ESHUURA 37

Nyine Kubatizibwa Shi?

Taho akamanyiso aha kihikire nari ekigwire:

Abakristaayo baine kubatizibwa.

□ Kihikire

□ Kigwire

Ekigyendererwa kikuru ky’okubatizibwa n’okukurinda kutagwa omu kibi.

□ Kihikire

□ Kigwire

Okubatizibwa nikukuhistya aha kujunwa.

□ Kihikire

□ Kigwire

Waaba otabatiziibwe, Ruhanga tarikukujunaana ahabw’ebikorwa byawe.

□ Kihikire

□ Kigwire

Banywani baawe baabatizibwa, nikimanyisa ngu naiwe ohikire kubatizibwa.

□ Kihikire

□ Kigwire

KU ORAABE noogyendera aha mitindo ya Ruhanga, orikuhamya omukago gwawe nawe, kandi orikugambira abandi ebi orikwikiriza, buzima nikiba kiri ekya butoosha iwe kuteekateeka aha kubatizibwa. Kwonka shi noomanya ota yaaba ohikire kubatizibwa? Kubaasa kugarukamu ekibuuzo ekyo, ka tushwijume yaaba ebiri aha ruguru bihikire nari bigwire.

● Abakristaayo baine kubatizibwa.

Kihikire. Yesu akaragiira abakuratsi be kubatizibwa. (Matayo 28:19,20) Nangwa, Yesu nawe akabatizibwa. Kubaasa kukuratira Kristo, oine kubatizibwa waakuzire ekirikumara kubaasa kwecweramu, kandi oine ekihika ky’okwenda kukikora.

● Ekigyendererwa kikuru ky’okubatizibwa n’okukurinda kutagwa omu kibi.

Kigwire. Okubatizibwa n’akamanyiso k’okworeka muranga ngu oyehaireyo ahari Yehova. Okwehayo kwawe ti ndagaano erikukuzibira kukora ebintu ebi omu mutima gwawe gurikwenda kukora. Kureka, noohayo amagara gaawe ahari Yehova ahabw’okuba nooyenda kugyendera aha mitindo ye.

● Okubatizibwa nikukuhistya aha kujunwa.

Kihikire. Baibuli neegamba aha kubatizibwa nk’eidaara rikuru erikukuhistya aha kujunwa. (1Petero 3:21) Kwonka eki tikirikumanyisa ngu okubatizibwa ni nk’enshumbuushano ei orikushashurira kugira ngu ekurinde haabaho ekigwererezi. Noobatizibwa ahabw’okuba nookunda Yehova, kandi nooyenda kumuheereza ebiro byona n’omutima gwawe gwona.—Mako 12:29, 30.

● Waaba otabatiziibwe, Ruhanga tarikukujunaana ahabw’ebikorwa byawe.

Kigwire. Yakobo 4:17 nihagira hati: “Omuntu orikumanya kukora ebirungi, atabikore, ahariwe kiba kibi,” yaaba abatiziibwe nari atabatiziibwe. N’ahabw’ekyo waaba noomanya ekihikire kandi okuzire ekirikumara kubaasa kucwamu, obundi obu nibwo bwire bw’okugaaniira n’omuzaire waawe nari Omukristaayo okuzire omu by’omwoyo aha nshonga egyo. Obwo, noija kumanya oku orikubaasa kutunguuka kuhika aha kubatizibwa.

● Banywani baawe baabatizibwa, nikimanyisa ngu naiwe ohikire kubatizibwa.

Kigwire. Okucwamu kw’okubatizibwa kwine kuruga aha mutima gwawe oyekundiire. (Zaaburi 110:3) Kubaasa kubatizibwa oine kuba noomanya gye ekirikutwarirwa omu kuba omwe aha Bajurizi ba Yehova, kandi oyeteekateekire kuhikiiriza obujunaanizibwa obu.—Omubuurizi 5:4,5.

Okubatizibwa Nikuhindura Amagara Gaawe

Okubatizibwa n’okucwamu okurikuhindura amagara, kandi kukareeta emigisha mingi. Kwonka nikutwariramu n’obujunanizibwa bw’amaani, obw’okuhikiiriza okwehayo kwawe ahari Yehova.

Ori haihi kuhika aha kigyendererwa ekyo? Kyaba nikwo kiri, buzima ekyo kiine kukureetera okushemererwa. Ahabw’okuba omugisha ogurikukirayo oburungi gukutegyereize, nigwo ogw’okuheereza Yehova n’omutima gwawe gwona, kandi okooreka ngu oyehaireyo ahariwe.—Matayo 22:36, 37.

OMU SHUURA ERIKUKURATAHO

Yega oku orikubaasa kutaho ebigyendererwa kugira ngu okorese gye amagara gaawe.

EKYAHANDIIKIRWE KIKURU

“Muheyo emibiri yaanyu kuba ebitambo ebihuriire, ebirikwera, kandi ebirikusiimwa Ruhanga, nikwo kuheereza kwanyu oku mushemereire kumuha [murikukoresa okubaasa kwanyu kw’okuteekateeka].”—Abarooma 12:1.

AKAKORYO

Orikuhwerwa abazaire baawe, tunga omuntu omu kibiina orikubaasa kukuhwera kugunguuka kuhika aha kubatizibwa. —Ebyakozirwe 16:1-3.

EKI WAABA NOOKIMANYA . . .

Okubatizibwa n’ekikorwa kikuru ekirikukuhwera kugira “akamanyiso“ akarikwija kukutaanisaho kubaasa kujunwa.—Ezekieli 9:4-6.

EKY’OKUKORA!

Kubaasa kutunguuka kuhika aha kubatizibwa, ninyija kwongyera aha ku ndikwetegyereza enyegyesa za Baibuli ezi: ․․․․․

Eki ndikwenda kubuuza abazaire bangye aha nshonga egi ni ․․․․․

NOOTEEKATEEKA KI?

● Ahabw’enki okubatizibwa n’eidaara rikuru?

● Niki ekirikubaasa kureetara omunyeeto kuhika aha idaara ry’okubatizibwa ahonaaho?

● Ni nshonga ki erikubaasa kureetera omunyeeto kutimwimwa kwehayo n’okubatizibwa?

[Ebigambo ebitoorainwe]

“Okubatiziibwa kikampwera kucwamu gye n’okwetantara ebintu ebyabaire nibibaasa kundugiramu akabi.”​—Holly

[Akabokusi/​Ekishushani]

Ebibuuzo Ebirikukira Kubuuzibwa aha Kubatizibwa

Okubatizibwa nikujwekyera ki? Okwibikwa omu maizi nikyoreka ngu orekyeire aho kwebembeza ebyawe, nooba nooshusha ngu omuntu waawe owa ira yaafa, kandi okuruga ahansi omu maizi nikyoreka ngu waaba ohuriire omu kukora ebi Yehova arikukunda.

Okuhayo amagara gaawe ahari Yehova nikimanyisa ki? Nikimanyisa okweferereza ebyawe ebi orikukunda, okaraganisa kwebembeza kukora ebi Ruhanga arikukunda okukira ekindi kyona. (Matayo 16:24) N’eky’oburyo kwehayo ahari Yehova omu kushaba otakabatiziibwe.

Ni bintu ki ebi oine kuba nookora otakabatiziibwe? Oine kuba nookuratira emitindo y’Ekigambo kya Ruhanga kandi orikugambira abandi ebi orikwiririzamu. Oine kuba noohamya omukago gwawe na Ruhanga kurabira omu kushaba n’okweyegyesa Ekigambo kye. Oshemereire kuba oyecwerairemu kuheereza Yehova, beitu kutari kugyemeserezibwa abandi.

Hariho emyaka ei oshemereire kubatirizibwaho? Emyaka tikyo kikuru. Kwonka nabwo, oine kuba okuzire ekirikumara orikwetegyereza amakuru g’okwehayo.

Kandi shi ku waakuba nooyenda kubatizibwa kwonka abazaire baawe bakagira ngu obe otegyereizeho? Obundi nibenda ngu oyongyere kugira emitwarize y’Ekristaayo. Hurikiza obuhabuzi bwabo, kandi okorese obwire obwo kwongyera kuhamya omukago gwawe na Yehova.—1 Samueli 2:26.

[Akabokusi]

Eby’okukora

Oine ekiteekateeko ky’okubatizibwa?

Manya ahu waahika omu kutunguuka kwawe orikushwijuma ebibuuzo n’ebigambo ebiri ahaifo. Teeraho kushoma Ebyahandiikirwe ebirikworekwa otakahandiikire eby’okugarukamu byawe.

Hati nooyoreka ota ngu nooyesiga Yehova?​—Zaaburi 71:5. ․․․․․

Obaasize kworeka ota ngu oine okubaasa kw’okutaanisa ekibi n’ekirungi?​—Abaheburaayo 5:14. ․․․․․

Nooshaba emirundi engahi? ․․․․․

Omu kushaba kwawe noogamba kyenyini eki orikwenda, kandi shi ebi orikugamba nibyoreka ngu oiniire Yehova rukundo?​—Zaaburi 17:6. ․․․․․

Handiika ebigyendererwa ebi orikwenda kutaho aha bikwatiraine n’okushaba kwawe. ․․․․․

Nooyeyegyesa Baibuli obutoosha?​—Yoshua 1:8. ․․․․․

Niki ekirikutwarirwa omu kweyegyesa kwawe? ․․․․․

Handiika ebigyendererwa ebi orikwenda kutaho aha bikwatirine n’okweyegyesa. ․․․․․

Obuheereza bwawe niburugamu ebirungi? (Nk’eky’okureeberaho: Noobaasa kushoboororera abandi amazima ga Baibuli agarikutandikirwaho? Noogarukira abayooreka ngu nibenda kumanya ebirikukiraho? Nookora n’amaani kugira ou waatandika kwegyesa Baibuli?)

□ Eego □ Ngaaha

Nooyejumba omu kubuurira n’obu abazaire baawe batarikubuurira?​—Ebyakozirwe 5:42.

□ Eego □ Ngaaha

Handiika ebigyendererwa ebi orikwenda kutaho aha bikwatiraine n’okubuurira kwawe.​—2 Timoseo 2:15.

Nooza omu nteerane butoosha nari nookira kwosha?​—Abaheburaayo 10:25.

Ni mu miringo ki ei orikwejumba omu nteerane? ․․․․․

Nooza omu nteerane abazaire baawe baaba batarikubaasa kuzayo (kwonka bakuhaire orusa kugyenda)?

□ Eego □ Ngaaha

Noobaasa kugira ngu nooshemerererwa okukora ebi Ruhanga arikukunda? ​—Zaaburi 40:8.

□ Eego □ Ngaaha

Handiika ahaifo obu waayangiire okugyemeserezibwa kw’ab’orwingano rwawe?​—Abarooma 12:2.

Oyetebeekaniise ota kuguma oine omukago guhami na Yehova?​—Yuda 20, 21.

Noobaasa kugumizamu nooheereza Yehova n’obu abazaire baawe n’abanywani baawe baakurekyera aho?​—Matayo 10:36, 37.

□ Eego □ Ngaaha

[Ekishushani]

Nk’obushwere, okubatizibwa n’okucwamu okurikuhindura amagara, n’ahabw’ekyo oshemereire kukutwara nka kukuru munonga