Ekitebyo 42

Endogoya Okugamba

ORAHURIIREHO endogoya neegamba? ‘Ngaaha,’ nikwo orikubaasa kugira. ‘Enyamaishwa tizirikubaasa kugamba.’ Kwonka Baibuli neegamba aha ndogoya eyaagambire. Ka tureebe oku kyabaireho.

Abaisraeli bari haihi kutaaha omu nsi ya Kanaani. Balaki, omugabe wa Moabu, atiinire ahabw’Abaisraeli. N’ahabw’ekyo atuma kweta omushaija omunyabwengye orikwetwa Balamu okwija kukyeena Abaisraeli. Balaki araganisa kuheereza Balamu esente nyingi, n’ahabw’ekyo Balamu atemba endogoya ye atandika omuhanda gwe kureeba Balaki.

Yehova tarikwenda Balamu kukyeena abantu Be. N’ahabw’ekyo Yehova ayohereza maraika aine rurara ndaingwa kwemerera omu muhanda okutangiriza Balamu. Balamu tarikureeba maraika kwonka endogoya yo nemureeba. N’ahabw’ekyo endogoya eguma neegyezaho okweshumba maraika, kandi aha muheru ebyama ahansi omu muhanda. Balamu aitwa ekiniga kingi munonga, atyo atandika kuteera endogoya ye enkoni.

Omu kaanya ako Yehova areetera Balamu okuhurira endogoya neegamba nawe. ‘Naakukora ki ekishemereire kukureetera okunteera?’ endogoya emubuuza etyo.

Balamu agira ati: ‘Naakutura okundebeekyesa nk’otaine bwengye. Kuri naaba nyine rurara naaba ninkwita!’

‘Hariho obu ndakugizire nti?’ endogoya eba nikwo yaamubuuza.

Balamu agarukamu ati: ‘Ngaaha.’

Bwanyima Yehova areetera Balamu kureeba maraika aine rurara ayemereire omu muhanda. Maraika amubuuza ati: ‘Ahabw’enki waateera endogoya yaawe? Naija kukutangiriza omu muhanda, ahabw’okuba, toshemereire kuza kukyeena Israeli. Endogoya yaawe kuri etampunga, naaba nimba naakwitsire, kwonka naaba ntarikubaasa kwita ndogoya yaawe.’

Balamu agira ati: ‘Naashiisha. Naaba ntarikumanya ngu oyemereire omu muhanda.’ Maraika aikiriza Balamu kugumizamu, atyo Balamu agumizamu kuza kureeba Balaki. Kandi nabwo agyezaho kukyeena Israeli, kwonka, omu mwanya gw’ekyo, Yehova amureetera okuheereza Israeli emigisha emirundi eshatu.

Okubara 21:21-35; 22:1-40; 23:1-30; 24:1-25.