NOIJUKA ahabw’enki omwe ahari baamaraika ba Ruhanga yaahindukire Sitaane Omuregi?— Ekyetengo kye eky’okwenda kuramibwa nikyo kyamureetaire kuhakanisa Ruhanga. Haine baamaraika abandi abaakuratiire Sitaane?— Eego bariho. Baibuli neebeeta baamaraika ba Sitaane nari baadaimoni.​—Okushuuruurwa 12:9.

Baamaraika ababi abo, nari baadaimoni, nibaikiriza ngu Ruhanga ariho?— Baibuli neegira ngu ‘baadaimoni nibaikiriza ngu Ruhanga ariho.’ (Yakobo 2:19) Kwonka omu biro ebi berarikiriire. Ahabw’okuba nibamanya ngu Ruhanga naija kubafubira ahabw’ebintu bibi ebi batwire nibakora. Ni bibi ki ebi batwire nibakora?—

Baibuli neegira ngu baamaraika abo bakaruga omu myanya yaabo omu iguru reero baija kutuura omu nsi nk’abantu. Bakakora ekyo ahabw’okuba bakaba nibenda kuteerana n’abakazi barungi abaabaire bari omu nsi. (Okutandika 6:1, 2; Yuda 6) Noomanya ki aha bikwatiraine n’eby’okuteerana?—

 Okuteerana n’obwire obu omushaija n’omukazi we barikuba kumwe omu muringo gw’omutaano. Bwanyima, omwana naabaasa kutandika kukura omunda ya nyina. Kwonka tikihikire baamaraika kwejumba omu by’okuteerana. Ruhanga naayenda ngu omushaija n’omukazi abashweraine babe nibo baateerana. Omuringo ogwo omwana ku arikuzaarwa, omushaija n’omukazi we nibabaasa kumureeberera.

Baamaraika ku baajwaire emibiri y’abantu kandi bakateerana n’abakazi omu nsi, bakazaara abaana abaakuzire bakaba ebikaaka. Abaana abo bakaba enshaarizi kandi bakaba bakora akabi aha bantu. N’ahabw’ekyo Ruhanga akareeta omwegyemure kucwekyereza ebikaaka ebyo hamwe n’abantu babi abandi. Kwonka akabanza kugambira Noa kwombeka emeeri mpango, okubaasa kukiza abantu bakye abaabaire nibakora ebihikire. Omwegyesa Mukuru akagira ngu ebyabaireho omu bwire bw’Omwegyemure ogwo ni kikuru okuguma nitubiijuka.​—Okutandika 6:3, 4, 13, 14; Luka 17:26, 27.

Omwegyemure ku gwizire, noomanya ekyabaire ahari baamaraika ababi?— Bakeejuura emibiri y’abantu ei baabaire baine reero bagarukayo omu iguru. Bakaba batakiri baamaraika ba Ruhanga, n’ahabw’ekyo  bakahinduka baamaraika ba Sitaane, nari baadaimoni. Kandi niki ekyahikire aha baana baabo ebikaaka?— Bakafeera omu Mwegyemure. Kandi nikyo kyabaire n’aha bantu ababi abaabaire batarikworobera Ruhanga.

Okuruga obu Omwegyemure ogwo gwabaho, Ruhanga takaikirizaga baadaimoni kugaruka kujwara emibiri y’abantu. N’obu turaabe tutarikubaasa kubareeba, baadaimoni nibakireetera abantu kukora ebintu bibi munonga. Hati nibareetera abantu oburemeezi bwingi okukira obwire obw’enyima. Nibakora ekyo ahabw’okuba bakanagwa omu nsi kuruga omu iguru.

Noomanya ahabw’enki tutarikubaasa kureeba baadaimoni?— N’ahabw’okuba tibarikubaasa kureebwa. Kwonka nituhamya ngu bariho. Baibuli neegira ngu Sitaane ‘naagobeza ensi yoona,’ kandi baadaimoni be nibamuhwera.—Okushuuruurwa 12:9, 12.

Omuregi na baadaimoni be nibabaasa kutuhabisa?— Eego nibabaasa kutuhabisa twaba tutegyendesereize. Kwonka titushemereire kutiina. Omwegyesa Mukuru akagira ati: ‘Omuregi taanyineho bushoboorozi.’ Twaguma haihi Ruhanga, naija kuturinda Omuregi na baadaimoni.​—Yohaana 14:30.

Ni kikuru ngu tumanye ebintu bibi ebi baadaimoni barikuteeraho kutureetera kukora. Teekateeka ahari eki. Ni bintu ki ebibi ebi baadaimoni baakozire obu baija omu nsi?— Omwegyemure gutakabaireho, baamaraika bakaba nibateerana n’abakazi, ekintu eki baabaire batashemereire kukora. Omu bunaku obu baadaimoni nibashemererwa, abantu baaba batoorobeire ebiragiro bya Ruhanga ebirikukwata aha by’okuteerana. Ka nkubuuze, ni baahi abashemereire kuteerana?— Waagarukamu ekihikire, n’abo bonka abashweraine.

Omu bunaku obu bamwe aha boojo bato n’abaishiki bato nabo nibateerana, kwonka ekyo buzima kigwire. Baibuli neegira ngu Ruhanga niwe yaahangire ebicweka by’omubonano eby’omushaija n’omukazi. Yehova akahanga ebicweka by’omubiri ebyo n’ekigyendererwa  ngu abashweraine bonka babe nibo bakishemerererwamu. Baadaimoni nibashemererwa, abantu baakora ebintu ebi Yehova arikwanga. Nk’eky’okureeberaho, baadaimoni nibashemererwa omwojo n’omwishiki baazaanisa ebicweka byabo by’omubonano. Titurikwenda kureetera baadaimoni kushemererwa, tikwo?—

Hariho ekintu ekindi eki baadaimoni barikukunda kwonka eki Yehova arikwanga. Nookimanya?— N’obushaarizi. (Zaaburi 11:5) Okuba enshaarizi nikimanyisa okukora akabi aha bandi. Ijuka ngu ekyo nikyo ebikaaka, batabani ba baadaimoni baakozire.

Baadaimoni nibakunda kutiinisa abantu. Obumwe nibereebekyesa nk’abantu abaafiire. Kandi nibabaasa kutooreza amaraka g’abantu abo abaafiire. Omu kukora ekyo baadaimoni nibabeiha abantu bahika aha kwikiriza ngu abantu abaafiire haine ei bari bahuriire kandi ngu nibabaasa kugamba n’abahuriire. Buzima baadaimoni nibareetera abantu baingi kwikiriza ngu emizimu eriho.

 N’ahabw’ekyo tushemereire kwerinda kugira ngu Sitaane na baadaimoni be batatubeiha. Baibuli neeturabura eti: ‘Sitaane naateeraho kwehindura nka maraika w’omushana, abaheereza be nibakora nikyo kimwe.’ (2 Abakorinso 11:14, 15) Buzima baadaimoni ni babi. Ka tureebe oku barikuteeraho kutureetera kuba nk’abo.

Abantu nibeegyera nkahi eby’obushaarizi, obushambani n’ebirikukwata aha mizimu?— Ti barikubyega barikureeba puroguramu ezimwe ez’ahari tiivi na zaavidiyo, barikuzaana emizaano y’aha kompyuta, barikuza ahari Intaneeti nari barikushoma ebitabo ebirikukwata aha bintu nk’ebyo? Kwonka shi okukora ebintu nk’ebyo nikitwiriza haihi na Ruhanga nari n’Omuregi na baadaimoni be? Nooteekateeka ki?—

Nooteekateeka ngu n’oha orikwenda ngu tuhurikize nari tureebe ebintu ebyo ebibi?— Buzima ni Sitaane na baadaimoni be. Mbwenu nyowe naiwe twine kukora ki?— Nitwetenga kushoma, kuhurikiza kandi tukareeba ebintu ebirungi ebiraatuhwere kuheereza Yehova. Noobaasa kuteekateeka bimwe ahari ebyo ebirungi ebi turikubaasa kukora?—

Twakora ebirungi, titushemereire kutiina baadaimoni. Yesu aine amaani agarikukira agaabo, kandi nibamutiina. Eizooba rimwe baadaimoni bakagambira Yesu n’eiraka rihango bati: “Oizire kutucwekyereza?” (Mako 1:24) Mbwenu titurikwija kushemererwa obwire ku burihika Yesu akacwekyereza Sitaane na baadaimoni be?— Kwonka obwire obwo butakahikire, nitubaasa kuhamya ngu Yesu naija kuturinda baadaimoni twaguma haihi nawe n’Ishe ow’omu iguru.