Achinyamata Akufunsa Kuti . . .

Kodi Ndingatani Kuti Ndiziugwira Mtima?

“Nthawi zina ndimawakwiyira makolo anga ndipo ndimanena zinthu zopweteka kwambiri. Sindiwalankhulitsa mpaka mtima wanga uphwe.” —Anatero Kate, wa zaka 13.

“Vuto langa lalikulu n’loti sindidzidalira. Nthawi zina ndimada nkhawa koopsa mumtima mwangamu.”—Anatero Ivan, wa zaka 19.

ZINTHU zimene mumamva mumtima mwanu zimatha kukhala zamphamvu kwambiri. Zimakuchititsani kuganiza ndi kuchita zinthu mwa njira ina yake. Zikhoza kukuchititsani zinthu zabwino kapena zoipa. Nthawi zina maganizo anu akhoza kusokonezeka kumene. Jacob wa zaka 20 anati: “Pafupifupi nthawi zonse ndimamva kuti ndine wolephera. Nthawi zambiri ndimalephera kukwanitsa zinthu zomwe ndimafuna kuchita. Nthawi zina ndimangolira basi, kapena ndimakwiya kwambiri moti ndimawapsera mtima anthu amene ndili nawo pafupi. Ndimavutika kwambiri kuti ndiugwire mtima.”

Komabe, kuti munthu akhale wachikulire wokhwima maganizo ndiponso wodalirika amafunika kuphunzira kuugwira mtima. Akatswiri ena tsopano akukhulupirira kuti kutha kuugwira mtima ndiponso kuchita zinthu bwino ndi anthu ena n’kofunika kwambiri kuposa kukhala munthu wanzeru. Mulimonse mmene angaganiziremo, Baibulo limasonyeza kuti kuugwira mtima n’kofunika kwambiri. Mwachitsanzo, lemba la Miyambo 25:28 limati: “Wosalamulira mtima wake akunga mudzi wopasuka wopanda linga.” Kodi n’chifukwa chiyani kuugwira mtima kumavuta kwambiri?

Achinyamata Zimawavuta

Anthu a zaka zosiyanasiyana ndiponso okulira kosiyanasiyana amavutika kuugwira mtima. Komabe, zimenezi zikhoza kukhala zovuta kwambiri panthawi imene munthu akusintha kuchoka ku ubwana kusanduka wachikulire. Buku lotchedwa Changing Bodies, Changing Lives lolembedwa ndi Ruth Bell limati: “Achinyamata ambiri m’mutu mwawo zinthu zimangoti pwirikiti! Amapezeka kuti asokonezeka maganizo, akusangalala, akuda nkhawa, kapena akusowa chochita. Anthu ambiri amamva mosiyanasiyana mumtima mwawo panthawi yomweyomweyo ndiponso chifukwa cha zinthu zomwezomwezo. . . . Mukhoza kupezeka kuti panopa mukumva mwinamwake, koma pakangodutsa kanthawi kochepa mukumva mwamtundu wina.”

Popeza ndinu wachinyamata, simudziwanso zinthu zambiri. (Miyambo 1:4) Choncho mukamakumana ndi zinthu zachilendo ndi mavuto atsopano kwanthawi yoyamba, n’zosadabwitsa kuti mumayamba  kusadzidalira ndipo mwina mumaona kuti zakuchulukirani. Koma ubwino wake ndi woti Mlengi wanu amadziwa momwe mukumvera. Amadziwa ngakhale ‘zolingalira zanu.’ (Salmo 139:23) M’Mawu ake anaikamo mfundo zina zomwe zingakuthandizeni.

Njira Zabwino Zokuthandizani Kuugwira Mtima

Njira imodzi yokuthandizani kuugwira mtima ndiyo kuphunzira kudziletsa. Kuganizira zinthu zosalimbikitsa kungakufooketseni n’kupezeka kuti mulibenso mphamvu zomwe mukufunikira kuti muchitepo kanthu. (Miyambo 24:10) Koma kodi mungaphunzire bwanji kuganizira zinthu zolimbikitsa n’kuyamba kuugwira mtima?

Chinthu chimodzi chomwe mungachite ndicho kupewa kuganizira zinthu zosalimbikitsa zomwe zingakukhumudwitseni kapena kukudetsani nkhawa. Mutatsatira malangizo a m’Baibulo oti muziganizira kwambiri zinthu “zolemekezeka” ndi “zolungama,” mukhoza kuyamba kuganizira zinthu zolimbikitsa m’malo mwa zinthu zosalimbikitsa. (Afilipi 4:8) Kuchita zimenezi kukhoza kukhala kovuta, koma mukhoza kukwanitsa zimenezi mutachita khama.

Taganizirani mtsikana winawake dzina lake Jasmine. Iye anadandaulapo kuti: “Ndikuona kuti zinthu zandichulukira. Ndili ndi ntchito yatsopano ndi maudindonso atsopano. Ndatopa kwambiri moti sindikutha kuganiza bwinobwino. Ndimalephera ngakhale kupeza nthawi yopumula.” N’zosadabwitsa kwa wachinyamata kumva choncho nthawi zina, ndipo angamade nkhawa, n’kuyamba kusadzidalira. Baibulo limatiuza za mnyamata winawake dzina lake Timoteo, amene anali woyenerera bwino kwambiri kuchita ntchito imene anapatsidwa. Komabe, zikuoneka ngati ankadziona kuti akuperewera penapake.—1 Timoteo 4:11-16; 2 Timoteo 1:6, 7.

N’kutheka kuti mumayamba kudziona kuti mukuperewera penapake mukakumana ndi zochitika kapena ntchito yatsopano. Mukhoza kumaganiza kuti: ‘Sindingathe n’komwe kuchita zimenezi.’ Koma mukhoza kudziletsa kuganizira zinthu zofooketsa zoterozo mwa kusalola maganizo oterowo. Limbikirani kuphunzira momwe mungagwirire bwino ntchitoyo. Muzifunsa mafunso ndi kutsatira malangizo.—Miyambo 1:5, 7.

Mukayamba kuitha ntchito ija, m’pamenenso mumayamba kudzidalira. Musamangokhalira kuganizira zofooka zanu, chifukwa zingakulepheretseni kuchita khama kuti muyambe kuigwira bwino ntchitoyo. Panthawi ina mtumwi Paulo atadzudzulidwa, anayankha kuti: “Ndingakhale ndili wosaphunzira m’manenedwe, koma sinditero m’chidziwitso.” (2 Akorinto 10:10; 11:6) Mofanana ndi zimenezo, mukhoza kuyamba kudzidalira ngati mutavomereza kuti pali zinthu zina zimene mumachita bwino ndi kupempha Mulungu kuti akuthandizeni kulimbana ndi zofooka zanu. Mulungu akhoza kukuthandizanidi, monga momwe anathandizira anthu akale.—Eksodo 4:10.

Njira ina imene ingakuthandizeni kuugwira mtima ndiyo kukhala ndi zolinga zabwino, zoti mukhozadi kuzikwanitsa ndi kuzindikira kuti pali zinthu zina zomwe simungathe kuchita. Chinanso, pewani kudziyerekezera molakwika ndi anthu ena. Pa Agalatiya 6:4, Baibulo limapereka malangizo abwino. Limati: “Yense ayesere ntchito yake ya iye yekha, ndipo pamenepo adzakhala nako kudzitamandira chifukwa cha iye yekha, si chifukwa cha wina.”

Kubweza Mkwiyo

Kubweza mkwiyo kukhoza kukhala vuto lina lalikulu. Mofanana ndi Kate, amene tamutchula poyambirira uja, mkwiyo umachititsa achinyamata ambiri kunena ndi kuchita zinthu zopweteka ena ndi zowononga.

N’zoona kuti aliyense amakwiya nthawi zina. Koma kumbukirani munthu woyamba kupha mnzake, Kaini. Pamene “anakwiya kwambiri,” Mulungu anamuchenjeza kuti mkwiyo woterowo ukhoza kumuchititsa tchimo lalikulu. Anafunsa Kaini kuti: ‘Iwenso sudzalamulira [tchimolo] kodi?’ (Genesis 4:5-7, NW) Kaini sanamvere malangizo a Mulungu amenewa. Koma inuyo mukhoza kubweza mkwiyo wanu ndi kupewa kuchimwa pothandizidwa ndi Mulungu.

Apanso chachikulu ndi kudziletsa. Pa Miyambo 19:11, Baibulo limati: “Kulingalira kwa munthu kuchedwetsa mkwiyo; ulemerero wake uli wakuti akhululukire cholakwa.” Winawake akakukwiyitsani, yesetsani kumvetsa chifukwa chimene wachitira zimenezo. Kodi munthuyo amafuna kukupsetsani mtima mwadala? Kodi n’kutheka kuti munthuyo  anangopupuluma pochita zimenezo kapena anazichita m’chimbulimbuli? Kulolera zolakwa za ena kumasonyeza kuti mukutsanzira chifundo cha Mulungu, ndipo kungakuthandizeni kubweza mkwiyo wanu.

Koma bwanji ngati pali chifukwa chabwino chokwiyira? Malemba amati: ‘Kwiyani, koma musachimwe.’ (Aefeso 4:26) Ngati pangafunike kutero, kambiranani ndi munthu winayo. (Mateyu 5:23, 24) Kapena mwina chinthu chabwino kwambiri kuchita ndicho kusiya kukwiyako n’kungoiiwala nkhaniyo.

Mwina simungaganize choncho, koma zimene mumachita mukakwiya mukhoza kuzitengera kwa anzanu. Choncho Baibulo limalangiza kuti: “Usayanjane ndi munthu wokwiya msanga; ngakhale kupita ndi mwamuna waukali; kuti ungaphunzire mayendedwe ake, ndi kutengera moyo wako msampha.”—Miyambo 22:24, 25.

Kukhala ndi anthu amene amayesetsa kubweza mkwiyo wawo kungakuthandizeni kuphunzira kudziletsa. M’mipingo yachikristu ya Mboni za Yehova muli anthu ambiri okhwima maganizo oterowo, ndipo ambiri a iwo ndi aakulu ndiponso odziwa zambiri kuposa inuyo. Adziweni bwino ena mwa anthu amenewa. Yang’anitsitsani zomwe amachita akakumana ndi mavuto. Akhozanso kukupatsani malangizo abwino zinthu zikakuvutani. (Miyambo 24:6) Jacob, amene tinamutchula kale uja, anati: “Ndimaona kuti kukhala ndi mnzanga wokhwima maganizo amene angandikumbutse Mawu a Mulungu n’kothandiza kwambiri. Ndikakumbukira kuti Yehova amandikonda ngakhale kuti sindidzidalira, ndimatha kuugwira mtima n’kukhala pamtendere.”

Zinthu Zina Zothandiza Zomwe Mungachite

Buku lina lodziwika kwambiri lonena za kuchita zinthu zolimbitsa thupi limati: “Kafukufuku wambirimbiri wasonyeza kuti mmene mumagwiritsira ntchito thupi lanu zimakhudza maganizo anu chifukwa cha zimene zimachitika m’kati mwa thupi lanu. Timadzi tinatake ta m’thupi ndi mpweya umene uli m’thupi lanu zimasintha malinga ndi mmene mukugwiritsira ntchito thupi lanu.” N’zosachita kufunsa, kuchita zinthu zolimbitsa thupi n’kothandiza. Baibulo limatiuza kuti: “Kulimbitsa thupi kuli ndi phindu ndithu.” (1 Timoteo 4:8, Chipangano Chatsopano mu Chichewa cha Lero) Bwanji osayamba kuchita zinthu zolimbitsa thupi nthawi ndi nthawi ndiponso mosapambanitsa? Zingakuthandizeni kumamva bwino mumtima. Kudya zakudya zabwino kungakuthandizeninso.

Ganiziraninso nyimbo ndi zosangalatsa zomwe mumakonda. Pa kafukufuku winawake amene zotsatirapo zake anazilemba m’buku lotchedwa The Harvard Mental Health Letter anapeza kuti: “Kuonerera zachiwawa . . . kumachititsa munthu kukhala ndi mkwiyo ndiponso kufuna kuchita zachiwawa. . . . Anthu amene ankaonerera mafilimu achiwawa ankaganizira zinthu zambiri zachiwawa ndiponso magazi awo ankathamanga kwambiri kuposa anthu omwe sankaonerera zachiwawazo.” Choncho muzisankha mwanzeru zinthu zimene mumamvera ndi kuonerera.—Salmo 1:1-3; 1 Akorinto 15:33.

Koposa zonse, njira yabwino kwambiri yokuthandizani kuugwira mtima ndiyo kukhala pa ubwenzi wabwino ndi Mlengi wanu. Mlengiyu amatipempha tonsefe kuti tizimulankhula m’pemphero, kuti tizimuuza zakukhosi ndiponso zimene tikumva mu mtima mwathu. Mtumwi Paulo analimbikitsa kuti: ‘Musadere nkhawa konse. Zopempha zanu zidziwike kwa Mulungu. Ndipo mtendere wa Mulungu wakupambana chidziwitso chonse, udzasunga mitima yanu ndi maganizo anu.’ Zoonadi, mukhoza kukhala ndi mphamvu zokuthandizani kulimbana ndi chilichonse pamoyo wanu. Mtumwi Paulo anawonjezera kuti: “Ndikhoza zonse mwa Iye wondipatsa mphamvuyo.”—Afilipi 4:6, 7, 13.

Mtsikana wina wamng’ono dzina lake Malika anati: “Ndaphunzira kupemphera nthawi zonse. Kudziwa kuti Yehova amandikonda kumandithandiza kukhala pamtendere ndi kuugwira mtima.” Mothandizidwa ndi Mulungu, nanunso mukhoza kuphunzira kuugwira mtima.

[Mawu Otsindika patsamba 29]

Njira imodzi yokuthandizani kuugwira mtima ndiyo kuphunzira kudziletsa

[Chithunzi patsamba 30]

Kucheza ndi anthu achikulire kungakuthandizeni kuphunzira kuugwira mtima