Díí saad dashijaaʼígíí éí náhástʼéigo Oodlání ídlı̨́įgi chʼíiníʼą́: “Níłchʼi diyinii bineestʼąʼ éí ayóóʼóʼóʼní, ił hózhǫ́, hashtʼehodítʼé, nízaadgóó haʼahóní, ajoobaʼ, yáʼátʼéehii, aʼahódlí, aʼohgo éʼétʼé, ádaa áháyą́.” God biníłchʼi diyinii bitsʼą́ą́dę́ę́ʼ éʼétʼéiigi yaa chʼíhoníʼą́ągi éí nihíká adoolwoł.

Paul éí kótʼéego hadziih: Tsʼísee kʼehgo baa ooldahii éí “[naʼageh bee tsiʼnaʼadá,] baaʼihgo nitsáhákees, baa yádahasinii baa ooldah, beʼelyaii bichʼįʼ nahadlá, naʼadloʼgo álílee bee nahaghá, akʼeʼdiniih, ahiníʼdiiltłáád, adáhonooníinii, áháchįʼ, ałkʼijįʼ naʼanish, ałchʼą́ą́h naʼaʼnaʼ, ałtsʼáʼáldah, oochʼı̨́ı̨́d, [diné naatseed,] tó tsiʼnaʼiiłáii yidlą́, tʼáá naʼníleʼdii adlą́, áádóó tʼáá ákónáádaatʼéii.” (Gal. 5:​19-21) Colossians 3:5 bikʼehgo Paul éí “tsʼísee kʼehgo baa ooldahii” łaʼ yaa chʼíhwiizʼą́. Yáʼátʼéehgo éʼétʼé náhástʼéigo yaa halneʼ: “Kótʼéhígíí éí bee hazʼáanii doo bídéétʼiʼ da.” Áko Paul yáʼádaatʼéehii éʼétʼéiigi doo tʼáá átʼéé ńtʼééʼ yikááʼ áyiilaa da.

Galatians 5:​22, 23 áádóó Paul Éfasas dineʼé yidííniidígíí neilkaahgo éí tʼáá bééhózíní ííłʼı̨́. Paul ání: “Yáʼádaatʼéehii áádóó tʼáá ákogi ádaatʼéii índa tʼáá aaníí ádaatʼéii tʼáá ałtso éí [adinídíín] bineestʼąʼ ádaatʼé.” (Eph. 5:​8, 9, ftn.) Áko “yáʼádaatʼéehii,” tʼáá ákogi ádaatʼéii, índa tʼáá aaníí ádaatʼéii éí “adinídíín bineestʼąʼ” bitahdóó átʼé, ndi éí “níłchʼi diyinii bineestʼąʼ” ałdóʼ bił ahídéétʼiʼ.

Paul éí Timothy ííłní: “Tʼáá ákogi ánítʼéego, diyin kʼehgo hinínáago, Diyin God yinídlą́ągo baʼíínílí, ayóóʼíʼííníʼníigo, yéego haʼíínílníigo índa diné aʼohgo íʼdólzinii nílı̨́įgo” yéigo bee ánítʼı̨́. (1 Tim. 6:11) Oodląʼ, ayóóʼóʼóʼní, dóó aʼohgo íʼdólzin tʼéiyá “níłchʼi diyinii bineestʼąʼ” ádaatʼé. Ákondi Timothy éí tʼáá ákogi éʼétʼéiigi, diyin kʼehgo hináagi, dóó haʼahóní ałdóʼ bíká naalnish doo. Diyin biníłchʼi diyinii háká análwoʼgo díí Oodlání éʼétʼéiigi binjilnish doo.—Compare Colossians 3:12; 2 Peter 1:​5-7.

Galatians 5:​22, 23 Oodlání éí bee ádajítʼée dooleełgi doo tʼáá ałtso dabikáaʼ da. “Níłchʼi diyinii bineestʼąʼ” náhástʼéígíí bikʼehgo hiniiʼnáa dooleełgo éí God biníłchʼi diyinii nihíká análwoʼ doo. Oodlání hóyáanii jidooleełgo bee ájítʼéii ląʼí bíhwiidooʼáałii, áko “iiná ániidíii” biih jidoogááł, háálá éí “Diyin God tʼáá bináłtʼéego ályaa, tsʼídá tʼáá ákogi átʼé índa tʼáá aaníí dílyinii átʼé.”—Eph. 4:24.