Onani Zimene Ena Amacita Bwino
Cifukwa Cake Zingakhale Zovuta
Kudzikuza kumayambitsa tsankho. Munthu wodzikuza amadziona wofunika kwambili kuposa mmene alili. Amadziona kuti ni wapamwamba, ndipo anthu osiyana na iye amawaona kuti ni otsika. Aliyense angagwele mu msampha wa kudzikuza. Buku lakuti Encyclopædia Britannica limati: “M’zikhalidwe zambili, anthu amaona kuti mmene amacitila zinthu pa umoyo wawo, zakudya zawo, vovala, zizoloŵezi, zikhulupililo zawo, zokonda zawo, na zina zotelo ndiye zabwino kwambili kuposa za anthu ena.” Kodi tingapewe bwanji maganizo olakwika amenewa?
Mfundo ya m’Baibo
“Musacite ciliconse ndi mtima wokonda mikangano kapena wodzikuza, koma modzicepetsa, ndi kuona ena kukhala okuposani.”—AFILIPI 2:3.
Kodi mfundo imeneyi itanthauza ciani? Kuti tipewe kudzikuza, tifunika kukulitsa khalidwe la kudzicepetsa. Kudzicepetsa kumatithandiza kuzindikila kuti, pa zinthu zina, anthu ena amacita bwino kuposa ife. Palibe mtundu wa anthu umene uli na makhalidwe onse abwino na maluso.
Ganizilani citsanzo ca Stefan. Iye anakulila m’dziko la cikomyunizimu, koma anakwanitsa kuthetsa maganizo a tsankho oona kuti anthu a m’maiko amene si a cikomyunizimu ni otsika. Iye anati: “Niona kuti kuona ena kukhala otiposa n’kofunika kwambili polimbana na khalidwe la tsankho. Ine sinidziŵa zonse. Ndipo ningaphunzile cinacake kwa munthu aliyense.”
Zimene Mungacite
Muzidziona moyenela, ndipo musaiŵale kuti pali zina zimene simucita bwino. Vomelezani kuti ena amacita bwino pa mbali zimene imwe simucita bwino. Musakhale na maganizo akuti anthu onse a mtundu winawake ali na zofooka zofanana.
Mukakumana na munthu wocokela mu mtundu winawake, musathamangile kumuona kuti ali na vuto. Koma dzifunseni kuti:
Vomelezani kuti anthu ena amacita bwino pa mbali zina kuposa imwe
-
‘Kodi makhalidwe amene sinikondwela nawo mwa munthu ameneyu ni oipadi, kapena ni osiyana cabe na makhalidwe anga?’
-
‘Kodi munthu ameneyu anganipeze zifukwa ine?’
-
‘Kodi ni mbali ziti zimene munthu ameneyu amacita bwino kuposa ine?’
Ngati mungayankhe mafunso amenewa moona mtima, mungathetse maganizo alionse olakwika amene muli nawo kwa munthuyo. Komanso mungazindikile kuti munthuyo ali na makhalidwe ena amene mungakonde.
