Ekitebyo 92

Yesu Okuzoora Abafu

OMWISHIKI ou orikureeba aha aine emyaka 12 y’obukuru. Yesu akwitse omukono gwe, kandi nyina n’ishe babemereire haihi. Noomanya ahabw’enki nibareebeka bashemereirwe? Ka twetegyereze.

Ishe w’omwishiki n’omushaija w’ekitiinisa orikwetwa Yairo. Eizooba rimwe omuhara we akarwara, kandi baamuta aha kitanda. Kwonka tiyaaba gye. Yaaguma naayeyongyera kuba kubi munonga. Yairo n’omukazi we beerarikiriire munonga, ahabw’okuba nikireebeka ngu omwishiki waabo omuto naaza kufa. Niwe mwishiki ou baine wenka. Nikwo Yairo kugyenda akaza kusherura Yesu. Ahuriire eby’okutangaaza ebi Yesu arikukora.

Yairo ku abona Yesu, ashanga omutwe muhango gw’abantu bamwetoroire. Kwonka Yairo abaasa kuraba omuri abo bantu agwa aha bigyere bya Yesu. Amushaba naagira ati: ‘Muhara wangye arwaire munonga. Naakweshengyereza ija omukize.’ Yesu agira ngu naaza kwija.

Ku baba nibagyenda, abantu baguma nibabasindikiriza kumuhikaho. Ahonaaho Yesu ayemerera. Abuuza ati: ‘N’oha owankoraho?’ Yesu akahurira amaani gaamurugamu, n’ahabw’ekyo naamanya ngu haine owamukwataho. Kwonka shi n’oha? N’omukazi otwire arwaire okumara emyaka 12. Akaija yaakora aha kijwaro kye atyo yaakira!

Eki kireetera Yairo kushemererwa ahakuba hati naareeba oku kyanguhi ahari Yesu okukiza omuntu. Kwonka kandi entumwa eija egambira Yairo eti: ‘Muhara waawe yaakaba, otarusya omwegyesa.’ Yesu akihurira kandi agambira Yairo ati: ‘Otatiina, naija kukira.’

Bwanyima ku bahika aha nju ya Yairo, bashanga abantu nibacura baine obusaasi bwingi. Kwonka Yesu agira ati: ‘Mutarira, omwana tafiire. Agwejegyeire kwonka. Kwonka bamushekyerera munonga ahabw’okuba nibamanya ku afiire.’

Yesu aho atwara ishe w’omwishiki na nyina hamwe na bashatu aha beegi be omu kishengye ei omwana yaabaire abyami. Amukwata omukono, agira ati: ‘Imuka!’ Amagara ge gamugarukamu, nk’oku orikureeba aha. Aimuka, kandi agyendagyenda! Egyo niyo nshonga ahabw’enki nyina n’ishe bashemereirwe munonga.

Ogu tiwe muntu w’okubanza ou Yesu azoire kuruga omu bafu. Ow’okubanza ou Baibuli erikutugambira ni mutabani w’omufaakazi orikutuura omu rurembo rwa Naini. Bwanyima, Yesu kandi azoora Laazaaro, munyaanya wa Mariamu na Mariza, kuruga omu bafu. Yesu ku araategyeke nk’omugabe wa Ruhanga, naija kuzoora abantu baingi munonga abaafiire bagarukye babe abahuriire. Ekyo tikirikutushemeza?

Luka 8:40-56; 7:11-17; Yohaana 11:17-44.