Baadaimoni n’Abaitsi!

Sitaane na baadaimoni batwire bari abainazi kandi ab’akabi. Omu biro bya ira, Sitaane akaita amatungo n’abaheereza ba Yobu omwesigwa. Bwanyima yaita abaana ba Yobu ikumi arikwejunisa “omuyaga gw’amaani” kukumbagaza enju ei baabaire barimu. Bwanyima y’ebyo, Sitaane yaarwaza Yobu “ebihuute bibi, okuruga aha mara g’ebigyere okuhika aha kazingiro k’eishokye.”—Yobu 1:7-19; 2:7.

Omu bunaku bwa Yesu, baadaimoni bakareetera bamwe kuba ebiteta n’okuba empumi. (Matayo 9:32, 33; 12:22) Bakabonabonesa omushaija omwe kandi baamureetera kwesharashara n’amabaare. (Mako 5:5) Kandi bakareetera omwojo muto kwamuza, baamugwisa entsimbo kandi ‘baamutaagura munonga.’—Luka 9:42.

Ebiro ebi, Sitaane na baadaimoni bakiri abaitsi nk’oku baabaire bari ira. Buzima, omurimo gwabo  ogu omubi gutwire nigweyongyera okwiha obu baabingwa omu iguru. Amakuru omu nsi yoona nigahamya ngu n’abainazi. Nibarwaza abantu abamwe endwara. Abandi nibababuza obusingye nyekiro, bababuza oturo nari babarootesa ebirooto birikutiinisa. Abandi nibabahamba. Kandi nibagwisa abandi eiraro, babagyema kwita, nari babareetera kweita.

Lintina, orikutuura omuri Suriname, naagira ngu daimoni, nari shi omwoyo omubi, akaita abantu 16 ab’omu ka yaabo kandi baamubonabonesa omu mubiri n’omu biteekateeko okumara emyaka 18. Kurugiirira aha bi yaarabiremu we ahabwe, naagira ngu baadaimoni “nibashemerererwa okunyangaraza abantu baabo abarikwanga kuhikiiriza ebi barikwenda, bahika n’aha kubaita.”

Kwonka Yehova naabaasa kurinda abaheereza be okutazindwa Sitaane.—Enfumu 18:10.

[Ebishushani ebiri aha rupapura 11]

Omu biro bya ira, baadaimoni bakareetera abantu kurwara, baagwisa n’abandi entsimbo

[Ebishushani ebiri aha rupapura 12]

Baadaimoni ebiro ebi nibareetera abantu abamwe okuba abaitsi; nibateganisa abandi nyekiro, babarootesa ebirooto birikutiinisa