1, 2. Ni kwombeka kwa murimo ki oku orikwejumbamu, kandi ahabw’enki oku orikwombeka kuri kukuru munonga?

ORIYO nooyombeka otaireho omutima. Okwombeka okwo kutwire nikugyenda omumaisho okumara obwire kandi nikuza kugumizamu n’omu biro by’omumaisho. N’obu okwombeka oku kuraabe kutoorobi kwonka nikwesiimisa. N’obu haakubaho ki, oyeteekateekire kutareka okwombeka okwo nari okuba omwegande, ahakuba oku oriyo nooyombeka nikukwata aha magara gaawe hati n’aha biro byawe by’omumaisho. Ahabw’enki? Ahakuba ekyombeko ekiriyo nikyombekwa niiwe!

² Entumwa Yuda akooreka ngu twine kweyombeka. Obu yaahiga Abakristaayo ‘okwerindira omu kukunda kwa Ruhanga,’ omu kyahandiikirwe eki akooreka n’ekintu kikuru ekirikubaasa kutuhwera kukora ekyo: “Mweyombekye aha musingi gw’okwikiriza kwanyu okurikwera munonga.” (Yuda 20, 21) Noobaasa kweyombeka ota, okoongyera kuhamya okwikiriza kwawe kugira ngu oyerindire omu kukunda kwa Ruhanga? Ka tureebe emiringo eshatu ei orikubaasa kwombekamu okwikiriza kwawe.

3-5. (a) Sitaane naayenda kukuhabisa ngu ogire miteekateekyere ki aha biragiro bya Yehova? (b) Tushemereire kureeba tuta ebiragiro bya Ruhanga, kandi ekyo nikiija kutukwataho kita? Ha eky’okureeberaho.

³ Eky’okubanza kya byona, twine kuhamya okwikiriza kwaitu omu biragiro bya Ruhanga. Omu kwega akatabo aka, oyetegyereize  emitindo ya Yehova mingi erikukwata aha micwe. Iwe noogiteekateekaho ki? Sitaane naayenda kukubuzabuza ngu oreebe okukuratira ebiragiro bya Yehova, emisingye ye n’emitindo ye, nk’ekirikukuremesa kutunga ebirungi kandi nk’ekitari kya rukundo. Atwire naakoresa omutego ogu okuruga obu gwamukorera gye omuri Edeni. (Okutandika 3:1-6) Naiwe naija kukubeihabeiha atyo? Nikiija kurugiirira aha ku orikureeba ebintu.

⁴ Eky’okureeberaho: Ka tugire ngu oriyo noogyendagyenda omu mwanya murungi munonga ogubyairwemu obunyaatsi burungi n’emiti. Ku oza kwetegyereza, oreeba orugo ruraingwa rurikutaanisa omwanya ogwo. Omwanya oguri enyima y’orugo nigushemeza. Omu kubanza, noobaasa kureeba orugo orwo nk’orutarikwetengyesa ahariiwe. Kwonka ku oza kwetegyereza, oreeba entare neeshooba haine eki erikwenda kukwata! Hati oreeba ngu orugo orwo buzima n’ekintu ky’oburinzi. Hariho enyamaishwa ekugwereire kukurya hati? Ekigambo kya Ruhanga nikirabura kiti: “Mwerinde mugume nimureeba. Sitaane omuzigu, waanyu naashooba nk’entare erikutsinda, naasherura ou araarye.”—1 Petero 5:8.

⁵ Sitaane n’omuzigu mubi munonga. Ahabw’okugira ngu Yehova tarikwenda ngu tugwe omu mitego ya Sitaane, ataireho ebiragiro okuturinda ‘obugobya’ bw’omubi ogwo. (Abaefeso 6:11) N’ahabw’ekyo, buri kuteekateeka aha biragiro bya Ruhanga, tushemereire kubireeba nk’omuringo ogu Tataitwe ow’omu iguru arikutworekamu rukundo ye. Twabireeba tutyo, nibiija kutubaasisa kugira oburinzi n’okushemererwa. Entumwa Yakobo akahandiika ati: “Ogwo orikwetegyereza ebiragiro ebihikire eby’obusingye, akabyezirikira, . . . omuntu ogwo [aryagira okushemererwa] omu kukora kwe.”—Yakobo 1:25.

6. Ni muringo ki ogw’okwombekamu okwikiriza omu biragiro bya Ruhanga n’emisingye ye ehikiriire ogurikukirayo oburungi? Ha eky’okureeberaho.

⁶ Okukuratira ebiragiro bya Ruhanga nigwo muringo ogurikukirayo oburungi ogw’okugumya okwikiriza kwaitu omuri ogwo Owaataireho Ebiragiro, n’omu bwengye oburi omu biragiro bye. Nk’eky’okureeberaho, “ekiragiro kya Kristo” nikitwariramu  ekiragiro kya Yesu eky’okwegyesa abandi ‘byona ebi yaaragiire.’ (Abagalatia 6:2; Matayo 28:19, 20) Kandi Abakristaayo nibatwara ekiragiro ky’okuguma nibaija omu nteerane kuramya n’okwombekana nka kikuru munonga. (Abaheburaayo 10:24, 25) Ebiragiro bya Ruhanga nibitwariramu okushaba Yehova obutoosha kandi twihire aha mutima. (Matayo 6:5-8; 1 Abatesalonika 5:17) Ku turikugyendera aha biragiro ebyo, nitweyongyera kwetegyereza obuhabuzi burungi obu birikutuha. Okubyorobera nikutureetera okushemererwa, kandi tutunga n’okumarwa oku tutakubaasize kutunga kuruga ahandi hoona omu nsi egi embi. Ku orikuteekateeka aha ku ogasiirwe ahabw’okugyendera aha biragiro bya Ruhanga, buzima okwikiriza kwawe omuribyo tikurikweyongyera?

7, 8. Abo abarikutiina ngu nibabaasa kuremwa kuhamira omu muhanda gw’okuhikiirira emyaka yaagyenda neehingura, Ekigambo kya Ruhanga nikibahamiza kita?

⁷ Kwonka obumwe, abamwe nibatiina ngu nikiija kubagumira okuhamira aha biragiro bya Yehova emyaka yaagyenda neehingura. Nibatiina ngu nibabaasa kuremwa. Ku oraabe oraagizireho ekiteekateeko nk’ekyo, guma noijuka ebigambo ebi: “Niinye MUKAMA Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.  Nangwa kuri waayorobeire ebiragiro byangye! Obwo obusingye bwawe bukaabaire nk’omugyera, n’okuhikiirira kwawe kuba nk’ebingonzi by’enyanja.” (Isaaya 48:17, 18) Oraatwire obwire kuteekateeka aha ku ebigambo ebyo birikugaruramu amaani?

⁸ Omu nyiriri ezi, Yehova naatwijutsya ngu twamworobera nitugasirwa. Naaraganisa ngu twamworobera, nitutunga emigisha ebiri. Ogw’okubanza, obusingye bwaitu nibwija kuba nk’omugyera, bube bwingi kandi bugumeho. Ogwa kabiri, okuhikiirira kwaitu nikwija kuba nk’ebingonzi by’enyanja. Waayemerera haihi n’enyanja, nooreeba ebingonzi bitarikuhwayo. Noomanya ngu ebingonzi nibiija kuguma nibiija ebiro byona. Yehova naagira ngu okuhikiirira kwawe, ekirikumanyisa okukora ebirungi kwawe, nikwija kuba okw’ebiro byona. Waaguma nooteeraho kuba omwesigwa ahari Yehova, tarikwija kukureka kugwa! (Shoma Zaaburi 55:22.) Mbwenu shi ebiraganiso nk’ebyo tibirikwombeka okwikiriza kwawe omuri Yehova n’omu biragiro bye ebirikwera?

9, 10. (a) Ahabw’enki ni kirungi Abakristaayo kugira ekigyendererwa ky’okukura omu by’omwoyo? (b) Okureeba ebintu omu muringo gw’eby’omwoyo nikureeta kuta okushemererwa?

⁹ Ekintu kya kabiri omu kweyombeka kwawe nikyorekwa omu bigambo ebi: ‘Ka tugumizemu kukura’ omu by’omwoyo. (Abaheburaayo 6:1) Okukura omu by’omwoyo n’ekintu kikuru munonga aha Mukristaayo. N’obu turaabe tutarikubaasa kuba abantu abahikiriire omu bunaku obu, kwonka nitubaasa kukura omu by’omwoyo. Ekindi, Abakristaayo nibatunga okushemererwa kwingi omu kuheereza Yehova ku barikugyenda nibakura omu by’omwoyo. Ahabw’enki kiri kityo?

¹⁰ Omukristaayo okuzire omu by’omwoyo naareeba ebintu nk’oku Yehova arikubireeba. (Yohaana 4:23) Paulo akahandiika ati: ‘Abakuratira eby’omubiri bata omutima aha by’omubiri; kwonka abakuratira omwoyo bata omutima aha by’omwoyo.’ (Abarooma 8:5) Okureeba ebintu nk’oku abantu barikubireeba  tikurikureeta okushemererwa kwingi, ahakuba butoosha nibaba nibeeyendeza, nibareeba haihi, kandi nibata omutima aha by’omubiri. Okureeba ebintu omu muringo gw’eby’omwoyo nikureeta okushemererwa ahakuba nikuta omutima ahari Yehova, ‘Ruhanga ow’okushemererwa.’ (1 Timoseo 1:11) Omuntu okuzire omu by’omwoyo naaba aine ekihika ky’okushemeza Yehova kandi n’obu yaakuba naagyezibwa naashemererwa. Ahabw’enki? Okugyezibwa nikutuha omugisha gw’okworeka ngu Sitaane n’omubeihi n’okuhamya obwesigwa bwaitu, ekintu ekirikushemeza Tataitwe ow’omu iguru.—Enfumu 27:11; shoma Yakobo 1:2, 3.

11, 12. (a) Paulo akagamba ki aha ‘kubaasa kw’Omukristaayo okw’okwetegyereza,’ kandi ekigambo ‘okutendekwa’ nikimanyisa ki? (b) Omubiri gwine kutendekwa guta okubaasa kumanyiira?

¹¹ Okukura omu by’omwoyo nikubaho kurabira omu kutendekwa. Teekateeka aha kyahandiikirwe eki: ‘Eby’okurya ebigumire bishemereire abakuru, abu okubaasa kwabo okw’okwetegyereza kutendekirwe kutaanisa ekibi n’ekirungi kurabira omu kukukoresa.’ (Abaheburaayo 5:14) Obu Paulo yaagamba aha “kutendekwa” kw’okubaasa kwaitu okw’okwetegyereza, akakoresa ekigambo ky’Orugriika ekyabaire nikikoresibwa omu myanya y’okukoreramu ebisasayizi omuri Bugriika omu kyasha ky’okubanza, ahakuba nikibaasa n’okuvunuurwa ‘nk’otendekirwe kukora omuzaano.’ Hati teekateeka aha birikugyendera omu kutendekwa okwo.

¹² Obu twazaarwa, emibiri yaitu ekaba etatendekirwe. Nk’eky’okureeberaho, omwereere naaba atarikumanya ei ebigyere bye n’emikono ye birikutoora. N’ahabw’ekyo, omwana naabitooza ei yaabona, obundi abyeteera ahamaisho, haza akangarana. Kwonka butoosha ku arikuguma naakoresa emikono ye n’ebigyere bye, omubiri gwe nigutendekwa. Omwana naayajura, agyenda kandi airuka. * Kandi shi orikukora omuzaano? Waamureeba  naayerekyera kandi naayehindurira omu mwanya, torikubaasa kubanganisa ngu okubaasa kukora ekyo atwire naatendeka gye omubiri gwe. Okuba omuhangu omuri ekyo tikurikubaho hataine eki akozire, naaba amazire obwire naatendekwa. Baibuli neeyoreka ngu okutendeka omubiri nk’okwo “nikugasha kakye.” Mbwenu okutendekwa omu by’omwoyo okubaasa kutaanisa ekibi n’ekirungi, kwo t’okw’omugasho n’okukiraho?—1 Timoseo 4:8.

13. Nitubaasa kutendeka tuta okubaasa kwaitu okw’okwetegyereza?

¹³ Omu katabo aka, tugambire aha bintu bingi ebiraije kukuhwera kutendeka okubaasa kwawe okw’okwetegyereza kugira ngu ogume ori omwesigwa ahari Yehova nk’omuntu okuzire omu by’omwoyo. Omu bi orikucwamu kukora buri izooba, shaba kandi oteekateekye aha misingye n’ebiragiro bya Ruhanga. Omu ki oraabe nooza kucwamu kyona, yebuuze: ‘Ni misingye ki ya Baibuli erikukwata aha nshonga egi? Nimbaasa kugigyenderaho nta? Eki ndikuza kukora nikiija kushemeza Tataitwe ow’omu iguru?’ (Shoma Enfumu 3:5, 6; Yakobo 1:5.) Buri ki oraacwemu orikugyendera aha misingye ya Baibuli nikiija kwongyera kutendeka okubaasa kwawe okw’okwetegyereza. Okwetendeka okwo nikwija kukuhwera kukura omu by’omwoyo n’okuguma ohamire.

14. N’enki eki tushemereire kukora okubaasa kukura omu by’omwoyo, kwonka ni buhabuzi ki obu twine kuguma nitwijuka?

¹⁴ N’obu turaabe nitubaasa kuba abantu abakuzire omu by’omwoyo, kwonka okukura omu by’omwoyo tikwine bugarukiro. Okubaasa kukura, tushemereire kurya. Paulo akagira ati: ‘Eby’okurya ebigumire bishemereire abakuru.’ Ekikuru ekiraakuhwere kwombeka okwikiriza kwawe n’okuguma noorya eby’okurya  eby’omwoyo ebigumire. Ku oraagume noogyendera aha bi orikwega, obwo nibwo bwengye, kandi Baibuli neegira eti: “Obwengye n’ekintu kikuru.” N’ahabw’ekyo, twine kworeka ngu buzima twine enjara y’amazima g’omutaano agu Tataitwe arikutumanyisa. (Enfumu 4:5-7; 1 Petero 2:2) N’eky’amazima, okwongyera kutunga okumanya n’obwengye oburikuruga ahari Ruhanga ti kintu ekishemereire kutureetera kuteekateeka ngu nitukira abandi. Twine kweshwijuma butoosha, kubaasa kwetantara okugira amaryo n’endiijo mitwarize mibi omu mitima yaitu. Paulo akahandiika ati: “[Mugume] mweshwijume mureebe ku muraabe muri omu kwikiriza; kandi mwegyeze mwenka.”—2 Abakorinso 13:5.

15. Ahabw’enki okugira rukundo ni kikuru okubaasa kukura omu by’omwoyo?

¹⁵ Okwombeka enju nikubaasa kuhwa, kwonka omurimo gw’okugireeberera nigugumizamu. Okugihunduuza n’okugiboneza ni kikuru, kandi nk’oku embeera zirikuhinduka, nihabaasa kwetengyesa okwongyeraho ekindi kishengye. Nitwetenga ki okubaasa kukura n’okuguma tuhamire omu by’omwoyo? Ekirikukira byona ni rukundo. Twine kweyongyera kukunda Yehova n’ab’eishe-emwe bagyenzi baitu. Twaba tutaine rukundo, okumanya oku twine n’ebi turikukora nibiba bitaine makuru, nk’okurangira kw’edebe erimu busha. (1 Abakorinso 13:1-3) Twaba twine rukundo, nitubaasa kuba Abakristaayo abakuzire omu by’omwoyo kandi tweyongyere kuhama.

16. Sitaane naareetera abantu kugira miteekateekyere ki, kandi Yehova atuhaire ki okutuhwera?

¹⁶ Ka tureebe ekindi kintu eky’okukoresa omu kweyombeka kwawe. Okubaasa kweyombeka nk’omukuratsi wa Kristo ow’amazima, oine kwegyendesereza omu ku orikuteekateeka. Sitaane, omutegyeki w’ensi egi n’omukugu omu kureetera abantu kwehwa amatsiko, n’okugira ebiteekateeko ebibi ebirikumaramu amaani. (Abaefeso 2:2) Emiteekateekyere nk’egyo n’ey’akabi  aha Bakristaayo nk’oku emungwe eri ey’akabi aha nju y’emiti. Ekirungi, Yehova naatuha ekintu kikuru ekirikubaasa kutuhwera, nigo matsiko.

17. Ekigambo kya Ruhanga nikyoreka kita obukuru bw’amatsiko?

¹⁷ Baibuli neeyoreka eby’okurwanisa byona eby’omwoyo ebi tushemereire kuba twine kubaasa kurwanisa Sitaane n’ensi egi. Kimwe ekikuru ahari ebyo n’enkofiira, nari ‘amatsiko g’okujunwa.’ (1 Abatesalonika 5:8) Omu bwire obu Baibuli yaabaire neehandiikwa, omuserukare omu rutaro akaba amanya ngu tarikubaasa kuhonokaho yaaba ataine nkofiira. Enkofiira eyaabaire eba ekozirwe omu kyoma kandi omunda erimu oruhu, ekaba emurinda omutwe. Nk’oku enkofiira erikurinda omutwe, n’amatsiko nigarinda ebiteekateeko byawe.

18, 19. Yesu akataho ky’okureeberaho ki omu kuguma aine amatsiko, kandi nitubaasa kumutooreza tuta?

¹⁸ Yesu akataho eky’okureeberaho kikuru omu kuguma aine amatsiko. Ijuka ebi yaagumisiriize aha kiro kye ekyahereerukireyo omu nsi nk’omuntu. Munywani we ow’ahamara akamureebya ahabw’empiiha. Ondiijo yaamwehakana ngu tarikumumanya. Abandi boona bakahunga baamutsigaho. Ab’eihanga rye bakamwanga, baashaba ngu abaserukare Abarooma bamwite barikumubonabonesa. Buzima kihikire kugira ngu Yesu akagyezibwa munonga kukira oku itwe turikubaasa kugyezibwa. N’enki ekyamuhweraire? Abaheburaayo 12:2, nihagarukamu hati: ‘Ahabw’okushemererwa okwatairwe omu maisho ge, akagumisiriza omuti gw’okubonaboneraho n’okugaywa kandi yaashutama aha rubaju rwa buryo rw’ekitebe ky’obukama bwa Ruhanga.’ Yesu akaguma naijuka ‘okushemererwa okwatairwe omu maisho ge.’

¹⁹ Ni kushemererwa ki okwatairwe omu maisho ga Yesu? Yesu akaba naamanya ngu yaaguma agumisiriize, akaba naija kweza eiziina rya Yehova eririkwera. Akaba naija kworekyera kimwe ngu Sitaane n’omubeihi. Tihariho matsiko agandi agaakuhaire Yesu okushemererwa nk’okwo! Kandi akaba naamanya ngu Yehova naija kumuha ebiconco bingi ahabw’obwesigwa bwe, ngu akaba ari haihi kugaruka kuba na Ishe omu kushemererwa.  Yesu akaguma naateekateeka aha matsiko ago agarikushemeza n’omu buremeezi obw’amaani. Naitwe tushemereire kukora nikyo kimwe. Naitwe hariho okushemererwa okutairwe omu maisho gaitu. Yehova ahaire buri omwe omuriitwe omugisha gw’okuhwera omu kweza eiziina rye erikuru. Nitubaasa kworeka ngu Sitaane n’omubeihi turikutoorana Yehova nk’Omutegyeki waitu, kandi turikwerindira omu kukunda kwa Tataitwe n’obu twakubugana oburemeezi burikwingana ki.

20. N’enki ekirikubaasa kukuhwera kuguma nooteekateeka aha birungi kandi oine amatsiko?

²⁰ Ti kugira ngu Yehova ayeteekateekire okuha abaheereza be abeesigwa ebiconco kwonka, beitu aine n’ekihika ky’okukora ekyo. (Isaaya 30:18; shoma Malaki 3:10.) Naashemererwa okuha abaheereza be ebintu birungi ebi barikwetenga. (Zaaburi 37:4) N’ahabw’ekyo, guma otaire omutima aha matsiko agu oine. Otaikiriza emiteekateekyere y’ensi ya Sitaane etahikire. Waaheza kwetegyereza ngu omwoyo gw’ensi mporampora guriyo nigukutaaha omu mutima n’omu biteekateeko, shaba Yehova kukuha ‘obusingye bwa Ruhanga oburengire okwetegyereza kw’omuntu weena.’ Obusingye obwo nibwija kurinda omutima gwawe n’obwengye bwawe.—Abafilipi 4:6, 7.

21, 22. (a) “Omutwe muhango gw’abantu” baine matsiko ki ag’omuhendo? (b) Ni matsiko ki ag’Ekikristaayo ag’omuhendo ahariiwe, kandi omaririire kukora ki?

²¹ Ka n’amatsiko g’omuhendo agu oine kuteekateekaho! Ku  oraabe ori omwe aha ‘mutwe muhango gw’abantu,’ abaraije ‘kuruga omu kubonabona kwingi,’ teekateeka aha magara agu oraije kutunga. (Okushuuruurwa 7:9, 14) Sitaane na baadaimoni ku bariheza kwihwaho, turyahurira twaruhuuka omu muringo ogu tutarikubaasa kwetegyereza hati. Mbwenu shi n’oha omuriitwe otarikukwatwaho oburemeezi obu Sitaane arikureeta? Oburemeezi obwo ku buraahweho, ka nihaija kubaho okushemererwa kw’amaani okwejumba omu mirimo y’okuhindura ensi paradiso ahansi y’obwebembezi bwa Yesu n’abantu 144,000 abaraije kuba nibategyeka nawe! Ka twine ekihika ky’okureeba endwara zoona n’obumuga bwona nibihwaho, eky’okwakiira abakundwa baitu abaafiire, n’eky’okutuuraho omu muringo ogu Ruhanga yaabaire naayenda! Oku turiguma nitweyongyera kuba abahikiriire, nikwo turaija kuguma nitwirira haihi n’ekiconco ekirikugambwaho omu Abarooma 8:21, “obusingye bw’abaana ba Ruhanga obw’ekitiinisa.”

²² Yehova naayenda ngu otunge obusingye bwingi okukira n’aha bu orikuteekateekaho. Ekirikubaasa kukuhitsya ahari ekyo n’okworoba. Buzima eki tikishemereire kukureetera kutaho omutima kworobera Yehova buri izooba? N’ahabw’ekyo, guma nooyeyombeka aha musingye gw’okwikiriza kwawe okurikwera munonga, obaase kwerindira omu kukunda kwa Ruhanga ebiro byona!