YAKOBO ndi Yuda anali abale ake a Yesu, ndipo Petulo ndi Yohane anali m’gulu la atumwi ake 12. Amuna anayi amenewa analemba makalata okwana 7 amene ali m’Malemba Achigiriki. Kalata iliyonse ili ndi dzina la amene anailemba ndipo malangizo ouziridwa amene ali m’makalata amenewa, anaperekedwa pothandiza Akhristu kuti azikhala okhulupirika kwa Yehova ndi Ufumu wake.

Akhristu ayenera kusonyeza chikhulupiriro. Kungonena kuti tili ndi chikhulupiriro si kokwanira. Munthu amene ali ndi chikhulupiriro chenicheni amaoneka ndi zochita zake. Yakobo analemba kuti: “Chikhulupiriro chopanda ntchito zake ndi chakufa.” (Yakobo 2:26) Munthu akasonyeza chikhulupiriro pamene akukumana ndi mayesero, amakhala wopirira. Kuti alimbane ndi mayesero, Mkhristu ayenera kupempha nzeru kwa Mulungu, ndipo azikhulupirira kuti Mulungu adzam’patsa nzeruzo. Mulungu amasangalala ndi munthu amene akupirira. (Yakobo 1:2-6, 12) Munthu akamasonyeza chikhulupiriro potumikira Mulungu ndi mtima wosagawanika, Yehova Mulungu amamuthandiza. Yakobo anati: “Yandikirani Mulungu, ndipo iyenso adzakuyandikirani.”—Yakobo 4:8.

Mkhristu ayenera kukhala ndi chikhulupiriro cholimba kwambiri kuti athe kupewa mayesero komanso zinthu zina zimene zingawononge makhalidwe ake abwino. M’nthawi ya wophunzira Yuda, anthu ankachita zinthu zoipa, ndipo zimenezi zinam’chititsa kulimbikitsa okhulupirira anzake “kumenya mwamphamvu nkhondo yachikhulupiriro.”—Yuda 3.

Akhristu ayenera kukhala ndi makhalidwe abwino. Yehova amafuna kuti anthu amene amamulambira azikhala oyera m’mbali zonse. Petulo analemba kuti: “Inunso khalani oyera m’makhalidwe anu onse, chifukwa Malemba amati: ‘Mukhale oyera, chifukwa ine [Yehova] ndine woyera.’” (1 Petulo 1:15, 16) Akhristu ali ndi chitsanzo chabwino chimene angachitsanzire. Petulo anati: “Khristu anavutika chifukwa cha inu, ndipo anakusiyirani chitsanzo kuti mutsatire mapazi ake mosamala kwambiri.” (1 Petulo 2:21) Ngakhale kuti Akhristu angavutike chifukwa chotsatira malamulo a Mulungu, iwo amakhala ndi “chikumbumtima chabwino.” (1 Petulo 3:16, 17) Petulo analimbikitsa Akhristu kuti akhale ndi khalidwe loyera ndiponso azichita ntchito zosonyeza kuti ndi odzipereka kwa Mulungu. Anawalimbikitsa kuti azichita zimenezi poyembekezera tsiku limene Mulungu adzapereke chiweruzo komanso poyembekezera dziko lapansi latsopano lolonjezedwa mmene “mudzakhala chilungamo.”—2 Petulo 3:11-13.

Akhristu ayenera kusonyeza chikondi. Yohane analemba kuti: “Mulungu ndiye chikondi.” Mtumwiyu ananena kuti Mulungu anasonyeza chikondi chachikulu potumiza Yesu kuti akhale “nsembe yophimba machimo athu.” Ndiyeno kodi Akhristu ayenera kuchita chiyani? Yohane anafotokoza kuti: “Okondedwa, ngati Mulungu anatikonda chonchi, ndiye kuti ifenso tiyenera kukondana.” (1 Yohane 4:8-11) Njira imodzi yosonyezera chikondi chimenechi ndi kuchereza Akhristu anzathu.—3 Yohane 5-8.

Koma kodi munthu amene amalambira Yehova angasonyeze bwanji kuti amamukonda? Yohane anayankha kuti: “Kukonda Mulungu kumatanthauza kusunga malamulo ake, ndipo malamulo akewo ndi osalemetsa.” (1 Yohane 5:3; 2 Yohane 6) Choncho amene amamvera Mulungu asakayikire zoti Mulungu adzapitiriza kuwakonda ndiponso kuti adzawapatsa “moyo wosatha.”—Yuda 21.

​—Nkhaniyi yachokera m’mabuku a Yakobo; 1 Petulo; 2 Petulo; 1 Yohane; 2 Yohane; 3 Yohane; Yuda.