M’mawiki akubwerawa, m’mayiko osiyanasiyana padziko lonse mukhala mukuchitika zisankho, ndipo anthu akuganizira zosankha atsogoleri amene akufuna kuti adzawalamulire.

 Kodi Baibulo limanena zotani?

 Baibulo limanena kuti maulamuliro onse a anthu ali ndi malire.

•   “Musamakhulupirire anthu olemekezeka, kapena mwana wa munthu wina aliyense wochokera kufumbi amene alibe chipulumutso. Mzimu wake umachoka, ndipo iye amabwerera kunthaka. Pa tsiku limenelo zonse zimene anali kuganiza zimatheratu.”​—Salimo 146:3, 4, mawu a m’munsi.

 Ngakhale olamulira ena amakhala abwino, n’kupita kwa nthawi amafa. Komanso, sangayembekezere kuti anthu amene adzabwere pambuyo pawo adzapitiriza ntchito zabwino zimene iwowo ankachita.​—Mlaliki 2:18, 19.

 Zoona zake n’zakuti Baibulo limanena kuti sizingatheke kuti anthu azidzilamulira okha bwinobwino.

•   “Munthu amene akuyenda alibe ulamuliro wowongolera mapazi ake.”​—Yeremiya 10:23.

 Kodi alipo amene angalamulire anthu bwinobwino masiku ano?

 Baibulo limafotokoza kuti Mulungu wasankha mtsogoleri wabwino kwambiri ndiponso wodalirika, Yesu Khristu. (Salimo 2:6) Yesu ndi Mfumu ya Ufumu wa Mulungu womwe ndi boma lomwe likulamulira kuchokera kumwamba.​—Mateyu 6:10.

 Kodi musankha Yesu kukhala mtsogoleri wanu? Baibulo limafotokoza chifukwa chake kupeza yankho la funsoli kuli kofunika:

•   “Psompsonani mwanayo [Yesu Khristu] kuopera kuti Mulungu angakwiye, ndipo mungawonongeke ndi kuchotsedwa panjirayo. Pakuti mkwiyo wake umatha kuyaka mofulumira. Odala ndi onse amene akuthawira kwa iye.”​—Salimo 2:12.

 Panopa ndi nthawi yoti musankhe zochita. Ulosi wa m’Baibulo umasonyeza kuti Yesu anayamba kulamulira m’chaka cha 1914 ndipo posachedwapa Ufumu wa Mulungu ulowa m’malo mwa maboma onse a anthu.​—Danieli 2:44.

 Kuti mudziwe zambiri zomwe mungachite kuti mukhale kumbali ya ulamuliro wa Yesu, werengani nkhani yakuti, “Sankhani Kukhala Kumbali ya Ufumu wa Mulungu Panopa.”