NKHANI YA PACHIKUTO | N’CHIFUKWA CHIYANI TIYENERA KUCHITA ZINTHU MOONA MTIMA?

Kodi Chinyengo N’choopsa Bwanji?

YAMBANI

Mayi wina wa ku South Africa, dzina lake Samantha, anati: “Mavuto ena angathe ngati utangochitako kachinyengo pang’ono.”

Kodi mukugwirizana ndi zimene mayiyu ananena? N’zoona kuti munthu aliyense amakumana ndi mavuto amene angamuchititse kuganiza zochita chinyengo. Komano zimene timachita tikakumana ndi mavuto oterowo zimasonyeza zomwe zili mumtima mwathu. Mwachitsanzo, munthu akhoza kulolera kuchita chinyengo n’cholinga choti asagwidwe komanso asachite manyazi. Koma zoona zake zikadziwika, munthuyo amakumana ndi mavuto aakulu. Tiyeni tione mavuto amene amabwera chifukwa cha chinyengo.

ANTHU AMASIYA KUKUKHULUPIRIRA

Anthu akamakhulupirirana m’pamene amagwirizana kwambiri. Koma sikuti zimenezi zimangochitika lero ndi lero. Anthu amayamba kukhulupirirana akamacheza nthawi zonse n’kumauzana zakukhosi komanso kuchita zinthu moganizirana. Komabe wina akachita zachinyengo ngakhale kamodzi kokha, mnzakeyo amasiya kumukhulupirira. Ndipotu zimakhala zovuta kuti ayambirenso kukhulupirirana.

Kodi munayamba mwanamizidwapo ndi munthu amene munkaona kuti ndi mnzanu wapamtima? Ngati ndi choncho, n’zosakayikitsa kuti munakhumudwa kwambiri. Kunena zoona chinyengo chimasokoneza mgwirizano ndiponso chibale.

CHINYENGO CHILI NGATI MATENDA OPATSIRANA

Pulofesa wa pa yunivesite ya California, dzina lake Robert Innes, anachita kafukufuku wina ndipo anapeza kuti “chinyengo chili ngati matenda opatsirana.” Choncho zimakhala zosavuta kuti munthu ayambe kuchita chinyengo ngati amakonda kuchita zinthu ndi munthu wachinyengo.

Kodi mungatani kuti musamachite nawo zinthu zachinyengo? Werengani mfundo za m’Baibulo zomwe zingakuthandizeni.

Zimene Anthu Achinyengo Amachita

Amanena Bodza

KODI MUNTHU WABODZA AMATANI? Munthu wabodza amauza munthu wina zinthu zomwe si zoona. Nthawi zina amatha kusintha nkhani, kubisa mfundo zina, kapena kuikokomeza kwambiri.

ZIMENE BAIBULO LIMANENA: “Pakuti munthu wochita zachiphamaso Yehova amanyansidwa naye, koma amakonda anthu owongoka mtima.” (Miyambo 3:32) “Popeza tsopano mwataya chinyengo, aliyense wa inu alankhule zoona kwa mnzake.”—Aefeso 4:25.

Amanena Miseche

KODI MUNTHU WAMISECHE AMATANI? Amanena zinthu zabodza komanso zoipa zokhudza munthu wina n’cholinga chomuipitsira mbiri.

ZIMENE BAIBULO LIMANENA: “Kazitape amangokhalira kuyambitsa mikangano, ndipo wonenera anzake zoipa amalekanitsa mabwenzi apamtima.” (Miyambo 16:28) “Popanda nkhuni moto umazima, ndipo popanda munthu wonenera anzake zoipa mikangano imazilala.”—Miyambo 26:20.

Amaba Mwachinyengo

KODI MUNTHU WAKUBA MWACHINYENGO AMATANI? Munthu wakuba mwachinyengo amanyengerera kapena kupusitsa munthu wina n’cholinga choti amubere.

ZIMENE BAIBULO LIMANENA: “Usachitire chinyengo waganyu wovutika ndiponso wosauka n’kumubera.” (Deuteronomo 24:14, 15) “Wobera munthu wosauka mwachinyengo amanyoza amene anamupanga, koma wokomera mtima munthu wosauka amalemekeza amene anamupanga.”—Miyambo 14:31.

Amaba

KODI MUNTHU WAKUBA AMATANI? Munthu wakuba amatenga katundu, ndalama kapena zinthu zina zomwe si zake popanda chilolezo.

ZIMENE BAIBULO LIMANENA: “Wakubayo asabenso, koma agwire ntchito molimbikira. Agwire ndi manja ake ntchito yabwino, kuti akhale ndi kanthu kena kopatsa munthu wosowa.” (Aefeso 4:28) “Musasocheretsedwe. . . . Akuba, aumbombo, zidakwa, olalata, kapena olanda, onsewo sadzalowa mu ufumu wa Mulungu.”—1 Akorinto 6:9, 10.

NSANJA YA OLONDA