1. Yiską́ą́ bidiʼyoolyéełgo, haʼátʼíí ílínígíí Jesus yaa yáłtiʼ?

YISKĄ́ bidiʼyoolyéełgo, Jesus éí 30dóó baʼaan ánéelą́ąʼdi ayóóʼóʼóʼní bídahoołʼaahii éí yee yichʼįʼ haadzííʼ. Éí kwííłní, “Ayóóʼádaʼahíínóhʼní.” (John 15:​12, 17) Bee ayóóʼádaʼahíínóhʼní yee dabooʼínígíí éí Jesus bikééʼ nidaakaígíí yee ííshjání ádeiyósin. (John 13:​34, 35) Jesus ayóóʼóʼóʼní yaa yáłtiʼ éí doo tʼóó baa nitsáhákeesígíí átʼée da. Ayóó bidziilgo nitsáhákees éí náánáłaʼ baa aʼááh jinízin doo. Jesus ání: “Diné bikʼisóó ayóóʼádayóʼníinii yá nináʼádeetʼáanii yá daaztsą́ągo, kótʼéego ayóóʼóʼóʼní ayóó átʼéii náánáłaʼ diné doo hwee nááhódlǫ́ǫ da. Tʼáá haʼátʼíhída bee hoséłʼáanii baa naahkaigo, shikʼisóó danohłı̨́.”—John 15:​13, 14.

2. (a) Dííshjı̨́įdi God yá nidaalʼaʼí haʼátʼíísh bee béédahoʼdílzin? (b) Haʼátʼíísh naʼídíkidígíí baa nídadíitʼįįł?

² Dííshjı̨́įdi, Jiihóvah yá nidaalʼaʼí bee ayóóʼóʼóʼní łáʼí ídlı̨́ ííshjání ádayósingo bee béédahoʼdílzin. (1 John 3:​10, 11) Azhą́ ałʼąą dineʼé, dóó nihizaad ałʼąą ádaatʼé, háádę́ę́ʼ shı̨́ı̨́  nideiikai, doodaiiʼ haa shı̨́ı̨́ yitʼéego biyaa dahooʼaʼ ndi. Kéyah tʼáá náhwiistʼą́ą́ ńtʼééʼ, Jiihóvah yá nidaalʼaʼí ayóóʼádaʼahóʼní. Dííshjı̨́įdi, haʼátʼíí biniyé ayóóʼóʼóʼní daniidzin? Haitʼéego Jiihóvah dóó Jesus bee ayóóʼóʼóʼní bee nihidziil ádanihósin? Haitʼéego díí ayóóʼóʼóʼní ííshjání ííníilzin éí náánáłahjįʼ bee bíká adiilwoł?—1 Corinthians 8:1.

3. “Yéego achʼįʼ nahwiiʼnáa doo” haitʼéego diné bidaʼdiiłʼá?

³ Dííshjı̨́įdi “yéego achʼįʼ nahwiiʼnáa doo” biyiʼ kéédahwiitʼı̨́, dóó “yínííł tʼéí bił hólǫ́.” (2 Timothy 3:​1-5; Psalm 90:10) Ląʼí diné bichʼįʼ nidahwiiʼnáago éí biniinaa beʼiinaʼ ninádeidiyiiʼaah. 800,000 ánéelą́ą́ʼ dóó biláahgo diné nidaʼádíltseed. Nihibrothers łaʼ ákótʼéego yaa nitsídahidikees áko tʼáá bí nidaʼádíltseed.

4. Diyin Bizaad biiʼ baa haneʼígíí háidísh dadeestsaał daniizı̨́ı̨́ʼ ńtʼééʼ?

⁴ Diyin Bizaad biiʼdę́ę́ʼ łaʼ God bá nidaalʼaʼí bichʼįʼ nidahwiiʼnáago tʼóó dadeestsaał daaníí ńtʼééʼ. Job bił nahonigaah tiʼhooníihgo ání: “Hinishnánígíí jooshłxá, doo hoolʼáágóó hinishnáa da doo.” (Job 7:16; 14:13) Jónah baa nahóókaadgo kóní: “Éí bąą kʼad, Bóhólníihii [Jiihóvah] nílíinii, nánooshkąąh, sheʼiinaʼ náádiidlé, háálá dasétsą́ą́jígo yáʼátʼééh, hinishnáa dooígíí éí dooda.” (Jonah 4:3) Halneʼii Iiláíjah chohooʼı̨́ bee ádin silı̨́įʼgo ání: “Kʼadí, shiBóhólníihii [Jiihóvah] nílíinii, sheʼiinaʼ náádiidlé.” (1 Kings 19:4) Díí hastóí yáʼádaatʼéhígíí éí Jiihóvah ayóóʼáyóʼní índa dahiináa doo nízin. Díí hastóí yínííł daazlı̨́įʼgo biniinaa doo yichʼįʼ báháchįʼ da. Ndi dabidziilgo áyiilaa áko dahinishnáa doo daniizı̨́ı̨́ʼ. Bíká eelwodgo tʼáá bá nidaalʼaʼ ńtʼééʼ.

5. Haʼátʼíí biniinaa nihibrothers dóó nihisisters tʼáá íiyisíí niheʼayóóʼóʼóʼniʼ deinízin?

⁵ Dííshjı̨́įdi ląʼí nihibrothers dóó nihisisters bichʼįʼ nidahwiiʼná yikʼee ádaatʼé. Niheʼayóóʼóʼóʼniʼ deinízin. Łaʼ éí tʼóó bá nidahałtʼiʼ dóó atídabiʼdilʼı̨́. Náánáłaʼ éí diné ádee dahooldzídígíí dóó łaʼ tʼáá ádzaago baa dahalneʼígíí éí yichʼįʼ hadaʼólní. Łaʼ éí nizaagóó naʼanish yaa chʼééh dadeeskai. Náánáłaʼ éí naanish bide ádaatʼé. Łaʼ hooghan dahazʼą́ągo yéigo bichʼįʼ nidahwiiʼná. Náánáłaʼ éí dabichʼooní doo Jiihóvah yá nidaalʼaʼ da. Tʼáá áłahájįʼ bee baa dahwiinítʼı̨́. Díí ákótʼéhígíí biniinaa łaʼ bide ádaatʼįįhgo tʼáá ákódígo ádeeshłííł daniizįįh. Háísh bíká adoolwoł?

6. Haitʼéego Jiihóvah beʼayóóʼóʼóʼniʼ bee bá nidaalʼaʼí dabidziilgo áyósin?

⁶ Jiihóvah ánihiłní, shidineʼé ayóóʼádeíníshʼní kʼad dóó hoolʼáágóó ayóóʼánihííníshʼní nihiłní. Jiihóvah éí Ízrel dineʼé kóyidííniid yę́ę baa nitsíníkees: “Shił anílı̨́įgo áádóó ił nílı̨́įgo índa ayóóʼánííníshʼníigo,” dóó “Tʼáadoo nił yéʼí, háálá nił honishłǫ́.” (Isaiah 43:​4, 5) Béénílniih: tʼááłaʼí niitínígo éí Jiihóvah bił niidlı̨́. * (Footnote níníłʼı̨́.) Diyin Bizaad yee haadzííʼ: “Ayóó ábóodziilii nilı̨́; bí yisdáʼiiníił doo, tʼáá íiyisí naa bił hózhǫ́ǫgo naa bił nihoozhǫǫh doo.”—Zephaniah 3:​16, 17.

7. Haitʼéego Jiihóvah beʼayóóʼóʼóʼniʼ éí amá beʼawééʼ bił tʼoʼígíí nahalin? (Áłtsé naashchʼąąʼígíí níníłʼı̨́.)

 ⁷ Jiihóvah bidineʼé dabidziilgo íidoolííł yee yichʼįʼ haadzííʼ, azhą́ shı̨́ı̨́ bichʼįʼ nidahwiiʼnáa ndi. Éí kóní: “Daʼołtʼoʼ doo, booshkʼiizh yee nanihijaah doo áádóó bitsoskʼidgi dah nanihijaah doo. Tʼáá hamá hahwiʼiyoosniidígi átʼéego hanihiʼdiyeeshnih.” (Isaiah 66:​12, 13) Awééʼ baa nitsíníkees bimá naabiłteeh doodaiiʼ yił naanéego yee yaa áhályą́ łeh! Jiihóvah ayóóʼánóʼní dóó nił hashtʼehodítʼé naa yinízin. Béénílniih ni éí Jiihóvah ayóó bił nilı̨́įgo átʼé.—Jeremiah 31:3.

8, 9. Jesus beʼayóóʼóʼóʼniʼ haitʼéego bee danihidziil doo?

⁸ Náánáłaʼ Jiihóvah beʼayóóʼóʼóʼniʼ nihichʼįʼ ííshjání áyiilaa: “Diyin God éí nihokááʼ dineʼé tʼáá íiyisí ayóóʼájóʼníigo bąą haYeʼ tʼááłáʼí há yizhchínígíí baazhníłtı̨́, áko tʼáá háiida boodlą́ągo baa dzólíhígíí éí doo ádoodįįł da, nidi iiná doo ninítʼiʼii bee hólǫ́ǫ dooleeł.” (John 3:16) Jesus beʼiinaʼ nihá ninéidiníʼą́. Éí bee ayóóʼóʼóʼní nihichʼįʼ ííshjání áyiilaa. Ayóóʼánihóʼníinii nihił béédahózingo bee danihidziil ánihósin. Diyin Bizaad ání, ‘achʼįʼ nahwiiʼná’ doodaiiʼ ‘tsístłʼah haztʼiʼ’ éí doo “Christ ayóóʼánihóʼnínígíí yitsʼánihidoonił” da.—Romans 8:​35, 38, 39.

⁹ Łahda nihide ádahootʼįįhgo doo bichʼįʼ danihidziil da łeh. Jiihóvah bá neilʼaʼ yę́ę doo bídaniidlı̨́į da deidleeh. Christ ayóóʼánihóʼnínígíí hazhóʼó baa nitsíikeesgo bee hadaʼííníilníigo danihidziil doo. (2 Corinthians 5:​14, 15 yíníłtaʼ.) Jesus beʼayóóʼóʼóʼniʼ bee dahiniiʼná dóó Jiihóvah bá nideilʼaʼ doogo  daniidzin. Éí nihíká análwoʼgo doo neʼ kódadiiníił da. Azhą́ shı̨́ı̨́ nitsihodínídéél, atídanihiʼdilʼı̨́, nihaa ninádahakaʼí, doodaiiʼ yínííł nídeedleeh ndi Jiihóvah tʼáá bá nideilʼaʼ doo.

10, 11. Łaʼ baa ninádahakaʼgo bíká adoolwołígíí háísh éí díí bąąh silá? Łaʼ baa chʼíhoníʼaah.

¹⁰ Jiihóvah éí áłah nídeidleehígíí bidziilgo áyósin beʼayóóʼóʼóʼniʼ choyoołʼı̨́. Nihibrothers dóó nihisisters ayóóʼádeíníiʼníigo Jiihóvah ayóóʼádeíníiʼníinii ííshjání ádeíníilzin. Nihibrothers tʼáá ałtso nihá bíighahgo bíká anídeilwoʼ baa aʼááh daniidzin. Jiihóvah tʼahdii ayóóʼádabóʼní yéénálniihgo bee bíká anídeijah. (1 John 4:​19-21) Yilʼaadii Paul akʼeʼashchı̨́: “Éí bąą tʼáá ádaahtʼínígi átʼéego chánah ídaʼahołneʼ índa ahíłká anáhjahgo nihidziil ádaʼahołnééh.” (1 Thessalonians 5:11) Tʼáá áníiltso ákódeiitʼı̨́į doo, ákondi elders doo tʼéiyá da. Nihibrothers dóó nihisisters dabidziilgo ádeíníilzin éí Jiihóvah dóó Jesus bedaʼiilʼı̨́.—Romans 15:​1, 2 yíníłtaʼ.

¹¹ Bił yá anídeiijahígíí łaʼ yéigo yínííł danilı̨́ doodaiiʼ bide ádahootʼéhígíí éí azeeʼííłʼíní bíká adoolwoł. (Luke 5:31) Elders dóó náánáłaʼ bił yá haneiijahígíí éí doo azeeʼííłʼíní danilı̨́ı̨́góó bił béédahózin. Ákondi yínííł danilı̨́ yíká anídaajah dóó dabidziilgo ádayósin. Tʼáá ałtso bił yá anídeiijahígíí “bijéí doo hadaʼólníinii chánahgo ádaahłeʼ, doo dabidziilii bíká anídaahjah, diné tʼáá ałtso bichʼįʼ hadaʼíínółní.” (1 Thessalonians 5:14) Nihibrothers dóó nihisisters yaa nitsídaahkeesígíí hazhóʼó bikʼiʼdiyiitįįh. Bichʼįʼ hadaʼííníilní dóó saad yáʼátʼéhígíí bee bidziil  ádeíníilzingo baa ninádahakaʼgo yee hadaʼólníi doo. Niísh ákónítʼı̨́? Haitʼéego nibrothers bíká anánílwoʼ?

12. Haitʼéego nihisister łaʼ yił áłah nádleehígíí haʼjólníigo ádahoolaa? Łaʼ baa chʼíhoníʼaah.

¹² Europedi nihisister léiʼ ání: “Łahda atíʼdideeshnííł nisingo baa nitsískees łeh. Ákondi shíká adoolwołígíí hólǫ́. Bił áłah náshdleehígíí yisdádáshiilóós. Shibrothers dóó shisisters éí tʼáá áłahájįʼ haʼahónínígíí dóó ayóóʼóʼóʼní yee shichʼįʼ yádaałtiʼ. Azhą́ yínííł bee shichʼįʼ nahwiiʼnáa ndi tʼáá díkwíí bił áłah náshdleehígíí bił béédahózin, łaʼ éí tʼáá áłahjįʼ shikʼi dadéezʼı̨́ı̨́ʼ. Ahastiin dóó beʼasdzą́ą́ léiʼ łaʼ shizhéʼé dóó shimá nahalingo baa nitséskees. Tʼáá áłahjįʼ, jı̨́įgo dóó tłʼéeʼgo shikʼi dadéezʼı̨́ı̨́ʼ dóó nizhónígo shaa áhályą́.” Doo tʼáá aheełtʼéego áká adiilwoł da. Ndi tʼáá bíniilʼánígi nihibrothers dóó nihisisters bíká adiilwoł. * (Footnote níníłʼı̨́.)

13. Haitʼéego náánáłahjįʼ baa dajiiniibaʼ doo?

¹³ Hazhóʼó ajíistsʼą́ąʼ doo. (James 1:19) Hazhóʼó íísíníłtsʼą́ąʼgo éí ayóóʼóʼóʼní bee ííshjání ííníilzin. Naʼídíłkidgi bee aa siitiʼ éí bee nihibrother yaa nitsékeesígíí bee bikʼidiʼdíítı̨́įłgo yee nihíká adoolwoł. Baa aʼááh niidzinígíí éí bił bééhózin doo. Bíniʼdii yáłtiʼgo bichʼįʼ haʼíínílní. Hazhóʼó íísíníłtsʼą́ąʼ doo. Yaa halneʼígíí hazhóʼó bikʼidiʼdíítı̨́ı̨́ł áádóó naʼólíi doo. Bikéédóó éí ádínínígíí yíístsʼą́ąʼgo kʼad éí kodóó bee bíká adiilwołgo átʼé. Tʼáá íiyisí aa aʼááh nízingo, náánáłaʼ bidziilgo ádíílííł.

14. Haʼátʼíí biniinaa doo bikʼijįʼ yájíłtiʼ da?

¹⁴ Doo bikʼijįʼ yájíłtiʼ da. Yinííł danilínígíí tʼóó tséʼádin yinííł yileeh shaa nídaatʼı̨́ danízin doo. Bíká adiilwoł yę́ę nihá nantłʼa łeh. “Łaʼ diltłish aa aalgeedígíí nahalingo yáłtiʼ, nidi diné hóyáanii bizaad éí chánah ánáʼoodlííł.” (Proverbs 12:18) Saad bikʼeʼashchʼíʼígíí doo náánáłaʼ bee bichʼįʼ hadiidzih da, ndi łahda doo baa nitsíikeesgo bikʼeʼashchʼíiʼgo haiidzih. Nihibrother bidziilgo ádiilníłígíí ádaa yáłtiʼgo hazhóʼó bikʼidiʼdiitı̨́įłgo bichʼįʼ nátʼą́ą́ʼ háádíídzih.—Matthew 7:12.

15. Haʼátʼíísh bee naʼanishígíí ílíinii éí náánáłahjįʼ yee hadaʼólníi doo?

¹⁵ Diyin Bizaad bee adziilii choiníłʼı̨́. (Romans 15:​4, 5 yíníłtaʼ.) Diyin Bizaad bitsʼą́ą́dę́ę́ʼ éí “God binahjįʼ hadaʼííníilníinii índa bee chánah daniidlíinii,” áko náánáłahjįʼ bidziil dooleełgo Diyin Bizaad choilʼı̨́į doo. Watch Tower Publications Index dóó Research Guide for Jehovah’s Witnesses ałdóʼ dahólǫ́. Díí bee naʼanishígíí choiníłʼı̨́, Diyin Bizaad biiʼ saad dahnaazhjaaʼígíí dóó naaltsoos bee haʼahóní nihibrothers dóó nihisisters chodeiyoołʼı̨́.

16. Haʼátʼíísh nihíká adoolwołgo náánáłaʼ yinííł nilíinii bee bíká adiilwoł?

¹⁶ Ayóó naa áhwiinítʼı̨́į doo. Jiihóvah éí “aTaaʼ aa aʼááh nízinii índa diné tʼáá ałtsojįʼ hayiʼiyoołníihii” nilı̨́, áádóó bá nidaalʼaʼígíí “bee ajoobaʼ yee oosáanii.” (2 Corinthians 1:​3, 4 yíníłtaʼ; Luke 1:78; Romans 15:13) Háálá  Paul éí Jiihóvah yeʼełʼı̨́įgo, náánáłahjįʼ dabidziilgo yee áyósin. Kótʼéego yikʼeʼashchı̨́: “Nihaa niikai yę́ędą́ą́ʼ nihá ádahwiinítʼı̨́ʼígo nihitaa siikai, tʼáá amá baʼáłchíní yaa áhályánígi átʼéego nihitaa deiikai nítʼééʼ. Áko Diyin God bitsʼą́ą́dóó haneʼ yáʼátʼéehii bee nihił nidahosiilneʼ, nidi doo díí tʼéiyá da, nidi ayóóʼádanihííníiʼníigo bąą nihá nináʼádadiyeetʼą́, háálá áhánígo nihikʼéí dasoolı̨́ı̨́ʼ.” (1 Thessalonians 2:​7, 8) Jiihóvah ajoobaʼ nahalingo, nihibrother éí Jiihóvah yee bidziil dooleełígíí yíká sodilzin yę́ę bee bíká adiilwoł!

17. Nihibrothers haʼátʼíí bee béédeilniih, áádóó haitʼéego hadaʼólníigo bee bíká adiilwoł?

¹⁷ Béénílniih tʼáá áníiltso nidaʼiyiilzííh. Haʼíínílníi doogo béénílniih. Nibrothers yeeʼ doo niʼiisíih da nínízingo doo bikʼee ákónítʼée da doo. (Ecclesiastes 7:​21, 22) Béénílniih Jiihóvah doo tʼáá ákótʼéégóó ádiilníłígíí doo yił nanihólíi da. Ałchʼįʼ hadaʼíínółní. (Ephesians 4:​2, 32) Éí nihibrother bił hóyééʼ tsʼídá doo díníidzįįł da. Doo éí náánáłaʼ bił ałhąąh nideeʼnil da. Bidziil ádeíníilzingo yáʼátʼéehgo ádeiłʼínígíí baa yádeiltiʼ doo. Díí átʼéego, Jiihóvah bá nideilʼaʼgo baa bił dahózhǫ́ éí bee bíká adiilwoł.—Galatians 6:4.

18. Haʼátʼíí biniyé náánáłaʼ bee ayóóʼóʼóʼní bidziil dooleeł daniidzin?

¹⁸ Jiihóvah bá nidaalʼaʼígíí tʼááłaʼí jinítínígo aláahgo bił ílı̨́. Jesus ałdóʼ bił nilı̨́. (Galatians 2:20) Nihibrothers dóó nihisisters ayóóʼádeíníiʼní, áko baa dajiiniibaʼ doo. Nihí éí “bee kʼé náhoodleełii áádóó tʼáá áníiltso ahidiníłnáago danihidziil ánihidoolíiłii hádeiitʼı̨́į doo.” (Romans 14:19) Nahasdzáán Ániidíii biiʼ kéédahwiitʼı̨́įgo baa nitsídeiikees, doo éí nihaa ninádahakaʼ da doo! Naałniih ádin doo, dóó anaʼí ádin doo. Diné ádił niʼiidzííh doo bitsʼą́ą́dóó daninée da doo, atídabiʼdilʼı̨́ ádin doo, hooghan hazʼą́ągi achʼįʼ nahwiiʼná ádin doo, áádóó nihąąh nidahwiikaad ádin doo. Tʼááłáʼí damííl nááhai bikéédóó bílaʼashdlaʼii hadadíłtʼéego ánéidoodlííł. Akéeʼdi naʼíhonitaah baa hoolzhiizhgo tʼahdii daʼoodlánígíí éí Jiihóvah baʼáłchíní dazhdooleeł tʼáá nahasdzáán bikáaʼgi “God baʼáłchíní baa hózhǫ́ǫgo béédahideeshchidígi” baa didootʼááł. (Romans 8:21) Áko tʼáá áníiltso ayóóʼóʼóʼní ííshjání ííníilzin éí bee danihidziil doo, dóó ahidiníłnáago áká anéijah éí bee yisdádiidááł God nizhónígo nahasdzáán ániidíii ánáyiidlaa biih diikááh.