Yehoshafaati, omugabe wa Yuda, akacwekyereza amatambiro ga Baali n’ebishushani by’okuramibwa byona omu ihanga eryo. Akaba naayenda ngu abantu bamanye ebiragiro bya Yehova. N’ahabw’ekyo akoohereza abanyiginya n’Abaleevi omuri Yuda yoona kwegyesa abantu ebiragiro bya Yehova.

Amahanga agaabaire gari haihi gakaba gatiina kutahiirira Yuda ahakuba gakaba nigamanya ngu Yehova naarinda abantu be. Bakaba bareetera Omugabe Yehoshafaati ebiconco. Kwonka Abamoabu, Abaamoni, n’abaabaire nibaruga omu kicweka kya Seiri bakaija kurwanisa Yuda. Yehoshafaati akaba naamanya ngu naayetenga obuhwezi bwa Yehova. Akeeta abashaija boona, abakazi, n’abaana kweteeranira omuri Yerusaalemu. Akashabira omu maisho g’abantu boona ati: ‘Yehova titurikubaasa kusingura tutaine buhwezi bwawe. Nyabura ’we tugambire eki twine kukora.’

Yehova akagarukamu okushaba okwo ati: ‘Mutatiina. Niinyija kubahwera. Muze omu myanya yaanyu, mwemerere kwonka, mureebe oku Mukama araabasingurire.’ Mbwenu shi Yehova akabajuna ata?

Akasheeshe akakuratsireho, Yehoshafaati akatoorana abeeshongozi kandi yaabagira ngu beebembere eihe. Bakagyenda baaruga Yerusaalemu baaza omu rugamba omu mwanya ogurikwetwa Tekoa.

Abeeshongozi ku baabaire nibahimbisa Yehova bashemereirwe, Yehova akarwanirira abantu be. Akahindura ebiteekateeko by’Abaamoni n’Abamoabu baatandika kwerwanisa bonka, kandi tihariho n’omwe ahari bo owaahonokireho. Kwonka Yehova akarinda abantu ba Yuda, abaserukare, n’abanyamurwa. Abantu boona abaabaire bari omu mahanga agabeetooroire bakahurira eki Yehova yaakozire, kandi baamanya ngu Yehova naakirinda abantu be. Yehova naajuna ata abantu be? Naabajuna omu miringo mingi. Tarikwetenga buhwezi bw’abantu kubaasa kukikora.