Tugambire obukomooko bwawe.

Nkazaarwa omu 1979 omuri United States. Ku naabaire nyine emyaka eshatu, abazaire bangye bakagaitururwa. Maawe akankuriza omu migyenzo y’Ekiyudaaya reero yaanyohereza omu mashomero g’Ekiyudaaya. Obu naabaire nyine emyaka mushanju, tukaza omuri Israeli kumara omwaka, kandi nkaza omu ishomero omu mwanya ogurikwetwa kibbutz. Bwanyima nyowe na maawe tukafuruka twaza Mexico.

N’obu haraabe haabaire hatariho sinagogi, nkaguma n’emigyenzo yangye y’Ekiyudaaya. Nkaba mpemba kanduro aha Sabato, nshoma Torah, nshaba ndikukoresa ekitabo ky’okushaba. Aha ishomero nkaba ninkira kugambira abeegi bagyenzi bangye ngu ediini yangye niyo yaabandize. Nkaba ntakashomaga erikwetwa Endagaano Ensya, erikugamba munonga aha nyegyesa za Yesu n’obuheereza bwe. Nangwa na maawe akandabura kutagishoma, arikutiina ngu enyegyesa zaayo niziija kumpabisa.

Ahabw’enki waacwiremu kushoma Endagaano Ensya?

Ku naahikize emyaka 17, nkagaruka omuri United States kuhendera emishomo yangye. Nkashangayo ou ndikumanya owaangizire ngu n’Omukristaayo kandi akangira ngu okuramya kwangye nikuba kutahikire ahatari Yesu.

Nkamugira ngu “abantu abarikwikiririza omuri Yesu bahabire.”

Akambuuza ati: “Orashomireho Endagaano Ensya?”

Nkamugira ngu “ngaaha.”

N’ahabw’ekyo akangira ati: “Mbwenu tori omushema, kuha ekiteekateeko kyawe aha kintu eki otarikumanya?”

Ebigambo bye bikancumita, ahakuba butoosha nkaba niimanya ngu n’eky’obushema kugamba aha kintu eki otarikumanya. Nkefuuza naagyenda na Baibuli ye omuka naatandika kushoma Endagaano Ensya.

Ebi waashomire bikakukwataho bita?

Ekyantangaarize, nketegyereza ngu abaahandiikire Endagaano Ensya bakaba bari Abayudaaya. Kandi, buri kwongyera kushoma, nkaba nyongyera kureeba Yesu ari Omuyudaaya w’embabazi, omucureezi owaabaire naayenda kuhwera abantu, kutari kubaitsa omwaga. Nkaza n’omu ibiikiro ry’ebitabo naatiiza ebitabo ebirikumukwataho. Kwonka tihariho na kimwe aharibyo ekyampamiize ngu akaba ari Mesia. Ebimwe bikaba nibimugambaho nka Ruhanga, ekyabaire kitarikukora amakuru ahariinye. Ahakuba Yesu ku araabe ari Ruhanga, akaba naayeshaba? Kandi, Yesu akafa. Kwonka, Baibuli neegamba ahari Ruhanga eti: “Torikufa.” *

Enshonga ezi kikakureetera kukora ki?

Amazima tigarikwehakanisa, kandi nkaba mmaririire kusherura amazima. N’ahabw’ekyo nkashaba Ruhanga ndikurira omurundi gw’okubanza ntarikukoresa ekitabo ky’okushaba. Ku naagiire kuheza kushaba nkahurira abarikwiguza aha rwigi rwangye. Bakaba bari Abajurizi ba Yehova babiri. Bakampa kimwe aha bitabo byabo. Ekitabo eki, n’okuguma ningaaniira nabo, bikampamiza ngu enyikiriza zaabo nizeegamira ahari Baibuli. Nk’eky’okureeberaho, Abajurizi ba Yehova nibamanya ngu Yesu ti kicweka ky’obushatu, kureka ‘n’Omwana wa Ruhanga’ * kandi ‘omujigaijo w’ebyahangirwe byona.’ *

Bwanyima, nkagaruka Mexico, ahu naagumiizemu niinyega aha bunabi oburikukwata ahari Mesia ndikuhwerwa Abajurizi ba Yehova. Nkashemezibwa munonga obunabi bwingi oburiho! Kwonka nabwo, nkaguma nyine okubangaanisa. Nkaguma niinyebuuza nti: ‘Yesu wenka niwe arikuhikiiriza obunabi obu?’ Kandi nti: ‘Ku yaakuba yaabaire ari omushaija omunyabwengye owaakozire ebi byona kweshushaniriza Mesia?’

Niki ekyakureeteire kuhinduka?

Abajurizi ba Yehova bakaanyoreka obunabi obu hataine owaabaire naabaasa kubucupura. Nk’eky’okureeberaho, emyaka erengire 700 enyima, nabi Miika akagira ngu Mesia akaba naija kuzaarirwa omuri Betelehemu, eya Buyudaaya *. N’oha owaabaire naabaasa kumureetera kuzaarirwa omu mwanya ogwo? Isaaya akahandiika ngu Mesia naija kwitwa kandi ahemangurwe nk’omushuma, kwonka kandi ngu naija kuziikwa n’abagaiga. * Ebi byona bikahikiirira omuri Yesu.

Obuhame obw’aha muheru bukaba nibukwata aha bukomooko bwa Yesu. Baibuli ekagira ngu Mesia akaba naija kuba ari mwijukuru w’Omugabe Daudi *. Ku ogire ngu Abayudaaya ba ira tibarabiikire ebihandiiko bw’obukomooko bwa Yesu, ngu naaruga omu runyiriri rwa Daudi, abazigu be bakaba nibaija kuhakanisa enshonga egi! Kwonka bakaba batarikubaasa, ahakuba obuhame oburikworeka ngu Yesu akaba aine obuzaare na Daudi bukaba butarikubaasa kuhakanisibwa. N’abantu bakaba nibamweta “Omwana wa Daudi.” *

Omu gwa 70 Y.A.K—37 Yesu aherize kufa, abaserukare Abarooma bakataahirira Yerusaalemu, kandi ebihandiiko by’obukomooko bwe bikabura nari bikacwekyerezibwa. N’ahabw’ekyo, Mesia kubaasa kumanywa, akaba aine kubaho omwaka gwa 70 gutakahikire.

Okumanya ebi byona kikakukwataho kita?

Omu Eky’Ebiragiro 18:18, 19, kikagambwa ngu Ruhanga naija kwimutsya nabi omuri Israeli ori Musa. Kandi Ruhanga akagira ngu ‘weena oraayangye kuhurira ebigambo ebi araagambe omu iziina ryangye niinyija kukimutura.’ Omu kushwijuma kwangye okwa Baibuli yoona nketungira obuhame ngu Yesu owa Nazareesi niwe yaabaire ari nabi ogwo.