Abaisraeli bakaruga aha Rushozi Sinai kandi baaraba omu ihamba rya Parani baaza omuri Kadeshi. N’ahabw’ekyo Yehova akagambira Musa ati: ‘Yohereza abashaija 12, kuruga omuri buri ruganda, baze kutata ensi ya Kanaani, ei ndikwija kuha Abaisraeli.’ Musa akatoorana abashaija 12 yaabagambira ati: ‘Muze Kanaani, mutate ensi, mureebe yaaba eri nungi erikwera eby’okurya. Mumanye abantu abagitwiremu yaaba baine amaani nari batagaine kandi yaaba nibatuura omu nsiisira nari omu ndembo.’ Entatsi 12, otwariiremu Yoshua na Kalebu, bakaza Kanaani.

Bwanyima y’ebiro 40, entatsi zikagaruka, zaareeta ebijuma by’emitiini, amakomamahanga, n’emizaabibu. Entatsi zikagira ziti: ‘N’ensi nungi, kwonka abantu baayo n’ab’amaani kandi endembo zaabo ziine engo zigumire.’ Kalebu akagira ati: ‘Twinamukye ahonaaho. Nitubaasa kubasingura.’ Noomanya ahabw’enki Kalebu yaagambire ekyo? N’ahabw’okugira ngu we na Yoshua bakaba nibeesiga Yehova. Kwonka entatsi ezindi 10 zikagira ziti: ‘Ngaaha. Abantu baayo n’ab’amaani nk’ebikaaka. Itwe tukeereeba turi nk’eseneene omu maisho gaabo.’

Abaisraeli bakahwamu amaani. Bakatandika kwetomboita kandi bakagambirana bati: ‘Ka tweteereho omwebembezi, tugarukye Misri. Ahabw’enki nitwikiriza kuza omu nsi egyo kufeerayo?’ Yoshua na  Kalebu bakagira bati: ‘Murekye kugomera Yehova, kandi mutatiina. Yehova naija kubarinda.’ Kwonka Abaisraeli bakanga kuhurira. Kandi bakaba nibenda n’okwita Yoshua na Kalebu.

Mbwenu shi Yehova akakora ki? Akagambira Musa ati: ‘Byona ebi nkoriire Abaisraeli, tibarikwenda kunyorobera. N’ahabw’ekyo nimwija kumara emyaka 40 omu ihamba, kandi niyo murifeera. Kwonka abaana baabo, Yoshua na Kalebu nibo barihika omu nsi ei naaraganiise kubaha.’