Ekitebyo 31

Musa na Arooni Okuza Kureeba Faraho

MUSA ku yaahikire Misri, yaagambira mwene ishe Arooni byona ebirikukwata aha by’okutangaaza. Kandi Musa na Arooni ku baayorekire Abaisraeli eby’okutangaaza ebi, abantu boona bakaikiriza ngu Yehova akaba ari nabo.

Bwanyima Musa na Arooni bakaza kureeba Faraho. Baamugambira bati: ‘Yehova Ruhanga wa Israeli naagira ati: “Reka abantu bangye bagyende omu ihamba kumara ebiro bishatu bandamye.”’ Kwonka Faraho yaabagarukamu ati: ‘Tindikwikiririza omuri Yehova. Kandi tindikuza kwikiriza Abaisraeli kugyenda.’

Faraho akeitwa ekiniga ahabw’okuba abantu bakaba nibenda kuruga aha murimo kuza kuramya Yehova. N’ahabw’ekyo, yaabagyema kukora emirimo erikukiraho. Abaisraeli baajunaana Musa ahabw’oku baabaire nibatwazibwa kubi kandi na Musa yaaguubwa kubi. Kwonka Yehova yaamugambira kutafayo. Yehova yaagira ati: ‘Niinyija kureetera Faraho kurekura abantu bangye.’

Musa na Arooni baagaruka baaza kureeba Faraho. Aha murundi ogu baakora eky’okutangaaza. Arooni akarekyera enkoni ye ahansi, kandi yaahindukamu enjoka mpango. Kwonka abanyabwengye ba Faraho nabo baarekyera ahansi enkoni zaabo, kandi zaahindukamu enjoka. Kwonka reeba! enjoka ya Arooni eriyo neemira enjoka z’abanyabwengye! Nabwo Faraho yaayanga kwikiriza Abaisraeli kugyenda.

N’ahabw’ekyo obunaku bwa Yehova kwegyesa Faraho eishomo buhika. Noomanya oku yaarimwegyeise? Akarimwegyesa arikureeta ebibonaboneso 10, ninga obusaasi bwingi omuri Misri.

Bwanyima y’ebibonaboneso bingi, Faraho akatuma kweta Musa, kandi yaamugira ati: ‘Ihaho eki kibonaboneso, haza niinyija kureka Abaisraeli bagyende.’ Kwonka ekibonaboneso ku kyabaire kiihwaho, Faraho akaba ahindura ekiteekateeko kye. Akaba ataikiriza bantu kugyenda. Kwonka, aha muheru gwa byona, bwanyima y’ekibonaboneso kya 10, Faraho akoohereza Abaisraeli baagyenda.

Noomanya buri kibonaboneso ahari ebi 10? Shuuruura orupapura orurikukurataho tubyegeho.

Okuruga 4:27-31; 5:1-23; 6:1-13, 26-30; 7:1-13.