Paul ání: ‘Diyin God bá hinishnáa doo biniyé Jew dineʼé bibee hazʼáanii bee shá nihootʼą́ągo dasétsą́.’—Gal. 2:19.

Rome nahósʼaʼgi Galéíshiyagi congregation góneʼ Oodlání łaʼ doo tʼáá aaníígóó ndaʼnitinii bitah heeskai. Yisdáʼdoodáałgo éí Mosaic Law bikʼehgóó dajikáah doo, íiyisígíí éí ąąh náhinilgish bee hazʼą́ągi bikʼeh éʼétʼée doo, daaníigo yee ndaʼnitin. Ndi, Paul bił bééhózingo ąąh náhinilgish éí Oodlání kʼad doo bá átʼée da. Paul éí díí doo tʼáá aaníígóó bee naʼnitinii átʼé, níigo naneeztą́ą́ʼ. Áko éí Jesus Christ nááʼádiisʼniiʼgi brothers yéigo dayoodlą́ągo yá ánáyiidlaa.—Gal. 2:4; 5:2.

Paul éí ‘Jew dineʼé bibee hazʼáanii bee shá nihootʼą́ągo dasétsą́,’ níigi éí Mosaic Law bee Diyin bił kʼéʼahidishʼní, doo níigo áníi da. Ndi Jesus nááʼádiisʼniiʼgi joosdląądgo bee Diyin bił kʼéʼahidishʼní. Áko éí bee ‘Diyin God bá hinishná,’ jiní. Mosaic Law éí kʼad bitsʼą́ąjįʼ hwéédoochid.

“Jew dineʼé bibee hazʼáanii bee” éí haitʼéego Paul łah átʼéego bił hooʼaʼgo áyiilaa? Paul ání: “Jew dineʼé bibee hazʼáanii bikʼeh hólʼínígíí binahjįʼ doo łaʼda tʼáá ákogi ájítʼéego há haʼdoodzih da, nidi Jesus Christ joodlą́ągo baijólíhígíí tʼéiyá.” (Gal. 2:16) Ákondi Jew dineʼé bibee hazʼáanii éí ílı̨́įgo choozʼįįd. Paul éí Galéíshiya dineʼé ííłní: “Ádił nidaʼiilzíihii ádaa ákodadínóodzįįł biniyé doochíiłii aa deetʼánígíí yizhchı̨́įjįʼ há ályaa.” (Gal. 3:19) Áko nidaʼiisíihii éí díí bee hazʼáanii doo tsʼídá tʼáá ákogi átʼéego yedaʼdoolíił dago ííshjánígo áyiilaa. Éí tsʼídá tʼáá ákogi átʼéii nááhidoonihii ályaago tʼéiyá bohónéedzą́. Díí bee hazʼáanii Christ “doochíiłii” yaa honílóóz. Jesus Christ yoodlą́ągo bikʼehgóó joogáałgo Diyin éí tʼáá ákogi ájítʼéego há hadoodzih. (Gal. 3:24) Paul éí tʼáá ákogi ájítʼéego há haʼoodzííʼ, háálá Jew dineʼé bibee hazʼáanii bee Jesus joosdląąd. Éí bąą ‘Jew dineʼé bibee hazʼáanii bee shá nihootʼą́ągo dasétsą́ągo Diyin God bá hinishná,’ jiní. Díí bee hazʼáanii éí kʼad doo hótąʼ da, ndi Diyin bá jííná.

Paul éí Rome dineʼé tʼáá kótʼéego yichʼįʼ haadzííʼ. Éí ání: “Tʼáá ákótʼéego shikʼisóó, Christ bitsʼíís bił dasinoonáago bee hazʼáanii Mózes baa deetʼáanii bitsʼąą dasinooná, . . . kʼad bee hazʼáanii bitsʼą́ąjįʼ nihéédahideeshchidgo binaalteʼ daniidlı̨́ı̨́ nítʼééʼ yę́ę bichʼįʼ daneeʼná.” (Rom. 7:4, 6) Díí áádóó Galatians 2:19 tʼáá áłah Paul éí Jew dineʼé bibee hazʼáanii biyaadóó niʼiisíihii tʼáá aaníigo dadootsaał doo níigo ááhyiłníi daaígi bee bikʼidaʼdiitą́ągo nihá áyiilaa. Ndi éí nihéédadeeshchidgo átʼé ní. Éí bí índa Oodlání tʼáá bígi ádaatʼéii Jew dineʼé bibee hazʼáanii kʼad doo dabótąʼ da. Christ nááʼádiisniiʼgi dayoodlą́ągo éí bee béédadoochid.