“Obu naabaire ndi muto, munyaanyazi akaba naanteera, kandi arikunjuma buri izooba. Ku naashwairwe, maazaara nawe akaguma naantwariza kubi. Maazaara na tatazaara bakaba nibantwariza nk’omuhuuku. Nkaba ninteganisibwa enyehurira z’okwenda kweita.”—Madhu, a kuruga India.

 “Omu nsi yoona, abakazi nibo barikukira kutwarizibwa kubi,” bikahamibwa Ekitongore ky’Eby’amagara omu Nsi Yoona. Ekitongore eki nikiteebereza ngu haihi omukazi omwe ahari bashatu naabonabonesibwa, nari naatwarizibwa kubi omu nshonga y’okuteerana.

 Eki ku kiraabe kirakubaireho, hoona ahu orikuza noobaasa kuhurira otaine burinzi, orikuteekateeka ngu noija kuhikwaho akabi omu bigambo, aha mubiri, nari omu by’okuteerana. Okukwitsa omwaga n’okukutwariza kubi ahabw’obuhangwa bwawe, nikibaasa kukureetera kuteekateeka ngu abantu baingi ‘tibarikufayo aha bakazi.’ Kwonka shi buzima Ruhanga naafayo aha bakazi?

 Ekyahandiikirwe: “[Ruhanga akahanga] omushaija n’omukazi.”—Okutandika 1:27.

 Eki kirikumanyisa: Ruhanga akahanga abashaija hamwe n’abakazi. Bombi naabareeba nk’abaine kuheebwa ekitiinisa. Kandi, naayenda ngu omushaija ‘akunde omukazi we, nk’oku arikwekunda,’ beitu kutari kumutegyekyereza, okumujuma, nari okumwitsya omwaga. (Abaefeso 5:33; Abakolosai 3:19) Buzima, Ruhanga naafayo aha burinzi bw’abakazi.

 “Obu naabaire ndi muto, nkatorobozibwa abanyabuzaare. Obu naabaire nyine emyaka 17, mukama wangye aha murimo akantiinatiinisa ngu naaza kumbinga naaba ntateeraine nawe. Ku naakuzire, nkatandika kutwarizibwa kubi ibanyi, abazaire, n’abataahi. Kwonka bwanyima nkaija naayega ebirikukwata ahari Yehova, b Omuhangi. Naatwara abakazi nk’ab’ekitiinisa. Eki kikampamiza ngu naankunda, kandi ngu naantwara nk’ow’omuhendo.”—Maria, kuruga Argentina.

 Ekyahandiikirwe: ‘Hariho munywani w’omuntu [orikumuba haihi] okukira owaazairwe nawe.’—Enfumu 18:24.

 Eki kirikumanyisa: Omunywani owaabuzima naakuhwera. Enyehurira zaawe zigambire omuntu ou orikwesiga, kyaba nikibaasika.

 “Okumara emyaka 20 tihaine ou naagambiire ngu nkaba nintwarizibwa kubi omu kuteerana. N’ekyarugiremu, nkaburwa okushemererwa, naagira okwerarikirira, n’amaganya. Kwonka ebi naabaire nindabamu ku naarugireho nkabigambira omuntu owaampurikiize, nkatunga oburuhuuko bw’amaani.”—Elif, kuruga Türkiye.

 Ekyahandiikirwe: ‘Yegyekyera [Ruhanga] okushoberwa kwawe kwona, ahabw’okuba naakutaho omutima.’—1 Petero 5:7.

 Eki kirikumanyisa: Waashaba, Ruhanga buzima naahurira okushaba kwawe. (Zaaburi 55:22; 65:2) Ahabw’okugira ngu naakufaho, naabaasa kukuhwera kwetegyereza oku buzima ori ow’omuhendo.

 “Okwega ebirikukwata ahari Yehova kikampwera kutandika kukira ebironda by’omu mutima ebi naabaire nyine. Hati nimbaasa kuhungira ahari Ruhanga kurabira omu kushaba. Ari nk’omunywani orikwetegyereza gye enyehurira zangye.”—Ana, kuruga Belize.

 Ekyahandiikirwe: ‘[Yehova] naija kucwera efuuzi n’abarikuburabuzibwa, emanja [z’oburingaaniza], omuntu-buntu arekye kubatiinisa obundi.’—Zaaburi 10:​17, 18.

 Eki kirikumanyisa: Ruhanga ari haihi kumaraho obutari buringaaniza bwona, otwariiremu okutwariza kubi abakazi, n’okubaitsa omwaga.

 “Okumanya ngu Yehova ari haihi kumaraho okutwarizibwa kubi kw’abakazi n’abaishiki bato, kumbeereire nk’omubazi ogurikukiza. Ntungire obusingye bw’omu biteekateeko.” —Roberta, kuruga Mexico.

 Okwega ebirikukiraho aha matsiko agu Baibuli erikuha, ahabw’enki orikubaasa kwesiga ebi erikuraganisa, n’oku Abajurizi ba Yehova hati barikuhwera abantu barikukoresa Baibuli, shaba okuhaire obutumwa obu kuguma naakutaayaayira.

 Noobaasa kwihaho ekicweka eki eky’omuringo oguteirwe.