Ndife osangalala kwambiri kuti tili ndi kabuku komanso buku latsopano lomwe tizigwiritsa ntchito pochititsa maphunziro a Baibulo. Tikupempha Yehova kuti atidalitse pamene tikuyesetsa kuphunzitsa anthu ambiri. (Mt 28:18-20; 1Ak 3:6-9) Kodi tizigwiritsa ntchito bwanji zinthu zatsopanozi?

Buku lakuti Mungakhale Ndi Moyo Mpaka Kalekale lizitithandiza kuphunzira Baibulo ndi anthu mochita kukambirana. M‘bukuli muli njira yatsopano yophunzitsira anthu, choncho mukamakonzekera komanso kuchititsa maphunziro a Baibulo muzigwiritsa ntchito njira zotsatirazi. *

• Muziwerenga ndime komanso kukambirana mafunso

• Muziwerenga malemba akuti “werengani” ndipo muzimuthandiza wophunzirayo kumvetsa mmene angawagwiritsire ntchito

• Muzionera komanso kukambirana mavidiyo pogwiritsa ntchito mafunso amene aperekedwa

• Muziyesetsa kumaliza phunziro lililonse pa ulendo umodzi

Tikakhala mu utumiki tiziyamba ndi kugawira kabuku kuti tione ngati munthu ali ndi chidwi. (Onani bokosi lakuti “ Zimene Tingachite Kuti Tigawire Kabuku Kakuti Mungakhale Ndi Moyo Mpaka Kalekale pa Ulendo Woyamba.”) Ngati mwamaliza kuphunzira limodzi kabukuka ndipo wophunzirayo akufuna kupitiriza kuphunzira, muzimugawira buku ndi kuyamba kuphunzira naye phunziro 04. Ngati mukuphunzira ndi munthu pogwiritsa ntchito buku la Zimene Baibulo Limaphunzitsa kapena lakuti Mungatani Kuti Mulungu Azikukondani, yambani kuphunzira naye buku lakuti Mungakhale Ndi Moyo Mpaka Kalekale n’kuona pamene mungayambire.

ONERANI VIDIYO YAKUTI SANGALALANI POPHUNZIRA BAIBULO, NDIPO KENAKO YANKHANI MAFUNSO OTSATIRAWA:

• Kodi anthu aziphunzira chiyani m’buku latsopanoli?

• N’chifukwa chiyani muyenera kumuonetsa vidiyoyi wophunzira watsopano?

• Kodi ndi zolinga ziti zimene muyenera kumulimbikitsa wophunzira kukhala nazo komanso kuzikwaniritsa?​—Onani tchati chakuti “ Cholinga cha Chigawo Chilichonse Komanso Zomwe Wophunzira Akulimbikitsidwa Kuchita.”