Eshuura ya Munaana

Obukama bwa Ruhanga Niki?

Baibuli neetwegyesa ki aha Bukama bwa Ruhanga?

Niki eki Obukama bwa Ruhanga buraije kukora?

Ni ryari obu Obukama bwa Ruhanga buribaasisa ebi Ruhanga akunda kukorwa omu nsi?

1. Ni shaara ki erikumanywa gye hati ei turikuza kushwijuma?

OBUSIRIIRA n’obusiriira bw’abantu omu nsi yoona nibamanya eshaara ei baingi barikweta Eshaara ya Tataitwe, nari Eshaara ya Mukama Waitu. Ebigambo ebi n’eby’eshaara erikumanywa gye ei Yesu Kristo we wenka yaataireho nk’eky’okureeberaho. N’eshaara erimu amakuru, kandi okushwijuma ebicweka bishatu eby’eshaara egi nikwija kukuhwera kwega bingi ebi Baibuli buzima erikwegyesa.

2. Ni bintu ki bishatu ebikuru ebi Yesu yaayegyeise abeegi be kushaba?

² Aha kutandika kw’eshaara egi ei Yesu yaataireho, akaragiira abaabaire bamuhurikiriize ati: “N’ahabw’ekyo mushabe muti: Tataitwe ow’omu iguru, eiziina ryawe ryezibwe. Obukama bwawe bwije. Eby’okunda bikorwe omu nsi nk’oku bikorwa omu iguru.” (Matayo 6:9-13) Ebintu bishatu ebirikworekwa omu shaara egi nibikuru mu muringo ki?

3. N’enki eki tushemereire kumanya aha Bukama bwa Ruhanga?

³ Twaherize kwega bingi aha iziina rya Ruhanga, Yehova. Kandi tukeega kakye aha kigyendererwa kya Ruhanga—ebi akozire kandi n’ebi ari haihi kukorera abantu. Kwonka shi, Yesu akaba naamanyisa ki obu yaagira ngu tushabe tuti: “Obukama bwawe bwije”? Obukama bwa Ruhanga niki? Okwija kwabwo nikwija kweza nari kushemeza kuta eiziina rya Ruhanga? Okwija kw’Obukama kwine kakwate ki n’okukora ebi Ruhanga akunda?

 EKI OBUKAMA BWA RUHANGA BURI

4. Obukama bwa Ruhanga niki, kandi Omugabe wabwo n’oha?

⁴ Obukama bwa Ruhanga ni gavumenti ei Yehova Ruhanga yaatandikireho omu iguru, eine Omugabe ou Ruhanga yaatooraine. Omugabe w’Obukama bwa Ruhanga n’oha? Ni Yesu Kristo. Yesu nk’Omugabe naakira abategyeki boona ab’abantu kandi naayetwa “Omugabe w’abagabe kandi Omukama w’abakama.” (1 Timoseo 6:15) Aine obushoboorozi bw’okukora ebirungi ebirikukira aha bi omutegyeki weena ow’omuntu yaakukora n’obu yaakuba ogwo orikukirayo kukora ebirungi.

5. Obukama bwa Ruhanga nibwija kutegyekyera nkahi, kandi nibwija kutegyeka baahi?

⁵ Obukama bwa Ruhanga nibwija kutegyekyera nkahi? Kwonka shi, Yesu ari nkahi? Buzima noijuka orikwega ngu Yesu akafeera aha muti gw’okubonaboneraho, kwonka bwanyima yaazoorwa. Bwanyima, yaatemba omu iguru. (Ebyakozirwe 2:33) N’ahabw’ekyo, omu iguru okwo—niyo Obukama bwa Ruhanga buri. Egi niyo nshonga ahabw’enki Baibuli neebweta “obukama bw’omu iguru.” (2 Timoseo 4:18) N’obu Obukama bwa Ruhanga buraabe buri omu iguru, nibwija kutegyeka ensi.—Okushuuruurwa 11:15.

6, 7. N’enki ekirikuhindura Yesu kuba Omutegyeki w’omutaano?

⁶ N’enki ekirikuhindura Yesu kuba Omugabe w’omutaano? Enshonga emwe eri ngu, we tarikwija kufa. Erikugyeragyeranisa Yesu n’abagabe ab’abantu, Baibuli neeyoreka ngu “niwe wenka oine okutafa, otuura omu mushana ogutahikwaho.” (1 Timoseo 6:16) Eki nikimanyisa ngu ebirungi byona ebi arikora biryahangaara. Kandi nitukihamya ngu naija kukora eby’okutangaaza kandi ebirungi buzima ebirikugasira abantu be.

⁷ Teekateeka aha burangi obu obw’omu Baibuli oburikukwata ahari Yesu: “Omwoyo wa MUKAMA aryaguma ahariwe, agire omwoyo gw’obwengye n’okwetegyereza, omwoyo gw’okuhanuura n’obushoboorozi, omwoyo gw’okumanya n’okutiina MUKAMA. Omu kutiina MUKAMA [Yehova] nimwo arishemerererwa. Taricwa rubanja rw’amaisho, n’obu  rwakuba orw’okugambirwa, kureka aryacwera abooro emanja omu kuhikiirira, n’abacureezi b’omu nsi aryabashoboorora omu bwinganisa.” (Isaaya 11:2-4) Ebigambo ebyo nibyoreka ngu Yesu akaba naija kuba Omugabe ohikiriire kandi oine embabazi aha bantu omu nsi. Okaayenzire kugira omutegyeki nk’ogwo?

8. Ni baahi abaraije kutegyeka hamwe na Yesu?

⁸ Aga n’amazima agandi agarikukwata aha Bukama bwa Ruhanga: Yesu tarikwija kutegyeka wenka. Aine abandi abaritegyeka nawe. Nk’eky’okureeberaho, Paulo entumwa akagambira Timoseo ati: ‘Twagumizamu kugumisiriza, nitwija kutegyeka nawe nk’abagabe.’ (2 Timoseo 2:12) N’eky’amazima, Paulo, Timoseo hamwe n’abandi beesigwa abatoorainwe Ruhanga nibaija kutegyeka hamwe na Yesu omu Bukama bw’omu iguru. Ni bangahi abaraije kutunga omugisha ogwo?

9. Ni bangahi abaraije kutegyeka na Yesu, kandi Ruhanga akatandika kubatoorana ryari?

⁹ Nk’oku kyorekirwe omu Shuura ya 7 ey’ekitabo eki, Yohaana entumwa akaheebwa okworekwa omu yaareebire “[Yesu Kristo] Omwana gw’entaama ayemereire aha Rushozi Saayuuni [omwanya gwe omukuru omu iguru], hamwe n’abantu akasiriira n’obukumi buna n’enkumi ina, aha buso bwabo hahandiikirweho eiziina rye n’eiziina rya Ishe.” Aba 144,000 ni baahi? Yohaana we wenka naatugambira ati: ‘Abo nibo bakuratira Omwana gw’entaama ei aza yoona. Abo bakacungurwa omu bantu okuba omuganuro ahari Ruhanga n’aha Mwana gw’entaama.’ (Okushuuruurwa 14:1, 4) Eego, n’abakuratsi ba Yesu Kristo abeesigwa abatoorainwe kutegyeka nawe omu iguru. Bwanyima y’okuzoorwa kuruga omu kufa bakaza omu iguru, ‘nibaija kutegyeka ensi nk’abagabe’ bari hamwe na Yesu. (Okushuuruurwa 5:10) Okwiha omu biro by’entumwa, Ruhanga atwire naatoorana Abakristaayo abeesigwa okubaasa kwijuza omubaro 144,000.

10. Ahabw’enki n’ekikorwa kya rukundo okutebeekanisiza Yesu n’abantu abandi abeesigwa 144,000 okutegyeka abantu?

¹⁰ Okutebeekanisiza Yesu hamwe n’abantu 144,000 okutegyeka abantu n’ekikorwa kya rukundo. Ekintu kimwe  eki tushemereire kumanya kiri ngu, Yesu naamanya eki okubonabona hamwe n’okuba omuntu kirikumanyisa. Paulo akagira ngu Yesu “ti munyamurwa otarikubaasa kusaasira hamwe naitwe omu bweremwa bwaitu, kureka twine owaayohiibwe omu miringo yoona nkaitwe, kwonka we atashiishe.” (Abaheburaayo 4:15; 5:8) Abarikuza kutegyeka nawe nabo bakabonabona kandi bakagumisiriza nk’abantu. Okwongyera ahari ekyo, batwire nibarwanisa obutahikiirira kandi beemeire oburwaire bw’emiringo yoona. Buzima, nibaija kwetegyereza oburemeezi obu abantu barikushanga!

N’ENKI EKI OBUKAMA BWA RUHANGA BURAIJE KUKORA?

11. N’enki eki Yesu yaagizire ngu abeegi be bashabe aha bikwatiraine n’ebi Ruhanga akunda?

¹¹ Obu Yesu yaagira ngu abeegi be bashabe Obukama bwa Ruhanga kwija, akongyera yaagira ngu bashemereire kushaba ebi Ruhanga akunda kukorwa “omu nsi.” Ruhanga ari omu iguru, kandi ebi akunda obutoosha nibikorwa baamaraika abeesigwa omu iguru. Omu Shuura ya 3 ey’ekitabo eki, tukeega ngu maraika omugomi akareka kukora ebi Ruhanga akunda atyo yaareetera Adamu na Haawa kushiisha. Omu Shuura ya 10, nitwija kwega bingi ebirikukwata aha ki Baibuli erikwegyesa ahari maraika ogwo omugomi, ou turikumanya nka Sitaane Omuregi. Sitaane hamwe n’ebihangirwe by’omwoyo ebindi ebyacwiremu kumukuratira—ebirikwetwa baadaimoni—bakaikirizibwa kutuura omu iguru okumara obwire bukye. N’ahabw’ekyo, ti boona omu iguru ngu bakaba nibakora ebi Ruhanga akunda. Ekyo kikaba nikiija kuhinduka aha kutandika kw’obutegyeki bw’Obukama bwa Ruhanga. Yesu Kristo, Omugabe musya owaabaire naija kwemekwa akaba naija kurwanisa Sitaane.—Okushuuruurwa 12:7-9.

12. Ni bintu ki bibiri bikuru ebyabaireho ebirikushobororwaho omu Okushuuruurwa 12:10?

¹² Ebigambo by’oburangi ebi ebirikukurataho nibishoboorora ekyabaire nikiza kubaho: “Kandi naahurira eiraka rihango omu iguru nirigira riti: Hati mbwenu okujuna kwa Ruhanga waitu n’amaani ge n’obukama bwe n’obushoboorozi bwa Kristo we biizire, ahakuba [Sitaane] omuregi  w’ab’eishe-emwe anagirwe ahansi, obarega nyomushana na nyekiro omu maisho ga Ruhanga waitu.” (Okushuuruurwa 12:10) Nooyetegyereza ebintu bibiri bikuru ebyabaireho ebirikushobororwaho omu runyiriri rwa Baibuli oru? Eky’okubanza, Obukama bwa Ruhanga oburi ahansi ya Yesu Kristo nibutandika kutegyeka. Ekyakabiri, Sitaane naabingwa omu iguru okwija hanu omu nsi.

13. N’enki ekyarugire omu kubingwa kwa Sitaane omu iguru?

¹³ N’enki ekyarugire omu bintu ebyo bibiri ebyabaireho? Ebikwatiraine n’ebyabaireho omu iguru, nitushoma tuti: “N’ahabw’ekyo, iwe eiguru naimwe abarituuramu, mushemererwe!” (Okushuuruurwa 12:12) N’eky’amazima, baamaraika abeesigwa omu iguru bashemereirwe ahabw’okuba Sitaane na baadaimoni tibakiri mu iguru, buri omwe omu iguru n’omwesigwa ahari Yehova Ruhanga. Okwo hariyo obumwe n’obusingye obutahwaho. Hati ebi Ruhanga akunda nibikorwa omu iguru.

14. N’enki ebitwire nibibaho okwiha obu Sitaane yaanagwa omu nsi?

¹⁴ Kandi shi ensi yo? Baibuli neegira eti: ‘Kwonka iwe ensi, naiwe enyanja, muryareeba enaku ahabw’okuba omuregi yaabaizira n’ekiniga kingi, ahakuba naamanya ku aine omwanya mukye.’ (Okushuuruurwa 12:12) Sitaane aine ekiniga ahabw’okubingwa omu iguru kandi n’ahabw’okumanya ngu atsigaizeyo akaanya kakye. Aine ekiniga, naareeta enaku, nari shi “okubonabona” omu nsi. Nitwija kwega bingi aha ‘kubonabona’ omu shuura erikukurataho. Nk’oku twareeba ngu Sitaane akanagwa omu nsi kandi yaaretamu okubonabona, nitubaasa kubuuza, Obukama nibubaasa kubaasisa buta ebi Ruhanga akunda kukorwa omu nsi?

15. Ekigyendererwa kya Ruhanga ahabw’ensi niki?

¹⁵ Ijuka ekigyendererwa kya Ruhanga ahabw’ensi. Okakyegaho omu Shuura ya 3. Omuri Edeni, Ruhanga akooreka ngu ekigyendererwa kye kiri ngu ensi egi ebe ekibanja kye ekiijwire abantu abahikiriire kandi abatarikufa. Sitaane akareetera Adamu na Haawa kushiisha, haza ekyo kyakyerereza ekigyendererwa kya Ruhanga ahabw’ensi kuhikiirizibwa kwonka beitu tikirakihiindwire. Nahati Yehova naayenda ngu ‘abahikiriire  bahungure ensi, bagituuremu ebiro byona.’ (Zaaburi 37:29) Kandi Obukama bwa Ruhanga nibwija kuhikiiriza ekyo. Mu muringo ki?

16, 17. Danieli 2:44 nirutugambira ki aha Bukama bwa Ruhanga?

¹⁶ Teekateeka aha burangi oburi omuri Danieli 2:44. Aho nitushoma ngu: “Omu busingye bw’abo bagabe Ruhanga w’omu iguru aryataho obundi bugabe, obutaricwekyerezibwa ebiro byona, kandi obutegyeki bwabwo tiburihungurwa rindi ihanga; kureka buryayatagura obwo bugabe bwona, bubumareho kandi bwo buryagumaho.” Eki nikitumanyisa ki aha bikwatiraine n’Obukama bwa Ruhanga?

¹⁷ Eky’okubanza, nikitumanyisa ngu Obukama bwa Ruhanga bukaba nibwija kuteebwaho “omu busingye bw’abo bagabe,” nari obu obundi obugabe buriba bukirikutegyeka. Ekyakabiri, nikitumanyisa ngu Obukama buryagumaho ebiro byona. Tiburicwekyerezibwa kandi tiburihungurwa bundi bugabe. Ekya kashatu, nitureeba ngu nihaija kubaho orutaro ahagati y’Obukama bwa Ruhanga hamwe n’obukama bw’ensi egi. Obukama bwa Ruhanga nibwija kusingura. Aha muheru, obukama bwa Ruhanga niyo gavumenti yonka eritegyeka abantu. Obwo abantu baryashemerererwa obutegyeki oburikukirayo oburungi obutakarebwahoga.

18. Eiziina ry’orugamba rw’aha muheru oruriba ahagati y’Obukama bwa Ruhanga na zaagavumenti z’ensi egi ni riiha?

¹⁸ Baibuli eine bingi ebi erikugamba aha rugamba orw’aha muheru oruriba ahagati y’Obukama bwa Ruhanga na gavumenti z’ensi egi. Nk’eky’okureeberaho, neetwegyesa ngu nk’oku emperu erikwirira haihi, emyoyo emibi neija kujanjaaza ebishuba okubaasa kubeiha ‘abagabe b’ensi abatwire omu nsi yoona.’ Eine kigyendererwa ki? ‘Okuteeranira hamwe [abagabe b’ensi] kuza omu rugamba orw’ekiro kikuru kya Ruhanga ow’Obushoboorozi bwona.’ Abagabe b’ensi nibaija kuteeranirwa hamwe omu “mwanya ogurikwetwa Haramagedoni omu Ruheburaayo.” (Okushuuruurwa 16:14, 16) Ahabw’ebyagambwaho omu nyiriri ezo ibiri, orugamba ahagati y’Obukama bwa Ruhanga na gavumenti z’abantu nirwetwa Haramagedoni.

19, 20. N’enki ekirikuremesa ebi Ruhanga akunda kukorwa omu nsi hati?

 ¹⁹ N’enki eki Obukama bwa Ruhanga burihikiiriza omu rugamba rwa Haramagedoni? Garuka oteekateeke eki ekigyendererwa kya Ruhanga ahabw’ensi kiri. Yehova Ruhanga akaba naayenda ngu ensi etuurwemu abantu abahikiriire bamuheerereze omu Kibanja Kye. N’enki ekirikuremesa ekyo kubaho hati? Eky’okubanza, nitushiisha, niturwara kandi tufa. Tukeega omu Shuura ya 5 ngu Yesu akatufeera ngu tubaase kugumaho ebiro byona. Shana noijuka ebigambo ebihandiikirwe omu Ngiri ya Yohaana: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”—Yohaana 3:16.

²⁰ Oburemeezi obundi buri ngu abantu baingi nibakora eby’obugomi. Nibabeiha, nibaiba, nibakora ebihagaro. Tibarikwenda kukora ebi Ruhanga akunda. Abantu abarikukora eby’obugomi nibaija kucwekyererezibwa omu rutaro rwa Ruhanga ahari Haramagedoni. (Zaaburi 37:10) Kandi enshonga endiijo ahabw’enki ebi Ruhanga akunda bitarikukorwa omu nsi n’ahabw’okugira ngu gavumenti tizirikuhiga abantu kubikora. Gavumenti enyingi tizirikufayo, tiziine mbabazi nari oburingaaniza. Baibuli butunu neegira eti: “Omuntu naayekuriza ahari mugyenzi we kumukora kubi.”—Omubuurizi 8:9.

21. Obukama buryabaasisa buta ebi Ruhanga akunda kukorwa omu nsi?

²¹ Bwanyima ya Haramagedoni, abantu baryategyekwa gavumenti emwe, nibwo Bukama bwa Ruhanga. Obukama obwo nibwija kuhikiiriza ebi Ruhanga akunda kandi bureete emigisha y’omutaano. Nk’eky’okureeberaho, nibwija kwihaho Sitaane na baadaimoni be. (Okushuuruurwa 20:1-3) Amaani g’ekitambo kya Yesu nigaija kuteebwa omu nkora kugira ngu abantu abeesigwa babe batarigaruka kurwara nari kufa. Omu mwanya gw’okufa, ahansi y’obutegyeki bw’Obukama bwa Ruhanga, abantu baryagumaho ebiro byona. (Okushuuruurwa 22:1-3) Ensi eryahindurwa ekibanja kya  Ruhanga. Butyo Obukama bwa Ruhanga buryabaasisa ebi Ruhanga akunda kukorwa omu nsi, kandi buryayeza eiziina rya Ruhanga. Eki nikimanyisa ki? Nikimanyisa ngu bwanyima, omu Bukama bwa Ruhanga buri omwe aryahimbisa eiziina rya Yehova.

NI RYARI OBU OBUKAMA BWA RUHANGA BURIBAASISA EBI RUHANGA AKUNDA KUKORWA OMU NSI?

22. Nitumanya tuta ngu Obukama bwa Ruhanga tiburaiziire omu bwire obu Yesu yaabaire akiri omu nsi nari ahonaaho aherize kuzooka?

²² Obu Yesu yaagambira abakuratsi be kushaba ngu, ‘Obukama bwawe bwije,’ kikaba nikyeyoreka gye ngu omu bwire obwo Obukama bukaba butakaizire. Kwonka shi bukaba buri obw’okwija obu Yesu yaatemba omu iguru? Ngaaha, ahabw’okuba Petero na Paulo bakagira ngu bwanyima ya Yesu kuzooka, oburangi omuri Zaaburi 110:1, NW bukahikiririzibwa omuri Yesu: “Yehova akagambira Mukama wangye ati: ‘Shutama aha rubaju rwangye rwa buryo, okuhitsya obu ndigira abazigu baawe akatebe k’ebigyere byawe.’” (Ebyakozirwe 2:32-34; Abaheburaayo 10:12, 13) Hakabaho okutegyereza kumara obwire.

23. (a) Obukama bwa Ruhanga bukatandika kutegyeka ryari? (b) N’enki eki turikwija kwegaho omu shuura erikukurataho?

²³ Okumara bwire ki? Omu kyasha kya 19, abeegi ba Baibuli bakaba nibamanya gye ngu obwire bw’okutegyereza bukaba nibuza kugarukira omu gwa 1914. (Ebirikukwata aha mwaka ogwo, reeba Ebyongyeirweho aha rupapura 215-18.) Ebyatandikire kubaho omu nsi omu gwa 1914 nibihamya ngu  embara y’abeegi ba Baibuli ekaba ehikire. Okuhikiirira kw’oburangi bwa Baibuli nikworeka ngu omu gwa 1914, Kristo akahinduka Omugabe kandi ngu Obukama bwa Ruhanga obw’omu iguru bukatandika kutegyeka. N’ahabw’ekyo, turi omu ‘kaanya kakye’ aku Sitaane atsigaizeyo. (Okushuuruurwa 12:12; Zaaburi 110:2) Kandi nitubaasa kugamba twine obwesigye ngu juba, Obukama bwa Ruhanga nibuza kubaasisa ebi Ruhanga akunda kukorwa omu nsi. Amakuru aga nigakutangaaza? Iwe noikiriza ngu ebi n’amazima? Eshuura erikukurataho neija kukuhwera kureeba ngu Baibuli buzima neeyegyesa ebintu ebi.

EBI BAIBULI ERIKWEGYESA

▪ Obukama bwa Ruhanga ni gavumenti ey’omu iguru ei Yesu Kristo ari Omugabe waayo, kandi kuruga omu nsi, abantu 144,000 batoorainwe kutegyeka nawe.—Okushuuruurwa 14:1, 4.

▪ Obukama bukatandika kutegyeka omu gwa 1914, kandi okwiha obwo, Sitaane akabingwa kuruga omu iguru yaanagwa omu nsi.—Okushuuruurwa 12:9.

▪ Obukama bwa Ruhanga nibuza kucwekyereza gavumenti z’abantu, kandi ensi eryahinduka ekibanja kya Ruhanga.—Okushuuruurwa 16:14, 16.

[Ebibuuzo by’Obucweka]

 [Ekishushani ekiri aha rupapura 83]

Okubingwa kwa Sitaane na baadaimoni be kuruga omu iguru kukareetaho okubonabona omu nsi. Oburemeezi obwo juba nibuza kuhwaho

[Ekishushani ekiri aha rupapura 84, 85]

Ahansi y’obutegyeki bw’Obukama, ebi Ruhanga akunda nibiija kukorwa omu nsi nk’oku bikorwa omu iguru