RUHANGA akata Adamu na Haawa omu musiri Edeni. N’obu baraabe baagomire kandi bakafa, Ruhanga akakora entebeekanisa eraabaasise oruzaaro rwabo otwariiremu naitwe, kutuura omuri Paradiso ebiro byona. Baibuli neeraganisa eti: “Abahikiriire baryahungura ensi, bagituuremu ebiro byona.”​—Zaaburi 37:29.

Baibuli neegamba aha “eiguru risya n’ensi nsya.” (Isaaya 65:17; 2 Petero 3:13) “Eiguru” ery’omu bwire obu nibwo butegyeki bw’abantu, kwonka “eiguru risya” niritwariramu Yesu Kristo n’abo abu aritegyeka nabo. Ka nikiija kuba ekirikushemeza obu eiguru risya, obutegyeki bwa Ruhanga obw’obusingye buritegyeka ensi yoona!

Mbwenu shi “ensi ensya” nikyo ki?— Ensi ensya nibaija kuba bari abantu abarungi abarikukunda Yehova. Baibuli ku erikugamba aha “nsi,” obumwe neeba neemanyisa abantu abarikutuura omu nsi, etarikumanyisa ensi ei tutwireho. (Okutandika 11:1; Zaaburi 66:4; 96:1) N’ahabw’ekyo, abantu abarungi abo nibaija kutuura omu nsi aha.

Ensi egi ey’abantu ababi neija kuba etakiriho. Ijuka, Omwegyemure omu bwire bwa Noa gukacwekyereza abantu ababi boona. Kandi nk’oku twegire, ensi embi egi neija kucwekyerezibwa ahari Haramagedoni. Ka tureebe oku embeera ziraije kuba ziri omu nsi ya Ruhanga ensya bwanyima ya Haramagedoni.

Nooyenda kutuuraho ebiro byona omuri Paradiso omu nsi ya  Ruhanga ensya ey’obusingye?— Tihariho mushaho orikubaasa kutubaasisa kubaho ebiro byona. Tihariho mubazi ogurikubaasa kuturinda okufa. Ekirikutubaasisa kubaho ebiro byona n’okwirira haihi Ruhanga. Kandi Omwegyesa Mukuru naatugambira oku twine kukikora.

Ka tureebe omu Baibuli zaitu omuri Yohaana eshuura 17, orunyiriri 3. Harimu ebigambo by’Omwegyesa Mukuru ebi: “Aga nigo magara agatahwaho, okumanya iwe Ruhanga omwe ow’amazima, n’[o]gwo ou waatumire, Yesu Kristo.”

Mbwenu shi, Yesu akagira ngu twine kukora ki okubaasa kutuuraho ebiro byona?— Eky’okubanza, twine kwega ahari Tataitwe ow’omu iguru, Yehova, kandi tukeega n’aha Mwana we, owaatufeereire. Eki nikimanyisa ngu twine kwega Baibuli. Ekitabo eki, Yegyera aha Mwegyesa Mukuru, nikituhwera kwega Baibuli.

Kwonka shi okwega ahari Yehova nikiija kutuhwera kita kutuuraho ebiro byona?— Nk’oku turikwetenga eby’okurya buri izooba, nitwetenga kwega ebirikukwata ahari Yehova buri izooba. Baibuli neegira eti: “Omuntu tatungwa by’okurya byonka, kureka n’ekigambo kyona ekiruga omu kanwa ka Ruhanga.”​—Matayo 4:4.

Twine kwega n’ebirikukwata ahari Yesu Kristo ahabw’okuba Ruhanga akoheereza Omwana we ogwo kwihaho ebibi byaitu. Baibuli neegira eti: “Tihariho ondiijo ou twakuboneramu okujunwa.” Kandi Baibuli neegira eti: “Orikwikiriza Omwana aine amagara agatahwaho.” (Ebyakozirwe 4:12; Yohaana 3:36) Mbwenu shi nitwikiririza omuri Yesu kandi twikiriza ngu titurikubaasa kutunga amagara agatahwaho ahu atari?— Kyaba nikwo kiri, nitwija kugumizamu nitwegyera aha Mwegyesa Mukuru buri izooba, kandi tukore ebi arikutugambira.

Omuringo gumwe omurungi ogu turikubaasa kwegyeramu ebirikukwata aha Mwegyesa Mukuru n’okuguma nitushoma ekitabo eki  kandi tukareeba n’ebishushani byona tukabiteekateekaho. Teeraho kureeba yaaba noobaasa kugarukamu ebibuuzo ebiri aha bishushani ebyo. Kandi, shoma ekitabo eki ori na nyoko nari sho. Abazaire baawe baaba batariho, kishome n’abandi abakuzire n’abaana abandi. Mbwenu tikirikukushemeza waahwera abandi kwegyera aha Mwegyesa Mukuru, bakamanya eki baine kukora kubaasa kutuura omu nsi ya Ruhanga ensya ebiro byona?—

Baibuli neetugambira eti: “Ensi egi neehwaho.” Kwonka Baibuli neeshoboorora oku turikubaasa kutuuraho ebiro byona omu nsi ya Ruhanga ensya ey’obusingye. Neegira eti: “Okora ebi Ruhanga akunda, agumaho ebiro byona.” (1 Yohaana 2:17) Mbwenu shi nitubaasa kutuura omu nsi ya Ruhanga ensya ebiro byona?— Eego nitubaasa, twayega ebirikukwata ahari Yehova n’aha Mwana we omukundwa Yesu. Kwonka naitwe twine kuta omu nkora ebi turikwega. Okushoma ekitabo eki nikwija kukuhwera kukora ebyo.