1, 2. Ni kiconco ki eky’omuhendo kuruga ahari Ruhanga, kandi n’ahabw’enki?

TATAITWE ow’omu iguru atuhaire ekintu ky’omuhendo, nikyo kiconco ky’amagara nk’abantu abaine obwengye, abarikubaasa kutooreza emitwarize ye. (Okutandika 1:27) Ahabw’ekiconco ekyo eky’omuhendo, nitubaasa kwetegyereza oku emisingye ya Baibuli erikubaasa kutugasira. Twagigyenderaho, nitubaasa kukura omu by’omwoyo, tube abantu abarikukunda Yehova kandi abu “emitima yaabo [etendekirwe] kutaanisa ekirungi n’ekibi.”—Abaheburaayo 5:14.

² Okwetegyereza emisingye ya Baibuli ni kikuru munonga obunaku obu, ahakuba ensi egumire munonga kandi tihariho biragiro ebirikukwata ahari buri mbeera erikubaasa kubaho. Eby’obushaho nibyoreka gye enshonga egi, na munonga aha bikwatiraine n’emibazi n’emiringo y’obujanjabi erikutwariramu okukoresa eshagama. Egi n’enshonga nkuru ei boona abarikwenda kworobera Yehova baine kutaho omutima. Kandi, twayetegyereza emisingye ya Baibuli erikukwata aha nshonga egi, nitubaasa kucwamu ebitarikwija kureetera omutima gwaitu kutushinja kandi ebiraaturindire omu kukunda kwa Ruhanga. (Enfumu 2:6-11) Teekateeka aha misingye emwe egi.

3, 4. Ni ryari obu Ebyahandiikirwe byabanza kugamba aha kwera kw’eshagama, kandi ekyo nikyegamira ha misingye ki?

³ Yehova akabanza kworeka akakwate akari ahagati y’amagara  n’eshagama n’okwera kwabyo, bwanyima ya Kaini kwita Abeeli. Ruhanga akagambira Kaini ati: “Eiraka ry’eshagama ya murumuna waawe nirimpururiza omu itaka.” (Okutandika 4:10) Ahari Yehova, eshagama ya Abeeli ekaba neejwekyera amagara ge agaabaire gaaheza kwitwa. N’ahabw’ekyo, nitubaasa kugira ngu eshagama ya Abeeli ekaba neetakira Ruhanga okugihoorera enzigu.—Abaheburaayo 12:24.

⁴ Bwanyima y’Omwegyemure ogw’omu bwire bwa Noa, Ruhanga akaikiriza abantu kurya enyama y’enyamaishwa beitu etari shagama yaazo. Ruhanga akagira ati: “Kwonka mutarirya enyama n’amagara gaayo, niyo shagama yaayo. Kandi buzima eshagama y’amagara gaanyu ndyagihoora.” (Okutandika 9:4, 5) Ekiragiro eki kikaba nikikwata ahari baijukuru ba Noa boona okuhitsya n’aha b’omu bunaku obu. Nikyongyera kuhamya eki Ruhanga yaabaire naamanyisa obu yaagambira Kaini ngu amagara g’ebihangirwe byona nigajwekyerwa eshagama. Ekyo kandi nikihamiza kimwe ngu Yehova, Enshuro y’amagara, naija kujunaana abantu boona abatarikuha amagara n’eshagama ekitiinisa.—Zaaburi 36:9.

5, 6. Ebiragiro ebyahairwe Musa bikooreka bita ngu eshagama n’ey’omuhendo kandi n’erikwera? (Reeba akabokisi “ Fayo aha Magara g’Enyamaishwa.”)

⁵ Amazima makuru aga ag’emirundi ebiri gakaba gari n’omu Biragiro bya Musa. Abaleevi 17:10, 11 nihagira hati: “Omuntu weena . . . orirya eshagama yoona [ey’omuringo gwona,] ndyamuta aha kaso, mmucwe omu ihanga rye. Mumanye ngu amagara g’omubiri gaba omu shagama; nikyo naagibaheera kushukwa aha itambiro ngu erihiirire amagara gaanyu; eshagama niyo erihiirira.” *—Reeba akabokisi “ Amaani g’Eshagama ag’Okucungura,” aha rupapura 76.

⁶ Eshagama y’enyamaishwa ku yaabaire eba etakoresiibwe aha itambiro, ekaba eba eshemereire kwatwa ahansi. Omu muringo  gw’akamanyiso, amagara gakaba gagarurirwa Owaagahangire. (Eky’Ebiragiro 12:16; Ezekieli 18:4) Kwonka yetegyereze ngu Abaisraeli bakaba batakuratiriza buri kashagama koona omu nyama. Enyamaishwa ku yaabaire esharwa gye, bakagireka ekajwa kandi ekabaagwa gye, Omuisraeli akaba agirya omutima gwe gutarikumushinja, ahakuba ekyo kikaba nikyoreka ngu yaaha Omuhi w’Amagara ekitiinisa.

7. Daudi akooreka ata ngu akaba naatwara eshagama nk’erikwera?

 ⁷ Daudi, ‘omuntu owaabaire ari nk’oku omutima gwa Yehova gurikwenda,’ akeetegyereza emisingye eri omu kiragiro kya Ruhanga aha shagama. (Ebyakozirwe 13:22) Eizooba rimwe obu yaabaire aine eiriho ry’amaani, abashaija be bashatu bakooga amagara gaabo, baaza omu rusiisira rw’abazigu, baatahayo amaizi omu iziba, baagamureetera. Daudi akakora ki? Akabuuza ati: “Nimbaasa nta kunywa eshagama y’abashaija abaayoga amagara gaabo?” Omu maisho ga Daudi, amaizi ago gakaba gari nk’eshagama nari amagara g’abashaija be abo. N’obu araabe yaabaire aine eiriho, ‘akagashuka omu maisho ga Yehova.’—2 Samueli 23:15-17.

8, 9. Oku Ruhanga yaabaire naatwara amagara n’eshagama, ku haabaireho ekibiina Ekikristaayo kwahinduka? Shoboorora.

⁸ Emyaka nka 2,400 bwanyima ya Noa kuheebwa ekiragiro ekirikukwata aha shagama kandi na bwanyima y’emyaka 1,500 ebiragiro biherize kuteebwaho, Yehova arikukoresa omwoyo gwe, akahwera ab’akakiiko akareeberezi ak’ekibiina Ekikristaayo ekya ira kuhandiika bati: ‘Omwoyo ogurikwera naitwe twasiima kutabakorera gundi mutwaro oguremeire kureka okwikiriza ebi ebibashemereire, okureka kurya ebihongyeirwe ebishushani, n’eshagama, n’ebinigirwe, n’obushambani.’—Ebyakozirwe 15:28, 29.

⁹ Buzima, akakiiko akareeberezi aka ira kakeetegyereza ngu eshagama n’erikwera kandi ngu okugikoresa kubi ni kibi nk’okushambana nari okuramya ebishushani. Abakristaayo ab’amazima omu bunaku obu nibaikiriza ekyo. Kandi ahabw’okugira ngu nibagyendera aha misingye ya Baibuli, nibashemeza Yehova baaba nibacwamu aha bikwatiraine n’okukoresa eshagama.

10, 11. (a) Abajurizi ba Yehova nibatwara bata okuteebwamu eshagama n’ebicweka byayo ebikuru? (b) Aha bikwatiraine n’eshagama, ni miringo ki ey’obujanjabi ei Abakristaayo barikubaasa kucwamu ebitarikushushana?

¹⁰ Abajurizi ba Yehova nibamanya ngu ‘okureka eshagama’ nikimanyisa okutaikiriza kuteebwamu eshagama nari okugiha abandi nari okubiika eyaabo reero bwanyima ekabateebwamu. Ahabw’okwenda kworobera ekiragiro kya Ruhanga, tibarikwikiriza  n’ebicweka by’eshagama bina ebikuru: obutafaari oburikutukura n’oburikwera, platelets, na plasma.

¹¹ Omu bunaku obu, ebicweka by’eshagama ebyo bina nibabaasa kubyihamu obundi bucweka bw’eshagama obukye munonga oburikubaasa kukoresibwa omu miringo mingi. Omukristaayo naabaasa kwikiriza obucweka obwo? Naabutwara nka “eshagama”? Buri omwe aine kwecweramu aha nshonga egi. Nikyo kimwe n’emiringo y’obujanjabi nka hemodialysis, hemodilution, n’okurabya eshagama yaawe omu kyoma ekirikukora nk’omutima, obumwe ekirikugigyegyena kikagiihamu oburofa reero ekarekurwa ekagaruka omu mubiri gwawe etabandize kubiikwa.—Reeba Ebyongyeirweho, aha rupapura 215-218.

12. Tushemereire kureeba kandi tukatwaza tuta omu nshonga ez’okwecweramu?

¹² Ebi turikwecweramu shi tibirikukwata ahari Yehova na kakye?  Ngaaha, ahakuba naafayo aha biteekateeko byaitu n’aha bigyendererwa byaitu. (Shoma Enfumu 17:3; 24:12.) N’ahabw’ekyo, bwanyima y’okushaba n’okucondooza aha mubazi nari aha muringo gw’obujanjabi, nitwenda kucwamu turikwihirira aha muntu waitu ow’omunda otendekirwe Baibuli. (Abarooma 14:2, 22, 23) Abandi tibashemereire kutugyema kucwamu nkabo, kandi naitwe titushemereire kubabuuza tuti, “Okaacwamu ota ku waakuba ori omu mbeera nk’eyangye?” Omu nshonga nk’ezo, buri Mukristaayo ashemereire ‘kwekorera omutwaro gwe wenka.’ *—Abagalatia 6:5; Abarooma 14:12; reeba akabokisi “ Nintwara Eshagama nk’Erikwera?” aha rupapura 81.

13. Ebiragiro n’emisingye ya Yehova nibyoreka ki ahariwe? Shoboorora.

¹³ Ebiragiro n’emisingye eri omu Baibuli nibyoreka ngu Yehova n’Omuhi w’Ebiragiro ow’obwengye kandi Tataitwe oine rukundo, orikufayo munonga ahabw’oburungi bw’abaana be. (Zaaburi 19:7-11) N’obu ekiragiro ‘ky’okwetantara eshagama’ kiraabe kitarahairwe ngu tugire amagara marungi, nikiturinda oburemeezi oburikureetwa okuteebwamu eshagama. (Ebyakozirwe 15:20) Nangwa abantu baingi omu by’obushaho nibareeba okushemezibwa otateibwemu shagama nk’omuringo gw’obujanjabi ogurikukirayo oburungi omu bunaku obu. Aha Bakristaayo ab’amazima, okutunguuka nk’okwo nikuhamya obwengye bwa Ruhanga bwingi na rukundo ye mpango nk’omuzaire.—Shoma Isaaya 55:9; Yohaana 14:21, 23.

14, 15. (a) Rukundo ei Ruhanga ainiire abantu be ekaba neereebekyera omu biragiro nka biiha? (b) Noobaasa kugyendera ota aha misingye egyo ey’okwerinda?

¹⁴ Okufayo kwa Ruhanga ahabw’oburungi bw’abantu be omuri Israeli eya ira, kukaba nikureeberekyera omu biragiro bye ebirikukira obwingi. Nk’eky’okureeberaho, akaragiira ngu aha mutwe gw’amaju g’Abaisraeli habeho eky’okuzibira abantu kugwa,  ahabw’okugira ngu bakaba bakoreraho ebintu bingi. (Eky’Ebiragiro 22:8; 1 Samueli 9:25, 26; Nehemia 8:16; Ebyakozirwe 10:9) Ruhanga kandi akabaragiira ngu ente ezirikucumita bazirinde. (Okuruga 21:28, 29) Omuntu ku yaabaire ayehuzya ebiragiro ebi, kikaba kyoreka ngu tarikufayo ahabw’oburungi bw’abandi, kandi akaba agiibwaho orubanja rw’okusheesha eshagama.

¹⁵ Noobaasa kugyendera ota aha misingye eri omu biragiro ebi? Teekateeka aha motoka yaawe, emivugire yaawe, amatungo gaawe, eka yaawe, omurimo gwawe n’eby’okweshemeza ebi orikwejumbamu. Omu nsi ezimwe, eminyeeto mingi neefeera omuri zaabutandu ahabw’okuba nibeejumba omu bintu ebirikuta amagara gaabo omu kabi. Kwonka eminyeeto erikwenda kwerindira omu kukunda kwa Ruhanga neetwara amagara nk’ag’omuhendo kandi terikwejumba omu by’okweshemeza eby’akabi. Tibarikuteekateeka ngu eminyeeto terikuhikwaho kabi. Kureka, nibashemerererwa obunyeeto bwabo barikwerinda ebintu eby’akabi.—Omubuurizi 11:9, 10.

16. Ni musingye ki gwa Baibuli ogurikukwata aha kwihamu enda? (Reeba ebiri aha kanyonyoozi ahansi.)

¹⁶ N’amagara g’omwana otakazairwe n’ag’omuhendo omu maisho ga Ruhanga. Omuri Israeli eya ira, omuntu ku yaabaire akora kubi omukazi oine enda omukazi nari omwana we akafa, Ruhanga akaba atwara owarugwaho akabi ako nk’omwitsi, kandi akaba ariha ‘amagara ge arikwitwa.’ * (Shoma Okuruga 21:22, 23.) Mbwenu teekateeka aha ku Yehova arikwehurira ku arikureeba abantu buri mwaka nibaihamu enda nkana ezitarikubarwa, baingi ahabw’okwenda kweshemeza nari ahabw’obushambani!

17. Okaahuumuriza ota omuntu owaihiremu enda atakeegire mitindo ya Ruhanga?

¹⁷ Kwonka shi omukazi ku yaakuba yaihiremu enda atakeegire amazima ga Baibuli? Nikiba nikimanyisa ngu Yehova tarikubaasa kumusaasira? Ngaaha buzima! Omuntu oyeteisiize kimwe buzima  naabaasa kugira amatsiko ngu Yehova naamusaasira arikwihirira aha shagama ya Yesu eyaasheeshekire. (Zaaburi 103:8-14; Abaefeso 1:7) Na Kristo akagira ati: “Tindaizire kweta bahikiriire kureka abasiisi ngu beeteise.”—Luka 5:32.

18. Baibuli neegamba eta ahari ekyo ekirikureetera abantu okusheesha eshagama nyingi?

¹⁸ Oyihireho okwetantara kukora kubi abandi, Yehova naayenda ngu twihire kimwe rwango omu mitima yaitu obu nibwo bukomooko bukuru bw’okusheesha eshagama. Entumwa Yohaana akahandiika ati: “Weena orikwanga mwene ishe n’omwitsi.” (1 Yohaana 3:15) Omuntu nk’ogwo naaba atarikwanga mugyenzi we kwonka, kureka naaba naamutengyera n’okufa. Rwango ye neebaasa kureebekyera omu bi arikubeiherera mugyenzi we, ebyakureeteire Yehova kucwera omuntu ogwo orubanja ku ogire ngu nigaba gari amazima. (Abaleevi 19:16; Eky’Ebiragiro 19:18-21; Matayo 5:22) Mbwenu ka ni kikuru kwihira kimwe omu mitima yaitu rwango yoona eyaakuba erimu!—Yakobo 1:14, 15; 4:1-3.

19. Omuntu orikwebemberwa emisingye ya Baibuli naatwara ata ebyahandiikirwe nka Zaaburi 11:5 na Abafilipi 4:8, 9?

¹⁹ Abarikutwara amagara nk’ag’omuhendo nk’oku Yehova arikugatwara kandi abarikwenda kwerindira omu kukunda kwe nabo nibetantara obushaarizi obw’emiringo yoona. Zaaburi 11:5 nihagira ngu Yehova ‘naayanga abarikukunda endwano.’ Ekyahandiikirwe eki tikirikworeka emitwarize ya Ruhanga yonka; beitu n’omusingye gw’okukuratira omu mitwarize yaitu. Nikireetera abarikukunda Ruhanga kwetantara eby’okweshemeza byona ebirikushagika obushaarizi. Nikyo kimwe n’ebigambo ngu Yehova ni “Ruhanga mukama w’obusingye” nibihiga abaheereza be okwijuza ebiteekateeko n’emitima yaabo ebintu ebishemeire, ebirungi kandi ebirikusiimwa, ebirikureetaho obusingye.—Shoma Abafilipi 4:8, 9.

20-22. Abakristaayo nibatwaza bata aha bikwatiraine n’ensi, kandi n’ahabw’eki?

²⁰ Omu maisho ga Ruhanga, ensi ya Sitaane yoona eine orubanja rw’okusheesha eshagama. Ebibiina byayo eby’obutegyeki, ebirikworekwa omu Byahandiikirwe nk’enyamaishwa enshaarizi,  biitsire obutabarwa bw’abantu, otwariiremu n’abaheereza ba Yehova. (Danieli 8:3, 4, 20-22; Okushuuruurwa 13:1, 2, 7, 8) Ab’eby’obushuubuzi n’ab’ebya sayansi bakwataniise hamwe n’amahanga aga agari nk’enyamaishwa, baakora eby’okurwanisa ebirikukirayo kuba eby’akabi, baatungiramu amagoba maingi. Ka kihikire okugira ngu “ensi yoona eri omu butegyeki bw’Omubi ogwo”!—1 Yohaana 5:19.

²¹ Ahabw’okugira ngu abakuratsi ba Kristo “ti b’ensi” kandi ngu nibangira kimwe kwejumba omu ntaro n’omu by’obutegyeki, nibetantara orubanja rw’okusheesha eshagama. * (Yohaana 15:19; 17:16) Kandi barikutooreza Kristo, tibarikutwariza kubi abarikubahiiganisa. Kureka, nibooreka abazigu baabo rukundo, n’okubashabira babashabira.—Matayo 5:44; Abarooma 12:17-21.

²² Okukira byona, Abakristaayo ab’amazima nibetantara kukwatanisa na ‘Babulooni orurembo Orukuru,’ nari shi ediini zoona ez’ebishuba kandi eziine orubanja ruhango orw’okusheesha eshagama. Ekigambo kya Ruhanga nikigira kiti: ‘Eshagama  ya baanabi n’abarikwera n’eya boona abaitsirwe omu nsi ekashangwa omuri orwo rurembo.’ N’ahabw’ekyo, nituraburwa tuti: “Mururugyemu imwe bantu bangye ‘mwe.”—Okushuuruurwa 17:6; 18:2, 4, 24.

23. Okuruga omuri Babulooni orurembo Orukuru nikitwariramu ki?

²³ Okuruga omuri Babulooni orurembo Orukuru nikikira aha kwiha eiziina ryawe omu bitabo byabo. Kandi nikitwariramu okwanga ebikorwa bibi ebi ediini z’ebishuba zirikwikiriza nari ebi zirikushagika butunu nk’emicwe mibi, okwejwanzya omu by’obutegyeki, n’okwemarira aha kusherura eby’obugaiga. (Shoma Zaaburi 97:10; Okushuuruurwa 18:7, 9, 11-17) Ebikorwa ebi ka nibikira kureetera abantu kusheesha eshagama!

24, 25. Ruhanga naihirira ahari ki okusaasira omuntu oine orubanja rw’okusheesha eshagama, kandi eki kikaba nikijwekyerwa ki omu bunaku bw’okuhandiikwa kwa Baibuli?

²⁴ Tutakaizire omu kuramya okw’amazima, omu muringo gumwe buri omwe omuriitwe akaba naashagika ensi ya Sitaane, n’ahabw’ekyo tukaba twine orubanja rw’okusheesha eshagama. Kwonka ahabw’okuhindura emitwarize yaitu, tukaikiririza omu kitambo kya Kristo, kandi tukehayo ahari Ruhanga, Ruhanga akatugirira embabazi yaatuha oburinzi bw’eby’omwoyo. (Ebyakozirwe 3:19) Oburinzi obwo omu bunaku bw’okuhandiikwa kwa Baibuli bukaba nibujwekyerwa endembo z’okuhungiramu.—Okubara 35:11-15; Eky’Ebiragiro 21:1-9.

²⁵ Entebeekanisa egyo ekaba neekora eta? Omwisraeli ku yaabaire aita mugyenzi we atagyendereire, akaba airukira omuri rumwe aha ndembo ezo. Bwanyima y’abaramuzi kucwamu ngu akaba atamugyendereire, nyakwita akaba aine kuguma omu rurembo rw’okuhungiramu okuhitsya obu omunyamurwa omukuru yaabaire afa. Obwo akaba agira obugabe kutuura ahandi hoona ataine rubanja. Ka n’eky’okureeberaho kirungi eky’embabazi za Ruhanga, kandi ekirikworeka omuhendo ogu Yehova arikuta aha magara g’abantu! Ebiri nk’endembo z’okuhungiramu ezo eza ira n’ebi Ruhanga arikutuha arikwihirira aha kitambo kya Kristo, okuturinda okufa ahabw’okuhenda ekiragiro kya Ruhanga ekirikukwata aha magara n’eshagama tutagyendereire.  Ruhanga okutuha ekitambo nookitwara nka kikuru? Noobaasa kworeka ota ngu nookitwara nka kikuru? Omuringo gumwe ogw’okukyorekamu n’okweta abandi okukwegaitaho omu rurembo rw’okuhungiramu orw’akamanyiso na munonga nk’oku turikureeba ngu “okubonabona kwingi” kuri haihi kutandika.—Matayo 24:21; 2 Abakorinso 6:1, 2.

26-28. Ni mu muringo ki ogu embeera yaitu obunaku obu eri nk’eya nabi Ezekieli, kandi nitubaasa kwerindira tuta omu kukunda kwa Ruhanga?

²⁶ Embeera y’abantu ba Ruhanga omu bunaku obu neetwijutsya eya nabi Ezekieli, ou Yehova yaaragiire kukora nk’omurinzi w’okuranga okurabura kwe aha Baisraeli. Ruhanga akagira ati: “Hurira ekigambo ekirikuruga omu kanwa kangye, obampanire.” Kuri Ezekieli atarafiireyo aha murimo gwe, akaba naija kubuuzibwa eshagama y’abaitsirwe obu orurembo Yerusaalemu rwacwekyerezibwa. (Ezekieli 33:7-9) Kwonka Ezekieli akooroba atyo tiyaagibwaho rubanja rw’okusheesha eshagama.

²⁷ Obunaku obu, tworekyeire omuheru gw’ensi ya Sitaane yoona. N’ahabw’ekyo okuhikaana n’amakuru g’Obukama, Abajurizi ba Yehova nibatwara okurangirira ‘eizooba eri Ruhanga arihooreraho enzigu’ nk’omugisha kandi obujunaanizibwa. (Isaaya 61:2; Matayo 24:14) Nooyejumba omu murimo ogu omukuru omu bwijwire? Entumwa Paulo akaba naatwara omurimo gwe gw’okubuurira nka mukuru munonga. Kandi akabaasa kugira ati: “Ndi mwere ahabw’eshagama y’abantu boona; ahakuba tindatiinire kubagambira naama yoona eya Ruhanga.” (Ebyakozirwe 20:26, 27) Ka n’eky’okureeberaho kirungi eky’okutooreza!

²⁸ N’eky’amazima, okubaasa kwerindira omuri rukundo ya Yehova nk’omuzaire, titushemereire kugarukira aha kutwara amagara n’eshagama nk’oku Yehova arikubitwara kwonka. Twine n’okuguma turi abeecumi, nari turikwera, omu maisho ge, nk’oku turaareebe omu shuura erikukurataho.