Ni ryari obu omukazi Omukristaayo ashemereire kwetwekyerera aha mutwe omu nshonga ezikwatiraine n’okuramya kandi n’ahabw’enki? Ka tushwijume ebi entumwa Paulo yaahandikire aha nshonga egi arikuhwerwa omwoyo gurikwera. Naaha obuhabuzi obu turikwetenga kubaasa kucwamu omu muringo ogurikuhaisa Ruhanga ekitiinisa. (1 Abakorinso 11:3-16) Paulo akooreka enshonga ishatu ezi tushemereire kuteekateekaho: (1) Emirimo erikwetengyesa omukazi kwetwekyerera, (2) omwanya n’abariho, hamwe (3) n’ekigyendererwa ekishemereire kumureetera kukuratira obuhabuzi obu.

Emirimo. Paulo akagamba aha mirimo y’emiringo ebiri: okushaba n’okubuurira. (Orunyiriri 4, 5) Okushaba buzima n’okuramya okurimu okugamba na Yehova. Okubuurira oku, omu bunaku obu nikwo kwegyesa kwona okw’Omukristaayo okurikuruga omu Baibuli. Mbwenu shi Paulo naamanyisa ngu omukazi ashemereire kwetwekyerera buri kuza kushaba nari kwegyesa omuntu amazima ga Baibuli? Ngaaha. Omwanya ogu omukazi arikushabiramu nari arikwegyesezamu n’abariho nibyo birikworeka yaaba ashemereire nari atashemereire kwetwekyerera.

Omwanya, n’abariho. Ebigambo bya Paulo nibyoreka emyanya ebiri, omu ka n’omu kibiina. Naagira ati: ‘Omutwe gw’omukazi na iba; . . . omukazi weena orikushaba nari orikubuurira ateetwekyereire, naaba ahemwire omutwe gwe.’ (Orunyiriri 3, 5) Omu ntebeekanisa y’amaka, iba w’omukazi niwe Yehova atooraine kuba omutwe gw’omukazi. Omukazi yaaba ataikiriize bushoboorozi bwa iba, naahemura iba yaatwara obujunaanizibwa obu Yehova yaahaire  iba. Nk’eky’okureeberaho, kyayetengyesa ngu omukazi ayegyese omwegi wa Baibuli iba ari nawe aho, naayoreka ngu naikiriza obushoboorozi bwa iba arikwetwekyerera nari arikukoma ekitambaara aha mutwe. Omukazi naaba aine kukora ekyo yaaba iba ari Omukristaayo obatiziibwe nari atari Mukristaayo, ahakuba omushaija niwe mutwe gw’eka. * Omukazi yaaba naaza kushaba nari kwegyesa hariho omutabani omuto obatiziibwe, nabwo naaba aine kwetwekyerera, ti habw’okugira ngu omutabani ogwo n’omutwe gw’eka, kureka ahabw’obushoboorozi oburikuheebwa abashaija ababatiziibwe omu kibiina Ekikristaayo.

Paulo akagamba aha mbeera z’omu kibiina arikugira ati: ‘Ku haraabe hariho orikwenda kureeta empaka, amanye ngu tihariho gundi mugyenzo, kandi n’omu’ bibiina bya Ruhanga tigurimu. (Orunyiriri 16) Omu kibiina Ekikristaayo, obwebembezi nibuheebwa abashaija ababatiziibwe. (1 Timoseo 2:11-14; Abaheburaayo 13:17) Abashaija bonka nibo barikutooranwa kuba abareeberezi nari abaheereza, bakaheebwa obujunaanizibwa kuruga ahari Ruhanga kureeberera obusyo bwe. (Ebyakozirwe 20:28) Kwonka obumwe, nikibaasa kwetengyesa, omukazi Omukristaayo ashabwe kukora omurimo ogurikukira kukorwa omushaija obatiziibwe. Nk’eky’okureeberaho, nikibaasa kumwetengyesa kwebembera oruteerane rw’okwetebeekanisa kuza kubuurira, haaba hatariho mushaija obatiziibwe. Nari naabaasa kwebembera okwegyesa omuntu Baibuli hariho omushaija obatiziibwe kyaba kitebeekanisiibwe kityo kare. * Ahabw’okugira ngu ebi byona neeba eri entebeekanisa y’ekibiina Ekikristaayo, naaba ashemereire kwetwekyerera kworeka ngu naakora omurimo ogushemereire kukorwa omushaija.

Kwonka, bingi ebirikubaho omu kuramya kwaitu tibirikwetengyesa banyaanyazi-itwe kwetwekyerera. Nk’eky’okureeberaho, tikirikwetengyesa munyaanyazi-itwe kwetwekyerera yaaba naagarukamu omu nteerane z’Ekikristaayo, yaaba naabuurira enju aha nju ari na iba nari omushaija ondiijo obatiziibwe, yaaba naashaba n’omwana we otakabatiziibwe nari naamwegyesa. Kwonka nihabaasa  kubaho ebibuuzo ebindi, kandi munyaanyazi-itwe yaaba atarikumanya gye ebirikukwata aha nshonga egyo, naabaasa kwongyera kucoondoza. * Yaaba atarikuhamya kandi omuntu we ow’omunda yaamwikiriza kwetwekyerera, nikiba kitagwire nk’oku kirikworekwa omu kishushani.

Ebigyendererwa. Omu runyiriri 10, harimu enshonga ibiri ahabw’enki omukazi Omukristaayo ashemereire kwetwekyerera: “Omukazi ashemereire kugira [‘akamanyiso k’obushoboorozi aha mutwe gwe,’] ahabwa baamaraika.” Eky’okubanza, yetegyereze ebigambo, “akamanyiso k’obushoboorozi.” Okwetwekyerera n’omuringo ogu omukazi arikworekyeramu ngu naikiriza obushoboorozi obu Yehova yaahaire abashaija ababatiziibwe abari omu kibiina. Omu muringo ogwo naayoreka rukundo ye n’obwesigwa bwe ahari Yehova Ruhanga. Enshonga ya kabiri neeshangwa omu bigambo “ahabwa baamaraika.” Omukazi ku arikwetwekyerera, ekyo nikikwata kita aha byahangirwe eby’omwoyo eby’amaani?

Baamaraika nibagasirwa baareeba obushoboorozi bwa Yehova Ruhanga nibworoberwa omu kibiina kye kyona, omu iguru n’omu nsi. Kandi nibagasirwa ku barikureeba abantu abatahikiriire niboorobera obushoboorozi obu. Nabo, baine kworobera entebeekanisa ya Yehova, ekintu eki baamaraika baingi baaremirwe kukora omu biro bya ira. (Yuda 6) Hati, obumwe baamaraika nibabaasa kureeba omukazi Omukristaayo oine obwengye bwingi, orikumanya bingi okukira omushaija obatiziibwe; kwonka arikwikiriza obushoboorozi bw’omushaija ogwo. Obumwe, omukazi ogwo naabaasa kuba ari Omukristaayo oshukirweho amajuta orikwija kuba omwe aha barikuza kutegyeka na Kristo. Omukazi nk’ogwo naija kuheereza omu mwanya ogurikukira ogwa baamaraika kandi ategyekye na Kristo omu iguru. Ka nikiba kiri eky’okureeberaho kirungi ahari baamaraika omu bunaku obu! Buzima, banyaanyazi-itwe boona ka baine  omugisha gw’omutaano kworeka ngu n’abacureezi kandi ngu nibooroba omu maisho g’obukaikuru n’obukaikuru bwa baamaraika!