OMWAKA oguhingwire, ab’eishe-emwe baingi bakatooranwa kuheereza nk’abareeberezi nari nk’abaheereza omu kibiina. Waaba ori omwe aharibo, oshemereirwe ahakuba hati noobaasa kuheereza Yehova n’ab’eishe-emwe omu muringo gw’omutaano.

Kwonka ku oraabe oine okwerarikirira, ekyo n’ekya butoosha. Jason, omureeberezi muto, naagira ati: “Ku naatoorainwe, obujunaanizibwa obu naahairwe bukanyerarikiriza.” Musa na Yeremia nabo bakaba nibateekateeka ngu tibarabaase obujunaanizibwa busya obu Yehova yaabahaire. (Okuruga 4:10; Yeremia 1:6) Naiwe ku oraabe nooyehurira otyo, noobaasa kukora ki kugira obumanzi, kandi okaagumizamu nootunguuka? Noobaasa kwegyera ahari Timoseo.​—Ebyakozirwe 16:1-3.

Timoseo naabaasa kuba yaabaire aine emyaka nka 20 obu yaatandika kugyenda n’entumwa Paulo. Obu Timoseo yaaheebwa omugisha ogu, omu kubanza naabaasa kuba yaayehuriire nk’otahikire kwegyesa nari kuha abandi obuhabuzi ahakuba akaba akiri muto. (1 Timoseo 4:11, 12; 2 Timoseo 1:1, 2, 7) Kwonka akagumizamu naatunguuka, kandi bwanyima y’emyaka ikumi, Paulo akagambira Abafilipi ati: “Nyine amatsiko omuri Mukama waitu Yesu kubatumaho juba Timoseo.” Ahabw’enki yaagizire atyo? Akashoboorora ati: “Tinyine ondiijo nkawe, orita omutima munonga aha byanyu.”​—Abafilipi 2:19, 20.

Ahabw’enki Timoseo n’eky’okureeberaho kirungi aha bareeberezi? Ka tureebe enshonga mukaaga.

1. Akaba naafayo aha bantu. Paulo akagambira ab’eishe-emwe ab’omuri Filipi ngu Timoseo naija kubataho “omutima munonga.” (Abafilipi 2:20) Ahabw’okuba akaba naayenda ab’eishe-emwe kuguma aha rubaju rwa Yehova, kandi akaba ayeteekateekire kukoresa obwire bwe n’amaani ge kubahwera.

William, omazire emyaka nka 20 ari omureeberezi, naakira kugambira abareeberezi abasya ati: “Mukunde ab’eishe-emwe. Mute omutima aha byetengo byabo beitu kutari kubeebembera kyonka.” Mutaba nk’omuvugi wa baasi orikuta omutima aha kukwata obwire bw’okuhika ahu baasi erikwemerera, omu mwanya gw’okufayo aha ku abantu barikutaaha omu baasi.

2. Akeebembeza okuheereza Yehova. Paulo akagira ngu Timoseo akaba atari nk’abandi abaabaire “nibasherura ebyabo bonka, ti bya Yesu Kristo.” (Abafilipi 2:21) Paulo akareeba ngu ab’eishe-emwe abandi bakaba nibeefaho bonka. Obumwe bakaba nibeebembeza ebyetengo byabo byonka omu mwanya gw’okuheereza Yehova. Kwonka Timoseo tikwo yaabaire ari! Ku yaatungire omugisha gw’okwongyera aha buheereza bwe, akatwaza nka nabi Isaaya, owagizire ati: “Ndi aha; ba niinye waatuma!”​—Isaaya 6:8.

Noobaasa ota kuringaaniza ebyetengo byawe n’ebyetengo by’ekibiina? Eky’okubanza, kuratira obuhabuzi bwa Paulo oburikutuhiga kwebembeza “ebirikukira oburungi.” (Abafilipi 1:10) Yebeembeze okuheereza Yehova. Ekya kabiri, yetantare ebintu ebirikubaasa kutwara obwire bwingi n’amaani maingi. Paulo akagambira Timoseo ati: “Oyetantare okwetenga okubi kw’obutsigazi, okuratire okuhikiirira, okwikiriza, okukunda n’obusingye.”​—2 Timoseo 2:22.

3. Akaheereza Yehova n’obweziriki. Paulo akagamba ahari Timoseo ati: “Nk’oku  omwana akorera ishe, nikwo yaakozire naanye omu kubuzya” amakuru marungi. (Abafilipi 2:22) Timoseo akaba atari mugara. N’obweziriki akakorera hamwe na Paulo, kandi eki kikahamya omukago gwabo.

Obunaku obu hariho emirimo mingi y’okukora omu kibiina kya Yehova. Kandi emirimo egi neekureetera okumarwa n’okugira omukago murungi n’ab’eishe-emwe. N’ahabw’ekyo hamya ngu oine bingi by’okukora omu “omurimo gwa Mukama.”​—1 Abakorinso 15:58.

4. Akata omu nkora ebi yaayegire. Paulo akahandiikira Timoseo ati: “Okakuratira enyegyesa yangye, emitwarize yangye, eki ndikugyenderera, okwikiriza kwangye, okugumisiriza kwangye, okukunda kwangye, okuhamya kwangye.” (2 Timoseo 3:10) Timoseo akagyendera aha bi yaayegire, n’ahabw’ekyo akongyera kuheebwa obujunaanizibwa.​—1 Abakorinso 4:17.

Teeraho kunywana omureeberezi omazire obwire buraingwa akubeere eky’okureeberaho. Tom, omazire obwire buraingwa ari omureeberezi, naijuka ngu omureeberezi owaabaire aheereize obwire buraingwa akamufaho, kandi yaamutendeka. Naagira ati: “Butoosha nkaba mmusheruraho obuhabuzi kandi mbukuratira. Eki kikampwera kugira obumanzi.”

5. Akagumizamu naayetendeka. Paulo akahabura Timoseo ati: “Yemanyiize okutiina Ruhanga.” (1 Timoseo 4:7) Omwiruki n’obu yaakuba aine orikumutendeka, nawe naaba aine kwetendeka. Paulo akahiga Timoseo ati: “Oyezirikye kushomera abantu Ebyahandiikirwe, n’okubuurira, n’okwegyesa. . . . Ebyo obyezirikire, obe nibyo waataho omutima, boona bareebe oku orikweyongyera kugyenda omumaisho.”​—1 Timoseo 4:13-15.

Niiwe oine kugumizamu nootunguuka. Gumizamu nooyeshomesa Baibuli, kandi kuratira obuhabuzi busya oburikutuheebwa ekibiina. Orekye kweyesiga ekirenga. Tikihikire kuteekateeka ngu torikwetenga kucondooza waaba nooza kushoboorora oburemeezi butari bumwe na bumwe ahabw’okugira ngu otwire nookikora. Nka Timoseo, ‘oyerinde iwe wenka n’omu bi orikwegyesa.’​—1 Timoseo 4:16.

6. Akeesiga omwoyo gurikwera. Obu Paulo yaagamba aha buheereza bwa Timoseo akamwijutsya ati: ‘Orinde ekyo kirungi eki waakwatsiibwe omwoyo gurikwera.’ (2 Timoseo 1:14) Timoseo akaba aine kwesiga omwoyo gurikwera.

Donald, oheereize nk’omureeberezi kumara emyaka mingi, naagira ati: “Ab’eishe-emwe abahairwe obujunaanizibwa omu kibiina baine kutwara omukago ogu baine na Yehova nk’ogw’omuhendo. Abarikukora ekyo nibaija kwongyera kutunga amaani. Baashaba obuhwezi bw’omwoyo gurikwera kandi bakateeraho kugira emitwarize yaagwo, nibaija kugasira munonga ab’eishe-emwe.”​—Zaaburi 84:7; 1 Petero 4:11.

Nikishemeza kureeba abaheereza n’abareeberezi basya omu kibiina abarikutunguuka omu kuheereza Yehova. Jason, owaaba yaagambirweho, naagira ati: “Obwire obu mmazire ndi omureeberezi, nyegire bingi kandi nyeyongyeire kugira obumanzi. Hati ninkunda munonga obuheereza bwangye, kandi nimbutwara nk’obw’omuhendo!”

Noija kugumizamu nootunguuka? Waatooreza eky’okureeberaho kya Timoseo, ab’eishe-emwe na banyaanyazi-itwe nibaija kugasirwa munonga.