EIZOOBA rimwe omushaija akaija kureeba Yesu. Akaba naamanya ngu Yesu n’omunyabwengye, reero yaamushaba ati: ‘Mwegyesa, ragiira mwene tata ampe aha bintu ebi aine.’ Omushaija ogwo akaba naateekateeka ngu ashemereire kutunga bimwe aha bintu bya mwene ishe.

Kuri noogira ngu okaba ori Yesu, okaagambire ki?— Yesu akareeba ngu omushaija ogwo akaba aine oburemeezi. Oburemeezi bw’omushaija ogwo kukaba kutarikwenda ebintu ebi mwene ishe yaabaire aine. Akaba aine oburemeezi bw’okutamanya ekyabaire kiri kikuru buzima.

Ka tuteekateekye ahari eki. Niki eki tushemereire kutwara nka kikuru munonga? N’okugira eby’okuzaanisa birungi, ebijwaro bisya nari ebindi bintu nk’ebyo?— Ngaaha, hariho ekintu ekirikukirayo obukuru. Kandi ekyo nikyo Yesu yaabaire naayenda kwegyesaho. Akatebya ekitebyo ekirikukwata aha mushaija owaayebirwe Ruhanga. Okaayenzire kukimanya?—

Omushaija ogu akaba ari omugaiga munonga. Akaba aine eitaka rihango n’ebitara. Ebihingwa ebi yaahingire bikeera munonga. Ebitara bye bikaba biijwire ataine h’okubiika ebi yaabaire naashaaruura byona. Mbwenu shi, niki eki yaabaire naaza kukora? Akagira ati: “Niinyija kusheenya ebitara byangye, nyombekye ebirikukira obuhango; omwo nimwo ndahunikye emyaka yangye yoona, nkabiikamu n’ebintu byangye.”

Omushaija omugaiga ogwo  akateekateeka ngu ekyo nikyo ky’obwengye eki yaabaire aine kukora. Akateekateeka ngu kikaba kiri eky’obwengye kwebiikira ebintu bingi. Akagira ati: ‘Nyine ebintu bingi birungi ebibiikirwe eby’okumara emyaka mingi; mbwenu niinyija kuhuumura, ndye, nywe, nshemererwe.’ Kwonka omugaiga ogwo akaba aine oburemeezi omu miteekateekyere ye. Noomanya oburemeezi obu yaabaire aine?— Akaba naayeteekateekaho wenka hamwe n’aha kweshemeza. Akeebwa Ruhanga.

N’ahabw’ekyo Ruhanga akagira omushaija omugaiga ogwo ati: ‘Iwe mushema ’we! eki kiro nooza kufa. Mbwenu shi ebi waabiikire biryaba eby’oha?’ Mbwenu shi omushaija omugaiga ogwo akaba naabaasa kukoresa ebintu ebyo bwanyima y’okufa?— Ngaaha, omuntu ondiijo akaba naija kubitwara. Yesu akagira ati: “Nikwo omuntu ashusha atyo, oyebiikira obutungi, haza atari mutungi ahari Ruhanga.”​—Luka 12:13-21.

Ningira ngu torikwenda kuba nk’omushaija ogwo omugaiga, tikwo?— Ekigyendererwa kye ekikuru kikaba kiri eky’okutunga eby’obugaiga. Egyo  ekaba eri enshobe. Butoosha akaba naayenda kwongyera kutunga ebindi bintu bingi. Kwonka akaba atari “mutungi ahari Ruhanga.”

Abantu baingi bari nk’omushaija omugaiga ogwo. Nibaba nibenda kuguma nibeyongyera kutunga ebintu bingi. Kwonka ekyo nikibaasa kureetaho oburemeezi bwingi. Nk’eky’okureeberaho, ningira ngu oine eby’okuzaanisa, tikwo?— Ni by’okuzaanisa ki ebi oine? Teekateeka ahari eki.— Ka tugire ngu omwe ahari banywani baawe aine omupiira nari ebindi eby’okuzaanisa ebi iwe otaine. Mbwenu shi nikiba kihikire iwe kuteeraho kushaba abazaire baawe ngu babikugurire?—

Omu kubanza, eky’okuzaanisa nikiba nikireebeka nk’eky’omugasho munonga. Kwonka niki ekirikubaho obwire bwahinguraho?— Nikikura. Nikibaasa kucweka, reero ohuurire otakikyenda. Buzima, oine ekintu ekirikukirira kimwe eby’okuzaanisa. Ekintu ekyo nookimanya?—

N’amagara gaawe. Okugira amagara ni kikuru ahakuba waaba otagaine, tihaine eki orikubaasa kukora. Kwonka amagara gaawe oshemereire kugakoresa ebi Ruhanga akunda, tikwo?— N’ahabw’ekyo otakaaba nk’omushaija ogwo omugaiga omushema owaayebirwe Ruhanga.

Abaana tibo bonka abarikubaasa kukora eby’obushema nk’omushaija  ogwo omugaiga. Abantu baingi abakuru nabo nibabikora. Bamwe aharibo nibakira kwenda kutunga ebintu bingi kwongyerera aha bi baine. Nibabaasa kuba baine eby’okurya, ebijwaro hamwe n’oburaaro. Kwonka nibaba nibenda kutunga ebindi bingi. Nibaba nibenda kugira ebijwaro bingi. Kandi nibaba nibenda n’okugira amaju mahango. Ebintu ebyo byona nibitwara esente. N’ahabw’ekyo nibeemarira aha kukora kubaasa kutunga esente nyingi. Oku barikweyongyera kutunga esente nyingi nikwo barikweyongyera kwetenga ebintu bingi.

Abantu abamwe abakuru nibamara obwire bwingi barikukora kubaasa kutunga esente, bahika n’aha kubura obwire bw’okuba n’ab’omu maka gaabo. Kandi Ruhanga nibaba batamwiniire bwire. Mbwenu shi esente zaabo nizibaasa kurinda amagara gaabo?— Ngaaha, tizirikubaasa. Mbwenu nibabaasa kukoresa esente zaabo baaheza kufa?— Ngaaha. Ekyo tikirikubasika ahabw’okuba abafiire tibarikubaasa kugira eki baakora kyona.​—Omubuurizi 9:5, 10.

Mbwenu shi ekyo nikimanyisa ngu okugira esente ni kibi?— Ngaaha. Twaba twine esente nitubaasa kugura eby’okurya n’ebijwaro. Baibuli neegira ngu esente n’eky’oburinzi. (Omubuurizi 7:12) Kwonka twakunda esente, obwo nituba twaza kutunga oburemeezi bw’amaani. Nituba nk’omushaija omugaiga ogwo omushema owaayebikiire eby’obugaiga bingi kwonka atari mugaiga ahari Ruhanga.

Nikimanyisa ki okuba omugaiga ahari Ruhanga?— Nikimanyisa okwebembeza ebya Ruhanga. Abantu abamwe nibagira ngu nibaikiririza omuri Ruhanga. Nibateekateeka ngu ekyo nikiba nikimara. Kwonka shi buzima nibaba bari abatungi ahari Ruhanga?— Ngaaha, nibaba bari nk’omushaija omugaiga owaayebirwe Ruhanga.

Yesu tarayebiirwe Ishe ow’omu iguru. Tarataire mutima aha kukora kutunga esente nyingi. Kandi akaba ataine bintu bingi. Yesu akaba naamanya ekirikukirayo obukuru. Nookimanya?— N’okuba omugaiga ahari Ruhanga.

Ninshaba ongambire, nitubaasa kuba tuta abagaiga ahari Ruhanga?— Nitubaasa kuba abagaiga ahari Ruhanga turikukora ebirikumushemeza. Yesu akagira ati: “Obutoosha nkora ebimushemeza.” (Yohaana 8:29) Ruhanga  naashemererwa twakora ebi arikwenda. Ninshaba ongambire, ni bintu ki ebi orikubaasa kukora ebirikushemeza Ruhanga?— Eego, noobaasa kushoma Baibuli, oze omu nteerane z’Ekikristaayo, oshabe Ruhanga, kandi ohwere abandi kwega ebirikukwata ahari Ruhanga. Ebyo buzima n’ebintu bikuru munonga omu magara.

Ahabw’okugira ngu Yesu akaba ari omugaiga ahari Ruhanga, Yehova akamureeberera. Akamuha ekihembo ky’okugumaho ebiro byona. Twakora nka Yesu, naitwe Yehova naija kutukunda kandi atureeberere. N’ahabw’ekyo ka tuteereho kuba nka Yesu kandi twetantare okuba nk’omushaija omugaiga ogwo owaayebirwe Ruhanga.