Ekihandiiko aha Kisiika
Ekitebyo 78
Ekihandiiko aha Kisiika
N’ENKI ekirikubaho aha? Abantu bari aha bugyenyi buhango. Omugabe wa Babulooni ayetsire abagyenyi bakuru rukumi. Bariyo nibakoresa ebikopo by’ezaabu n’efeeza hamwe n’enyabya ebyaihirwe omuri hekalu ya Yehova omuri Yerusaalemu. Kwonka, ahonaaho, enkumu z’engaro z’omuntu zireebeka omu mwanya zitandika kuhandiika aha kisiika. Buri omwe atiina.
Belishaza mwijukuru wa Nebukadeneeza, hati niwe mugabe. Agamba n’eiraka rihango kumureetera abanyabwengye be. Omugabe agira ati: ‘Omuntu weena oraashome ekyo kihandiiko, akakinshobororera, naija kuheebwa ebiconco bingi kandi naija kuba omutegyeki wa kashatu omu bugabe.’ Kwonka tihaine n’omwe omu banyabwengye orikubaasa kushoma ekihandiiko ky’aha kisiika, n’obu kwakuba okukishoborora.
Nyina w’omugabe ahurira oruyombo, aija omu nju y’obugyenyi. Agambira ati omugabe: ‘Naakweshengyereza, reka kwemereza omutima. Hariho omushaija omu bugabe bwawe orikumanya baaruhanga abarikwera. Obu shwenkuru yaawe Nebukadeneeza yaabaire ari omugabe akamuhindura omukuru w’abanyabwengye be boona. Eiziina rye ni Danieli. Tuma bamukwetere, naija kukugambira eki ebi byona birikumanyisa.’
Batyo ahonaaho Danieli bamureeta. Bwanyima y’okwanga kwakiira ebihembo, Danieli atandika kugamba ahabw’enki Yehova yaihireho Nebukadeneeza Ishenkuru wa Belishaza aha kuba omugabe. Danieli agira ati; ‘Akaba aine amaryo, Yehova nikwo kumufubira.’
Danieli agambira Belishaza ati: ‘Kandi naiwe omutabani Belishaza, n’obu oraabe waamanyire byona ebyamubaireho, okiine amaryo nk’oku Nebukadeneeza yaabaire ari. Oreetsire ebikopo n’enyabya kuruga omu hekalu ya Yehova kandi waabinyweramu. Waasingiza baaruhanga abakozirwe omu biti n’omu mabaare, kandi tohaire Omuhangi waitu ow’Obushoboorozi ekitiinisa. Egyo niyo nshonga ahabw’enki Ruhanga yaayohereza omukono kuhandiika ebi bigambo.’
Danieli agira ati: ‘Ebi nibyo bihandikirwe.’ ‘MENE, MENE, TEKEELI, na PARASIINI.’
‘MENE nikimanyisa ngu Ruhanga abazire ebiro by’obugabe bwawe yaabugarukiza aho. TEKEELI nikimanyisa ngu opimirwe aha minzaani waashangwa otahikire. PARASIINI nikimanyisa ngu obugabe bwawe bubaganisiibwemu, bwaheebwa Abameedi n’Abaperesi.’
N’obu Danieli yaabaire akyagamba, Abameedi n’Abaperesi bakaba baatandikire kuzinda Babulooni. Bakwata orurembo kandi baita Belishaza. Ekihandiiko eky’aha kisiika kyahikiirira ekyo kiro! Kwonka hati n’enki ekiraahike aha Baisraeli? Nituza kukireeba, kwonka ka tubanze tureebe ekyabaire ahari Danieli.
