Wolembedwa ndi Luka 1:1-80

YAMBANI

Kalata yopita kwa a Teofilo (1-4)
Gabrieli ananeneratu za kubadwa kwa Yohane Mʼbatizi (5-25)
Gabrieli ananeneratu za kubadwa kwa Yesu (26-38)
Mariya anapita kwa Elizabeti (39-45)
Mariya analemekeza Yehova (46-56)
Kubadwa kwa Yohane komanso mmene anamupatsira dzina (57-66)
Ulosi wa Zekariya (67-80)

1 Anthu ambiri ayesetsa kulemba nkhani yofotokoza zochitika zenizeni zimene ife tonse timazikhulupirira.*+ ² Iwo analemba ndendende mmene anatiuzira anthu amene kuchokera pachiyambi, anali mboni zoona ndi maso+ komanso atumiki a uthengawo.+ ³ Inenso, popeza kuti ndafufuza zinthu zonse mosamala kwambiri kuchokera pachiyambi, ndatsimikiza kuti ndikulembereni mwatsatanetsatane, inu wolemekezeka kwambiri, a Teofilo.+ ⁴ Ndachita zimenezi kuti mudziwe bwinobwino kuti zinthu zimene anakuphunzitsani ndi mawu apakamwa nʼzodalirika.+ ⁵ Mʼmasiku a Herode,*+ mfumu ya Yudeya, kunali wansembe wina dzina lake Zekariya wa mʼgulu la ansembe la Abiya.+ Mkazi wake anali wochokera mwa ana aakazi a Aroni ndipo dzina lake anali Elizabeti. ⁶ Awiri onsewo anali olungama pamaso pa Mulungu chifukwa ankayenda mokhulupirika, mogwirizana ndi malamulo onse komanso zimene chilamulo cha Yehova* chimafuna. ⁷ Koma iwo analibe mwana chifukwa Elizabeti anali wosabereka ndipo onse awiri anali okalamba. ⁸ Tsopano pamene Zekariya ankagwira ntchito monga wansembe pamaso pa Mulungu, kuimira gulu lake la ansembe,+ ⁹ mogwirizana ndi zimene ansembe ankachita nthawi zonse,* inali nthawi yake yakuti akalowa mʼnyumba yopatulika ya Yehova,*+ akapereke nsembe zofukiza.+ ¹⁰ Gulu lonse la anthu linkapemphera panja, pa ola lopereka nsembe zofukizalo. ¹¹ Mngelo wa Yehova* anaonekera kwa iye, ataimirira mbali yakumanja ya guwa lansembe zofukiza. ¹² Koma Zekariya ataona zimenezo anavutika mumtima ndipo anachita mantha kwambiri. ¹³ Ndiye mngeloyo anamuuza kuti: “Usachite mantha Zekariya chifukwa pemphero lako lopembedzera lamveka ndithu. Mkazi wako Elizabeti adzakuberekera mwana wamwamuna ndipo udzamupatse dzina lakuti Yohane.+ ¹⁴ Udzasangalala komanso kukondwera kwambiri ndipo anthu ambiri adzasangalala ndi kubadwa kwake+ ¹⁵ chifukwa adzakhala wamkulu pamaso pa Yehova.*+ Koma asadzamwe vinyo ngakhale pangʼono kapena chakumwa chilichonse choledzeretsa+ ndipo adzadzazidwa ndi mzimu woyera asanabadwe nʼkomwe.*+ ¹⁶ Iye adzathandiza Aisiraeli ambiri kuti alape nʼkuyambiranso kumvera Yehova* Mulungu wawo.+ ¹⁷ Komanso adzatsogola monga kalambulabwalo wa Mulungu ali ndi mzimu ndi mphamvu ngati za Eliya.+ Iye adzatembenuza mitima ya abambo kuti ikhale ngati ya ana+ ndipo anthu osamvera adzawatembenuzira ku nzeru yeniyeni ya anthu olungama. Adzachita zimenezi kuti asonkhanitse anthu amene akonzekera kutumikira Yehova.”*+ ¹⁸ Ndiyeno Zekariya anafunsa mngeloyo kuti: “Nditsimikiza bwanji zimenezi? Inetu ndine wokalamba ndipo mkazi wanganso ali ndi zaka zambiri.” ¹⁹ Mngeloyo anamuyankha kuti: “Ine ndine Gabirieli+ amene ndimaima pamaso pa Mulungu+ ndipo wandituma kudzalankhula nawe komanso kudzalengeza uthenga wabwinowu kwa iwe. ²⁰ Ndiye tamvera! Udzakhala chete osatha kulankhula, mpaka tsiku limene zinthu zimenezi zidzachitike chifukwa sunakhulupirire mawu anga amene adzakwaniritsidwe pa nthawi yake imene inaikidwiratu.” ²¹ Pa nthawiyi nʼkuti anthu akuyembekezerabe Zekariya ndipo anadabwa chifukwa chakuti anachedwa kwambiri mʼnyumba yopatulikayo. ²² Atatuluka sanathenso kulankhula nawo ndipo iwo anazindikira kuti waona zinthu zodabwitsa* mʼnyumba yopatulikayo. Iye ankalankhula nawo ndi manja, sankathanso kutulutsa mawu. ²³ Masiku ake ochita utumiki wopatulika* atatha, anapita kwawo. ²⁴ Patapita masiku angapo, mkazi wake Elizabeti anakhala woyembekezera ndipo anakhala kwayekha miyezi 5. Iye ananena kuti: ²⁵ “Izitu nʼzimene Yehova* wandichitira masiku ano. Iye wandikumbukira kuti achotse kunyozeka kwanga pamaso pa anthu.”+ ²⁶ Elizabeti ali woyembekezera kwa miyezi 6, Mulungu anatumiza mngelo Gabirieli+ kumzinda wina wa ku Galileya, wotchedwa Nazareti. ²⁷ Anamutumiza kwa namwali+ amene mwamuna wina dzina lake Yosefe, wa mʼnyumba ya Davide, anamulonjeza* kuti adzamukwatira. Namwali ameneyu dzina lake anali Mariya.+ ²⁸ Mngelo uja atafika kwa namwaliyu ananena kuti: “Moni, iwe wodalitsidwa koposawe, Yehova* ali nawe.” ²⁹ Koma mawu amenewa anamudabwitsa kwambiri moti anayamba kuganizira za moni wamtundu umenewu. ³⁰ Choncho mngeloyo anamuuza kuti: “Usaope Mariya, chifukwa Mulungu wakukomera mtima. ³¹ Tsopano mvetsera! Udzakhala woyembekezera nʼkubereka mwana wamwamuna+ ndipo udzamupatse dzina lakuti Yesu.+ ³² Ameneyu adzakhala wamkulu+ ndipo adzatchedwa Mwana wa Wamʼmwambamwamba.+ Yehova* Mulungu adzamupatsa mpando wachifumu wa Davide atate wake.+ ³³ Iye adzalamulira monga Mfumu panyumba ya Yakobo kwamuyaya ndipo Ufumu wake sudzatha.”+ ³⁴ Koma Mariya anafunsa mngeloyo kuti: “Zimenezi zidzatheka bwanji, chifukwa sindinagonepo ndi mwamuna?”+ ³⁵ Poyankha mngeloyo anauza Mariya kuti: “Mzimu woyera udzafika pa iwe+ ndipo mphamvu ya Wamʼmwambamwamba idzakuphimba. Pa chifukwa chimenechi amene adzabadweyo adzatchedwa woyera,+ Mwana wa Mulungu.+ ³⁶ Ndipotu mʼbale wako Elizabeti, amene anthu amamunena kuti mkazi wosabereka, nayenso ndi woyembekezera ndipo adzabereka mwana wamwamuna mu ukalamba wake, moti uno ndi mwezi wake wa 6. ³⁷ Izi zachitika chifukwa zimene Mulungu wanena sizilephereka.”*+ ³⁸ Ndiyeno Mariya ananena kuti: “Ndine kapolo wa Yehova!* Zimene mwanenazo zichitike ndithu kwa ine.” Atatero mngeloyo anamusiya. ³⁹ Choncho mʼmasiku amenewo Mariya ananyamuka mofulumira nʼkupita kudera lamapiri, kumzinda wina mʼdziko la fuko la Yuda. ⁴⁰ Kumeneko analowa mʼnyumba ya Zekariya nʼkupereka moni kwa Elizabeti. ⁴¹ Ndiyeno Elizabeti atamva moni wa Mariya, khanda limene linali mʼmimba mwakemo linadumpha ndipo Elizabetiyo anadzazidwa ndi mzimu woyera. ⁴² Choncho anafuula mwamphamvu kuti: “Ndiwe wodalitsidwa mwa akazi onse ndipo chipatso cha mimba yako nʼchodalitsidwanso! ⁴³ Koma zatheka bwanji kuti ndipeze mwayi umenewu, kuti mayi wa Mbuye wanga abwere kwa ine? ⁴⁴ Mawu a moni wako atalowa mʼmakutu mwangamu, khanda ladumpha mosangalala mʼmimba mwangamu. ⁴⁵ Ndipotu ndiwe wosangalala chifukwa unakhulupirira, moti zonse zimene unauzidwa zochokera kwa Yehova* zidzakwaniritsidwa.” ⁴⁶ Ndiyeno Mariya ananena kuti: “Moyo wanga ukulemekeza Yehova,*+ ⁴⁷ ndipo mzimu wanga sungalephere kusefukira ndi chimwemwe mwa Mulungu, Mpulumutsi wanga,+ ⁴⁸ chifukwa waona malo otsika a kapolo wake wamkazi.+ Ndipo taonani! kuyambira tsopano mibadwo yonse idzanditcha wosangalala.+ ⁴⁹ Chifukwa Wamphamvuyo wandichitira zazikulu ndipo dzina lake ndi loyera.+ ⁵⁰ Kumibadwomibadwo iye amachitira chifundo anthu amene amamuopa.+ ⁵¹ Wachita zamphamvu ndi dzanja lake, wabalalitsira kutali amene zolinga zamʼmitima yawo zikusonyeza kuti ndi odzikuza.+ ⁵² Watsitsa anthu amphamvu pamipando yachifumu+ ndipo wakweza anthu onyozeka.+ ⁵³ Wakhutitsa anthu anjala ndi zinthu zabwino+ koma amene anali ndi chuma wawathamangitsa chimanjamanja. ⁵⁴ Iye wathandiza mtumiki wake Isiraeli pokumbukira lonjezo lake lakuti adzasonyeza chifundo+ ⁵⁵ kwamuyaya, mogwirizana ndi zimene anauza makolo athu akale, Abulahamu ndi mbadwa* zake.”+ ⁵⁶ Mariya anakhala ndi Elizabeti pafupifupi miyezi itatu kenako anabwerera kwawo. ⁵⁷ Tsopano nthawi yoti Elizabeti abereke inakwana ndipo anabereka mwana wamwamuna. ⁵⁸ Anthu oyandikana naye komanso achibale ake anamva kuti Yehova* anamuchitira chifundo chachikulu ndipo anasangalala naye limodzi.+ ⁵⁹ Pa tsiku la 8, iwo anabwera kudzachita mdulidwe wa mwanayo+ komanso ankafuna kumupatsa dzina la bambo ake, lakuti Zekariya. ⁶⁰ Koma mayi ake anayankha kuti: “Limenelo ayi! Dzina lake akhala Yohane.” ⁶¹ Atanena zimenezi, iwo anamuuza kuti: “Palibe wachibale wako aliyense amene amadziwika ndi dzina limenelo.” ⁶² Kenako anafunsa bambo ake, polankhula ndi manja, dzina limene akufuna kuti amupatse mwanayo. ⁶³ Choncho iye anapempha poti alembepo ndipo analemba kuti: “Dzina lake ndi Yohane.”+ Ataona zimenezi onse anadabwa. ⁶⁴ Nthawi yomweyo pakamwa pake panatseguka ndipo lilime lake linamasuka moti anayamba kulankhula+ ndi kutamanda Mulungu. ⁶⁵ Anthu onse amene ankakhala mʼdera limenelo anagwidwa ndi mantha ndipo nkhani imeneyi inali mʼkamwamʼkamwa mʼdera lonse lamapiri ku Yudeya. ⁶⁶ Onse amene anamva zimenezi anazisunga mʼmitima yawo ndipo ankanena kuti: “Kodi mwana ameneyu adzakhala wotani?” Chifukwa dzanja la Yehova* linalidi pa iye. ⁶⁷ Ndiyeno Zekariya, bambo a mwanayo, anadzazidwa ndi mzimu woyera ndipo ananenera kuti: ⁶⁸ “Atamandike Yehova* Mulungu wa Isiraeli,+ chifukwa wakumbukira anthu ake nʼkuwabweretsera chipulumutso.+ ⁶⁹ Iye watikwezera nyanga yachipulumutso*+ mʼnyumba ya mtumiki wake Davide,+ ⁷⁰ mogwirizana ndi zimene ananena kudzera pakamwa pa aneneri ake oyera akale,+ ⁷¹ zoti adzatipulumutsa kwa adani athu ndiponso mʼmanja mwa onse amene amadana nafe.+ ⁷² Adzakwaniritsa zimene analonjeza makolo athu akale ndipo adzawasonyeza chifundo. Iye adzakumbukira pangano lake loyera,+ ⁷³ lumbiro limene analumbira kwa kholo lathu Abulahamu,+ ⁷⁴ kuti pambuyo poti tapulumutsidwa mʼmanja mwa adani, atipatse mwayi wochita utumiki wopatulika kwa iye mopanda mantha, ⁷⁵ mokhulupirika komanso mwachilungamo pamaso pake masiku athu onse. ⁷⁶ Koma kunena za mwana wamngʼonowe, udzatchedwa mneneri wa Wamʼmwambamwamba, chifukwa udzatsogola pamaso pa Yehova* kuti ukakonze njira zake.+ ⁷⁷ Kuti ukathandize anthu ake kudziwa za chipulumutso chimene chidzatheke machimo awo akadzakhululukidwa,+ ⁷⁸ chifukwa cha chifundo chachikulu cha Mulungu wathu. Ndi chifundo chimenechi, kuwala kwamʼmawa kudzatifikira kuchokera kumwamba, ⁷⁹ ndipo kudzaunikira amene akukhala mumdima komanso mumthunzi wa imfa+ ndi kutsogolera mapazi athu panjira yamtendere.” ⁸⁰ Choncho mwana uja anakula ndipo analimba mwauzimu. Iye anapitiriza kukhala mʼchipululu mpaka tsiku limene anadzionetsera poyera kwa Isiraeli.