GUMA NOOREEBA!

2022: Gubaire Guri Omwaka gw’Okushoberwa—Baibuli Neegamba Ki?

TANDIKA

Entaro, oburemeezi omu by’entaatsya, n’ebihikiirizi ebireetsirweho embeera mbi y’obwire nibyo bibaire nibikirayo omu makuru omu 2022. Baibuli niyo yonka erikushoboorora amakuru g’ebibaireho byona.

Amakuru genyini ag’ebibaireho omu 2022

Ebibaireho omu 2022 nibyongyera kuhamiza kimwe ngu turi omu bwire obu Baibuli erikweta ‘ebiro by’emperu.’ (2 Timoseo 3:1) Obwire obu bukatandika omuri 1914. Yetegyereze ebibaireho oku birikuhikaana n’ebi Baibuli yaagizire ngu bikaba nibiija kubaho omu bwire obu:

Entaro.—Matayo 24:6.

“2022 nigwo mwaka obu Europe egarukire kugwerwa akagwe k’entaro.” a

Reeba ekicweka, “Russia Okutaahirira Ukraine.”

“Enjara.”—Matayo 24:7.

“2022: Nigwo mwaka obu haabaireho enjara y’amaani.” b

Reeba ekicweka, “Orutaro rwa Ukraine Rwongyeire aha Ibura ry’Eby’okurya omu Nsi Yoona.”

Endwara z’amaani.—Luka 21:11.

“Poliyo egarukire, amatojo gaayeyongyera, kandi na COVID-19 neekigumizamu kuba ey’akabi. Ebi byona byorekire ngu endwara ezirikuturira n’ez’akabi, kandi ngu abantu bari omu kabi k’amaani.” c

Reeba ekicweka, “Abantu Obukaikuru 6 Baitsirwe COVID.”

“Ebirikutiinisa.”—Luka 21:11.

“Obutagatsi bw’amaani, ekyanda, omuriro, n’emyegyemure. Obwire bw’omushana omu 2022, buzima nibwija kuguma nibwijukwa ahabw’embeera mbi y’obwire eyaareetsireho okucwekyerera, okufa kw’abantu baingi, n’abandi obukaikuru bakahunga omu myanya yaabo omu nsi yoona.” d

Reeba ekicweka, “Obutagatsi Obutakabahoga omu Byafaayo omu Nsi Yoona.”

“Okujagarara [nari, obutabanguko].”—Luka 21:9.

“Eby’entaatsya bireetaire abantu kutabuka na munonga ahabw’ebeeyi y’ebintu kutemba, ekireetaire abantu kuhakanisa gavumenti nyingi omu 2022.” e

Reeba ekicweka, “Ebeeyi y’Ebintu Kutemba omu Nsi Yoona.”

Niki ekiraabeho omwaka ogurikwija?

Tihariho omuntu orikubaasa kumanya gye ebiraabeho omu 2023. Kwonka eki turikumanya n’okugira ngu juba, Obukama bwa Ruhanga, nari gavumenti ey’omu iguru, neija kuhindura embeera omu nsi. (Danieli 2:44) Gavumenti egi neija kwihaho okubonabona kw’abantu, reero ebi Ruhanga arikukunda bikorwe omu nsi.—Matayo 6:9, 10.

Nitukuhiga kukuratira obuhabuzi bwa Yesu Kristo, reero ‘ogume nooreeba’ oku ebirikubaho omu nsi birikuhikiiriza obunabi bwa Baibuli. (Mako 13:37) Nyabura ’we tumanyise waaba nooyenda kwongyera kumanya oku Baibuli erikubaasa kukuhwera hati, n’oku erikubaasa kukuha amatsiko ga nyentsya n’ab’eka yaawe.

a Amakuru agaashohoziibwe Associated Press, “2022 nigwo mwaka obu Europe egarukire kugwerwa akagwe akarikureetwaho entaro,” bikagambwa Jill Lawless, Okwaikumi-n’abari 8, 2022.

b “Ibura ry’Eby’okurya omu Nsi Yoona,” bikagambwa Ekitongore ky’Eby’okurya omu Nsi Yoona

c Akatabo k’Eby’amagara, “Turi omu Bwire bw’Ebigyererezi—nka COVID-19, Amatojo, Poliyo, n’Ezindi Ndwara,” bikagambwa Lawrence O. Gostin, JD, Okwamwenda 22, 2022.

d Earth.Org, “Niki Ekireetsireho Embeera Mbi y’Obwire Etakabahoga omu Bwire bw’Omushana omu 2022?” bikagambwa Martina Igini, Okwaikumi 24, 2022.

e Okuhaajaana aha Kureetaho Obusingye omu Nsi Yoona, “Entaatsya Mbi Ereetsireho Obwesharingo omu Nsi Yoona omu 2022,” bikagambwa Thomas Carothers na Benjamin Feldman, Okwaikumi-n’abiri 8, 2022.