26 JULY, 2022
RUSSIA

Anapeza Mphamvu Pogwiritsa Ntchito Pemphero

YAMBANI

Posachedwa khoti la Mzinda wa Surgut m’Dera la Khanty-Mansi Autonomous Area—Yugra, lipereka chigamulo chake pa mlandu wa abale 17 ndi mlongo mmodzi. Pa gululo pali M’bale Vyacheslav Boronos, Saveliy Gargalyk, Yevgeniy Kayryak, Artem Kim, Sergey Loginov, Aleksey Plekhov komanso M’bale Sergey Volosnikov. Loya waboma sananene chilango chomwe akufuna kuti anthuwa apatsidwe.

Nthawi Komanso Zimene Zinachitika

15 February, 2019

Apolisi anakafufuza zinthu m’nyumba zambiri za Mboni za Yehova ku Surgut ndi m’mizinda ina yapafupi. Pamapeto pake, abale atatu kuphatikizapo Sergey Loginov anakatseredwa kundende poyembekezera kuwazenga mlandu. Pambuyo pake m’bale wina anauzidwa kuti apite kuchipatala cha anthu ovutika maganizo. Abale 7 omwe atchulidwa munkhaniyi anamenyedwa ndi apolisi chifukwa choti anakana kuulula Akhristu anzawo
26 February, 2019

Khoti Loona za Ufulu wa Anthu ku Europe linalamula boma la Russia kuti litulutse m’ndende Sergey Loginov kuti akalandire chithandizo kuchipatala
11 April, 2019

Sergey Loginov anatulutsidwa m’ndende
29 October, 2021

Mlandu unayamba kuzengedwa

Zokhudza Anthuwa

Yevgeniy Kayryak

Chaka chobadwa: 1986 (Ku Surgut)

Mbiri yake: Iye limodzi ndi makolo ake komanso ana ena awiri am’banjamo, anayamba kuphunzira Baibulo cha m’ma 1990. Iye anabatizidwa mu 2006. Anakwatira Rosanna mu 2016.

Zimene Ananena

N’chiyani chakuthandizani kuti musamakhale ndi nkhawa?

Nthawi zina ndimamvetsera nyimbo zathu za Ufumu. Komanso kupemphera kochokera pansi pamtima kumandithandiza kukhazikitsa maganizo m’malo. Ndili pa ukaidi wosachoka pa khomo, ndinali ndi kope lomwe ndinkalembamo mavesi a m’Baibulo komanso mawu a nyimbo zathu.

Nthawi zambiri ndimaganizira mawu opezeka pa Mateyu 10:28 akuti: “Musachite mantha ndi amene amapha thupi koma sangaphe moyo.” Mawu amenewa omwe amapezekanso m’nyimbo yathu ina, amandithandiza kuti ndizidalira kwambiri Yehova.

Munkamva bwanji pomwe khoti linkamvetsera mlandu wanu?

Ndinkaona kuti Yehova ankandithandiza kuti ndikhale wolimba mtima. . . . Ukamadziwa kuti ukuchita zinthu zogwirizana ndi choonadi, sumadziimba mlandu. Ndikaimirira, ndinkalankhula molimba mtima komanso mwaulemu. Ndikamalankhulapo pomwe khoti likumvetsera mlandu wathu, kunkathandiza ine ndi mkazi wanga kukhala olimba mtima.

Sergey Loginov

Chaka chobadwa: 1961 (M’dziko la Bashkortostan)

Mbiri yake: Makolo ake anamwalira adakali mwana. Kwa zaka zambiri ankasamalira azakhali ake. Anachita maphunziro a uinjiniya wa zamagetsi ndipo kwa zaka zambiri wakhala akugwira ntchito zamagetsi

Mu 1993 anayamba kuphunzira Baibulo ndi Mboni za Yehova. Anachita chidwi ndi mfundo za m’Baibulo ndipo ankafunitsitsa kuzitsatira pa moyo wake. Anabatizidwa mu 1996

Zimene Ananena

N’chiyani chinakuthandizani kuti mukhalebe wokhulupirika ngakhale kuti ankakuchitirani nkhanza mutamangidwa?

Ndinkapempha Yehova kuti andipatse mphamvu . . . Komanso kuti ndizichita zinthu modekha . . . Ukakumana ndi zinthu zomwe palibenso zomwe ungachite, umaona Yehova akukuthandiza m’njira yachilendo. Ndingatero kuti ndinkamudalira kwambiri kuti andithandiza.

Aleksey Plekhov

Chaka chobadwa: 1977 (Ku Surgut)

Mbiri yake: Kuyambira ali mwana ankakhala ndi mafunso okhudza Mulungu. Kenako anapeza mayankho okhutiritsa kuchokera m’Baibulo ndipo anabatizidwa mu 1996

Amagwira ntchito yowotcherera zitsulo. Mu 2013 anakwatira Anna ndipo ali ndi ana awiri aakazi

Zimene Ananena

N’chiyani chinakuthandizani kuti mukhalebe wokhulupirika pamene munkatsutsidwa?

Yesu anachenjeza ophunzira ake kuti adzazunzidwa, choncho ndinkayembekezera kuti nthawi ina ndidzazunzidwa. Kungodziwa za zinthu zinazake ndi kosiyana kwambiri ndi kukumana nazo. Nthawi imeneyo chomwe ndinkaganizira ndikukhalabe wokhulupirika mpaka pamapeto. Tsiku lonse ndinkangoimba chamumtima nyimbo ija yakuti “Ndithandizeni Ndikhale Wolimba Mtima.” Ndipo ndikakhala kuti ndikuzunzidwa ndinkayimba nyimboyi mobwerezabwereza.

Pomwe abale athu akupitiriza kukumana ndi mayesero, tili ndi chikhulupiriro chonse kuti Yehova akumva mapemphero awo komanso kuwayankha mwamsanga pomwe akufunikira kwambiri thandizo lake.—Salimo 69:17.

Mwina Mungakondenso Kudziwa Izi

NKHANI

Anamangidwa Chifukwa Chotsatira Zimene Amakhulupirira ku Russia

Oimira gulu lina la zachitetezo la FSB anamanga a Dennis Christensen chifukwa chotenga nawo mbali pa msonkhano wa Mboni za Yehova womwe unkachitika mwamtendere mumzinda wa Oryol ku Russia.

NKHANI