1-2. 1 Timothy 6:20 bikʼehgo Timothy haʼátʼíí baa deetʼą́?

HAʼÁTʼÍÍ shı̨́ı̨́ ílı̨́įgo nihee hólóonii háida nihá yaa áhályą́ą doo biniyé baa diilyééł. Béeso há baa áháyą́ą doogo, béeso bá hooghan góneʼ yah azhdoonił. Łaʼda yidínóoʼı̨́ı̨́ł doodaiiʼ yóóʼadínóodah bitsʼąą hashtʼeʼniiʼnił. Ílínígíí nihá baa áháyą́ągi bikʼidiʼdiitı̨́ı̨́ł.

² 1 Timothy 6:20 yíníłtaʼ. Yilʼaadii Paul éí Timothy ílı̨́įgo bee naʼahoosdliʼígíí yééhoyiiłnííh. God éí nihookááʼ dineʼé tʼáá aaníinii bił béédahodoozįįł yóʼní. Timothy “haneʼ yáʼátʼéehii baa nahólne” hoʼdooʼniid áádóó “niʼdoolʼaadígíí biʼílééh” hodiʼníigo hąąh niilyá. (2 Tim. 4:​2, 5) Paul éí Timothy díí bee naʼahoosdlíʼígíí baa áhólyą́ yidííniid. Timothy nahalingo nihí ałdóʼ ílíinii nihąąh ńdaasyá. Éí haʼátʼíí ádaatʼé? Jiihóvah nihainíláii haʼátʼíí biniyé baa áhwiilyą́ą doo?

3-4. Diyin Bizaad biiʼdę́ę́ʼ tʼáá aaníigo bee nidaʼnitinii haʼátʼíí biniinaa ílı̨́įgo ádaatʼé?

³ Jiihóvah éí Diyin Bizaad biiʼdę́ę́ʼ tʼáá aaníigo naʼnitin yee nihaa joozbaʼ. Tʼáá aaníigo naʼnitin éí ílı̨́įgo átʼé, háálá Jiihóvah áhánígo bił kʼé ahidiiʼníigi yee nanihidínóotįįł áádóó nihił hózhǫ́ǫgo hiniiʼnáa dooígi nihił chʼídootʼááł. Tʼáá aaníigo naʼnitin nídiilyáago bikʼeh hiniiʼnáago éí yoochʼíidgo naʼnitin índa doo ákogi átʼéego iiná nihąąh táádaasgiz.—1 Cor. 6:​9-11.

⁴ Aʼohgo ádaa nitsídaakeesii dóó Diyin hadeinitáhígíí éí Jiihóvah tʼáá aaníinii ílínígíí bił ííshjání ádeileʼ. (Heb. 11:6) Tʼáá aaníigo naʼnitin nízhdidooléełgo éí dííshjı̨́įdi  háíshı̨́ı̨́ choyoołʼínígíí bikʼehgóó joogáał doo. (Matt. 11:25; 24:45) Tʼáá aaníigo naʼnitin éí doo tʼáá sáhí íitʼı̨́įgo bikʼiʼdidiitı̨́įł da. Akʼiʼdiitįįh shóoztʼeʼii éí aláahdi ílíinii átʼé.—Prov. 3:​13, 15.

5. Haʼátʼíí ałdóʼ Jiihóvah yee nihaʼoozlííʼ?

⁵ Jiihóvah éí tʼáá aaníigo naʼnitin diné bee nidaniitin doo biniyé nihaidiníʼą́. Áko Jiihóvah binahatʼaʼ dóó tʼáá bí bééhodiilzįįłgi bee nidaniitin. (Matt. 24:14) Haneʼ baa dahwiilneʼígíí ílíinii átʼé. Díí éí diné yikʼidaʼdiitįįhgo Jiihóvah bidineʼé yihidiikááh. Kótʼéego iiná doo ninítʼiʼii nídeididoolééł. (1 Tim. 4:16) Nahwiilneʼgi tʼáá áłtsʼísí ndi, naanish tsʼídá aláahdi átʼéii bee áká anéiilwoʼgo átʼé. (1 Tim. 2:​3, 4) Jiihóvah bił deíníilníishgo, dooládóʼ baa hózhóonii átʼée da!—1 Cor. 3:9.

6. Bee hadaʼoosdliʼ yę́ę doo baa áda áhojilyą́ą da ńtʼééʼígíí haadajiidzaa?

⁶ Timothy bił ahąąh nidajikai yę́ę łaʼ Jiihóvah bił nidajilnish yę́ę doo baa ahééh dazhnízin da. Díímas éí nihokááʼjí bił nidahaztʼiʼii ayóóʼájóʼní, áko Paul bíighahdóó nahojilneʼ yę́ę bitsʼázhníyá. (2 Tim. 4:10) Fijélas dóó Hermájiiniiz éí Paul atíbiʼdoolʼįįd yę́ęgi átʼéego áhodiʼdoolníiłgi bééjíldzidgo nahojilneʼ yę́ę bitsʼázhníʼáázh. (2 Tim. 1:15) Haimeníyas, Alezáander, dóó Failíítas éí Jiihóvah baaʼihgo baa yádajiłtiʼ dajizlı̨́ı̨́ʼ áádóó tʼáá aaníinii bitsʼá jiiskai. (1 Tim. 1:​19, 20; 2 Tim. 2:​16-18) Tʼáá ájíłtso hweʼoodląʼ dabidziil ńtʼééʼ, ndi bee hadaʼoosdliʼ yę́ę doo ílı̨́ı̨́góó baa tsídazdeezkééz.

7. Séítan éí haitʼéego nihikʼijįʼ naalnish?

⁷ Jiihóvah yee nihaʼoozlíʼígíí Séítan yóóʼádidiitʼááł nihóʼní. Séítan kótʼéego nihinaalnish: Entertainment dóó media choyoołʼı̨́įgo nihokááʼjí nitsáhákees áádóó doo yáʼátʼééhgóó oodááł yíʼoołkąąh. Tʼáá aaníinii yę́ę bididííchił nóʼní. Nihikʼéí dóó háíshı̨́ı̨́ bił neildeehígíí nihaa nídaatʼı̨́ áádóó atídanihiłʼínígíí éí Séítan bitsʼą́ą́dę́ę́ʼ yitʼihii átʼé. Nahwiilneʼ yę́ę neʼ kódiilnííł nízingo átʼı̨́. ‘Ił ééhózin doo tʼáá aaníinii’ bee atsʼą́ąjįʼ ashjééʼ (apostates dabidiʼnínígíí) yoochʼííd ádeiłʼínígíí yísíníłtsʼą́ąʼgo tʼáá aaníinii yę́ę bitsʼá diidááł nihóʼní.—1 Tim. 6:​20, 21.

8. Łaʼ brother Daniel wolyéego áátʼįįd yę́ę haʼátʼíí bitsʼą́ą́dóó bíhooʼaah?

⁸ Doo ádaa áhwiilyą́ą́góó éí tʼáá aaníigo naʼnitin yę́ę bitsʼá diidááł. Daniel * wolyéego ákójiidzaago haa haneʼ, éí video games hoł ayóó átʼé. Kójíní: “Neeznáá shinááhaigo video games bee  naashnéego baa nídiisdzá. Áłtsé éí video games baʼátʼeʼ ádaadinígíí bee naashné ńtʼééʼ. Tʼáadoo baa ákonisiní video games doo yáʼádaatʼéhígíí bee naashné. Wónáásdóó violence índa demons bídadéétʼiʼígíí bee naashné.” Tʼáá éí tʼéí baa nijigháago 15 hours aleeh. Daniel ánáádíʼní: “Díí baa naasháhígíí Jiihóvah yitsʼą́ąjįʼ kóshósingo baa ákonisin. Ndi shijéí nitłʼiz silı̨́įʼgo Diyin Bizaad bee naʼnitin doo shídéétʼiʼ da niizı̨́ı̨́ʼ.” Entertainment doo yáʼátʼééh góneʼ ahodoolóosgi doo ayóó baa ákozhnízin da łeh, áko tʼáá aaníigo naʼnitin yę́ę yóóʼazhdoołdiłgo átʼé. Jiihóvah ílı̨́įgo yee nihaʼoozlííʼ yę́ę tʼáá ákódoonííł.

9. 1 Timothy 1:​18, 19 bikʼehgo Paul éí Timothy háí bejíłtʼé ní?

⁹ 1 Timothy 1:​18, 19 yíníłtaʼ. Paul éí Timothy siláo naabaahii bejíłtʼé ní, áko “yáʼátʼéehii yéigo bichʼą́ą́h nanibaah,” hałní. Díí éí diyin kʼehgo naabaah ááhyiłní. Oodlání éí haitʼéego siláo naabaahii nidahojílin? Bee ániitʼéii bineilnishgo tʼéiyá haitʼéego Christ binaabaahii niidlı̨́į doo? Paul siláo nidahoniidlin nínę́ę bitsʼą́ą́dóó haʼátʼíí ashdlaʼgo bídahwiidiilʼááł? Bíhwiilʼą́ʼígíí nihíká adoolwołgo tʼáá aaníinii bąąh dah siitı̨́į doo.

10. Diyin kʼehgo iiná haʼátʼíí óolyé, haʼátʼíí biniyé hwee hólǫ́ǫ doo?

¹⁰ Diyin kʼehgo iiná bíhoołʼaah. Siláo naabaahii éí akééʼgóó átʼée łeh. Haʼátʼíí shı̨́ı̨́ doodaiiʼ háida bił nilínígíí yichʼą́ą́h naagháa łeh. Paul éí Timothy diyin kʼehgo iiná bíhoołʼaah yidííniid. Díí éí God áhánígo bééhozhdoosįįłgo ááhyiłní. (1 Tim. 4:7) God ayóóʼííníʼníigo dóó bikʼehgo hiniiʼnáago éí tʼáá aaníinii yéigo bąąh dah siitı̨́į doo.—1 Tim. 4:​8-10; 6:6.

11. Haʼátʼíí biniyé tʼáá ákogi ániitʼée doo?

¹¹ Tʼáá ákogi ánítʼé bíhoołʼaah. Siláo naabaahii éí naʼádínítaahgo anaaʼ hodooleeł yiniyé hashtʼedítʼée łeh. Timothy éí diyin kʼehgo naabaah yiniyé hashtʼeʼ áʼdólzin ńtʼééʼ. Jó, Paul níłchʼi diyinii nabiiłnáago hachʼįʼ haadzííʼ yę́ę bikʼehgóó ájítʼé. Ániid naʼadáago biʼadáhonooní bitsʼąą kónítʼé, ndi tʼáá ákogi éʼétʼé, índa kʼé hwiindzin bee oodlání bił ahínéikah hoʼdooʼniid. (2 Tim. 2:22) Tʼáá ákogi ájooníiłgo tʼéí ánítʼé haʼnínígíí bohónéedzą́. Tʼáá ákogi ániitʼéego tʼéiyá nihitsʼíís yidánoolníinii bikʼeh didiidleeł. (Rom. 7:​21-25) Tʼáá ákogi ájítʼéego éí áłtséédą́ą́ʼ ájítʼé yę́ę bitsʼą́ąjįʼ dashdidoogááł, áádóó iiná ániidíii hazhdoołtʼih. (Eph. 4:​22, 24) Tʼáá ákótʼéego, azhą́ chʼééh deedzáa ndi, ahídaniidlı̨́įgo áłah néiidleehdi brothers dóó sisters bił honiidlǫ́ǫ doo.—Heb. 10:​24, 25.

12. Diyin Bizaad chooʼı̨́įgi haitʼéego nizhónígo ílı̨́į doo?

¹² Siláo naabaahii éí yee achʼą́ą́h naabaahii tʼáá ahą́ą́h yee ádinítʼaah łeh. Yiyiichįįh doogo tʼáá ahą́ą́ choyoołʼı̨́. Nihí ákótʼéego saad tʼáá aaníinii tʼáá ákogi átʼéego chooʼı̨́įgi bíhwiidiilʼááł. (2 Tim. 2:15) Áłah néiidleehdi bíhwiidiilʼáałgo átʼé. Naniitinígíí Diyin Bizaad ílíinii átʼé dínóozįįłgo éí tʼáá nihí Diyin Bizaad tʼáá áłahjįʼ yíníiltaʼgo neilkaah doo. Diyin Bizaad éí niheʼoodląʼ bidziilgo íidoolííł. Doo tʼóó jółtaʼgo ááhyiłníi da. Jółtaʼígíí nabikʼítsíjíłkeesgo hazhóʼó bikʼizhdiʼdootı̨́ı̨́ł biniyé publications nijiłkaahgo hazhóʼó baa hojilneʼ doo. (1 Tim. 4:​13-15) Kótʼéego éí Diyin Bizaad hazhóʼó  choiniilʼı̨́įgo łaʼda bee nidíníítįįł. Saadígíí éí doo tʼóó wóltaʼ da doo. Danihíistsʼą́ʼígíí saad ánínígíí yikʼidiʼdootı̨́ı̨́ł áádóó bí bídéétʼiʼgi yaa ákodínóozįįł. Diyin Bizaad biiʼdę́ę́ʼ diyingo God hahasdzíiʼii tʼáá ahą́ą́h yíníiltaʼgo éí naʼnítin bíhwiidiilʼááł áádóó hazhóʼó choiniilʼı̨́įgo bee naʼniitin doo.—2 Tim. 3:​16, 17.

13. Proverbs 22:3 bikʼehgo haʼátʼíí bitsʼąą nídidíítı̨́ı̨́ł??

¹³ Haʼísíidgo ádaa áhólyą́. Siláo naabaahii éí haada hodoonííł yíká déezʼı̨́įʼ łeh áádóó yiniyé hashtʼeʼ áʼdólzin. Nihí ałdóʼ haʼiilzíidgo atínihidoolíiłii bitsʼą́ąjįʼ kódiiʼnííł. (Proverbs 22:3 yíníłtaʼ; Heb. 5:14) Recreation dóó entertainment ádiilníłígíí baa honiidzą́ą doo. Ndaalkidígíí éí tʼóó baaʼihgo ił ashtéézh ádaatʼéii aláahgo yídaʼoołkąąh. Kótʼéego iiná Jiihóvah doo yíłdin da áádóó bee ádihozhdiiltʼih. Díí éí God ayóóʼííníiʼnínę́ę nihitsʼą́ą́ʼ yidoołchxǫǫł.—Eph. 5:​5, 6.

14. Daniel ádaa ákozhniidzı̨́ʼígíí haitʼéego bíká eelwod?

¹⁴ Daniel, baa chʼíhootʼánę́ę éí violent dóó demonic video games bee nijinéhę́ę doo yáʼátʼééhgóó baa ákozhniizı̨́ı̨́ʼ. Watchtower Library biiʼdę́ę́ʼ dabikááʼígíí háká adoolwoł biniyé nijiłkaahgo baa nízhdiidzá. Haitʼéego háká eelwod? Video games bee nijinéhę́ę nizhníłtʼiʼ. Online subscriptions ałdóʼ nizhníłtʼiʼ áádóó náánáłaʼ bił nidajinéhę́ę bitsʼą́ąjįʼ dashdiiyá. Daniel ájíní: “Kʼad éí tłóóʼgóó tʼáadoo leʼé baa naasháa łeh áádóó congregationdę́ę́ʼ shikʼis bił ahínéishkah.” Daniel éí kʼad elder dóó pioneer nilı̨́.

15. Tʼáá ádzaagóó haneʼ haʼátʼíí biniinaa bááhádzidii átʼé?

¹⁵ Timothy nahalingo, yoochʼííd ádeiłʼı̨́įgo atsʼą́ąjįʼ danilínígíí yee atídaʼałʼíinii bíká hadaʼiilzíid doo. (1 Tim. 4:​1, 7; 2 Tim. 2:16) Nihibrothers tʼáá ádzaagóó yaa nidahalneʼ doodaiiʼ Jiihóvah biorganization bikééʼ siidzı̨́įgi nihił naaki nilı̨́į doo danihóʼní. Tʼáá ádzaagóó haneʼ biniinaa niheʼoodląʼ doo bidziil da dooleełgo átʼé. Tʼáá ádzaagóó haneʼ yidiidląąłgi bitsʼąą ádaa áhwiilyą́ą doo. Haʼátʼíí biniyé? Jó, “diné tʼáá ádzaagóó nidahalneʼígíí bíniʼ dááchxǫʼ áádóó tʼáá aaníinii bee ádaadin.” Ndi, “naʼahíyátiʼ dóó saad bee  ałghaʼditʼááh” tʼéiyá hadeinitá. (1 Tim. 6:​4, 5) Yoochʼííd ádeiłʼínígíí deidiidląął áádóó nihibrothers baa ayódahoolníih doo danízin.

16. Haʼátʼíí bitsʼąą ádaa áhwiilyą́ą doo?

¹⁶ Tʼááłáʼí góneʼ díníʼı̨́ı̨́ʼ. “Jesus Christ bisiláo hayóii nilı̨́įgo” Timothy éí nahalneʼígíí tʼéí yinéłʼı̨́įgo doo tʼáá bíjí binaanish índa naadeełii tʼéí yíká átʼı̨́į da ńtʼééʼ. (2 Tim. 2:​3, 4) Timothy nahalingo, naadeełii doo ałhąʼíilnéeh da doo. Atʼı̨́ bíká íitʼı̨́įgo éí Jiihóvah ayóóʼííníiʼnínę́ę, Diyin Bizaad baa ahééh niidzin yę́ę áádóó baa nihił hózhǫ́ǫgo nahwiilneʼ yę́ę yóóʼadiildił. (Matt. 13:22) Tʼóó bikiinígo hiniiʼnáago Jiihóvah bá yiilnishgo éí bee bóhólníihgo bił hazʼáanii bíká íitʼı̨́į doo.—Matt. 6:​22-25, 33.

17-18. Diyin kʼehgo iiná yidoołchxǫǫłii haitʼéego tsı̨́įłgo bitsʼą́ąjįʼ kódiiʼnííł?

¹⁷ Tsı̨́įłgo ádííníiłgi biniyé hashtʼe áʼdíínílzin. Siláo naabaahii éí haada hoodzaago ádooníiłgi tʼáá íídą́ą́ʼ yinah hazʼą́ą doo. Jiihóvah yee nihaʼoozlíʼígíí yóóʼadiildił bitsʼąą tʼáá íídą́ą́ʼ tsı̨́įłgo ádiiʼníłígíí bee hashtʼediniitʼée doo. Haʼátʼíí nihíká adoolwoł? Tʼahdoo áhánééhdą́ą́ʼ binahosiitʼą́ą doo.

¹⁸ Kótʼéego baa nitsíníkees. Nitsaago áłah ílı̨́įgi ląʼí chʼídaʼiiztiin łeh áádóó bikáaʼgi EXIT signs dah naaztą́ą łeh. Tʼáá íídą́ą́ʼ hoł bééhózingo éí haada hootʼįįhgo tʼáadoo áłtsé baa nitsíjíkeesí chʼéʼétiingóó dashdidoolwoł. Tʼáá ákótʼéego, Internet biiʼdę́ę́ʼ, movies, doodaiiʼ TV programs badaaʼihii índa doo yáʼádaatʼéehii yoochʼííd bił nidaaztʼiʼii naalkidgo, tʼáá íídą́ą́ʼ tsı̨́įłgo “ádiiʼníiłgi” bee hashtʼediniitʼée doo. Kwíitʼı̨́įgo éí diyin kʼehgo iiná yidoołchxǫǫłii tsı̨́įłgo bitsʼą́ąjįʼ kódiiʼnííł áádóó Jiihóvah chin nihąąh ádingo nihinéłʼı̨́į doo.—Ps. 101:3; 1 Tim. 4:12.

19. Jiihóvah yee nihaʼoozlíʼígíí baa áhwiilyą́ągo haʼátʼíí bee nihikʼihojidlíi doo?

¹⁹ Jiihóvah ílı̨́įgo yee nihaʼoozlíʼígíí baa áhwiilyą́ą doo. Díí éí Diyin Bizaad biiʼdę́ę́ʼ tʼáá aaníinii áádóó nihił dahózhǫ́ǫgo náánáłaʼ bee nidaniitinígíí nihąąh niilyá. Díí bikʼehgóó íiʼníiłgo éí nihíniʼ tʼáadoo biʼdiiłʼáhí da doo, niheʼiinaʼ tʼáadoo beełtʼéhí da doo, áádóó Jiihóvah yééhodoosįįłígíí baa nihił hózhǫ́ǫgo nidaniitin doo. Jiihóvah nihíká análwoʼgo yee nihaʼoozlíʼígíí baa áhwiilyą́ą doo.—1 Tim. 6:​12, 19.