1. Ałkʼidą́ą́ʼ Oodlání yę́ę haʼátʼíí bee bichʼįʼ nidahwiisʼnááʼ?

YILʼAADII Peter éí 62 dóó 64 bitaʼ yihahgo “Pántas, Galéíshiya, Kapadóshiya, Éízha, índa Bithíniyagóoda tabidiʼnooskaadgo áadi déʼéyóní danilı̨́įgo kéédahatʼíinii” naaltsoos yichʼįʼ áyiilaa. (1 Peter 1:1) Díí nihibrothers dóó nihisisters éí bibee ádaʼoolʼįįłii ałʼąą ádaatʼé. Éí “kǫʼ nahalingo naʼíhonitaah” bee bichʼįʼ nidahwiiʼná, áko saad bee haʼahóníinii dóó kótʼéego bididooniiłii yídin danilı̨́. Áádóó tʼóó náhádzidgo hazʼą́ągo nahalzhiishgi bídeiníłką́. Peter ání: “Kʼadę́ę nihodoogáałjįʼ ahalzhíísh.” Jerúsalem ádooldįįłgo bichʼįʼ hoolzhish. Áko tʼáá átʼé Oodlání daʼníłtsʼą́ąʼjįʼgo tabidiʼnooskaadígíí hachʼįʼ nidahwiiʼnáagi haʼátʼíí bee hadaʼjólníi doo?​—1 Peter 4:4, 7, 12.

2, 3. Peter éí haʼátʼíí biniyé bibrothers dóó bisisters ahił danohłı̨́ yidííniid? (Áłtsé naashchʼąąʼígíí níníłʼı̨́.)

² Azhą́ tʼáá íídą́ą́ʼ nihibrothers dóó nihisisters ałhéédaholzin, índa tʼáadoo leʼé ałhił ádeełʼı̨́į ndi, Peter áháłníigo  “ayóóʼádaʼahíínóhʼní,” “nihaʼałkʼee nídaakahígíí . . . nihił danilı̨́,” dóó “ahíłká anídaahjah.” (1 Peter 4:8-10) Ákódajítʼéego haʼátʼíí yee háká adoolwoł?

³ Éí áhánígo ałhił dajídlı̨́įgo áhodoolííł. Nishąʼ, béénílniihísh łaʼda bighanjįʼ nihaa díínááł nidííniid yę́ę baa hózhǫ́ǫgo bił ahíinikai? Áádóó ní ałdóʼ nighangi łaʼ shaa díínááł bidííníniid yę́ędą́ą́ʼ áhánígo ałhééhosohsįįd. Nihibrothers dóó nihisisters éí kótʼéego nihaa díínááł dabidiiʼníigo éí bił ałhéédahoniizįįh. Peter bíyoołkááł yę́ędą́ą́ʼ Oodlání danilínę́ę bichʼįʼ dahodiisnáaʼgo áhánígo ałhił dajídlı̨́ı̨́ ńtʼééʼ. Áko díí “nihoogháahjįʼ yoołkáałgo” tʼáá ákódaniitʼée doo.​—2 Timothy 3:1.

4. Haʼátʼíí baa nídadíitʼįįł?

⁴ Haitʼéego éí ałchʼįʼ nihił dahadleeʼ doo? Haʼátʼíí biniinaa ił hadleeʼ bichʼįʼ siitiʼ doo, ndi haitʼéego tʼáadoo kóniitʼéhí doo? Łaʼda nihaa díínááł nihidííniidgo haitʼéego baa ahééh niidzin doo?

5. Áłah néiidleehgi nihaa nídaakahígíí haitʼéego nihił danilı̨́į doo?

⁵ Áłah néiidleehgi: Jiihóvah dóó bidineʼé áłah náʼádleehgi nihaa nánídááh danihiłní. Áłah néiidleehgi nihaa nídaakahígíí éí bichʼįʼ kʼé daniidzin doo, íiyisígíí éí índída nihił yah ííyáhígíí. (Romans 15:7) Éí bí ałdóʼ Jiihóvah wóshdę́ę́ʼ bidííniid, áko bił kʼé didiiʼniił, éí ánoolingi dóó yee hadítʼéegi doo bee níilʼı̨́į da doo. (James 2:1-4) Tʼáá sáhí nihaa níyáago, shił dah níkeehísh bididííniił? Áłah náʼádleehgi baa nináʼáldahígíí hazhóʼó bee bił hwiinilneʼgo, doodaiiʼ Diyin Bizaad biiʼdę́ę́ʼ wóltaʼgi bee bíká anánílwoʼgo yaa ahééh dínóozįįłgoda átʼé. Kódeiitʼı̨́įgo éí “nihaʼałkʼee nídaakahígíí nihił danilı̨́į” doo.​—Romans 12:13.

6. Háí éí íiyisíí bichʼįʼ nihił dahadleeʼ doo?

⁶ Chʼiyáán łaʼ doodı̨́įłgi: Diyin Bizaad biiʼ baa dahaneʼgo éí íídą́ą́ʼ diné haʼałkʼee nídaakahgo chʼiyáán bá ánídajiiłʼįįh ńtʼééʼ. Éí shı̨́ı̨́ ałkʼis ídlı̨́ dóó kʼé hwiindzingo ádaatʼı̨́ı̨́ ńtʼééʼ. (Genesis 18:1-8; Judges 13:15; Luke 24:28-30) Áko háí íiyisíí bichʼįʼ nihił hadleeʼ doo? Éí nihibrothers dóó nihisisters Kingdom Hallgi bił yah anéiijahígíí. Díí tʼóó tséʼádin baaʼihgo nihił hoogáał dooleeł, áko nihibrothers dóó nihisisters yéigo badaʼííníidlı̨́įgo bił ałkʼis daniidlı̨́į doo. 2011 yę́ędą́ą́ʼ, Hastóí Alą́ąjįʼ Daʼéeʼéshígíí éí United States Bétheldi deílníshígíí Watchtower bíhooʼaah biniyé ahínéekahgi éí 6:15 p.m.dóó bee hááhalzhishgo yá ándayiidlaa. Haʼátʼíí biniyé? Jó éí Béthelgi nidaalnishígíí ałchʼįʼ bił dahadleeʼ doo biniyé. Łahgóó branch bił nahasʼą́ą́góó ałdóʼ ákódaʼiilaa. Kótʼéego ályaago Béthelgi nidaalnishígíí nizhónígo ałhéédahoolzįįh.

7, 8. Diyin Bizaad yee nidaʼnitinii nihaa nídaakahígíí haitʼéego bichʼįʼ nihił dahadleeʼ doo?

⁷ Nihibrother łaʼ éí náánáłahdę́ę́ʼ áłah náʼádleehdę́ę́ʼ, circuit overseers doodaiiʼ Bétheldę́ę́ʼ łaʼ Diyin Bizaad bee naʼnitin biniyé nihaa nídaakah. Nihił dahadleeʼgo nihighandida bił dah diidı̨́ı̨́ł.​—3 John 5, 7, 8 yíníłtaʼ.

⁸ Nihisister United Statesdóó naagháago kóní: “Tʼáá níléídę́ę́ʼ shichʼooní  bił, Diyin Bizaad yee nidaʼnitinii bichʼooní yił nihaʼałkʼee nídaakahgo bił nídaʼiidı̨́įhgo hoolzhiizh.” Baa nitsíjíkeesgo éí díí tʼáá áłahájįʼ kótʼéego áníjiilʼįįhgo hweʼoodląʼ bidziil ánáyoodlííł dóó tʼáá bił ayóó baa hoł honeení ńtʼééʼ. Kójíní: “Tʼáadoo biniyéhígóó íítʼįįd doo ndi niidzin da.”

9, 10. (a) Háí éí tʼáá nízáágóoda nihaʼałkʼee ndábiilkáah doo? (b) Haghan ádahoołtsʼísí ndi bee áká aníjílwoʼgoósh tʼáá bohónéedzą́ągo átʼé? Łaʼ baa chʼíhoníʼaah.

⁹ Nihighan náhwiiłʼaahgo: Diyin Bizaad biiʼ dahaneʼgo éí chʼaadeíkáahii haghangi bá nídahojiiłʼaah ńtʼééʼ. (Job 31:32; Philemon 22) Dííshjı̨́įdi nihí ałdóʼ tʼáá ákódeiitʼı̨́į doo. Circuit overseer danilíinii éí Kingdom Hallgi nihaa nádáahgo, dóó diyin kʼehgo daʼóltaʼgóó daʼółtaʼii, índa kin binaʼanishgi yindaalnishii ndábiilkáah dooígi bídin hóyéeʼ łeh. Áádóó łaʼda kééhatʼı̨́įgi ayóó áhootʼįįhgo bitsʼą́ą́dóó bighan ádin yileehgo éí bighan bá ánályaajįʼ nihaʼałkʼee nábiilkáahgo bá hosiilʼą́ą doogoósh bííníigahgo átʼé? Éí bighan ayóó áníłtso, éí áká azhdoolwoł doo tʼóó niidzin da doo. Éí shı̨́ı̨́ tʼáá íídą́ą́ʼ ląʼídi áká eelwodgo átʼé. Azhą́ nighan áhoołtsʼísí ndi, łaʼdaásh bá hwiidííłʼaałgo ná bíighah?

¹⁰ Nihibrother łaʼ South Koreadi bighan áníigo éí diyin kʼehgo óltaʼgi daʼółtaʼii łaʼ baʼałkʼee ndábiilkááh ńtʼééʼ. Kójíníigo akʼeʼjishchı̨́: “Áłtsé éí tʼą́ą́ʼ nishłı̨́, háálá tʼáá ániidígo asiigeh dóó nihighan áłtsʼísí yeeʼ. Ndi díí daʼííłtaʼii nihaʼałkʼee ndábiilkáahgo ayóó átʼéego baa hózhǫ́. Ániid ahízyehii niidlı̨́įgo éí tʼáá ájíłah Jiihóvah bá naʼaʼaʼgi ayóó baa hózhóonii átʼée lágo baa ákoniidzı̨́ı̨́ʼ.”

11. Ániid nihaa daheeznánígíí haitʼéego bíká adiilwoł?

¹¹ Brothers dóó sisters ániid nihaa daheeznánígíí: Łahdę́ę́ʼ áłah náʼádleehígíí łaʼda nihaa doonééł. Éí áłah náʼádleehgi yinaalnishii bídin hóyéeʼii nihíká adoojah yiniyé niná. Doodaiiʼ nidahwiilneʼgi pioneer nilı̨́įgo áká adoolwoł biniyé nihichʼįʼ biʼdeelʼaʼ. Díí éí ániid nááhástʼą́, áłah náʼádleeh, saad doodaiiʼ bee ádaʼoolʼįįłii łah átʼéejįʼ binááhodíʼnóoldı̨́ı̨́ł. Nighandi nihaa dookah bididííniiłgoósh bił daʼdííyı̨́ı̨́ł doodaiiʼ bił chʼaadííkah? Áko éí akʼis łaʼ náádahodoodleeł dóó nihídadínóoldı̨́ı̨́ł.

12. Nihibrother baa haneʼígíí haitʼéego binahjįʼ éí doo tʼóó ahayóígóó biniyé hashtʼeʼízhdidoolníił da?

¹² Hoł hadleeʼgo éí doo tʼóó ahayóígóó biniyé hashtʼeʼízhdídóolníił da. (Luke 10:41, 42 yíníłtaʼ.) Nihibrother łaʼ bichʼooní yił tʼóó missionary dzizlı̨́ʼígo bééjílniihgo ájíní: “Tʼah ániid neiitʼaash, tʼáadoo nihił bééhóziní da, índa nihił hodiikʼąąd. Łaʼ ajı̨́ yaa adeezʼą́ągo shichʼooní doo bił hatsʼíídgóó sidá, doo kójítʼée da doo nisingo chʼééh háká anáshwoʼ. Ńtʼééʼ 7:30 p.m. oolkiłgo dáádílkał  łaʼ názhneestsʼin. Éí Diyin Bizaad yíhoołʼaahii łaʼ átʼı̨́ı̨́ lá, chʼil łitsxooí táaʼgo nihá yiníjaaʼ. Missionaries ániid niʼázhígíí baa hoł hózhǫ́ǫgo biniyé jiníyá. Wóshdę́ę́ʼ bidiiʼniid áádóó tó łaʼ baa niiką́. Áádóó dééh dóó gohwééh hashtłʼishí łaʼ íilyaa. Swahilijí saad tʼah doo bíhwiilʼaah da, áko bí ałdóʼ bilagáanakʼehjí yátiʼ doo bił bééhózin da.” Nihibrother áníigo éí díí binahjįʼ nihibrothers tʼáá ákwii kéédahatʼínígíí bił ałkʼis dasiidlı̨́ı̨́ʼ dóó nihił hózhǫ́ǫgo ánihiilaa.

13. Nił hadleeʼgi haitʼéego níká eelwod?

¹³ Nił hadleeʼ dooígi łahdaaísh tʼą́ą́ʼ sínílı̨́ı̨́ʼ? Ákwii nidzaa ládą́ą́ʼ éí ił hózhǫ́ áádóó hoolʼáágóó akʼis dooleeł ńtʼéeʼii nił chʼíʼníyá. Hoł hadleeʼgo haʼałkʼee nídaʼaldahgo éí doo hoł hodikʼą́ą da łeh. Áko haʼátʼíí biniyé hoł hadleeʼ dooígi tʼą́ą́ʼ jílı̨́į doo? Biniinaanii shı̨́ı̨́ díkwíígóó dahólǫ́.

14. Ił hadleeʼ bá hosiilʼą́ągo dóó bóhoneeʼą́ągi doo nihá bohónéedzą́ą́góó, haa diiʼnííł?

¹⁴ Bá hwiidooʼaałgi dóó bóhoneeʼą́ągi: Jiihóvah bidineʼé binaanish tʼóó adahayóí. Łaʼ éí bá hwiideeshʼaałgi doo bíighah da doodaiiʼ doo bóhoneeʼą́ą da danízin. Ákótʼéego nitsíníkeesgo nił hadleeʼ dooígi bá hosíníłʼą́ągo íínísin. Háálá Diyin Bizaad áníigo nihaa nídaakahígíí bichʼįʼ nihił dahadleeʼ. (Hebrews 13:2) Nihił hadleeʼgo éí yáʼátʼéehii átʼé. Ndi nihił hadleeʼ doogo éí doo daʼílíinii baa naʼadáhígíí tʼą́ą́ʼ ájósin doo.

15. Haʼátʼíí biniinaa łaʼ éí doo ayóó shił hadleeʼ da danízin?

¹⁵ Ádaa nitsíníkeesgi: Shaʼałkʼee nídaʼaldahgo shił hadleeʼ doo nínízinísh łeh, ndi doo bííníshghah daásh nínízin łeh? Yánínízingoda biniinaa shaʼałkʼee neheeskaígíí shitsʼą́ą́ʼ ádadahodidoołaał nínízin. Doodaiiʼ nibéeso shı̨́ı̨́ doo ląʼí da, áko łahdę́ę́ʼ éí bibéeso daaląʼígo baʼałkʼee nídaakahígíí tʼáá shiláhígo bił dahadleeʼ nínízin. Béénílniih, haghan éí doo ayóó ánóolingo siʼą́ą da doo. Ndi, tʼóó hashtʼehodítʼéego ná áhwiinítʼı̨́įgo naa dahaaskaiígíí bił dahózhǫ́ǫ doo.

16, 17. Łaʼda naʼałkʼee dookahgo haʼátʼíí biniinaa tʼáadoo bikʼee ádił nitsééníltłiʼ doo?

¹⁶ Łaʼda naʼałkʼee dookahgi bikʼee nitsééníltłiʼ łeh, doo tʼáá ni tʼéiyá ákónítʼée da. Britaindę́ę́ʼ nihibrother elder nilı̨́įgo ání: “Łaʼda haʼałkʼee dookahgo biniyé hashtʼezhdiʼnéehgo hoł yéeʼ łeh. Ndi Jiihóvah tʼáá ałtsojįʼ bá naʼaʼaʼgi éí hoł yéeʼ yę́ęgi biláahdi yáʼátʼéehgo baa hózhǫ́. Shaa nídaʼaldahgo éí gohwééh dóó tʼóó ahił nahaneʼgo bíneeshdlı̨́.” Diné haa níyáhígíí bízhneedlı̨́į doo. (Philippians 2:4) Diné ádaa dahalneʼgo bóhoneedlı̨́į łeh, áko bił ahínéekahgo baa dahaneʼ nídadiitsʼı̨́įh doo. Elder náánáłaʼ ání: “Shibrothers dóó shisisters shighangi bił ahínéishkahgo éí hazhóʼó béédahoyoosįįh dóó haitʼéego éí tʼóó áłtsé Jiihóvah yił ahéédahoosįįdgi shił bééhoozįįh.” Naʼałkʼee nídaakahígíí bínindlı̨́įgo bił dahózhǫ́ǫ doo.

¹⁷ Nihisister pioneer nilı̨́įgo éí diyin kʼehgo daʼóltaʼgóó daʼółtaʼii baʼałkʼee nídabiilkáahgo ání: “Áłtsé éí díí baa shíniʼ ńtʼééʼ, shighangi doo ayóó shee hólóní da, tʼáá íídą́ą́ʼ chodaozʼįįdii tʼéiyá shighan góneʼ naaznil. Éí óltaʼgi naʼnitinii bichʼooní tʼáadoo kótʼéego nitséskeesígo áshiilaa. Éí áníigo bichʼooní  yił circuit binaʼanishgi honaanishgo éí bidaʼoodląʼ dabidziilii baʼałkʼee nahwiilkaahgo naadeełii doo ayóó bee dahólǫ́ǫ da. Ndi tʼáá nihígi átʼéego Jiihóvah bá naʼaʼaʼgi beʼiinaʼ tʼóó bikiinígo ádayósin. Díí tʼah áłchíní daniidlı̨́įgo shimá kónihiłníi łeh neʼ: ‘Hazaʼaleeh biiʼ oolʼéelgo bił dajiyą́ą́jí agháago yáʼátʼééh.’” (Proverbs 15:17) Tʼáadoo éí baa nihíniʼí doo, háálá nihaʼałkʼee doogáłígíí ayóóʼóʼóʼní bee bił ííshjání ádiilnííł.

18, 19. Łaʼda nihá nádáahgo bichʼįʼ nihił hadleeʼ doogo haitʼéego éí tʼáadoo doo yáʼátʼééhgóó baa nitsíikeesí doo?

¹⁸ Náánáłaʼda baa nitsíníkeesgi: Kingdom Hallgi bił yah anéijahígíísh łaʼ doo bił ahídínéeshnáa da? Tʼáá kótʼéego baa nitsíníkeesgo éí doo ná hashtʼedooníił da. Łaʼda doo bił ahídiniilnánígíí éí nighangi naa doogáałgo doo íinínízin da łeh. Doodaiiʼ łaʼda níniʼ yiyiiłʼaʼ ńtʼéeʼgo biniinaa doo baa yoonééh átʼée da.

¹⁹ Diyin Bizaad áníigo niʼanaʼí bichʼįʼ nił hadleeʼgo hazhóʼó bił kʼé ahidiʼníi doo. (Proverbs 25:21, 22 yíníłtaʼ.) Łaʼda shaʼałkʼee díínááł bidiiʼníigo éí doo yáʼátʼééhgóó aa nitsíníkees yę́ęgi hashtʼéédooʼníiłgo hazhóʼó kʼé náhodoodleełgo átʼé. Éí yáʼádaatʼéehii yee átʼée lágo baa ákodíníizįįł, tʼáá éí yee Jiihóvah yee ádíchʼįʼ kóbiilaa. (John 6:44) Ayóóʼóʼóʼniʼ bee łaʼda tʼáadoo nayolíhí shaa díínáał bidiiʼniidgo, díidída bee nizhónígo ałkʼis doołeeł. Haitʼéego ayóóʼóʼóʼniʼ naniiłnáago łaʼda naʼałkʼee  doogááł? Éí Philippians 2:3 ánínígi bikʼeh ániitʼée doo: “Aʼohgo nitsáhákees bee náánáłaʼ nihiláahdi ádaatʼéego baa nitsídaahkees.” Nihibrothers dóó nihisisters éí nihiláahdi yee ádaatʼéiigi baa nitsíikees doo. Bibeʼoodląʼ, hadaʼólníigi, doodaiiʼ yee átʼéiigida bitsʼą́ą́dóó baa íhwiidiilʼáałgo átʼé. Kótʼéego baa nitsíikeesgo éí ayóóʼíʼííníʼníigo ánihidoolííł áádóó doo nantłʼagóó nihaʼałkʼee nádáahgo bichʼįʼ nihił hadleeʼ doo.

20. Łaʼda nihaa díínááł nihidííniidgo éí bee lą́ asiidlı̨́įʼgo, haʼátʼíí biniyé dóó haitʼéego éí bee nihá ahódlíi doo?

²⁰ David psalm áyiilaago ání: Jiihóvah, “háishąʼ niníbaal biiʼ hodílzinii yiiʼ hólǫ́ǫ doo?” (Psalm 15:1) Áádóó bikʼijįʼ David éí Jiihóvah baʼałkʼee dahólónígíí yee ádaatʼéii dooleełii chʼíiníʼą́. Łaʼ éí há ahódlíi doo. “Azhą́ bikʼee tiʼhojooníih nidi, bee nihojiiʼaahígíí baa nijighá.” (Psalm 15:4) Łaʼda nihaa díínááł nihidííniidgo áádóó bee lą́ ásiidlı̨́įʼgo doo shá bíighah da, doo diiʼníi da doo, ndi anáhóótʼiʼ haleehgo éí tʼáá áko. Nihaa díínááł nihidííniid yę́ęda tʼáá íídą́ą́ʼ yiniyé hashtʼediidzaagoda átʼé. Áko doo shá bíighah da diiʼniidgo yinaashnish yę́ę tʼáá ádzaaí silı̨́įʼ doo. (Matthew 5:37) Łaʼ éí shaa díínááł bidiʼniihgo áádóó doo shá bíighah da daaníi łeh, éí shił yáʼátʼéhígíí shaa díínááł shidííniidgo tʼéiyá bichʼįʼ deeshááł, nízin łeh. Díísh éí ayóóʼájóʼníigo hoł ílı̨́į doo? Háíshı̨́ı̨́ shaa díínááł nihidííniidígíí baa ahééh niidzin doo. (Luke 10:7) Nihaa díínááł nihiʼdooʼniidgo ńtʼééʼ doo nihá bíighah silı̨́ı̨́ʼgóogo, yáʼátʼéeh doo éí tʼáá tsı̨́łígo nihiʼníłniiʼígíí bił náhodíilnih.

21. Bił kééhojitʼíinii łaʼ nihaa díínááł níigo haitʼéego bibee ádaʼoolʼįįłii hoł nilı̨́į doo?

²¹ Áádóó ałdóʼ diné bił kééhojitʼíinii bibee ádaʼoolʼįįłii hoł nilı̨́į doo. Łahgóó éí tʼáadoo naólníní łaʼda baa níyáago wóshdę́ę́ʼ deiłniih. Ndi łaʼ éí áłtsé tʼáá bilą́ąjįʼ akǫ́ǫ́ déyá níigo ádaa halnih. Náánáłahgóó éí baʼałkʼee yikahígíí yáʼátʼéehii chʼiyáán áłtsé yiyaa nídeiikááh, áádóó yił dabighanígíí éí akéédę́ę́ʼ daʼayı̨́ı̨́h. Ndi łaʼ éí tʼáá neheeskaígíí aheełtʼéego baa nitsáhákees łeh. Náánáłaʼ éí doodı̨́įłii nídayiikááh. Ndi łaʼ éí baa dah iildéhígíí tʼáá shí chʼiyáán ádeeshłííł níi łeh. Áádóó łahgóó éí shaa díínááł nábidiʼniihgo tʼóó hazhóʼó doo shá bíighah da níi łeh. Ndi łaʼ éí shaa díínááł bidiʼníigo doo shá bíighah da jididooniiłgi doo hoł ílı̨́ı̨́góó ájíní, hodóʼníi doo. Nihaa díínááł nihidííniidígíí bił honiilzhǫ́ǫgo ííníilzin doo.

22. Haʼátʼíí biniyé ayóóʼóʼóʼniʼ dóó ahił ídlı̨́ bee ahíłká anéijahgo ílíinii átʼé?

²² Peter ání: “Kʼadę́ę nihodoogáałjįʼ ahalzhíísh.” (1 Peter 4:7) Éí tsʼídá yéigo ayóó átʼéego nihichʼįʼ dahwiidiyooʼnááł. Tʼóó tséʼédin áhooníiłgo nihibrothers dóó nihisisters tsʼídá yéigo ayóóʼádeíníiʼní. Peter yee nihichʼįʼ haadziih yę́ę éí kʼad tsʼídá yéigo bikʼeh ádaniitʼée doo: “Nihaʼałkʼee nídaakahígíí tʼáadoo doo sohdadoołʼįįłí, nidi nihił danilı̨́. . . . Ahíłká anídaahjah.” (1 Peter 4:8-10) Nihaa nídaʼaldahgo nihił dahadleeʼgo baa hózhǫ́, éí kʼad áádóó ahoyéelʼáágóó bídin hwiindzinii átʼé.