EBY’ABASHWERAINE
2: Okukwatanisa
EKI KIRIKUMANYISA
Mwaba nimukwatanisa omu bushwere, omushaija naaba ari nk’omuvugi w’enyonyi reero omukazi ari nk’omuhwezi omu kuvuga kwonka bombi baine ekigyendererwa kimwe. Haabaho oburemeezi, buri omwe naaba naakoresa ebigambo nka “itwe” omu mwanya gwa “nyowe.”
OMUSINGYE GWA BAIBULI: ‘Nibaba batakiri babiri kureka [omubiri gumwe.]’—Matayo 19:6.
“Obushwere ti bw’omuntu omwe. Omushaija n’omukazi baine kukorera hamwe kubureetera kusingura.”—Christopher.
ENSHONGA AHABW’ENKI NI KIKURU
Haabaho obutaikirizana, omushaija n’omukazi abatarikukwatanisa nibateeraho kurwanagana omu mwanya gw’okurwanisa oburemeezi. Enshonga nkye nizibaasa kurugamu oburemeezi bw’amaani.
“Okukwatanisa ni kukuru omu bushwere. Ku ogire ngu nyowe na ibanyi titurikukwatanisa, tukaabaire nk’abarikuraara omu kishengye kimwe baitu tutari abashweraine, babiri abarikutuura hamwe kwonka abataine kigyendererwa kimwe kyahika aha kucwamu enshonga nkuru.” —Alexandra.
EKI ORIKUBAASA KUKORA
YEGYEZE
Esente ezi ndikukora ninzireeba “nk’ezangye nyenka”?
Kubaasa kuhuumura gye, nimba nyine kuba hare n’omukundwa wangye?
Tindikwehitsya abanyabuzaare b’omukundwa wangye, n’obu araabe we naakunda kuba nabo?
GAANIIRAHO N’OMUKUNDWA WAAWE
Omu bushwere bwaitu ni nkahi ahu turikukwatanisa gye?
Ni nkahi ahu twine kwongyeramu amaani?
Nitubaasa kukora ki kwongyera kugira omutima gw’okukwatanisa?
OBUHABUZI
Teekateeka murikuzaana omuzaano gwa tenesi muri aha mbaju zitarikushushani. Omu mwanya gw’ekyo, nimubaasa kukora ki kuza aha rubaju rumwe?
Omu mwanya gw’okuteekateeka oti: ‘Nimbaasa kusingura nta?’ teekateeka oti: ‘Twembi nitubaasa kusingura tuta?’
“Ti kikuru kumanya ohikire n’oha kandi ogwire n’oha. Ekikuru n’okugira obusingye n’obumwe omu bushwere bwanyu.”—Ethan.
OMUSINGYE GWA BAIBULI: ‘Reka kweta aha byawe wenka, kureka oyete n’aha by’abandi.’—Abafilipi 2:3, 4.
