Ekitebyo 113

Paulo Omuri Rooma

REEBA enjegyere ezitsibire Paulo, kandi reeba omuserikare Omurooma omurinzire. Paulo n’omusibe omuri Rooma. Ategyereize okuhitsya obu Kaisaari omugabe wa Rooma araacwemu eky’okumukorera. Akiri omusibe, abantu nibaikirizibwa kumutaayaayira.

Amazire ebiro bishatu ahikire Rooma, Paulo atuma aha bakuru b’Abayudaaya kwija kumureeba. Ekyarugiremu Abayudaaya baingi ab’omuri Rooma baija. Paulo ababuurira ebirikukwata ahari Yesu n’obukama bwa Ruhanga. Abamwe baikiriza bahinduka Abakristayo, kwonka abandi banga kwikiriza.

Paulo kandi abuurira abaserikare abatari bamwe abaabaire baheebwa omurimo gw’okumurinda. Emyaka ebiri ei yaamazire aha ari omusibe, Paulo akaba abuurira buri muntu ou yaabaire abaasa kugamba nawe. Ekyarugiremu, n’ab’omu maka ga Kaisaari baahurira amakuru marungi g’Obukama, kandi abamwe omuri bo baahinduka Abakristaayo.

Beitu omugyenyi ogu ori aha meza naahandiika n’oha? Noobaasa kuteeba? Eego, ni Timoseo. Timoseo nawe akaba ari omu kihome ahabw’okubuurira aha by’Obukama bwa Ruhanga, kwonka hati takiri musibe. Kandi yaija aha kuhwera Paulo. Noomanya eki Timoseo arikuhandiika? Ka tureebe.

Noijuka etauni ya Filipi n’eya Efeso omu Kitebyo kya 110? Paulo akahwera omu kutandikaho ebibiina by’Abakristaayo omu tauni ezo zombi. Mbwenu, ari omu kihome, Paulo ahandiikira Abakristaayo aba amabaruha. Ebaruha ezi ziri omu Baibuli kandi nizeetwa Abaefeso na Abafilipi. Hati Paulo ariyo naagambira Timoseo eby’okuhandikira Abakristaayo banywani baabo ab’omuri Filipi.

Abafilipi batwire bainiire Paulo embabazi. Bakamutwekyera ekiconco aha omu kihome, kandi nikyo Paulo arikubebariza. Epafurodiito niwe mushaija owaaretsire ekiconco ekyo. Kwonka Epafurodiito akarwara munonga haihi afe. Hati akizire kandi ayetebeekaniise kutaaha owaabo. Naija kutwara ebaruha egi erikuruga ahari Paulo na Timoseo yaaba naagaruka Filipi.

Ari omu kihome, Paulo ahandiika ezindi baruha ibiri ezitwine omu Baibuli. Emwe n’ey’Abakristaayo b’omu tauni ya Kolosai. Noomanya oku erikwetwa? Neeyetwa Abakolosai. Endiijo n’eya munywani we ow’ahamara orikwetwa Filemooni nawe orikutuura omuri Kolosai. Ebaruha neekwata aha muheereza wa Filemooni, Onesimo.

Onesimo akatoroka ahari Filemooni yaaza Rooma. Onesimo akamanya ku Paulo ari aha omu kihome. Yaija kumutaayaayira, atyo Paulo yaabuurira Onesimo. Omu mwanya mukye, Onesimo nawe yaahinduka Omukristaayo. Hati Onesimo nayefuuza ekyamutoroire. Mbwenu noomanya eki Paulo yaahandiika omu baruha egi eya Filemooni?

Paulo naashaba Filemooni okusaasira Onesimo. Paulo yaahandiika ati: ‘Ndiyo nimukwoherereza. Kwonka ti muheereza waawe kwonka. Kureka n’ow’eishe-emwe murungi.’ Onesimo agaruka Kolosai atwara ebaruha ezo ibiri, emwe ey’Abakolosai, endiijo eya Filemooni. Nitubaasa kuteekateeka aha kushemererwa oku Filemooni yaagizire okumanya ngu omuheereza we ahindukire Omukristaayo.

Paulo obu yaahandiikira Abafilipi na Filemooni, kwo buzima akaba aine amakuru marungi. Paulo akagambira Abafilipi ati: ‘Nimboherereza Timoseo. Kwonka naanye niinyija kubataayaayira omu biro bikye. Kandi ahari Filemooni ahandiika ati: ‘Ntebeekanisiza ah’okuraara.’

Paulo ku aruga omu kihome, ataayaayira ab’eishe-emwe omu myanya mingi. Kwonka bwanyima Paulo agaruka asibirwa Rooma omurundi ogundi. Aha murundi ogu naamanya ngu naija kwitwa. Atyo ahandiikira Timoseo amushaba kwija juba. Ahandiika ati: ‘Ndinzire obwesigwa ahari Ruhanga, kandi Ruhanga naija kumpa ekiconco.’ Hahingwireho emyaka mikye Paulo aherize kwitwa, Yerusaalemu egaruka ehwerekyerezibwa, aha murundi ogu ehwerekyerezibwa Abarooma.

Kwonka omu Baibuli harimu ebindi bingi. Yehova Ruhanga akeejunisa entumwa Yohaana okuhandiika ebitabo ebirikushembayo omu Baibuli, otwariiremu n’ekitabo ky’Okushuuruurwa. Ekitabo kya Baibuli eki nikigamba aha biro by’omu maisho. Hati ka twegye ebirikukwata aha biro by’omu maisho.

Ebyakozirwe 28:16-31; Abafilipi 1:13; 2:19-30; 4:18-23; Abaheburaayo 13:23; Filemooni 1-25; Abakolosai 4:7-9; 2 Timoseo 4:7-9.