1, 2. Yehova naayehurira ata yaareeba turikuteeraho kuba ab’amazima?

TEERA akashushani eizooba rimwe omwojo muto arikuruga ah’eishomero, reero atorotoora aha muhanda akashaho karimu esente. Mbwenu shi naija kukora ki? Yaayenda naabaasa kutwara esente ezo. Kwonka omu mwanya gw’ekyo, naabaasa kucwamu kuzigarurira mukama waazo. Nyina yaamanya eki yaakora, naamwesiimisa munonga.

² Abazaire abaingi nibashemererwa abaana baabo baaba ab’amazima. Tataitwe, Yehova ow’omu iguru, “Ruhanga orikwesigwa,” nikimushemeza naitwe twaba abeesigwa. (Zaaburi 31:5) Nitwenda kumushemeza turikuba ab’amazima omu bintu byona. (Abaheburaayo 13:18) Ka tushwijume emiringo ena emikuru obu kirikubaasa kuguma kuba ab’amazima. Kandi bwanyima nituza kureeba bimwe aha birungi ebirikuruga omu kuba ab’amazima.

3-5. (a) Nitubaasa kwebeiha tuta? (b) Niki ekirikwija kutuhwera kuba ab’amazima omu kweshwijuma?

³ Kubaasa kukoragana n’abandi omu mazima, twine  kubanza twaba ab’amazima omu kweshwijuma. Eki butoosha tikyorobi. Omu kyasha ky’okubanza, ab’eishe-emwe omu kibiina kya Laodikea bakaba nibeebeiha barikuteekateeka ngu nibashemeza Ruhanga, kwonka buzima batarikumushemeza. (Okushuuruurwa 3:17) Naitwe nitubaasa kwebeiha turemwe kweshwijuma gye kumanya eki turi.

⁴ Yakobo omwegi wa Yesu akashoboorora ati: ‘Omuntu weena yaayeteekateekaho kuba omunyadiini, akabura kurinda rurimi rwe, naaba naayebeiha omu mutima gwe, kandi ediini y’omuntu ogwo n’eya busha.’ (Yakobo 1:26) Nituba nitwebeiha twateekateeka ngu Ruhanga tarikufayo twaba nitukora ebintu bimwe ebirungi, kwonka turikugambira kubi abandi, turikubarengyeza, nari turikugamba ebishuba. Niki ekirikubaasa kutuhwera kwetantara okwebeiha nkʼokwo?

⁵ Twayereeba omu ndeeberwamu, nitubaasa kureeba endeebeka yaitu ey’aha ruguru. Kwonka twashoma Baibuli nitubaasa kumanya emiteekateekyere yaitu ey’omunda. Baibuli neebaasa kutuhwera kumanya okubaasa kwaitu n’obweremwa bwaitu. Nitumanya empindahinduka ezi twine kukora omu miteekateekyere yaitu, emitwarize n’emigambire. (Shoma Yakobo 1:23-25.) Kwonka twayebeiha ngu titwine kamogo, titurikubaasa kwongyera kuboneza emitwarize yaitu. N’ahabw’ekyo twine kukoresa Baibuli kandi tube ab’amazima omu kweshwijuma. (Okutonzya 3:40; Hagai 1:5) Okushaba nakwo nikutuhwera kureeba kyenyini eki turi buzima. Nitubaasa kushaba Yehova kutushwijuma, n’okutuhwera kureeba obumogo bwaitu reero tubuteereeze. (Zaaburi 139:23, 24) Twijukye ngu “omuntu orikwehabagiza n’ekirikunugwa ahari” Yehova, ‘kwonka ab’omutima gugororokire naabeesiga.’​—Enfumu 3:32.

6. Ahabw’enki omushaija n’omukazi we baine kutwarizana omu muringo gw’amazima?

⁶ Hatariho kubangaanisa, okuba ab’amazima ni kikuru omu ka. Omushaija n’omukazi we baaba batarikusherekana, nibahurira baine oburinzi kandi barikwesigana. Okutaba w’amazima omu bushwere nikibaasa kutwariramu ebintu bingi. Nk’eky’okureeberaho, omushaija nari omukazi naabaasa kweshunga n’otari mukundwa we, nari areebe ebirikwitsa enshoni, nari arigire omuntu ondiijo bwesherekye. Yetegyereze ebigambo by’omuhandiiki wa Zaaburi ebi: ‘Tindikushutama na bantu bataine mugasho, kandi tindikukwatanisa n’endyarya.’ (Zaaburi 26:4)  Waaba otari w’amazima aha mukundwa waawe, nangwa n’omu biteekateeko, nikibaasa kushiisha obushwere bwanyu.

7, 8. Noobaasa kukoresa ota Baibuli kwegyesa abaana obukuru bw’okuba ab’amazima?

⁷ Abaana nabo baine kumanya ngu okuba ab’amazima ni kikuru. Abazaire nibabaasa kukoresa Baibuli kwegyesa abaana baabo aha nshonga egi. Baibuli erimu abantu abaaremirwe kuba ab’amazima. Akani, akaba omushuma, Gehazi, akabeiha kubaasa kutunga esente, kandi Yuda akaiba esente, reero bwanyima yaareebya Yesu arikushaba ebicweka 30 eby’efeeza.​—Yoshua 6:17-19; 7:11-25; 2 Abagabe 5:14-16, 20-27; Matayo 26:14, 15; Yohaana 12:6.

⁸ Baibuli erimu abantu barungi abaabaire ab’amazima. Yakobo akagambira abaana be kugarurayo esente ezi baashangire omu nshaho zaabo. Yefusa n’omuhara bakahikiiriza eki baabaire baraganiise Ruhanga. Kandi Yesu akaba ow’amazima n’omu mbeera zigumire. (Okutandika 43:12; Abaramuzi 11:30-40; Yohaana 18:3-11) Eby’okureeberaho ebi nibibaasa kuhwera abaana kwetegyereza obukuru bw’okuba ab’amazima.

9. Abaana nibagasirwa bata abazaire baaba ab’amazima?

⁹ Abazaire nibabaasa kwegyera aha musingye mukuru gwa Baibuli ogu: ‘Mbwenu iwe orikwegyesa abandi, toyeyegyesa? Iwe orikubuurira abandi okutaiba, noiba?’ (Abarooma 2:21) Abaana nibabaasa kumanya oburyarya bw’abazaire baabo omu bi barikugamba. Twagambira abaana kuba ab’amazima kwonka itwe tukakora ekirikutaana n’ekyo, eki nikiija kubabuzabuza. Abaana baareeba ngu abazaire baabo nibabeiha n’omu bushonga bukye, nabo nibabaasa kutwaza batyo. (Shoma Luka 16:10.) Kwonka, abaana baareeba ngu abazaire baabo nibahamira aha mazima,  nabo nikibaasa kubahwera kwija kuba ab’amazima baakura bakazaara abaana abaabo.​—Enfumu 22:6; Abaefeso 6:4.

10. Nitubaasa kuba tuta ab’amazima twaba nitugaaniira n’Abakristaayo bagyenzi baitu?

¹⁰ Kandi twine kuba ab’amazima aha Bakristaayo bagyenzi baitu. Okugaaniira okwa butoosha nikubaasa kurugamu orugambo, nangwa n’okubeiherera omuntu. Twagamba eki batugambiire eki tutaineho buhame, nitubaasa kuba turiyo nitujanjaaza ebishuba. Nikiba kiri eky’obwengye ‘kwerinda omu bi turikugamba.’ (Enfumu 10:19) Okuba ab’amazima tikirikumanyisa ngu twine kugamba buri kimwe eki turikuteekateeka, eki turikumanya, nari eki tuhuriire. N’obu twakuba nituza kugamba ekihikire, nikibaasa kuba kitarikutukwataho, kitarikwetengyesa, kandi kitari kirungi kugaruka kukigambaho. (1 Abatesalonika 4:11) Abamwe baaheza kugamba kubi nibeehozaho barikugira bati: “Naakubeera ow’amazima.” Kwonka itwe abaheereza ba Yehova ebigambo byaitu butoosha biine kuba ebishemeire kandi eby’embabazi.​—Shoma Abakolosai 4:6.

11, 12. (a) Omuntu orikuba akozire ekibi naabaasa kuba ata rwongyerera maganya yaaba atagambire mazima? (b) Nitubaasa kwebuuza bibuuzo ki? (c) Nitubaasa kuba tuta ab’amazima aha kibiina kya Yehova?

¹¹ Yehova ahaire abareeberezi obujunaanizibwa bw’okuhwera ekibiina. Nikyorobera abareeberezi kutuhwera twabagambira amazima. Ahabw’enki? Mbwenu shi waaba orwaire okaza ow’omushaho, noomushereka bumwe aha bumanyiso bw’endwara yaawe? Waamushereka naija kukuhwera ata? Omu muringo nigwo gumwe, twaba  tukozire enshobe y’amaani, titushemereire kugishereka. Kureka twine kugambira abareeberezi amazima goona. (Zaaburi 12:2; Ebyakozirwe 5:1-11) Hati teekateeka aha mbeera endiijo egi: Ka tugire waamanya ngu munywani waawe akozire ekibi ky’amaani. (Abaleevi 5:1) Mbwenu shi noija kugira oti: “Obu ndi munywani we owaabuzima, tindikwija kugamba eki akozire? Nari noija kwijuka ngu abareeberezi bariho kumuhwera kugaruka kugira omukago murungi na Yehova?​—Abaheburaayo 13:17; Yakobo 5:14, 15.

¹² Kandi ni kikuru okuba ab’amazima aha kibiina kya Yehova nka twaba nitwijuza ripoota z’obuheereza bwaitu. Kandi nituba ab’amazima twaba nitushaba kuba baapayoniya nari kuza omu buheereza obundi.​—Shoma Enfumu 6:16-19.

13. Nitubaasa kuba tuta ab’amazima twaba nitukoragana n’Abakristaayo bagyenzi baitu omu by’obushuubuzi?

¹³ Abakristaayo tibaine kujwanzya enshonga z’eby’obushuubuzi n’okuramya. Nk’eky’okureeberaho, titurikwejumba omu by’obushuubuzi aha Kyombeko ky’Obukama nari twaba turi omu kubuurira. Kandi titurikuryangatanisa ab’eishe-emwe omu by’obushuubuzi. Omujurizi wa Yehova yaaba naakora owaawe, muhe omushaara gwe omu bwire, muhe esente ezi mwaragaine, kandi muhe n’ebindi ebirikwetengyesa omu biragiro. Ebi nibibaasa kutwariramu okushashurira amagara ge omu bitongore by’enshumbuushano, n’okumuha ebiro by’okuhuumuraho kwonka otamushazire omushaara. (1 Timoseo 5:18; Yakobo 5:1-4) Kandi waaba nookorera Omujurizi wa Yehova mugyenzi waawe, toine kuteekateeka ngu aine kukutwariza omu muringo gw’omutaano. (Abaefeso 6:5-8) Hamya ngu nookora ohitsya eshaaha ezi mwikirizaine, kandi okore omurimo ogu orikushashurirwa kukora.​—2 Abatesalonika 3:10.

14. Abakristaayo baine kukora ki batakakoragaine omu by’obushuubuzi?

 ¹⁴ Kwonka shi ku waakukwatanisa n’Omukristaayo mugyenzi waawe omu by’obushuubuzi? Nimubaasa kutandika hamwe eduuka nari omwe aguze mugyenzi we esente. Omu mbeera nk’ezi, omusingye gwa Baibuli ogurikugira ngu mute buri kimwe omu buhandiikye nigubaasa kuhwera! Obu nabi Yeremia yaagura ekibanja, akahandiika endagaano ibiri, emwe baakareebi nari shi abajurizi bakataho emikono, reero zombi zikabiikwa gye kugira ngu zibaase kujurizibwa omu biro by’omumaisho. (Yeremia 32:9-12; kandi reeba Okutandika 23:16-20.) Abamwe nibateekateeka ngu okuhandiika endagaano nikibaasa kworeka ngu ow’eishe-emwe tarikukwesiga. Kwonka amazima gari ngu, okukora endagaano nikuzibira obuteetegyerezana bwingi, okureebyana, n’obutaikirizana. Guma noijuka ngu obusingye bw’ekibiina ni bukuru munonga kukira enshonga y’eby’obushuubuzi yoona.​—1 Abakorinso 6:1-8; reeba Ebirikukiraho 30.

15. Yehova naareeba ata eby’obushuubuzi ebitari by’amazima?

¹⁵ Twine kuba ab’amazima ahari boona otwariiremu nabo abatari Bajurizi ba Yehova. Okuba ab’amazima Yehova naakitwara nka kikuru. ‘Minzaani z’oburyarya n’ekirikunugwa ahari [Yehova], kwonka ebipimo by’amazima nibimushemeza.’ (Enfumu 11:1; 20:10, 23) Ira omu bunaku bwa Baibuli, minzaani zikaba nizikira kukoresibwa omu kugura n’okuguza ebintu. Kwonka abashuubuzi abamwe bakaba nibaryangatanisa abaguzi baabo barikubaha ebitahikire nari barikubashashuza esente nyingi. N’obunaku obu, baingi ti b’amazima omu by’obushuubuzi. Kandi nk’oku Yehova ira yaabaire naayanga ebikorwa bitari by’amazima, na hati naabyanga.

16, 17. Ni bikorwa ki ebitari by’amazima ebikanyire munonga ebi twine kwetantara?

 ¹⁶ Twena nitubaasa kugyezibwa kutaba b’amazima. Eki nikibaasa kubaho twaba nitwijuza ebipapura by’okushaba omurimo, foomu za gavumenti, nari twaba nitukora ebigyezo aha ishomero. Baingi nibateekateeka ngu tikiine nshonga kubeiha, kwongyeramu ebitahikire, nari okugarukamu ebirikuhabisa. Kwonka ekyo tikirikututangaaza. Baibuli neeyoreka ngu omu biro by’emperu, abantu bakaabaire “abarikwekunda, abakunzi b’empiiha, . . . [kandi] abarikwanga ebirungi.”​—2 Timoseo 3:1-5.

¹⁷ Obumwe abantu abatari b’amazima nibareebeka nk’abasinguzi omu nsi egi. (Zaaburi 73:1-8) Omukristaayo naabaasa n’okufeerwa omurimo gwe, kufeerwa esente ze, atwarizibwe kubi aha murimo ahabw’okuba ow’amazima. Kwonka okuba ow’amazima n’eky’omuhendo munonga kukira ebi arikufeerwa. Ahabw’enki?

18. Ahabw’enki okugira eiziina rirungi ry’obwesigwa kiri ekintu ky’omuhendo munonga?

¹⁸ Obwesigwa, amazima, n’okutahindahinduka, n’emitwarize y’omuhendo etarikukira kureebeka omu nsi egi. Buri omwe ahariitwe aine omugisha gw’okuteeraho kugira emitwarize nk’egyo. (Miika 7:2) N’amazima abantu abamwe nibabaasa kukurahura kandi bakwete omushema ahabw’okuba ow’amazima. Kwonka abandi nibaija kukukunda kandi bakwesigye ahabw’okuba ow’amazima. Omu nsi yoona Abajurizi ba Yehova nibamanywa ahabw’okuba ab’amazima. Abantu abamwe nibakunda kuha Abajurizi ba Yehova emirimo ahabw’okumanya ngu nibaija kukora eby’amazima. Kandi abakozi abamwe ku barikubingwa aha mirimo ahabw’obutaba b’amazima, Abajurizi ba Yehova bo nibaguma aha mirimo yaabo.

19. Okuba ow’amazima nikikwata kita aha mukago gwawe na Yehova?

 ¹⁹ Okuba ow’amazima omu bintu byona nikiija kukureetera kugira omutima ogutarikweshinja n’obusingye omu biteekateeko. Nitubaasa kuba nk’entumwa Paulo owaahandiikire ati: “Nitumanya ngu twine omutima ogutarikweshinja.” (Abaheburaayo 13:18) Ekirikukira byona, Tataitwe Yehova orikutukunda naija kureeba obwesigwa bwawe, kandi akuhe emigisha ahabw’okuteeraho kuba ow’amazima omuri byona.​—Shoma Zaaburi 15:1, 2; Enfumu 22:1.