Omu nsi eya burugwa-izooba bwa Israeli hakaba nihatuurayo abantu abaabaire nibaikiriza ngu enyonyoozi nizibaasa kubarinda. Izooba rimwe, abashaija bamwe kuruga oburugwa-izooba, bakareeba enyonyoozi ahaiguru erikwaka munonga, baagikurata. Kandi “enyonyoozi” egyo ekabatwara Yerusaalemu. Abashaija abo bakatandika kubuuza abantu bati: “Omugabe w’Abayudaaya ozairwe ari nkahi? Twizire kumuramya.”

Heroode, omugabe wa Yerusaalemu, ku yaahuriire ebirikukwata aha mugabe omusya, akeerarikirira. Akabuuza abanyamurwa ati: ‘Omugabe ogu akaba naija kuzaarirwa nkahi?’ Bakamugarukamu bati: ‘Baanabi bakaranga ngu naija kuzaarirwa omuri Betelehemu.’ N’ahabw’ekyo Heroode akeeta abashaija kuruga burugwa-izooba yaabagira ati: “Mwirooko mugyende, musherure gye ogwo mwana; ku muraamubone, mugarukye mungambire, naanye nze” kumwinamira. Kwonka akaba naabeiha.

Kandi “enyonyoozi” ekagaruka yaabebembera. Abashaija baakagikuratira kuhika Betelehemu. “Enyonyoozi” egyo ekabebembera yaayemerera aha mutwe gw’enju reero baataaha omu nju. Bakashangamu Yesu ari na nyina Mariamu. Bakamwinamira kandi baamuha ebiconco by’ezaabu n’eby’emigaju na sumuruna. Mbwenu shi buzima Yehova akaba ayoheereize abashaija aba kureeba Yesu? Ngaaha.

Ekiro ekyo, Yehova akagambira Yosefu omu kirooto ati: ‘Heroode naayenda kwita Yesu. Twara omukazi waawe n’omwana ohungire Misri. Ogumeyo kuhitsya obu ndikugira ngu tihariho kabi.’ Ahonaaho, Yosefu n’eka ye bakaza Misri.

Yehova akaba agambiire abashaija abaarugire burugwa-izooba ngu batagaruka owa Heroode. Heroode ku yaamanyire ngu tibaraagaruke, akagira ekiniga. Ahabw’okugira ngu akaba atarikubaasa kubona Yesu, akaragiira ngu aboojo boona omuri Betelehemu abaabaire nibaingana na Yesu baitwe. Kwonka Yesu akaba aine oburinzi, ari omuri Misri.

Ku haahingwireho obwire, Heroode akafa. Yehova akagambira Yosefu ati: ‘Hati tihariho kabi, noobaasa  kugarukayo.’ Yosefu, Mariamu, na Yesu bakagaruka Israeli, kandi baatura omu rurembo Nazareesi.