WAABA nooyenda kumanya omuntu noomubuuza eiziina rye. Twena twine amaziina. Omuntu w’okubanza omu nsi, Ruhanga akamuha eiziina. Akamweta Adamu. Omukazi wa Adamu akeetwa Haawa.

Kwonka, abantu tibo bonka abaine amaziina. Teekateeka aha bintu ebindi ebiine amaziina. Embwa n’ente nazo niziba ziine amaziina. N’ahabw’ekyo okugira eiziina ni kikuru munonga.

Enyonyoozi zoona ezirikuba ziri ahaiguru nyekiro, nooteekateeka ngu ziine amaziina?— Eego, Ruhanga buri nyonyoozi akagiha eiziina. Baibuli neetugira eti: “Amanya obwingi bw’enyonyoozi, zoona azeeta amaziina gaazo.”​—Zaaburi 147:4.

Nooteekateeka ngu n’oha orikukira byona ebiri omu iguru n’omu nsi?— Ni Ruhanga. Nooteekateeka ngu aine eiziina?— Yesu akagira ngu Ruhanga aine eiziina. Yesu omurundi gumwe arikushaba Ruhanga akagira ati: ‘Nkamanyisa abakuratsi bangye eiziina ryawe.’ (Yohaana 17:26) Noomanya eiziina rya Ruhanga?— Ruhanga we wenka naaritugambira. Naagira ati: “Niinye Yehova.” N’ahabw’ekyo eiziina rya Ruhanga ni YEHOVA.​—Okuruga 6:2.

Mbwenu noohurira ota abandi baaba nibamanya eiziina ryawe?— Nooshemererwa, tikwo?— Yehova nawe naayenda ngu abantu bamanye eiziina rye. N’ahabw’ekyo tushemereire kukoresa eiziina Yehova twaba nitugamba aha birikukwata ahari Ruhanga. Omwegyesa Mukuru ku yaabaire aba naagamba n’abantu akaba akoresa eiziina rya Ruhanga Yehova. Eizooba rimwe Yesu akagira ati: “Okunde Yehova Ruhanga waawe n’omutima gwawe gwona.”​—Mako 12:30, NW.

Yesu akaba naamanya ngu eiziina “Yehova” ni rikuru munonga. N’ahabw’ekyo  akeegyesa abakuratsi be kukoresa eiziina rya Ruhanga. Kandi akabeegyesa kukoresa eiziina rya Ruhanga baaba nibashaba. Yesu akaba naamanya ngu Ruhanga naayenda ngu abantu boona bamanye eiziina Rye Yehova.

Omu bunaku bwa ira, Ruhanga akooreka Musa owaabaire ari omwe aha Baisraeli obukuru bw’eiziina Rye. Abaisraeli bakaba nibatuura omu nsi erikwetwa Misri. Abantu abaabaire nibatuura omu nsi egyo bakaba nibeetwa Abanyamisri. Bakahindura Abaisraeli abahuuku kandi bakaba nibabatwariza kubi munonga. Musa ku yaakuzire, akateeraho kuhwera omwe aha Baisraeli. Ekyo kikagwisa kubi Faraho owaabaire ari omugabe wa Misri, yaayenda kwita Musa. N’ahabw’ekyo Musa akahunga yaaruga Misri.

Musa akagyenda yaaza omu ihanga erindi. Rikaba niryetwa Midiani. Ku yaabaire ari okwo yaashwera yaagira eka. Kandi akaba naakora nk’omuriisa w’entaama. Eizooba  rimwe Musa akaba ariisize entaama ze haihi n’orushozi reero yaareeba ekintu ekirikutangaaza. Orushaka rukaba nirwaka omuriro, kwonka rukaba rutarikusya. Musa yaarwirira haihi kurwetegyereza.

Noomanya ekyabaireho?— Musa akahuurira eiraka ririkweta ririkuruga ahagati y’orushaka orwo orwabaire nirwaka omuriro. Iraka rikaba niryeta riti: “Musa, Musa!” N’oha owaabaire naagamba ebigambo ebyo?— Ruhanga niwe yaabaire nabigamba. Ruhanga akaba ainiire Musa omurimo muhango gw’okukora. Ruhanga akagira ati: “Ija, nkutume ahari Faraho, oihe abantu bangye Abaisreali omuri Misri.” Ruhanga akaraganisa kuhwera Musa omu kukora ekyo.

Kwonka Musa akagambira Ruhanga ati: ‘Ku ndihika Abaisraeli omuri Misri, naabagira nti: Ruhanga abantumireho; bambuuza bati: Eiziina rye n’oha? ndyabagarukamu nta?’ Ruhanga akagambira Musa kugambira Abaisraeli ati: ‘Yehova niwe abantumireho. Yehova niryo eiziina ryangye ebiro byona.’ (Okuruga 3:1-15, NW) Eki nikyoreka ngu Ruhanga akaba naija kuguma n’eiziina Yehova. Akaba atarikwija  kurihindura. Ruhanga akaba naayenda kuguma naayetwa eiziina Yehova ebiro byona.

Musa ku yaagarukire Misri, Abanyamisri bakateekateeka ngu Yehova akaba ari ruhanga w’Abaisraeli otari w’amaani. Bakaba batarikuteekateeka ngu akaba ari Ruhanga ow’ensi yoona. N’ahabw’ekyo Yehova akagambira omugabe wa Misri ati: ‘Ninza kureetera eiziina ryangye kumanywa omu nsi yoona.’ (Okuruga 9:16) Yehova buzima akareetera eiziina rye kumanywa. Noomanya oku ekyo yaakikozire?—

Akakoresa Musa kwiha Abaisraeli omuri Misri. Ku baahikire aha Nyanja Erikutukura, Yehova yaagibaganisamu, yaatamu omuhanda gwomire. Abaisraeli baarabamu aha itaka ry’omire. Kwonka bwanyima Faraho n’amahe ge goona ku baabaire bari omu muhanda ogwo, amaizi agaabaire gacungirwe embaju zombi gaayeshuka Abanyamisri boona bafa.

Bwanyima abantu omu nsi yoona bakatandika kuhuurira eki Yehova yaakozire aha Nyanja Erikutukura. Nitumanya tuta ngu bakahurira ekyo ekyabaireho?— Bwanyima y’emyaka nka 40, Abaisraeli bakaija omuri Kanaani, omu nsi ei Yehova yaabaire aragaaniise kubaha. Omukazi muto Rahabu ow’omu nsi egyo, akagambira abashaija babiri b’Abaisraeli ati: ‘Tukahurira oku Yehova yaayomize  amaizi g’Enyanja Erikutukura omu maisho gaanyu, obu mwaruga Misri.’​—Yoshua 2:10.

Omu bunaku obu abantu baingi bari nk’Abanyamisri abo. Tibarikwikiriza ngu Yehova ni Ruhanga w’ensi yoona. N’ahabw’ekyo Ruhanga naayenda ngu abantu be bagambire abandi ebirikumukwataho. Ekyo nikyo Yesu yaakozire. Ari haihi kuruga omu nsi, arikushaba akagambira Yehova ati: “Nkabamanyisa eiziina ryawe.”​—Yohaana 17:26.

Nooyenda kuba nka Yesu? N’ahabw’ekyo gambira abandi  ngu eiziina rya Ruhanga ni Yehova. Noobaasa kushanga ngu abantu baingi tibarikurimanya. N’ahabw’ekyo noobaasa kubooreka ekyahandiikirwe ekiri omu Baibuli omuri Zaaburi 83:18. Hati ka tushome hamwe ekyahandiikirwe ekyo omu Baibuli. Nikigira kiti: “Bamanye ngu niiwe wenka orikwetwa Yehova, okira boona, kandi otegyeka ensi yoona.”

Nitwega ki omu bi twashoma?— Nitwega ngu eiziina Yehova niryo eiziina rikuru munonga omu maziina agandi goona. N’eiziina rya Ruhanga ow’Obushoboorozi Bwona, Ishe wa Yesu kandi Ogwo owaahangire ebintu byona. Kandi ijuka ngu Yesu akagira ngu tushemereire kukunda Yehova Ruhanga n’omutima gwaitu gwona. Nookunda Yehova?—

Mbwenu nitubaasa kworeka tuta ngu nitukunda Yehova?— Omuringo gumwe n’okumumanya nka Munywani waitu. Omuringo ogundi n’okugambira abandi eiziina rye. Nitubaasa kubooreka omu Baibuli ngu eiziina rye ni Yehova. Nitubaasa kugambira abandi aha bintu birungi ebi yaahangire n’ebi akozire. Ekyo nikishemeza Yehova munonga ahakuba naayenda ngu abantu bamumanye. Nitubaasa kwehayo kukora ekyo, tikwo?—

Ti kugira ngu buri omwe naija kuhurikiza twaba nitugamba aha birikukwata ahari Yehova. Abantu baingi tibarahurikiize obu Yesu Omwegyesa Mukuru yaabaire naayegyesa ahari Ruhanga. Kwonka Yesu tararekire kwegyesa ebirikukwata ahari Yehova.

N’ahabw’ekyo ka tuteereho kuba nka Yesu. Ka tugumizemu nitugambira abantu ebirikukwata ahari Yehova. Twakora ekyo, Yehova Ruhanga naija kushemererwa ahakuba nituba nitworeka ngu nitukunda eiziina rye.