N’eky’amazima omu diini zoona harimu abantu abacureezi. Ruhanga naareeba abantu nk’abo kandi naabafaho. Kwonka eky’obusaasi, abanyadiini nibakora ebihagaro omu iziina ry’ediini. (2 Abakorinso 4:3, 4; 11:13-15) Amakuru nigooreka ngu ediini ezimwe nizejumba omu bikorwa by’obuzahambuki, omu kwita abantu, omu ntaro n’omu kutwariza kubi abaana n’okubatoroboza. Ebikorwa ebyo buzima nibigwisa kubi abantu abarikukunda Ruhanga.—Shoma Matayo 24:3-5, 11, 12.

Ediini ey’amazima neehimbisisa Ruhanga kwonka ey’ebishuba neemugwisa kubi. Ebi erikwegyesa tibiri mu Baibuli. Neeyegyesa ebishuba ahari Ruhanga n’aha bikwatiraine n’abafu. Kwonka Ruhanga naayenda ngu abantu bamanye amazima agarikumukwataho.—Shoma Omubuurizi 9:5, 10; 1 Timoseo 2:3-5.

Ruhanga tarikukunda amadiini agarikwetwara ngu nigamukunda kwonka buzima garikukunda ensi ya Sitaane. (Yakobo 4:4) Amadiini goona ag’ebishuba Baibuli neegeeta “Babulooni Orurembo Orukuru.” Babulooni rukaba ruri orurembo orwa ira ahu ediini y’ebishuba yaatandikiire, bwanyima y’omwegyemure gw’omu biro bya Noa. Ruhanga ari haihi kumaraho amadiini agarikubeiha abantu kandi gakabanyangaraza.—Shoma Okushuuruurwa 17:1, 2, 5, 16, 17; 18:8.

Hariho amakuru marungi agandi. Yehova tayebirwe abantu abacureezi abari omu madiini g’ebishuba goona. Ariyo naareeta abantu nk’abo omu mazima.—Shoma Miika 4:2, 5.

Yehova naafayo aha bantu abarikwenda kumanya amazima kandi abarikwenda kukora ebihikire. Naabagambira ngu barugye omu madiini g’ebishuba. Abantu abarikukunda Ruhanga nibaba beeteekateekire kukora empindahinduka okubaasa kumushemeza.—Shoma Okushuuruurwa 18:4.

Omu kyasha ky’okubanza, entumwa ku zaabuuriire amakuru marungi, abantu abacureezi baakagaikiriza n’okushemererwa. Yehova akabeegyesa omuringo murungi gw’okutwazamu, okugira amatsiko, ekigyendererwa n’okushemererwa. Abantu abo n’eky’okureeberaho kirungi ahabw’okuba bakaikiriza amakuru marungi barikwebembeza ebi Yehova akunda.—Shoma 1 Abatesalonika 1:8, 9; 2:13.

Abo abarikuruga omu madiini g’ebishuba Yehova naabaakiira omu kuramya okw’amazima. Waija omu kibiina kye, noija kuba munywani we, obe hamwe n’abaramya be ab’amazima, kandi noija kutunga n’amagara agatahwaho.—Shoma Mako 10:29, 30; 2 Abakorinso 6:17, 18.

Okucwekyerezibwa kw’amadiini g’ebishuba n’amakuru marungi ahakuba nikiija kureetaho obuteeka omu nsi yoona. Amadiini g’ebishuba tigarigaruka kubaganisamu abantu nari kubahabisa. Abantu boona nibaija kuramiza hamwe Ruhanga omwe ow’amazima.—Shoma Okushuuruurwa 18:20, 21; 21:3, 4.