1. Ahabw’enki entumwa Paulo yaahigire Abakristaayo Abaheburaayo kwongyera kugumyana?

OMU kyasha ky’okubanza, entumwa Paulo akahabura Abakristaayo Abaheburaayo ati: ‘Ka tuteekateekye oku twakwezirikisana kukundana n’okukora ebirungi, tutarikureka kuteeranira hamwe, nk’oku abamwe bagira, kureka tugumyane, kandi nk’oku murikureeba ngu ekiro ekyo kiri haihi n’okuhika, mweyongyere kutwaza mutyo.’ (Abaheburaayo 10:24, 25) Ab’eishe-emwe nibabaasa kuba baayebuurize ahabw’enki Paulo yaabagambiire kwongyera kugumyana. Omu myaka nk’etaano, bakeetegyereza eki Paulo yaabaire naamanyisa. Obwire obwo, bakareeba ngu ekiro kya Yehova eky’okucwera Yerusaalemu orubanja kiri haihi. Bakamanya ngu baine kuhunga omu rurembo nk’oku Yesu yaabaire abagambiire. (Luka 21:20-22; Ebyakozirwe 2:19, 20) Ekiro kya Yehova kikahika omu mwaka gwa 70 obu Abarooma baacwekyereza Yerusaalemu.

2. Ahabw’enki twine kuteekateeka aha kwongyera kugumyana obunaku obu?

 ² Obunaku obu, turi omu mbeera niyo emwe. Eizooba rya Yehova ‘erikuru, kandi eririkutiinisa munonga’ riri haihi kuhika. (Yoeli 2:11) Ebigambo bya nabi Zefania nibitukwataho n’omu bunaku obu. Nibigira biti: “Eizooba rya Mukama erikuru riri haihi; riri haihi, kandi nirirahuka munonga.” (Zefania 1:14) Ahabw’enshonga egi, twine ‘tuteekateeka oku turaayezirikisane kukundana n’okukora ebirungi.’ (Abaheburaayo 10:24) Twine kweyongyera kworeka ngu nitufayo aha b’eishe-emwe bagyenzi baitu, kugira ngu tubagumye kyayetengyesa.

3. Entumwa Paulo akagamba ki aha kuhuumuriza? (Reeba ekishushani aha kutandika.)

³ “Amaganya g’omutima gw’omuntu gaamureetera okweyinamirira, kwonka ekigambo kirungi kigushemeza.” (Enfumu 12:25) Twena obumwe nituba twine kuhuumurizibwa. Paulo akakyoreka gye ngu abo abaine obujunaanizibwa bw’okuhuumuriza abandi nabo baine kuhuumurizibwa. Akahandiikira ab’eishe-emwe omuri Rooma ati: “Mbainiire orushusho ngu mbone kubaha omugisha gw’omwoyo, gubagumye, nikwo kugira ngu tugumyane, nyowe ngumibwe okwikiriza kwanyu, naimwe okwangye.” (Abarooma 1:11, 12) N’ahabw’ekyo entumwa Paulo nawe obumwe akaba naayetenga okuhuumurizibwa.​—Shoma Abarooma 15:30-32.

4, 5. Obunaku obu nitubaasa kuhuumuriza baahi, kandi ahabw’enki?

⁴ Obunaku obu, nitubaasa kugumya abo abarikuheereza Yehova obutwire nka baapayoniya abeesigwa. Baingi aharibo nibeefeerereza ebintu ebi barikukunda kubaasa kuba baapayoniya. Nikyo kimwe n’abamiisani, Ababeseeli, abareeberezi abarikutaayaayira ebibiina n’abakazi baabo, n’abarikuheereza aha ofiisi z’abavunuuzi. Boona nibeefeerereza bingi kwongyera aha bwire obu barikumara nibaheereza Yehova. N’ahabw’ekyo twine kubagumya. Hariho baingi abarikuhurira nibenda kuba bakiri omu buheereza obw’obutwire kwonka abatakibaasa. Nabo nibashemererwa ku harikugira owaabagumya.

⁵ Ni baahi abandi abaine kuhuumurizibwa? Nitubaasa n’okugumya ab’eishe-emwe na banyaanyazi-itwe baingi abatakagiire omu bushwere ahabw’okugira ngu nibenda kworobera Yehova bashwere nari bashwerwe “omuri Mukama” honka. (1 Abakorinso 7:39) Abashaija baagambira abakazi baabo ngu nibabakunda kandi ngu nibasiima byona ebi barikukora, ekyo nikibagumya. (Enfumu 31:28, 31) Abakristaayo abarikuhiiganisibwa nari abarwaire nabo baine kuhuumurizibwa. (2 Abatesalonika 1:3-5) Yehova na Yesu nibagumya ab’eishe-emwe aba abeesigwa.​—Shoma 2 Abatesalonika 2:16, 17.

6. Ebiri omu Isaaya 32:1, 2 nibitwegyesa ki aha bujunaanizibwa bw’abareeberezi?

⁶ Shoma Isaaya 32:1, 2. Turi omu bunaku bugumire kandi nitubaasa kurahuka kugira amaganya n’okuhwamu amaani. Yesu Kristo naakoresa ‘abanyiginya’ abashukirweho amajuta n’ab’entaama ezindi kutugumya. Abareeberezi b’ekibiina aba ‘tibarikutegyeka’ okwikiriza kwaitu ‘kureka nibakorera hamwe’ naitwe kutureetera okushemererwa. Nibaba nibenda kutuhwera kuguma tushemereirwe  kandi turi abeesigwa.​—2 Abakorinso 1:24.

7, 8. Abareeberezi nibabaasa kugumya bata abandi omu bigambo n’omu bikorwa?

⁷ Abareeberezi nibabaasa kutooreza entumwa Paulo, owaabaire naateeraho kugumya ab’eishe-emwe bagyenzi be. Akahandiikira Abakristaayo b’omuri Tesalonika abaabaire nibahiiganisibwa ati: “Ahabw’okusaasibwa munonga, tukashemerererwa okubaha, ti ngiri ya Ruhanga yonka, kureka n’okuhayo amagara gaitu, ahabw’okuba mukahinduka abaitu ab’aha mara.”​—1 Abatesalonika 2:8.

⁸ Abareeberezi nibabaasa kugumya abandi omu bigambo. Kwonka shi eki butoosha nikimara? Paulo akagambira abareeberezi b’omuri Efeso ati: ‘Muhwere abataine maani, n’okwijuka ebigambo ebi Mukama waitu Yesu yaagambire naagira ati: Okugaba kuhaisa omugisha okukira okuheebwa.’ (Ebyakozirwe 20:35) Paulo akaba ayeteekateekire ‘kuhayo ebye, kandi n’okwehayo’ ahabw’ab’eishe-emwe. Akakyoreka omu bikorwa bye ngu akaba ayeteekateekire kubakorera ekirikukira oburungi. (2 Abakorinso 12:15) Omu muringo nigwo gumwe, abareeberezi baine kuhuumuriza abandi omu bigambo n’omu bikorwa. Eki nikyoreka ngu buzima nibatufaho.​—1 Abakorinso 14:3.

9. Abareeberezi nibabaasa kuhana bata omu muringo ogurikuhuumuriza?

⁹ Abareeberezi kubaasa kugumya ab’eishe-emwe abandi, obumwe nibabahana. Baibuli neebahwera kumanya oku barikubaasa kukora eki omu muringo murungi. Yesu bwanyima y’okufa kandi akazooka akataho eky’okureeberaho kirungi eky’okuhana abandi obu yaayoheereza obutumwa omu bibiina bya Asia. Akahana munonga ekibiina ky’omuri Efeso, Perugamo na Suatira. Kwonka atakabahanire, akabanza yaabasiima ahabw’ebirungi ebi baabaire nibakora. (Okushuuruurwa 2:1-5, 12, 13, 18, 19) Yesu akagambira ab’omu kibiina ky’omuri Laodikea: “Boona abu nkunda mbateisa kandi mbahana; n’ahabw’ekyo oyezirikye, oyeteise.” (Okushuuruurwa 3:19) Abareeberezi nibateeraho kutooreza Kristo baaba nibahana abandi.

10. Twena nitubaasa kugumyana tuta?

¹⁰ Abareeberezi tibo bonka abaine kugumya abandi. Paulo akahiga Abakristaayo boona kugamba “ebirungi ebirikubaasa kukuza [kwombeka] abantu ahu bishemereire kugambirwa, bibone kuhaisa abarikubihurira omugisha.” (Abaefeso 4:29) Buri omwe ahariitwe aine kumanya eki abandi barikwenda kubaasa kubahwera. Paulo akahandiikira Abakristaayo Abaheburaayo: “Mwimutsye emikono yaanyu enoganogokire, munanuure amaju gaanyu agazingazingirwe, mucwere ebigyere byanyu emihanda eshororokire, abarikucumbagira barekye kugiremerwamu, kureka bakire.” (Abaheburaayo 12:12, 13) Twena nitubaasa kugumyana omu bi turikugamba yaaba turi bakuru nari bato.

11. Niki ekyahwereire Marthe obu yaabaire aine amaganya?

¹¹ Munyaanyazi-itwe orikwetwa Marthe akaba aine amaganya g’akaanya kakye. * (Reeba obugambo obw’ahansi.) Akahandiika ati: “Eizooba rimwe ku naaherize kushaba kubaasa kuhuumurizibwa, nkabugana omukazi Omukristaayo okuzire  owaanfiireho kandi akangirira embabazi, eki naabaire ninyetenga omu bwire obwo. Kandi akangambira ebyamuhikireho ebyabaire nibihikaana n’okugyezibwa kwangye, ekyo kyandeetera kumanya ngu tiinye nyenka ori omu mbeera egi.” Munyaanyazi-itwe naabaasa kuba ataramanyire oku ebigambo bye byahuumuriize Marthe!

12, 13. Nitubaasa kugyendera tuta aha buhabuzi oburi Abafilipi 2:1-4?

¹² Paulo akahandiikira Abakristaayo b’omuri Filipi ati: “Ku haraabe hariho okugumibwa omuri Kristo, nari okuhuumurizana okurikuruga omuri rukundo, nari okukwatanisa omu mwoyo, nari embabazi n’esaasi, muhikiirize okushemererwa kwangye ahabw’okugira omutima gumwe omu kukundana, nimwikirizana n’omutima gumwe. Mutarikora ekintu kyona ahabw’okurwanira orubaju nari okwekuza, kureka omu bucureezi omuntu weena asiime mugyenzi we okukira oku arikwesiima. Omuntu weena omuriimwe arekye kweta aha bye wenka, kureka ayete n’aha by’abandi.”​—Abafilipi 2:1-4.

¹³ Twena tushemereire kusherura emiringo y’okugumya abandi. Nitubaasa kugumya ab’eishe-emwe na banyaanyazi-itwe, ‘turikubahuumuriza omuri rukundo,’ “turikukwatanisa omu mwoyo,” kandi twine “embabazi n’esaasi.”

14. Omuringo gumwe ogw’okugumya abandi ni guuha?

¹⁴ Nikitureetera okushemererwa twahurira ngu abu twahwereire bakiri abeesigwa. Entumwa Yohaana akahandiika ati: “Tihariho ki ndikushemerererwa okukira eki, okuhurira  ngu abaana bangye nibagyendera omu mazima.” (3 Yohaana 4) Baapayoniya baingi nibashemererwa kumanya ngu omuntu ou bahwereire kwega amazima ira naakiheereza Yehova omu bwesigwa, obundi hati ni payoniya. N’ahabw’ekyo baapayoniya baaba bahwairemu amaani, nitubaasa kubaijutsya ebirungi byona ebi baakoreire abandi.

15. Nitubaasa kukora ki kugaruramu amaani abarikuheereza Yehova omu bwesigwa?

¹⁵ Abareeberezi baingi abarikutaayaayira ebibiina nibagira ngu bo n’abakazi baabo nikibagumya ab’eishe-emwe b’ekibiina eki baherize kutaayaayira baabahandiikira obutumwa bw’okubeebaza. Nikyo kimwe n’abareeberezi, abamiisani, baapayoniya, n’Ababeseeli, abarikuheereza Yehova omu bwesigwa. Twabeebaza, ekyo nikibaasa kubagumya kukira oku turikuteekateeka.

16. Ni kintu ki ekyorobi eki orikubaasa kukora kuhuumuriza omuntu?

¹⁶ Mbwenu shi ku kyakuba kitarikukukworobera kugamba n’abandi? Buzima, tikigumire munonga kugumya abandi. Teeraho kumwenyera omuntu. Yaaba atakumwenyeire, noobaasa kushanga ngu aine oburemeezi kandi naayenda ou araabugambire. Noobaasa kumuhuumuriza orikumuhurikiza kyonka.​—Yakobo 1:19.

17. Niki ekyahuumuriize ow’eishe-emwe omwe omuto?

¹⁷ Ow’eishe-emwe muto orikwetwa Henri akaguubwa kubi abanyabuzaare be baingi ku baarekyeire aho kuheereza Yehova. Omwe aharibo akaba ari ishe, owaabaire ari omureeberezi. Omureeberezi orikutaayaayira ebibiina akareeba Henri agwirwe kubi  reero yaamutwara aheeru kunywa kaawa. Omureeberezi ogwo akahurikiza gye Henri arikugamba enyehurira ze. Henri akeetegyereza ngu omuringo gumwe ogw’okuhwera eka ye kugaruka omu mazima, n’okuguma ari omwesigwa. Kandi akahuumurizibwa ku yaashomire ebiri omu Zaaburi 46, Zefania 3:17, na Mako 10:29, 30.

18. (a) Omugabe Sulemaani akahandiika ki aha bikwatiraine n’okugumya? (b) Entumwa Paulo akaha buhabuzi ki?

¹⁸ Nitubaasa kwegyera ki aha byahikire ahari Marthe na Henri? Buri omwe ahariitwe naabaasa kugira ow’eishe-emwe nari munyaanyazi-itwe ou yaahuumuriza. Omugabe Sulemaani akahandiika ati: “Ekigambo ekigambiirwe omu bunaku bwakyo ka ni kirungi! Amaisho gashemuukire gashemeza omutima, n’enkuru nungi ziruhuura amagufa.” (Enfumu 15:23, 30) Noobaasa kuteekateeka aha muntu ou orikumanya ngu ahwairemu amaani nari agwirwe kubi? Noobaasa kumukorera ekintu kikye nk’okugira eki waamushomera omu Omunaara gw’Omurinzi nari aha mukura gwaitu. Kandi Paulo akatwegyesa ngu n’okweshongora hamwe ebyeshongoro by’Obukama nikibaasa kutureetera kwehurira gye. Akahandiika ati: “Mwegyesane, muhanane omu bwengye burungi bwona nimweshongorera Ruhanga zaaburi n’ebyeshongoro n’ebyevugo by’omwoyo, nimumuhimbisa omu mitima yaanyu.”​—Abakolosai 3:16; Ebyakozirwe 16:25.

19. Ahabw’enki juba nikiija kwetengyesa munonga ngu tugume nitugumyana, kandi twine kukora ki?

¹⁹ Obu ekiro kya Yehova kiri haihi kuhika, nikiija kwetengyesa munonga ngu tugume nitugumyana. (Abaheburaayo 10:25) Nitwija kushemererwa twagyendera aha buhabuzi bwa Paulo obu: “Mugumyane, kandi mwombekane, nk’oku murikukora.”​—1 Abatesalonika 5:11.