1, 2. Obushwere bwabamu oburemeezi nikimanyisa ngu nibuza kushenyuka? Shoboorora.

OBUSHWERE n’ekiconco kuruga ahari Yehova. Nibubaasa kwongyera aha kushemererwa kw’omuntu. Kwonka, buri bushwere burimu embeera zaabwo ezigumire. Nangwa embeera ezimwe nizibaasa kureebeka nk’ezitarikubaasa kuhwaho, kandi rukundo y’omushaija n’omukazi we neebaasa kuhitsya obwire etuube.

² Titushemereire kutangaara obushwere bwaitu bwabamu oburemeezi. Kwonka ekyo tikirikumanyisa ngu obushwere bwaitu buri haihi kushenyuka. Nangwa n’abo abaabaire baine oburemeezi bw’amaani omu bushwere, bakatunga oburyo bw’okugaruka kugira omukago murungi, n’okuhamya obushwere bwabo. Bata shi?

3, 4. Obumwe niki ekirikubaasa kuba omu bushwere?

³ Obushwere nibugaita abantu babiri abatarikushushana, abarikukunda ebirikutaana, abaine emiteekateekyere etarikushushana, kandi abarikukora ebintu omu muringo gutarikushushana. Kandi ahu baakuriire n’enganda zaabo nibibaasa kuba bitarikushushana. Nikitwara obwire omushaija n’omukazi we kubaasa kumanyana gye.

 ⁴ Haahinguraho obwire, omushaija naabaasa kutandika kukora ebye n’omukazi akore ebye babe batakikwatanisa. Nooba nooshusha ngu tibaine bigyendererwa birikushushana. Niki ekirikubaasa kubahwera kwirirana haihi?

5. (a) Niki ekirikubaasa kuhwera Omukristaayo kwirira haihi ou ari nawe omu bushwere? (b) Kurugiirira aha Abaheburaayo 13:4, twine kutwara tuta obushwere?

⁵ Yehova naaha obuhabuzi abari omu bushwere kubahwera kumwirira haihi, kandi nabo nibubahwera kwongyera kukundana. (Zaaburi 25:4; Isaaya 48:17, 18) Naatugambira ati: ‘Obushwere mubuhe ekitiinisa.’ (Abaheburaayo 13:4) Ekintu eki orikuha ekitiinisa nooba nookitwara nk’eky’omuhendo munonga. Nookirinda gye kandi torikukikwata eijaga. Oku nikwo Yehova arikwenda ngu tutware tutyo obushwere.

6. Kurugiirira ahari Matayo 19:4-6 ahabw’enki Yehova yaatandikireho obushwere?

⁶ Yehova niwe yaagaitsire omushaija n’omukazi ab’okubanza. Omwana we, Yesu akagira ati: “Timukashomaga ngu, owaabahangire bwa mbere na mbere, akahanga omushaija n’omukazi?” Kandi akagira ati: “Omushaija nikyo atsigiraho ishe na nyina, akaguma n’omukazi we, nabo bombi bakahinduka omuntu omwe. Baba batakiri babiri kureka omwe. N’ahabw’ekyo eki Ruhanga yaateeraine hamwe, omuntu atarikitaanisa.” (Matayo 19:4-6) Okuruga aha kutandika, Yehova akaba agyendereire ngu obushwere bube obw’obutwire. Akaba naayenda ngu abari omu bushwere bagume nibakwatanisa kandi bashemereirwe hamwe.

7. Omushaija n’omukazi we nibabaasa kuhamya bata obushwere bwabo?

⁷ Kwonka abari omu bushwere ebiro ebi nibongyera kutunga okugyemeserezibwa n’amaganya okukira ira. Obumwe okugyemeserezibwa nikuba okw’amaani reero bateekateeka ngu obushwere bwabo tirikubaasa kucungurwa, kandi beehwa amatsiko. Kwonka twayetegyereza oku Yehova arikureeba obushwere nikibaasa kutuhwera.​—1 Yohaana 5:3.

8, 9. (a) Ni ryari obu tushemereire kukuratira obuhabuzi oburikukwata aha bushwere? (b) Nitubaasa kworeka tuta ngu nitutwara obushwere nk’obw’omuhendo?

⁸ Butoosha obuhabuzi obu Yehova arikutuha nibuba buri obw’oburungi bwaitu. Nk’oku twaba twareebire, naaturabura ati: ‘Obushwere mubuhe ekitiinisa.’ (Abaheburaayo 13:4; Omubuurizi 5:4) Twakuratira obuhabuzi bwa Yehova n’obu kirikuba kitoorobi, buzima nitugasirwa.​—1 Abatesalonika 1:3; Abaheburaayo 6:10.

 ⁹ Obushwere twaba nitubutwara nk’obw’omuhendo, nitwetantara kukora nari kugamba ekintu kyona ekirikubaasa kubushiisha. Kureka, nituteeraho kuhamya omukago gwaitu n’ou turi nawe omu bushwere. Ekyo nitubaasa kukikora tuta?

10, 11. (a) Obushwere obumwe burimu buremeezi ki? (b) Ahabw’enki ni kikuru kufayo aha muringo ogu orikugambamu n’omukundwa waawe?

¹⁰ Omuntu naabaasa kugwisa kubi omukundwa we omu miringo mingi. Nitumanya ngu Abakristaayo tibashemereire kuteera abu bari nabo omu bushwere nari kubahitsyaho akabi koona. Kwonka omuntu naabaasa kuhutaaza mugyenzi we arikukoresa ebigambo. Ebigambo nibibaasa kukora nk’ebirwaniso. Omukazi omwe akagira ati: “Ibanyi naanteeza ebigambo. Nimbaasa kuba ntaine nkojo aha mubiri, kwonka ebigambo bye ebirikucumita ebi arikuungambira butoosha, bintaire enkojo aha mutima. Naakira kungira ati: ‘Ori omugugu!’ nari ‘Toine mugasho!’” Omushaija omwe akagira ngu omukazi we naaguma naamugarura ahansi arikukoresa ebigambo bibi, kandi arikumukubya amaziina. Akagira ati: “Tihariho muringo murungi ogu ndikubaasa kugarukamu kugamba omu bantu ebigambo ebi arikungambira. Egi niyo nshonga ahabw’enki ntarikubaasa kugamba nawe, kandi ninduga aha murimo kikyererezi. Nindeeba ngu aha murimo nimba ndi gye okukira okuza omuka.” Obunaku obu abantu nibakunda kujumiirana, n’okugambirana ebigambo bitari by’embabazi ebirikureeta obusaasi.

¹¹ Omushaija n’omukazi we baagambirana kubi, nikireetaho enkojo omu nyehurira ezitarikurahuka kukira.  Buzima, ogu tigwo muringo ogu Yehova arikwenda ngu omushaija n’omukazi we batwarizane. Kwonka noobaasa kugwisa kubi omukundwa waawe otakigyendereire. Noobaasa kuteekateeka ngu noomutwariza gye, kwonka we naayehurira ata? Ku oraabe oraagambiire kubi omukundwa waawe, oyeteekateekire kuhinduraho?​—Abagalatia 5:15; shoma Abaefeso 4:31.

12. Waaba ori omu bushwere, niki ekirikubaasa kushiisha omukago gwawe na Yehova?

¹² Yehova naafayo aha muringo ogu orikugambamu n’omukundwa waawe mwaba muri omu bantu nari mwaba muri mwembi. (Shoma 1 Petero 3:7.) Yakobo 1:26 nihatwijutsya ngu ‘omuntu weena yaayeteekateekaho kuba omunyadiini, akanga kurinda orurimi rwe, naaba  naayebeiha omu mutima gwe, kandi okuramya kw’omuntu ogwo n’okwa busha.’

13. Ni muringo ki ogundi ogu omuntu arikubaasa kugwisa kubi omukundwa we?

¹³ Hariho emiringo endiijo ei omushaija n’omukazi we barikubaasa kworeka ngu buri omwe naafayo ahari mugyenzi we. Nk’eky’okureeberaho, omukundwa waawe naayehurira ota waatandika kumara obwire bwingi n’ondiijo ou otarikushushanisa nawe obuhangwa? Mbwenu shi n’obu waakuba nookikora otaine bigyendererwa bibi, nk’okubuurira nawe, nari kumuhwera omu buremeezi, nikiija kugwisa kubi omukundwa waawe? Omukazi omwe Omukristaayo akagira ati: “Okureeba ibanyi naamara obwire bwingi na munyaanyazi-itwe ondiijo, kandi arikumufaho nikiinkora kubi. Nikiindeetera kwehurira nk’otaine mugasho.”

14. (a) Ni mazima ki agu turikwega omu Okutandika 2:24? (b) Niki eki tushemereire kwebuuza?

¹⁴ Itwe Abakristaayo, twine obujunaanizibwa bw’okureeberera abazaire baitu, n’ab’eishe-emwe omu kibiina. Kwonka twaheza kutaaha omu bushwere, nituba twine kufayo munonga aha bu turi nabo omu bushwere. Yehova akagira ngu omushaija ‘naija kuguma n’omukazi we.’ (Okutandika 2:24) Twine kutwara enyehurira z’abakundwa baitu nka nkuru munonga. Yebuuze oti: ‘Buzima nimpa omukundwa wangye obwire burikumara, niimukunda kandi mmufaho ekirikumara?’

15. Ahabw’enki Omukristaayo ori omu bushwere aine kwetantara kwemanyiiza munonga otari mukundwa we?

¹⁵ Twayeshunga munonga n’omuntu ondiijo otari mukundwa waitu, ekyo nikiija kureetaho oburemeezi omu bushwere bwaitu. Nitubaasa kutandika kumuteekateekaho tutandikye n’okumurigira. (Matayo 5:28) Enyehurira ezo nizibaasa kuguma nizeeyongyera tuhikye aha kukora ekitarikuhaisa obushwere ekitiinisa.

16. Baibuli neehabura ki aha bikwatiraine n’obushwere?

¹⁶ Baibuli bwanyima y’okugira ngu ‘obushwere mubuhe ekitiinisa,’ neegaruka egira ngu ekitanda ‘ky’obushwere kirekye kushiishwa, ahakuba abashambani Ruhanga naija kubacwera orubanja.’ (Abaheburaayo 13:4) Ebigambo ekitanda “ky’obushwere” nibimanyisa okuteerana kw’omushaija n’omukazi we. (Enfumu 5:18) Nitubaasa kworeka tuta ngu nituha ekitiinisa entebeekanisa egi, kandi tukeetantara kugishiisha?

17. (a) Abantu baingi ebiro ebi nibareeba bata okuteerana aheeru y’obushwere? (b) Kwonka shi Abakristaayo bo bashemereire kureeba bata okuteerana aheeru y’obushwere?

¹⁷ Abamwe ebiro ebi nibateekateeka ngu okutaba mwesigwa aha mukundwa waawe tikiine nshonga. Titurikwenda kugira emiteekateekyere nk’egyo. Yehova naakyoreka butunu ngu naayangira kimwe obushambani nari okuteerana aheeru y’obushwere. (Shoma Abarooma 12:9; Abaheburaayo 10:31; 12:29) Omuntu yaateerana n’otari mukazi we nari iba, naaba yaashiisha obushwere bwe. Kandi naaba naayoreka ngu tarikuha emitindo ya Yehova ekitiinisa, kandi omukago gwe na Yehova nigusiisikara. N’ahabw’ekyo twine kwetantara kuteera orutambwe rw’okubanza orurikubaasa kutureetera kugwa omu bushambani. Eki nikitwariramu okugirira omuntu ebiteekateeko bitashemeire.​—Yobu 31:1.

18. (a) Ahabw’enki okushambana nikwingana n’okuramya baaruhanga b’ebishuba? (b) Yehova naareeba ata okushambana?

¹⁸ Omuri Israeli eya ira Ebiragiro bya Musa bikaba nibyoreka ngu okuteerana aheeru y’obushwere n’ekicumuro ky’amaani, ekirikwingana n’okuramya baaruhanga b’ebishuba. Ekifubiro ky’ebicumuro ebi byombi kukaba kuri okwitwa. (Abaleevi 20:2, 10) Okushambana n’okuramya baaruhanga b’ebishuba bikaba nibishushana bita?  Omwisraeli ku yaabaire aramya baaruhanga b’ebishuba, kikaba kyoreka ngu yaahenda endagaano ye ey’okuguma ari omwesigwa ahari Yehova. Kandi ku yaabaire ashambana, akaba ahenda endagaano ye ey’okuguma ari omwesigwa aha mukundwa we. (Okuruga 19:5, 6; Eky’Ebiragiro 5:9; shoma Malaki 2:14.) Buzima, ira Yehova akaba naareeba obushambani nk’ekibi ky’amaani.

19. Niki ekirikubaasa kutuhwera kumariirira kwetantara obushambani?

¹⁹ Kandi shi obunaku obu? N’obu turaabe tutarikutegyekwa Ebiragiro bya Musa, emiteekateekyere ya Yehova aha bushambani tehindukire. Nk’oku tutarikubaasa kuramya baaruhanga b’ebishuba, titushemereire kuba abatari beesigwa aha bakundwa baitu omu bushwere. (Zaaburi 51:1, 4; Abakolosai 3:5) Twareebya abakundwa baitu, nituhemura obushwere bwaitu na Yehova, Ruhanga waitu.​—Reeba Ebirikukiraho 26.

20. Obwengye nibubaasa kuba buta obw’omugasho omu bushwere?

²⁰ Noobaasa kwongyera ota kuhamya obushwere bwawe? Ekigambo kya Ruhanga nikigira kiti: “Ahabw’obwengye enju eyombekwa, n’ahabw’okwetegyereza ehamira kimwe.” (Enfumu 24:3) Enju neebaasa kuba neefukiirira kandi etarimu bintu, nari neebaasa kuba eyombekire gye kandi erikutagata. Nikyo kimwe n’obushwere. Omuntu omunyabwengye naateeraho kurinda gye obushwere bwe, kandi naahamya ngu burimu obuteeka, n’okushemererwa.

21. Okumanya nikubaasa kuhamya kuta obushwere?

²¹ Baibuli neegumizamu erikugamba aha nju eti: ‘Ahabw’okumanya, ebishengye byayo nibiijura ebintu byona ebirikushemeza kandi eby’obuguzi bwingi.’ (Enfumu 24:4) Ebi orikwega omu Kigambo kya Ruhanga nibibaasa kuhindura  obushwere bwawe kuba burungi. (Abarooma 12:2; Abafilipi 1:9) Iwe n’omukundwa waawe mwaba nimushoma hamwe Baibuli n’ebitabo byaitu, mugaaniire oku murikubaasa kugyendera aha bi mwashoma. Muteereho kukundana n’okuhaana ekitiinisa, mugirirane embabazi kandi mube abeegyendesereza. Shaba Yehova kukuhwera kugira emitwarize eraahamye obushwere bwawe, reero omukundwa waawe ayongyere kukukunda.​—Enfumu 15:16, 17; 1 Petero 1:7.

22. Ahabw’enki omushaija n’omukazi we baine kuba nibakundana, kandi barikuhaana ekitiinisa?

²² Omushaija n’omukazi we baine kukora kyona ekirikubaasika kutwarizana omu muringo gwa rukundo, kandi ogw’ekitiinisa. Reero obwo obushwere bwabo nibwija kuhama bubemu n’okushemererwa. Kandi ekikuru munonga, nibaija kushemeza Yehova.​—Zaaburi 147:11; Abarooma 12:10.