1, 2. Niki eki twine kumanya ahari Sitaane na baadaimoni be?

OMU nsi ensya embeera niziija kuba ziri nungi munonga. Omu bwire butari bwa hare, nitwija kutuura nk’oku Ruhanga yaabaire naayenda ngu tutuure. Kwonka hati nitutuura omu nsi erikwebemberwa Sitaane na baadaimoni be. (2 Abakorinso 4:4) N’obu turaabe tutarikubaasa kubareeba, bariho kandi baine amaani.

² Omu shuura egi, nituza kushwijuma oku turikubaasa kuguma haihi na Yehova, kandi tukeerinda Sitaane. Yehova naaraganisa ngu naija kutuhwera. Kwonka twine kwetegyereza obukoryo obu Sitaane na baadaimoni be barikukoresa kutuhabisa n’okututaahirira.

3. Sitaane Omuregi naayenda kutureetera kukora ki?

³ Sitaane naagira ngu abantu nibaramya Yehova ahabw’okweyendeza, kandi ngu nitwija kurekyera aho kumuheereza embeera zaatugumira. (Shoma Yobu 2:4, 5.) Omuntu yaayoreka ngu naayenda kwega ebirikukwata ahari Yehova, Sitaane na baadaimoni nibakireeba, kandi nibateeraho kumuremesa. Nibagira ekiniga omuntu yaayehayo ahari Yehova akabatizibwa. Baibuli neegyeragyeranisa Omuregi ‘n’entare erikutsinda’ nari erikutoontoma, ‘erikusherura ou eraarye.’ (1 Petero 5:8) Sitaane naayenda  kumaraho omukago gwaitu na Yehova.​—Zaaburi 7:1, 2; 2 Timoseo 3:12.

4, 5. (a) Niki eki Sitaane atarikubaasa kukora? (b) ‘Okurwanisa Sitaane’ nikimanyisa ki?

⁴ Kwonka titwine kutiina Sitaane na baadaimoni be. Yehova tarikubaasa kubaikiriza kutukora kyona eki barikwenda. Naaraganisa ngu Abakristaayo ab’amazima nyamwingi nibaija kuhonokaho aha “kubonabona kwingi.” (Okushuuruurwa 7:9, 14) Tihaine eki Omuregi arikubaasa kukora kuremesa ekyo kubaho, ahakuba Yehova naarinda abantu be.

 ⁵ Twaguma haihi na Yehova, Sitaane tarikubaasa kumaraho omukago gwaitu nawe. Ekigambo kya Ruhanga nikituhamiza kiti: “Ruhanga ari hamwe naimwe, mwaba muri hamwe nawe.” (2 Obusingye 15:2; shoma 1 Abakorinso 10:13.) Abashaija n’abakazi baingi aba ira, nk’Abeeli, Enoka, Noa, Saara, na Musa, bakarwanisa Omuregi barikuguma haihi na Yehova. (Abaheburaayo 11:4-40) Naitwe nitubaasa kukora nikyo kimwe. Ekigambo kya Ruhanga nikiraganisa kiti: ‘Murwanise Sitaane, naija kubahunga.’​—Yakobo 4:7.

6. Sitaane naaturwanisa ata?

⁶ N’obu Sitaane araabe naamanya ngu Yehova tarikubaasa kumwikiriza kutukora kyona eki arikwenda, naakora obucweka eihembe kushiisha omukago gwaitu na Yehova. Obunaku obu, naaturwanisa omu miringo mingi etarikushushana, kandi naakoresa obukoryo obu atwire naakoresa kumara emyaka mingi enyima. Bumwe aharibwo ni buuha?

7. Ahabw’enki Sitaane naarwanisa abaheereza ba Yehova?

⁷ Entumwa Yohaana akahandiika ati: ‘Ensi yoona eri omu butegyeki bw’Omubi ogwo.’ (1 Yohaana 5:19) Sitaane ataire ensi egi embi yoona ahansi y’obushoboorozi bwe, kandi naaba naayenda ngu ategyekye n’abaheereza ba Yehova. (Miika 4:1; Yohaana 15:19; Okushuuruurwa 12:12, 17) Omuregi naamanya ngu atsigaizeyo obwire bukye, n’ahabw’ekyo naaba naayenda kuremesa buri omwe kutahamira ahari Ruhanga. Obumwe Omuregi naakoresa emitego erikureebwa butunu, kwonka obundi naaturwanisa bwesherekye.

8. Niki eki buri Mukristaayo aine kumanya?

⁸ Omu Abaefeso 6:12 nihagira hati: “Niturwana  [nitufukaana] . . . n’amahe g’emyoyo emibi ey’omu myanya y’omu iguru.” Buri Mukristaayo ari omu rutaro rw’okurwanisa Omuregi na baadaimoni. Twine kumanya ngu boona abeehaireyo ahari Yehova bari omu kurwana oku. Omu baruha ei entumwa Paulo yaahandiikiire Abaefeso akahiga Abakristaayo emirundi eshatu ‘kwemerera bahamire.’​—Abaefeso 6:11, 13, 14.

9. Sitaane na baadaimoni nibateeraho kutukora ki?

⁹ Sitaane na baadaimoni nibateeraho kutuhabisa omu miringo mingi. Twasingura Sitaane omu muringo ogumwe, tikirikumanyisa ngu tarikubaasa kutusingura omu muringo ogundi. Omuregi naateeraho kumanya obweremwa bwaitu kugira ngu ateho emitego ei arikumanya ngu neija kutusingura. Kwonka titwine kugwa omu mitego ye, ahakuba Baibuli neetumanyisa emitego egyo. (2 Abakorinso 2:11; reeba Ebirikukiraho 31.) Gumwe ahariyo n’okukoragana na baadaimoni.

10. (a) Okukoragana na baadaimoni nikitwariramu ki? (b) Yehova naayehurira ata omuntu yaakoragana na baadaimoni?

¹⁰ Okukoragana na baadaimoni nikitwariramu ebintu nk’okwebuuza aha barangi, obufumu, okuroga, nari okuteeraho kugamba n’abafu. Baibuli neetugambira ngu okukoragana na baadaimoni “n’ekirikunugwa” ahari Yehova, kandi titurikubaasa kukoragana nabo tukagaruka tukaramya Yehova. (Eky’Ebiragiro 18:10-12; Okushuuruurwa 21:8) Abakristaayo bashemereire kwetantarira kimwe okukoragana na baadaimoni okw’omuringo gwona.​—Abarooma 12:9.

11. Twaba nitukunda ebikorwa by’amaani agatarikwetegyerezibwa nikibaasa kuturugiramu kabi ki?

¹¹ Sitaane naamanya ngu twakunda ebikorwa by’amaani agatarikwetegyerezibwa, nikimworobera kutureetera  kukoragana na baadaimoni. Buri muringo gwona ogw’okukoragana na baadaimoni nigushiisha omukago gwaitu na Yehova.

12. Sitaane naateeraho ata kuhabisa emiteekateekyere yaitu?

¹² Sitaane naateeraho kubuzabuza abantu arikuhabisa emiteekateekyere yaabo. Mporampora naata okubangaanisa omu mitima yaabo, bahika n’aha kweta ‘ekibi ekirungi, n’ekirungi bakyeta ekibi.’ (Isaaya 5:20) Naareetera abantu kuteekateeka ngu obuhabuzi bwa Baibuli tiburikukora, kandi ngu nitubaasa kushemererwa twayehuzya emitindo ya Ruhanga.

13. Sitaane naakoresa ata omutego gw’okubangaanisa?

¹³ Okureetaho okubangaanisa n’omutego gumwe ogurikukorera gye Sitaane. Atwire naakoresa omutego ogu kuruga ira. Omu musiri Edeni akareetera Haawa kubangaanisa obu yaamubuuza ati: ‘N’eky’amazima, Ruhanga akagira ngu mutarirya aha muti gwona ogw’omuri eki kibanja?’ Bwanyima, omu bunaku bwa Yobu, Sitaane akabuuza Yehova omu maisho ga baamaraika ati: ‘Noogira ngu Yobu atiinira busha Ruhanga?’ (Yobu 1:9) Bwanyima ya Yesu kubatizibwa, Sitaane akateeraho kumuhabisa arikugira ati: ‘Ku oraabe ori omwana wa Ruhanga, gambira amabaare aga gahindukye eby’okurya.’​—Matayo 4:3.

14. Sitaane naareetera ata abantu kuteekateeka ngu okukoragana na baadaimoni ti ky’akabi?

¹⁴ Obunaku obu, Omuregi naagumizamu kureetaho okubangaanisa. Naareetera abantu abamwe kuteekateeka ngu okukoragana na baadaimoni ti kibi, arikureebekyesa ebikorwa bya baadaimoni ebimwe nk’ebitaine nshonga. Nangwa n’Abakristaayo abamwe babaasize kwehuzya akabi aka. (2 Abakorinso 11:3) Mbwenu shi nitubaasa  kukora ki kwerinda? Nitubaasa kukora ki kugira ngu Sitaane atatubeiha arikukoresa obukoryo bwe? Ka tureebe ebintu bibiri ebi Sitaane arikubaasa kukoresa kutuhabisa: Eby’okweshemeza n’eby’obujanjabi.

15. Eby’okweshemeza nibibaasa kutureetera bita kukwatanisa na baadaimoni?

¹⁵ Obunaku obu, vidiyo nyingi, ebirikworekwa aha tiivi, emizaano ya kompyuta, n’emikura ya Intaneeti nibiba birimu ebikorwa bya baadaimoni, emiguruko, n’amaani agatarikwetegyerezibwa. Abantu baingi nibareeba ebintu ebi nk’ebitari by’akabi kandi ebirikushemeza, beebwa kumanya ngu nibabaasa kutaahirirwa baadaimoni. Omuntu naabaasa n’okukoragana na baadaimoni kurabira omu bumanyiso obu abantu barikuteekateeka ngu nibuhikaana n’okuzaarwa kw’omuntu, okushoma omu biganja by’engaro, okuha engisha, emandwa, n’obufumu. Omuregi naashereka akabi akari omu bikorwa ebi, reero abireebekyesa nk’ebirimu ekihama ky’omugasho, ebirikushemeza, kandi ebi orikubaasa kuhugiraho kwemara eihamba. Omutu naabaasa n’okuteekateeka ngu tikiine kabi koona kureeba ekintu ekirimu emyoyo mibi nari eby’obufumu kasita oba otejumbire omu kubikora. Ahabw’enki emiteekateekyere egyo n’ey’akabi?​—1 Abakorinso 10:12.

16. Ahabw’enki twine kwetantara eby’okweshemeza ebirimu emyoyo mibi?

¹⁶ Sitaane na baadaimoni tibarikubaasa kushwijuma ebiri omu biteekateeko byaitu. Kwonka nibabaasa kumanya ebyetengo byaitu n’emiteekateekyere yaitu barikureeba ebi turikukora n’ab’omu maka gaitu, otwariiremu n’eby’okweshemeza ebi turikutoorana. Twatoorana vidiyo, ebyeshongoro, nari ebitabo ebirikukwata aha bufumu,  emiguruko, emizimu, oburogo, abacwezi, n’ebindi nk’ebyo, Sitaane na baadaimoni nibaija kumanya ngu twine ekihika ky’okwenda kubimanya. Obwo Sitaane naija kuteeraho kutureetera kwongyera kukoragana na baadaimoni butunu.​—Shoma Abagalatia 6:7.

17. Sitaane naabaasa kukoresa ata ekyetengo kyaitu eky’okwenda kugira amagara marungi?

¹⁷ Kandi Sitaane naakoresa n’ekyetengo kyaitu eky’okwenda kugira amagara marungi. Obunaku obu abantu baingi baine amagara mabi. Omuntu naabaasa kuba akoreise obujanjabi butarikushushana kwonka atarikukira. (Mako 5:25, 26) Ekyo nikibaasa kumureetera kwenda kwikiriza buri bujanjabi bwona. Kwonka itwe Abakristaayo  twine kwegyendesereza kutaikiriza obujanjabi oburikutwariramu eby’obufumu.​—Abaleevi 19:26.

18. Ni bujanjabi bwa muringo ki obu Omukristaayo ashemereire kwetantara?

¹⁸ Omuri Israeli eya ira, hakaba harimu bamwe abaabaire nibakoresa amaani g’emiguruko. Yehova akabagira ati: ‘Ku muraategye emikono yaanyu, niinyija kubaima amaisho, nangwa n’obu muraagume nimushaba hakye-hakye, tindikwija kubahurira.’ (Isaaya 1:15) Kiteekateekyeho! Yehova akaba atarikwija n’okuhurira okushaba kwabo. Titurikwenda kukora ekintu kyona ekirikubaasa kushiisha omukago gwaitu na Yehova, reero tukamureetera kwanga kutuhwera na munonga twaba turwaire. (Zaaburi 41:3) N’ahabw’ekyo, twine kucondooza aha bujanjabi obu turikuza kutunga kumanya yaaba bwine akakwate na baadaimoni nari amaani agatarikwetegyerezibwa. (Matayo 6:13) Twamanya ngu obujanjabi nibubaasa kuba bwine akakwate nabyo, twine kubwetantara!​—Reeba Ebirikukiraho 32.

19. Omuregi areetaire ata abantu baingi kugira obwoba?

¹⁹ N’obu abantu abamwe baraabe nibateekateeka ngu Omuregi na baadaimoni n’ebitebyo kwonka tibariho, abandi bo nibamanya ngu bariho ahabw’ebi babahikizeho. Abantu baingi nibatiina emyoyo mibi, kandi n’abahuuku b’emigyenzo egwire. Abamwe nibajanjaaza ebitebyo ebirikworeka oku baadaimoni barikukora kubi abantu. Obwire obwingi, abantu nibashemezibwa ebitebyo ebyo kandi nibakunda kubigambira abandi. Ebitebyo ebyo nibikira kureetera abantu kutiina Omuregi.

20. Nitubaasa kweshanga tuta turikujanjaaza ebishuba bya Sitaane?

²⁰ Teekateeka ahari eki! Sitaane naayenda ngu abantu  bamutiine. (2 Abatesalonika 2:9, 10) N’omubeihi orikumanya kuhabisa ebiteekateeko by’abantu abarikukunda ebikorwa bya baadaimoni, kandi akabareetera kwikiririza omu bintu ebimwe n’obu birikuba bitahikire. Abantu abo nibabaasa kutebya ebi barikuteekateeka ngu bakareeba nari ngu bakahurira. Oku barikuguma nibabitebya, nikwo n’ebitebyo ebyo birikuguma nibyongyerwamu ebitahikire. Titurikwenda kuguma nitutebya ebitebyo ebyo, reero tukahwera Sitaane kujanjaaza okutiina omu bantu.​—Yohaana 8:44; 2 Timoseo 2:16.

21. Omu mwanya gw’okutebya ebitebyo ebirikukwata ahari baadaimoni, nitubaasa kugamba ahari ki?

²¹ Omwe aha baheereza ba Yehova ku araabe yaabaire naateganisibwa baadaimoni atakeegire mazima, taine kuguma naatebeza abandi ebitebyo ebyo. Abaheereza ba Yehova tibaine kutiina ekintu kyona eki Omuregi na baadaimoni barikubaasa kukora. Omu mwanya gw’ekyo, twine kuta omutima ahari Yesu n’amaani agu Yehova amuhaire. (Abaheburaayo 12:2) Yesu akaba atarikutebeza abeegi be ebitebyo ebirikukwata ahari baadaimoni. Akata omutima aha kubuurira amakuru marungi g’Obukama ‘n’eby’amaani ebyakozirwe Ruhanga.’​—Ebyakozirwe 2:11; Luka 8:1; Abarooma 1:11, 12.

22. Omaririire kukora ki?

²² Titushemereire kwebwa ngu ekigyendererwa kya Sitaane n’okwita omukago gwaitu na Yehova. Naija kukora kyona ekirikubaasika kureeba ngu ekyo kyabaho. Kwonka nitumanya obukoryo bwe, kandi tumaririire kwangira emiringo yoona ei baadaimoni barikukoresa. Titurikwija “kuha Sitaane omwanya” gw’okutumaramu amaani omu kumariirira kwaitu. (Shoma Abaefeso 4:27.) Eego, twarwanisa Omuregi, nitwija kwerinda emitego ye, kandi Yehova naija kutuha oburinzi.​—Abaefeso 6:11.