1. Nihokáaʼgi bił nidahaztʼiʼígíí baa nitsáhákeesii haitʼéego nihidínóołtłʼah?

DIYIN Bizaad bitsʼą́ą́dóó baa íhwiilʼą́ʼígíí bikʼeh dahwiiniilʼı̨́įgo haash yitʼéego tʼáá nihá nanitłʼah? Éí biniinaa aʼohgo ádíníilzingo bee yáʼátʼéehgo ádiilnííł. Ndi éí tʼáá nanitłʼah. “Nihoogháahjįʼ yoołkáałgo,” diné “ayóóʼádadóʼníi doo, béeso yíchą́deídéelniʼ doo, ádaa dahaʼniih doo, beʼáshodahódliʼ doo,” índa doo ádaa áháyą́ą doo. (2 Timothy 3:​1-3) Nihokáaʼgi bił nidahaztʼiʼígíí éí doo yáʼátʼééhgóó nitsáhákees nihił béédahozin, háálá Jiihóvah béédahoniilzin. Diné ádaa dahaʼniihígíí éí deinízinígíí yee nídaʼaldįįh éí biniinaa bił dahózhǫ́ nidahalin. (Psalm 37:1; 73:3) ‘Náánáłaʼ ádeinízinii áłtsé bá baa nitsíikeesgoósh nihá yáʼátʼééh? Aʼohgo ádííníszingoósh diné bił danilı̨́į doo?’ Díí naʼídíkidígíí łahdaásh ákótʼéego baa nitsíníkees łeh? (Luke 9:48) Diné nihinaagóó nitsídaakeesii átʼéego nitsíikeesgo éí  nihibrothers bee díníiltłʼa. Jiihóvah bá nideiilʼaʼígíí łaʼ doo bił béédahózin da. God yá nidaalʼaʼígíí éí aʼohgo ádaatʼé baa ádahwiilʼaahgo éí bedaʼiilʼı̨́į doo.

2. God yá nidaalʼaʼí yę́ę haʼátʼíísh bitsʼą́ą́dóó bídahwidiilʼááł?

² Ałkʼidą́ą́ʼ nidaalʼaʼí haʼátʼíísh bíká eelwodgo God bikʼis danilı̨́ı̨́ ńtʼééʼ? Haitʼéego God yił dahóshǫ́? Tʼáá ákótʼéego ádaʼiilaa éí haitʼéego bichʼįʼ dabidziil ńtʼééʼ? Diyin Bizaad biiʼ ádaatʼįįd yę́ę yaa halneʼ deiyíníiltaʼ dóó nabikʼítsíníłkeesgo nihí oodląʼ bidziil áyósin.

3, 4. (a) Haitʼéego Jiihóvah nanihinitin? (b) Niheʼoodląʼ bidziil dooleełgo haʼátʼíí biniyé doo ił ééhózin tʼéiyá daniidzin da?

³ Jiihóvah éí daniidzinígíí nihaidiyiiʼaah bee niheʼoodląʼ niłdzilgo áyósin. Diyin Bizaad, Oodlání binaaltsoos ádaalyaaígíí, nihiwebsite, JW Broadcasting, dóó áłah nídaʼadleehígíí biiʼdóó yáʼátʼéehgo naʼnitinii. Doo ił ééhózin tʼéiyá da ndi náánáłaʼ aláahdi átʼéii Jesus yee naʼneeztą́ą́ʼ. Éí ájíní: “Shiníłʼaʼii yee íinízinii binaashnishgo łaʼyishłéhígíí, éí shichʼiyąʼ átʼé.”—John 4:34.

⁴ God íinízinii Jesus yinaalnishgo éí hachʼiyąʼ nahalin. Chʼiyáán nihá yáʼátʼéehii yiidą́ągo bee nihitah yáʼáhootʼééh dóó bee nihidziil. Tʼáá ákótʼéego, God íinízinii bindeilnishgo nihitah yáʼáhootʼééh dóó niheʼoodląʼ bidziil áyósin. Áłah náʼádleeh dóó nahólneʼgo łahdaásh chʼééh díníyá nahonílin łeh ákondi nihitah yáʼáhootʼééh dóó baa nił hózhǫ́ǫgo hooghandi nináhídááh łeh?

5. Haitʼéego hódzą́ nihíká análwoʼ?

⁵ Jiihóvah ánihiłníinii bikʼeh dahwiiniilʼı̨́įgo bee honiidzą́ągo ííshjání ííníilzin doo. (Psalm 107:43) Diné dahóyáanii tʼáadoo leʼé yáʼádaatʼéhígíí baa dahiditʼaah. “Haʼátʼíhída bídin nílíinii tʼáá ałtso tʼáá nidaʼííʼoh. . . . Hódzą́ dayiiłtsoodii éí iiná tsin sikaadii yá nilı̨́; tʼáá bizááká dabótąʼii bił dahózhǫ́.” (Proverbs 3:​13-18) Jesus ání: “Díidí nihił béédahózin ládą́ą́ʼ, baa naahkaigo nihił dahózhǫ́ǫ doo.” (John 13:17) Jesus bídahoołʼaahii akʼeh dahółʼı̨́įgo bił dahózhǫ́. Jesus yikééʼ deiyíkáah doogo beʼiinaʼ ádayiilaa.

6. Haʼátʼíí biniyé bídahwiilʼą́ʼígíí bikʼeh ádaniitʼée doo?

⁶ Dííshjı̨́įdi, bídahwiilʼaahígíí éí bikʼeh dahwiiniilʼı̨́į doo. Chidí yinaalnishígíí baa nitsíníkees éí bee naʼanishii dóó bił ééhózinii bee hólǫ́. Díí choyoołʼı̨́įgo éí chidí yinaalnishii yiyiichįįh dooleeł. Ląʼí nááhai binaanish áyiilaa ndi yíhoołʼą́ʼígíí tʼáá choyoołʼı̨́į doo chidí binjilnishii jiichįįh doo. Tʼáá ákótʼéego, áłtsé tʼáá aaníinii bídahwiilʼą́ą́ʼ baa nihił dahózhǫ́ éí biniinaa Diyin Bizaad yíníiltaʼgo bikʼeh dahwiiniilʼı̨́. Tʼáá áłahjįʼ nihił dahózhǫ́ǫ doogo éí tʼáá ákwii jı̨́ Jiihóvah yee nanihinitinígíí bikʼeh dahwiiniilʼı̨́į doo.

7. Diyin Bizaad bitsʼą́ą́dóó bídahwiilʼą́ą́ʼígíí haitʼéego ádiilnííł?

⁷ Łahda aʼohgo ádadíníilzin nihá ndanitłʼah yileehgo baa nídadíitʼįįł. Ałkʼidą́ą́ʼ daʼoodlánígíí haitʼéego aʼohgo ádólzin yę́ę bídahwiidiilʼááł. Baa ííníiltaʼígíí doo tʼáá éí tʼéiyá ádiilníił da. Baa nitsídeiikees doo, áádóó bikʼeh ádaʼiilʼı̨́į doo.

8, 9. Paul aʼohgo ádólzinii éí Acts 14:​8-15 bitsʼą́ą́dóó haʼátʼíí bíhwiilʼą́ą́ʼ? (Áłtsé naashchʼąąʼígíí níníłʼı̨́.)

⁸ God éí diné tʼáá ałtso “yisdádookah índa tʼáá aaníinii bił béédahodoozįįł yóʼní.” (1 Timothy 2:4) Diné doo Jiihóvah yéédahósinígíí haitʼéego baa nitsíníkees? Yilʼaadii Paul éí łaʼ Jew dineʼé tʼáá íídą́ą́ʼ Jiihóvah yaa ádahonízinígíí yił nahasneʼ. Diné doo tʼáá aaníí diyin dayoodlánígíí ałdóʼ yił nahasneʼ. Éí yił nahalneʼgo Paul bee aʼohgo ádólzin bee nahoʼdineestą́ą́ʼ. Haitʼéego?

⁹ Paul tʼáá áłtséedi nahojilneʼgo, Bárnabas bił Lístra kin haalʼáago nijizhʼáázh. Likeiyóniya dineʼé éí Paul dóó Bárnabas diyin jílı̨́ dahałní. Doo tʼáá aaníí dabidiyin danilínígíí Júpiter dóó Mérkurii yee dayózhí. Paul dóó Bárnabas ayóó ádaa haʼniih daatsʼí? Diné haa dahaniihgo ndi doo atídahóółʼįįgo baa hoł hózhǫ́ǫ́sh? Diné haa dahaniihgo bee ląʼí haneʼ yáʼátʼéhígíí deididootsʼı̨́ı̨́ł jinízinísh? Ndagaʼ! Éí tʼáá íiyisíí hoʼdiiłʼáago ázhdííniid: “Díishąʼ haʼátʼíí biniyé ádaahtʼı̨́? Tʼáá nihígi átʼéego, nihí ałdóʼ diné niidlı̨́įgo átʼé.”—Acts 14:​8-15.

10. Haʼátʼíí biniinaa Paul dóó Bárnabas doo Likeiyóniya dineʼé biláahdi ádajítʼée da bee ádaa ákozhnízin?

¹⁰ Paul dóó Bárnabas ázhdííniid, “Nihí ałdóʼ diné niidlı̨́įgo átʼé,” éí áhyiłnínígíí diné yił dahalneʼígíí nahalingo hó ałdóʼ niʼjiisííh. Doo Likeiyóniya dineʼé ákótʼéégóó bił aheełtʼéégóó God bichʼįʼ nahojiłá. Paul dóó Bárnabas éí God bííłʼaad díí diné tʼáá aaníinii God átʼéii bee nizhdínóotįįł. (Acts 13:2) Níłchʼi diyinii yee yitsʼá honínil dóó bee hoł chohooʼı̨́ háí yílyá. Díí éí doo bee ádaa hojiʼniih áhyiłníi da. Jesus yikééʼ dadidiikaigo Likeiyóniya dineʼé ałdóʼ yáʼąąshgóó bá chodahooʼı̨́ doogo yaa ákodaniizı̨́ı̨́ʼ.

11. Haitʼéego Paul aʼohgo ádólzin yę́ę beʼiilʼı̨́į doo?

¹¹ Haitʼéego Paul aʼohgo ádólzin yę́ę beʼiilʼı̨́į doo? Nihinaanish nidahwiilneʼ doodaiiʼ Jiihóvah yee nihíká análwoʼgo íilʼínígíí doo bee ádaa hwiiʼniih da. Díí bee nidaʼídídíilkił: ‘Diné bił dahashneʼígíí haitʼéego baa nitsískees? Dineʼésh łaʼ doo shił danilı̨́į da?’ Tʼáá náhwiistʼą́ą́ ńtʼééʼ, Jiihóvah Yá Dahalneʼé haneʼ yáʼátʼéhígíí deididootsʼı̨́įłgo hadeintá. Náánáłaʼ éí saad ałʼąą ádaatʼéii dóó náánáłaʼ diné ádaʼałʼínígíí yídahoołʼaah éí łaʼ doo bił danilı̨́į da ndi. Ákondi, Jiihóvah Yá Dahalneʼé éí diné bił nidahwiilneʼ doo biláahdi ádaniitʼé danízin da. Diné tʼááłaʼí niitínígo yaa nitsídaakees éí Jesus yikééʼ deíkáah doogo haitʼéego bíká adeeshwoł daniidzin.

12. Épafras náánáłaʼ yaa aʼááh nízinii haitʼéego ííshjání áyósin ńtʼééʼ?

¹² Náánáłaʼ aʼohgo ádaníilzingo éí nihibrothers dóó nihisisters tʼáá íídą́ą́ʼ “tʼáá nihí daʼiiniidlánígi átʼéego oodląʼ bee aa hodzódlí ílíinii shódayoostʼeʼii.” (2 Peter 1:1) Épafras ákódzaa. Diyin Bizaad biiʼ ashdladi baa chʼíhootʼą́. Romedi awáalyaa góneʼ jizdáa ndi, Kalásiidi Oodlání bichʼįʼ naaltsoos ájiilaa, Épafras baa hojólneʼ: “Tʼáá áłahjįʼ nihénálniihgo tʼáá íináwołí bee nihá sodilzin.” (Colossians 4:12)  Épafras éí bibrothers yéédahósin dóó ayóóʼádajóʼní. Paul éí “bił awáalyaa” jizkéhígíí hałní. Épafras hachʼįʼ anáhóótʼiʼ éí áhyiłní. (Philemon 23) Ákondi, náánáłaʼ yaa aʼááh nízin ńtʼééʼ. Haʼátʼíí bee áká ajoolwod? Épafras bibrothers dóó bisisters yá sonídílzįįh. Nihí ałdóʼ tʼáá ákótʼéego nihibrothers dóó nihisisters bízhiʼ chodeiniilʼı̨́įgo bá sodadiilzin doo. Éí sodizin ayóó bidziil átʼé.—2 Corinthians 1:11; James 5:16.

13. Sodilzingo haitʼéego Épafras beʼiilʼı̨́į doo?

¹³ Náánáłaʼ baa nitsíníkees bízhiʼ choiníłʼı̨́įgo bá sodidiilzįįł. Nihikʼis bił áłah nídeidleehígíí doodaiiʼ hooghan nidahazʼánígíí łaʼ shı̨́ı̨́ bichʼįʼ anídahaztʼiʼ nił bééhózin. Náánáłaʼ éí tʼáá yáʼátʼéehgo ádeeshlííł danízin ndi bá ndanitłʼah. Éí bá sodidiilzįįł. Nihibrothers dabízhiʼ jw.org daabíiʼii ałdóʼ bá sodidiilzįįł. Ayóóʼádayóʼnínę́ę bitsʼąą ádaadinii, nitsihodínídéél doodaiiʼ anaʼí dahólǫ́, dóó bibéeso bee bichʼįʼ anídahaztʼiʼii ałdóʼ bá sodilzin doo. Tʼóó ahayóí nihibrothers dóó nihisisters nihisodizin yídį danilı̨́! Náánáłaʼ bá sodiilzingo, doo tʼáá nihí tʼéiyá ádaa nitsíikees da ndi náánáłaʼ yídį danilínígíí baa nitsíikeesgo ííshjání ííníilzin. (Philippians 2:4) Díí bá sodiilzingo Jiihóvah nihíistsʼą́ą́ʼ.

14. Haitʼéego Jiihóvah éí aláahdi íistsʼą́ʼígíí nilı̨́?

¹⁴ Deísíníiltsʼą́ąʼgo aʼohgo ádeíníilzin. James 1:19 ánihiłní “hazhóʼó ajíistsʼą́ąʼ doo.” Jiihóvah éí aláahdi íistsʼą́ʼígíí nilı̨́. (Genesis 18:32; Joshua 10:14) Exodus 32:​11, 14 baa haneʼígíí yíníłtaʼ. Doo Jiihóvah yinízinii átʼée da ndi Mózes haʼátʼíí shı̨́ı̨́ yaa nitsíkeesii yee yił hólneʼ. Niísh tʼáá háida niʼiisíhígíí hazhóʼó yíísíníiltsʼą́ą́ʼ áádóó kótʼéego nínígíí beʼdíílííł? Hazhóʼó baa nitsíníkees:  Jiihóvah éí bílaʼashdlaʼii daboodlánígíí haʼólníigo nihíistsʼą́ą́ʼ.

15. Náánáłaʼ nihił nilı̨́įgo haitʼéego Jiihóvah beʼdiilnííł?

¹⁵ Hazhóʼó díí baa nitsíníkees: ‘Jiihóvah aʼohgo ádólzin éí Éíbraham, Réíchel, Mózes, Jáshowa, Manówah, Iiláíjah, dóó Heziikáíyah yíístsʼą́ą́ʼ díí átʼéego nihíistsʼą́ą́ʼ ałdóʼ. Ákoósh shí ałdóʼ náánáłahjįʼ hazhóʼó yíísínístsʼą́ąʼ doo? Shibrothers shił nilı̨́įgo hazhóʼósh yíísínístsʼą́ąʼ doo? Shił nilı̨́įgoósh beʼdeeshłííł? Áłah náʼádleehígíí góneʼ náánáłaʼ doodaiiʼ shighan hazʼánígíí daatsʼí łaʼ bitsʼąą áníshtʼé? Haash deeshnííł?’—Genesis 30:6; Judges 13:9; 1 Kings 17:22; 2 Chronicles 30:20.

16. Shímiyai doo haa joobaʼgóó atíhoolaago Naatʼáanii David haajiidzaa?

¹⁶ Náánáłaʼ doo nihaa dajoobaʼgo aʼohgo ádadíníilzinii bee ádaa ádahwiilyą́ą doo. (Ephesians 4:2) David aʼohgo ádólzingo íʼiilaaígíí éí 2 Samuel 16:​5, 6, 12, 13 baa haneʼ. (Yíníłtaʼ.) Shímiyai, Naatʼáanii Saul bikʼéí, éí David dóó bá nidaalʼaʼí éí yódziih índa tsé yee hołneʼ. David tʼáadoo hajiidzaa da ndi Shímiyai bichʼįʼ haʼjólníigo tʼóó hódziih. David tʼáadoo háhóchįįh da haʼátʼíísh bíká eelwod? Psalm 3 yaa halneʼii yídííłtah.

17. Haʼátʼíí David yee ádaa áhályánígíí bíká eelwod, dóó haitʼéego beʼiilʼı̨́į doo?

¹⁷ Hayeʼ Ábsalam hoʼniiłhı̨́ yę́ędą́ą́ʼ David éí Psalm 3 yikʼeʼashchı̨́. Díí éí Shímiyai hódziih yę́ędą́ą́ʼ áhóótʼįįd ákondi David tʼóó áhodéesyéél. Haitʼéego? Psalm 3:4 deiyíníiltaʼgo David ání: “Bóhólníihii [Jiihóvah] chánahgo náoshkąąhgo bihodiyingo dah yiskʼidę́ę́ʼ shichʼįʼ ééhoosįįd.” Atínihiʼdilʼı̨́įgo, David íʼiilaaígíí átʼéego sodadiilzin doo. Áádóó Jiihóvah biníłchʼi diyinii nihaididooʼááł bee hadaʼííníilníi doo. Łaʼda atíníłʼı̨́įgoósh éí baa náhodidííʼááł? Jiihóvaásh baʼíínílí tiʼhwiiʼníihgo yee naa aʼááh nízin dóó níká adoolwołgo nikʼihojidlíi doo?

18. Jiihóvah yee nanihinitinígíí beʼiilʼı̨́įgo haitʼéego nihíká adoolwoł?

¹⁸ Tʼáá ákótʼéego baa ákoniidzingo beʼiilʼı̨́į doo, dahoniidzą́ągo Jiihóvah nihikʼihojidlíi doo. Proverbs 8:​11, Diyin Bizaad ání: “Haʼátʼíhída bídin ídlíinii tʼáá ałtso tʼáá nídaʼííʼoh.” Hódzą́ éí ił ééhózin bitsʼą́ą́dę́ę́ʼ. Ndi hódzą́ éí doo ląʼí ił ééhózin ííłniih da. Hódzą́ éí nihíká análwoʼígíí dóó yáʼátʼéehgo íʼiilʼínígíí áhyiłní. Wóláchííʼ bichʼiyąʼ hashtʼeʼ nidayiinííł éí bee hódzą́ ííshjání ádeiłʼı̨́. (Proverbs 30:​24, 25) Christ, éí God “bibee hódzáanii átʼé,” tʼáá áłahjįʼ Bizhéʼé yił hóshǫ́ǫ yee éʼéłʼı̨́. (1 Corinthians 1:24; John 8:29) Nihí hódzą́ ííshjání ííníilzingo yáʼádaatʼéhígíí bedaʼiilʼı̨́įgo nihí ałdóʼ Jiihóvah niháí dooleeł. (Matthew 7:​21-23 yíníłtaʼ.) Aʼohgo ádíníilzingo éí bił áłah nídeidleehígíí Jiihóvah bá nideilʼaʼgo yee nihíká análwoʼ. Yáʼádaatʼéhígíí nihił bééhózin bedaʼiilʼı̨́ éí bee hadaʼííníilníi doo. Bee aʼohgo ádeíníilzinígíí ííshjání íilʼı̨́įgo éí kʼad dóó hoolʼáágóó baa nihił dahózhǫ́ǫ doo.