Kodi Mdyerekezi Alipodi?
Yankho la m’Baibulo
Inde Mdyerekezi alipodi. Iye ndi “wolamulira wa dziko,” mngelo amene anakhala woipa ndipo sanamvere Mulungu. (Yohane 14:30; Aefeso 6:11, 12) Baibulo limasonyeza zochita za Mdyerekezi kudzera m’matanthauzo a mayina ake otsatirawa:
Satana, kutanthauza “Wotsutsa.”—Yobu 1:6.
Mdyerekezi, kutanthauza “Woneneza.”—Chivumbulutso 12:9.
Njoka, dzina lomwe m’Baibulo limagwiritsidwa ntchito potanthauza “Wachinyengo.”—2 Akorinto 11:3.
Woyesa.—Mateyu 4:3.
Wabodza.—Yohane 8:44.
Mdyerekezi si uchimo umene umakhala mumtima mwa munthu
Anthu ena amaganiza kuti Mdyerekezi ndi khalidwe la uchimo limene limakhala mumtima mwa munthu. Koma Baibulo limanena kuti nthawi ina Mulungu analankhula ndi Satana. Mulungu alibe uchimo ndiye sizikanatheka kuti azilankhula ndi uchimo umene unali mumtima mwake. (Deuteronomo 32:4; Yobu 2:1-6) Komanso Satana anayesapo Yesu amene alibe uchimo. (Mateyu 4:8-10; 1 Yohane 3:5) Choncho Baibulo limasonyeza kuti Mdyerekezi alipodi ndipo si uchimo umene umakhala mumtima mwa munthu.
Kodi tiyenera kudabwa tikamaona kuti anthu ambiri amakhulupirira kuti kulibe Mdyerekezi? Ayi, chifukwatu Baibulo limanena kuti Satana amagwiritsira ntchito njira zachinyengo kuti zolinga zake zitheke. (2 Atesalonika 2:9, 10) Njira yaikulu imene Satana amapusitsira anthu n’kuwachititsa kuti azikhulupirira kuti iyeyo kulibe.—2 Akorinto 4:4.
Zinthu zabodza zimene anthu ena amakhulupirira zokhudza Mdyerekezi
Zimene anthu ena amakhulupirira: Dzina lina la Mdyerekezi ndi Lusifara.
Zoona zake: Liwu la Chiheberi limene m’Mabaibulo ena amalimasulira kuti “Lusifara” limatanthauza “wonyezimira.” (Yesaya 14:12) Nkhani imene ili m’chaputalachi ikusonyeza kuti mawu amenewa amatanthauza mafumu a Babulo amene Mulungu ananena kuti adzawachititsa manyazi chifukwa cha kudzikuza kwawo. (Yesaya 14:4, 13-20) Mawu akuti “wonyezimira” anagwiritsidwa ntchito m’njira yoseka mafumu a Babulo pamene anagonjetsedwa.
Zimene anthu ena amakhulupirira: Mulungu amagwiritsira ntchito Satana pofuna kulanga anthu.
Zoona zake: Mdyerekezi ndi mdani wa Mulungu osati mtumiki wake. Satana Mdyerekezi amazunza komanso kunenera mabodza anthu amene amatumikira Mulungu.—1 Petulo 5:8; Chivumbulutso 12:10.
Mwina Mungakondenso Kudziwa Izi
NSANJA YA OLONDA
Kodi Satana Ndi Maganizo Oipa Chabe?
Pali nkhani za m’Baibulo ziwiri zimene zingatithandize kupeza yankho la funso limeneli.
KUYANKHA MAFUNSO A M’BAIBULO
Kodi Mulungu Analenga Mdyerekezi Kuti Azitiyesa?
Kodi Satana anachokera kuti? Werengani nkhaniyi kuti mudziwe chifukwa chake Yesu ananena kuti Mdyerekezi “sanakhazikike m’choonadi.”
MFUNDO ZOFUNIKA ZA M'BAIBULO
N’chifukwa Chiyani Mulungu Amalola Kuti Anthu Azivutika?
Anthu ambiri amafuna kudziwa kuti n’chifukwa chiyani padzikoli pali mavuto ambiri. Baibulo limapereka yankho logwira mtima pa nkhaniyi.
KUYANKHA MAFUNSO A M’BAIBULO
Kodi Mdyerekezi Angalamulire Zochita za Anthu?
Kodi Mdyerekezi amakola bwanji anthu, ndipo ifeyo tingatani kuti tisakodwe ndi misampha yake?
ZIMENE BAIBULO LIMAPHUNZITSA
Yambani Kuphunzira Baibulo
Phunzirani Baibulo kwaulere, mochita kukambirana ndi mphunzitsi wanu.