1, 2. (a) Ahabw’enki obumwe nikitugumira okworobera abaine obushoboorozi? (b) Ni bibuuzo ki ebi turikuza kushwijuma?

ORAREEBIRE oku omwana muto arikusisirwa yaagambirwa kukora ekintu eki buzima atarikwenda kukora? Waamureeba ahamaisho, nooreeba ngu buzima omu mutima gwe agumiirwe. Yaahurira eki omuzaire we yaamugambira, kandi naamanya ngu ashemereire kumworobera. Kwonka hati, naahurira atarikwenda kumworobera. Eky’okureeberaho eki nikyoreka obumwe ekirikutubaho twena.

² Obumwe okworobera abaine obushoboorozi nikitugumira. Naiwe obumwe noogumirwa kuboorobera? Ku kiraabe nikwo kiri, kimanye ngu tiiwe wenka. Obunaku obu, abantu baingi tibarikworobera abaine obushoboorozi. Kwonka, Baibuli neegira ngu tushemereire kworobera abatwineho obushoboorozi. (Enfumu 24:21) Okuboorobera ni kikuru twaba nitwenda kwerindira omu kukunda kwa Ruhanga. N’ahabw’ekyo, ka twebuuze ebibuuzo ebi: Ahabw’enki nikibaasa kutugumira okworobera abaine obushoboorozi? Ahabw’enki Yehova naayenda ngu tuboorobere, kandi n’enki ekiraije kutuhwera kuboorobera? Eky’aha muheru, nitworeka tuta ngu nitworobera abaine obushoboorozi?

3, 4. Ekibi n’okutahikiirira bikatandika bita, kandi ahabw’enki okutahikiirira kwaitu nikutureetera kugumirwa kworobera abaine obushoboorozi?

³ Omu bugufu, ka tureebe enshonga ibiri ahabw’enki nikibaasa kutugumira kworobera abaine obushoboorozi. Ey’okubanza,  tituhikiriire; eya kabiri, n’abo abatwineho obushoboorozi tibahikiriire. Ekibi n’okutahikiirira omu bantu bikatandika ira munonga, omu kibanja ky’omuri Edeni obu Adamu na Haawa baagomera obushoboorozi bwa Ruhanga. N’ahabw’ekyo, ekibi kikatandika n’obugomi. Okuruga obwo n’okuhitsya hati, nituzaarwa twine omutima gw’okwenda kugoma.—Okutandika 2:15-17; 3:1-7; Zaaburi 51:5; Abarooma 5:12.

⁴ Ahabw’okugira ngu turi abasiisi, baingi omuriitwe nitubaasa kurahuka kugira amaryo kwonka obucureezi n’omutwarize murungi ogwinwe bakye, ogu twine kuteeraho kugira kandi tukagumya. Nangwa n’obu twakuba tuherize emyaka mingi nituheereza Yehova n’obwesigwa, nitubaasa kuhinduka abanyamaryo. Nk’eky’okureeberaho, teekateeka ahari Koora, n’obwesigwa owaarabire omu buremeezi bwingi hamwe n’abantu ba Yehova. Nabwo, akagira omururu gw’okwenda kwongyerwa obushoboorozi atyo yaareetera abandi kugomera Musa, omushaija owaabaire ari omucureezi okukira abandi boona omu bwire obwo. (Okubara 12:3; 16:1-3) Teekateeka n’aha Mugabe Uziya, ou amaryo gaareeteire kutaaha omuri hekalu ya Yehova kukora omurimo ogwabaire guri ogw’abanyamurwa bonka. (2 Obusingye 26:16-21) Abashaija nk’abo bakafubirwa ahabw’obugomi bwabo. Kwonka eby’okureeberaho byabo bibi haine ekirungi eki birikutwijutsya twena. Twine kurwanisa amaryo agarikutureetera kugumirwa kworobera abaine obushoboorozi.

5. Abantu abatahikiriire bakoreise kubi bata obushoboorozi bwabo?

⁵ N’ekindi, abantu abatahikiriire abaine obushoboorozi bakozire ebintu bibi bingi ebireeteire abantu kutaboorobera gye. Baingi n’enshaarizi, nibatwaza kubi abu barikutegyeka nari ni baangamba-nyenka. Ebyafaayo nibyoreka ngu batwire nibakoresa kubi obushoboorozi bwabo. (Shoma Omubuurizi 8:9.) Nk’eky’okureeberaho, Saulo akaba ari omushaija murungi kandi omucureezi obu Yehova yaamutoorana kuba omugabe. Kwonka akagira amaryo n’eitima, yaatandika kuhiiganisa Daudi omushaija omwesigwa. (1 Samueli 9:20, 21; 10:20-22;  18:7-11) Bwanyima, Daudi akaba omwe aha bagabe barungi ba Israeli, kwonka nawe akakoresa kubi obushoboorozi bwe obu yaatwara muka Uriya Omuhiiti, kandi akoohereza Uriya owaabaire ataine rubanja omu kaso k’orugamba ngu aitirwemu. (2 Samueli 11:1-17) Buzima, okutahikiirira nikureetera abantu kukoresa kubi obushoboorozi obu baine. Kandi abaine obushoboorozi baaba batarikutiina Yehova, nibabukoresa kubi munonga. Bwanyima y’okushoboorora oku bamwe ahari baapaapa Abakaturiki baareetsireho okuhiiganisa omu bicweka bingi, omutegyeki omwe omuri Bungyereza akagira ati: “Obushoboorozi nibushiisha ababwine kandi okugira obushoboorozi bwingi nikusiisira kimwe.” Turikwijuka ebigambo ebi, ka tushwijume ekibuuzo eki: Ahabw’enki twine kworobera abaine obushoboorozi?

6, 7. (a) Rukundo ei twiniire Yehova neetureetera kukora ki, kandi n’ahabw’enki? (b) Okuba abahurizi nikutwariramu ki, kandi nitworeka tuta ngu turi abahurizi?

⁶ Enshonga enkuru ezirikutuhiga kworobera abaine obushoboorozi niziruga omu kukunda Yehova, okukunda bagyenzi baitu, n’okwekunda. Ahabw’okugira ngu nitukunda Yehova okukira ebindi byona, nitwenda kumushemeza. (Shoma Enfumu 27:11; Mako 12:29, 30.) Nitumanya obushoboorozi bwe obw’okutegyeka byona, bukahakanisibwa omu nsi okwiha obu obugomi bwatandika omuri Edeni, kandi ngu abantu abarikukira obwingi bari aha rubaju rwa Sitaane kandi bangire obutegyeki bwa Yehova. N’okushemererwa, nitushagika obutegyeki bwa Yehova. Ku turikushoma ebigambo birungi ebiri omu Okushuuruurwa 4:11, nitwetegyereza gye ngu Yehova niwe Mutegyeki ohikire kutegyeka byona. Nitushagika obutegyeki bwa Yehova, kandi tumwikiriza kututegyeka omu bi turikukora buri izooba.

⁷ Okworoba nk’okwo nikumanyisa okworobera Yehova twaba nitumanya enshonga ahabw’enki twine kumworobera,  kandi tumworobera n’obu kirikuba kitugumiire. Nitumworobera ahabw’okuba nitumukunda. Kwonka, obumwe hariho obu kiraije kutugumira kworoba. Omu bwire nk’obwo, itwe nk’omwana muto owaagambwaho aha kutandika, nitwija kwetenga kwega kuba abahurizi. Nitwijuka ngu Yesu akahurira Ishe, yaakora ebi Akunda n’obu obumwe kyabaire kiba kitamworobeire. Yesu akagira Ishe ati: “Kirekye kuba nk’oku ndikwenda, kureka nka Iwe oku orikwenda.”—Luka 22:42.

8. (a) Okworobera obushoboorozi bwa Yehova omu bunaku obu emirundi emingi nikutwariramu ki, kandi n’enki ekirikworeka oku Yehova arikutwara ekyo? (b) N’enki ekirikubaasa kutuhwera kwikiriza okuhaburwa n’okuhanwa? (Reeba akabokisi “ Ikiriza Kuhaburwa N’okuhanwa.”)

⁸ N’eky’amazima, Yehova tarikugamba na buri omwe okwe omu bunaku obu; naakoresa Ekigambo kye n’abantu abarikumujwekyera omu nsi. N’ahabw’ekyo, emirundi emingi nitworeka ngu nitworobera obushoboorozi bwe turikworobera abantu abu ahaire obujunaanizibwa, nari abu ataireho kutwebembera. Twagomera abantu abo, turikwanga kwikiriza obuhabuzi n’okuhana oku barikutuha kuruga omu Byahandiikirwe, nitugwisa kubi Ruhanga waitu. Abaisraeli ku baayetomboiteire Musa kandi bakamugomera, Yehova akabareeba nk’abaagomera We.—Okubara 14:26, 27.

9. Ahabw’enki rukundo ei twiniire bagyenzi baitu neetureetera kworobera abaine obushoboorozi? Ha eky’okureeberaho.

⁹ Kandi nitworobera abaine obushoboorozi ahabwa rukundo ei twiniire abantu bagyenzi baitu. Ahabw’enki? Mbwenu, teera akashushani ori omuserukare omu mahe. Okusingura, n’okugumaho kw’eihe nikurugiirira aha ku buri muserukare arikukwatanisa, arikworobera, kandi akaha ekitiinisa abarikubakurira. Waayanga kworobera entebeekanisa egyo, okagomera abakuru, noobaasa kuta amagara g’abaserikare bagyenzi baawe omu kabi. N’eky’amazima obunaku obu, amahe g’abantu gakozire ebintu bingi bibi omu nsi. Kwonka Yehova aine amahe agarikukora ebirungi byonka. Emirundi mingi Baibuli neegamba ahari Ruhanga nka ‘Yehova ow’amahe.’ (1 Samueli 1:3) N’omuduumizi w’ebihangirwe bingi eby’omwoyo  kandi eby’amaani. Obumwe, Yehova naashushanisa abaheereza be ab’omu nsi nk’eihe. (Zaaburi 68:11; Ezekieli 37:1-10) Twagomera abantu abu Yehova ahaire obushoboorozi, mbwenu obwo nituba tutarikuta amagara g’ab’eishe-emwe bagyenzi baitu omu kabi? Omukristaayo yaagomera abareeberezi, n’abandi omu kibiina nikibakwataho. (1 Abakorinso 12:14, 25, 26) Omwana ku arikugoma, eka yoona neekwatwaho. N’ahabw’ekyo, nitworeka ngu nitukunda bagyenzi baitu turikworoba kandi turikugira omutima gw’okukwatanisa.

10, 11. Okwenda kugasirwa nikutuhiga kuta kworobera abaine obushoboorozi?

¹⁰ Kandi nitworobera abaine obushoboorozi ahabw’oburungi bwaitu. Yehova ku arikutushaba kworobera abaine obushoboorozi, butoosha naatugambira ebirungi ebiraije kurugamu. Nk’eky’okureeberaho, naagambira abaana kworobera abazaire baabo kugira ngu bahangaare kandi babe gye. (Eky’Ebiragiro 5:16; Abaefeso 6:2, 3) Naatugambira okworobera abareeberezi omu kibiina ahakuba twaba tutakozire tutyo nitutunga  oburemeezi omu by’omwoyo. (Abaheburaayo 13:7, 17) Kandi naatugambira kworobera abategyeki ahakuba n’eky’oburungi bwaitu.—Abarooma 13:4.

¹¹ Torikwikiriza ngu okumanya ahabw’enki Yehova naayenda ngu tworobe nikituhwera okworobera abaine obushoboorozi? Hati, ka tureebe oku turikubaasa kworobera abaine obushoboorozi omu miringo eshatu emikuru.

12. Ni bujunaanizibwa ki obu Yehova arikuha omushaija nari ishe abaana omu ka, kandi naabaasa kubuhikiiriza ata?

¹² Yehova niwe yaatandikireho entebeekanisa y’amaka. Nk’oku Yehova ari Ruhanga w’obusingye, akatebeekanisa amaka kugira ngu gaagyende gye. (1 Abakorinso 14:33) Naaha omushaija nari ishe abaana obushoboorozi kuba omutwe gw’eka. Omushaija naayoreka ngu naaha Kristo Yesu ekitiinisa, ori Omutwe gwe arikutooreza oku Yesu arikwebembera ekibiina. (Abaefeso 5:23) N’ahabw’ekyo, omushaija ashemereire kumariirira kuhikiiriza obujunaanizibwa bwe; kwonka tashemereire kuba ngamba-nyenka nari enshaarizi, kureka aine kuba ow’oburyo, omunyambabazi, kandi omunyasaasi. Naaguma naijuka ngu obushoboorozi bwe bwine obugarukiro, obwe nibuguma buri ahansi y’obwa Yehova.

13. Omukazi nari nyina abaana naabaasa kuhikiiriza ata obujunaanizibwa bwe omu muringo ogurikushemeza Yehova?

 ¹³ Omukazi nari nyina abaana aine kuba omuhwezi wa iba. Nawe ahairwe obushoboorozi omu ka, ahakuba Baibuli neegamba aha “ebi nyoko arikukwegyesa.” (Enfumu 1:8) Kwonka obushoboorozi bwe buri ahansi y’obwa iba. Omukazi Omukristaayo naayorobera obushoboorozi bwa iba arikumuhwera kuhikiiriza obujunaanizibwa bwe nk’omutwe gw’eka. Tarikugaya iba, nari kuteeraho kumutegyeka nari okutwara obujunaanizibwa bwe. Kureka, naamuhwera kandi akwatanisa nawe. Ebi iba arikucwamu byaba biri ebi atarikwikirizana nabyo, naabaasa kuhayo ebiteekateeko bye omu muringo ogurikuhaisa ekitiinisa, kandi agume naamworobera. Iba yaaba atari muheereza wa Ruhanga, obumwe nikibaasa kumugumira kumworobera, kwonka nabwo ku arikumworobera, emitwarize ye mirungi neebaasa kureetera iba kusherura Yehova.—Shoma 1 Petero 3:1.

14. Abaana nibabaasa kushemeza bata Yehova n’abazaire baabo?

¹⁴ Abaana nibashemeza Yehova ku barikworobera ishebo na nyinabo. N’ekindi, nibashemeza abazaire baabo kandi babahaisa  ekitiinisa. (Enfumu 10:1) Omu ka erimu omuzaire omwe, abaana niboorobera omuzaire ogwo, barikumanya ngu naayetengyera kimwe obuhwezi bwabo n’okukwatanisa nawe. Omu maka ei boona barikuhikiiriza obujunaanizibwa obu Ruhanga yaabahaire, nihabamu obusingye n’okushemererwa kwingi. Ekyo nikihaisa Yehova Ruhanga ekitiinisa, Owaatandikireho amaka goona.—Abaefeso 3:14, 15.

15. (a) Nitubaasa kworeka tuta ngu nitworobera obushoboorozi bwa Yehova omu kibiina? (b) Ni misingye ki erikubaasa kutuhwera kworobera abarikwebembera omu kibiina? (Reeba akabokisi “ Muhurire Abeebembezi Baanyu.”)

¹⁵ Yehova akatoorana Omwana we kuba Omutegyeki w’ekibiina Ekikristaayo. (Abakolosai 1:13) Yesu nawe atooraine ‘omwambari omwesigwa kandi ow’obwengye’ okureeberera abantu ba Ruhanga ab’omu nsi omu by’omwoyo. (Matayo 24:45-47) Akakiiko Akareeberezi ak’Abajurizi ba Yehova niko karikuheereza ‘nk’omwambari omwesigwa kandi ow’obwengye.’ Nk’oku kyabaire kiri omu bibiina Ebikristaayo omu kyasha ky’okubanza, abareeberezi obunaku obu nabo nibaheebwa obuhabuzi n’eby’okukuratira kuruga aha Kakiiko Akareeberezi, nari kurabira omu barikukajwekyera, nk’abareeberezi abarikutaayaayira ebibiina. Twayorobera abareeberezi Abakristaayo, nituba nitworobera Yehova.—Shoma 1 Abatesalonika 5:12; Abaheburaayo 13:17.

16. Ni mu muringo ki ogu abareeberezi barikutooranwa omwoyo gurikwera?

¹⁶ Abareeberezi n’abaheereza tibahikiriire. Nabo baine obweremwa nk’oku tubwine. Kwonka, abareeberezi ‘n’ebiconco omu bantu’ abariho okuhwera ekibiina kuguma kihamire omu by’omwoyo. (Abaefeso 4:8) Abareeberezi nibatooranwa omwoyo gurikwera. (Ebyakozirwe 20:28) Bata shi? Ahabw’okugira ngu nibabanza baahikiiriza ebirikwetengyesa ebiri omu Kigambo kya Ruhanga ekihandiikisiibwe omwoyo gwe. (1 Timoseo 3:1-7, 12; Tito 1:5-9) Ekindi, abareeberezi abarikucwamu yaaba ow’eishe-emwe naahikiiriza ebirikwetengyesa nibashaba Yehova kubaha omwoyo gwe kubeebembera.

17. Omu kuhikiiriza obujunaanizibwa bwabo omu kibiina, ahabw’enki abakazi Abakristaayo obumwe nibetwekyerera aha mutwe?

 ¹⁷ Obumwe omu kibiina, noobaasa kushanga hatariho bareeberezi nari abaheereza abashemereire kuhikiiriza obujunaanizibwa nk’okwebembera oruteerane rw’okuza kubuurira. Omu mbeera nk’egyo, abandi b’eishe-emwe ababatiziibwe nibabaasa kwebembera. N’ab’eishe-emwe abo baaba batariho, obwo banyaanyazi-itwe abaikiriziibwe nibabaasa kwebembera. Kwonka omukazi yaaba naaza kuhikiiriza obujunaanizibwa butoosha oburikuhikiirizibwa omushaija obatiziibwe, naagira eki yaayetwekyerera aha mutwe. * (1 Abakorinso 11:3-10) Eki tikirikugarura abakazi ahansi. Kureka, nikibaha omugisha kworeka ngu niboorobera entebeekanisa ya Yehova ey’obwebembezi, omu maka n’omu kibiina.

18, 19. (a) Noobaasa kushoboorora ota emisingye eri omu Abarooma 13:1-7? (b) Nitworeka tuta ngu nitworobera abakama abarikutegyeka?

¹⁸ Abakristaayo ab’amazima n’obwegyendesereza nibakuratira emisingye eri omu Abarooma 13:1-7. (Kishome.) Waashoma enyiriri ezi, nooreeba ngu “abakama abarikutegyeka” abarikugambwaho ni zaagavumenti. Obu Yehova akirekireho zaagavumenti ezi, nizikora omurimo mukuru, ziteeraho kureeta obutebeekana n’okuhitsya aha bantu obuheereza obu barikwetenga. Nitworeka ngu nitworobera gavumenti ezi twakuratira ebiragiro ebi zirikutaho. Nitushashura emishoro yoona ei zirikutushaba, twijuza gye ebihandiiko ebi gavumenti erikubaasa kutwenza, kandi tworobera ebiragiro ebirikutwariramu itwe, amaka gaitu, ebintu ebi twine n’eby’obushuubuzi. Kwonka titurikworobera ab’obushoboorozi baayenda ngu tugomere Ruhanga. Kureka, nitubagarukamu nk’oku entumwa eza ira zaagizire: “Tushemereire kworobera Ruhanga okukira abantu.”—Ebyakozirwe 5:28,  29; reeba akabokisi “N’Oha Ou Nshemereire Kworobera?” aha rupapura 42.

¹⁹ Kandi nitworeka ngu nitworobera abakama abarikutegyeka twakoragana gye n’abantu abandi. Obumwe, nitubaasa kukoragana n’ab’obushoboorozi tutabandize kurabira omu bandi. Entumwa Paulo akakoragana n’abategyeki nka Festo n’Omugabe Heroode Aguripa. Abashaija aba bakaba baine enshobe z’amaani, kwonka Paulo akagamba nabo omu muringo gw’ekitiinisa. (Ebyakozirwe 26:2, 25) Nitutooreza Paulo, n’obu ou turikugamba nawe yaakuba ari omutegyeki mukuru nari omuporiisi owa butoosha. Omu ishomero, Abakristaayo abato nibateeraho kworobera abeegyesa baabo, abakuru b’eishomero n’abakozi. Titurikuha kitiinisa abo bonka abarikukunda enyikiriza zaitu, kureka nitukiha n’abo abarikuhakanisa Abajurizi ba Yehova. Buzima, n’abatari baheereza ba Ruhanga okutwarira hamwe bashemereire kureeba ngu nitubaha ekitiinisa.—Shoma Abarooma 12:17, 18; 1 Petero 3:15.

20, 21. Bimwe aha birungi ebirikuruga omu kuha abaine obushoboorozi ekitiinisa ni biiha?

²⁰ Ka tufeyo munonga kuha abandi ekitiinisa. Entumwa Petero akahandiika ati: “Muhe abantu boona ekitiinisa.” (1 Petero 2:17) Abantu baakireeba ngu buzima nitubaha ekitiinisa, nikibaasa kubakwataho munonga. Ijuka ngu abantu baingi ebiro ebi tibarikuha bandi kitiinisa. Okuha abandi ekitiinisa n’omuringo gumwe ogu turikworoberamu ekiragiro kya Yesu eki: “Omushana gwanyu gube nikwo gwajwa gutyo omu maisho g’abantu, bareebe emicwe yaanyu emirungi, babone kuhimbisa Shoimwe ori omu iguru.”—Matayo 5:16.

²¹ Omu nsi egi eri omu mwirima, abantu ab’emitima mirungi nibaija omu mushana gw’eby’omwoyo. N’ahabw’ekyo okuha ekitiinisa ab’omu maka, omu kibiina, n’abakama abarikutegyeka nikibaasa kushendashenda bamwe kugyendera hamwe naitwe omu mushana. Ekyo ka ni kirungi! N’obu ekyo kyakuba kitabaireho, twaha abantu ekitiinisa nitushemeza Yehova Ruhanga, kandi kituhwera kwerindira omu kukunda kwe. Mbwenu ni kiconco ki ekirikukira ekyo?