Ekitebyo 88

Yohaana Okubatiza Yesu

REEBA egyo nkombe erikushuuma kugwa aha mutwe gw’omushaija. Omushaija ogwo ni Yesu. Hati aine emyaka nka 30 y’obukuru. Kandi omushaija ori nawe ni Yohaana. Twine eki twamwegireho enyimaho. Noijuka obu Mariamu yaaza kutaayaayira omunyabuzaare we Elizaabeesi, haza omwana omunda ya Elizaabeesi akagurukaguruka ahabw’okushemererwa? Ogwo mwana waabaire atakazairwe ni Yohaana. Kwonka shi hati Yohaana na Yesu nibakora ki?

Yohaana yaaheza kwibika Yesu omu maizi g’Omugyera Yorudaani. Oku nikwo omuntu arikubatizibwa. Eky’okubanza naibikwa omu maizi, reero bwanyima kandi aihwamu. Ahabw’okuba eki nikyo Yohaana arikukora, abantu nibamweta Yohaana Omubatiza. Kwonka ahabw’enki Yohaana yaabatiza Yesu?

Yohaana akakikora ahabw’okuba Yesu akaija yaashaba Yohaana kumubatiza. Yohaana naabatiza abantu abarikwenda kworeka ngu beeteisize ahabw’ebintu bibi ebi bakozire. Kwonka shi Yesu akaba akozire ekintu kibi kyona ekishemereire kumureetera kweteisa? Ngaaha, Yesu taine kibi kyona eki yaakozire, ahabw’okuba n’Omwana wa Ruhanga wenyine kuruga omu iguru. N’ahabw’ekyo akashaba Yohaana kumubatiza ahabw’enshonga ey’omutaano. Ka tureebe enshonga egi.

Yesu atakaizire ahari Yohaana, akaba ari omubaizi. Omubaizi n’omuntu orikukora ebintu kuruga omu miti, nk’emeeza, entebe n’embaaho. Iba wa Mariamu Yosefu akaba ari omubaizi, kandi akeegyesa Yesu nawe kuba omubaizi. Kwonka Yehova tarayohereize Omwana we omu nsi kuba omubaizi. Amwiniire omurimo gw’omutaano, kandi obunaku buhikire Yesu okutandika kugukora. N’ahabw’ekyo okworeka ngu akaija kukora ebi Ishe akunda, Yesu ashaba Yohaana okumubatiza. Ruhanga eki naakishemerererwa?

Eego, naakishemerererwa, ahakuba, bwanyima ya Yesu kuruga omu maizi, eiraka kuruga omu iguru rikagira riti: ‘Ogu n’Omwana wangye ou nshemerererwa.’ Kandi, nikireebeka iguru rikakinguuka reero nkombe egi yaija ahari Yesu. Kwonka ti nkombe ya buzima. Nereebeka nkayo kwonka. Buzimazima n’omwoyo wa Ruhanga orikwera.

Mbwenu hati, Yesu aine bingi eby’okuteekateekaho, atyo aza omu mwanya gwehereire kumara ebiro 40. Okwo Sitaane amushangayo. Emirundi eshatu, egyezaho kumutega okukora ekintu ekirikuhenda ebiragiro bya Ruhanga. Kwonka Yesu tarikubaasa kukikora.

Bwanyima y’ekyo, Yesu agaruka abugana abashaija abaahindukire abakuratsi be b’okubanza, nari shi abeegi. Amaziina ga bamwe ahari bo ni Anderea, Petero (orikwetwa Simooni) Filipo na Nasanaeli (orikwetwa Batolomayo). Yesu n’aba beegi be abasya baza omuri Galilaaya. Omuri Galilaaya beemereraho omu tauni ei Nasanaeli arikutuura erikwetwa Kaana. Okwo Yesu aza kutaaha obugyenyi bw’okushwera kandi akorerayo eky’okutangaaza kye ky’okubanza. Noomanya eky’okutangaaza ekyo? Akahindura amaizi viinyo.

Matayo 3:13-17; 4:1-11; 13:55; Mako 6:3; Yohaana 1:29-51; 2:1-12.