Oku nikwo twabaire nituteekateeka kurugiirira aha biri omu Abaheburaayo 12:16. Aharikugira ngu Esau akaba ‘atarikweta aha bya Ruhanga’ kandi akaguza Yakobo ‘obuhunguzi bwe bw’omujigaijo akaihuro k’eby’okurya.’ N’ahabw’ekyo tukaba nituteekateeka ngu, obu Yakobo yaatunga ‘obuhunguzi bw’omujigaijo,’ kikaba nikitwariramu okuba ishenkuru Mesia.​—Matayo 1:2, 16; Luka 3:23, 34.

Kwonka, okwongyera kucondooza aha by’omu Baibuli nibituhwera kumanya ngu omuntu akaba ataine kuba omujigaijo kubaasa kuba ishenkuru Mesia. Ka tureebe bimwe aha byahandiikirwe ebi:

Omujigaijo wa Yakobo ou Lea yaazaire ni Reubeeni, kandi omujigaijo wa Yakobo na Rakeeli ni Yosefu. Reubeeni ku yaashambaine, akaihwaho obukuru bw’omujigaijo, bwaheebwa Yosefu. (Okutandika 29:31-35; 30:22-25; 35:22-26; 49:22-26; 1 Obusingye 5:1, 2) Kwonka Mesia tararugire mu runyiriri rwa Reubeeni nari Yosefu. Akaruga omu runyiriri rwa Yuda mutabani wa Yakobo na Lea owa kana.​—Okutandika 49:10.

Omuri Luka 3:32 nihooreka baishenkuru Mesia abandi bataano, kandi nooshusha oti boona n’emijigaijo. Nk’eky’okureeberaho, Boazi akaba ari ishe Obedi, kandi Obedi akaba ari ishe Yese.​—Ruusi 4:17, 20-22; 1 Obusingye 2:10-12.

Daudi akaba atari mujigaijo wa Yese. Niwe yaabaire naahererukayo ahari batabani ba Yese munaana. Kwonka Mesia akaruga omu runyiriri rwa Daudi. (1 Samueli 16:10, 11; 17:12; Matayo 1:5, 6) Kandi, ishenkuru Mesia owaakuratsireho ni Sulemaani, nawe akaba atari mujigaijo wa Daudi.​—2 Samueli 3:2-5.

 Eki tikirikumanyisa ngu okuba omwojo w’omujigaijo kikaba kitari kikuru. Omwojo omujigaijo akaba atunga obujunaanizibwa obwabaire butarikutungwa aboojo abandi. Kaingi omwojo omujigaijo niwe yaabaire ayebembera eka ya ishe, yaaheza kufa, kandi akaba aheebwa emigabo ebiri y’obuhunguzi.​—Okutandika 43:33; Eky’Ebiragiro 21:17; Yoshua 17:1.

Kwonka obuhunguzi bw’omujigaijo bukaba nibubaasa kuheebwa ondiijo mwojo. Obu Abrahamu yaayohereza Ishimaeli kuruga omu ka, obuhunguzi bwe nk’omujigaijo bukaheebwa Isaaka. (Okutandika 21:14-21; 22:2) Kandi nk’oku twareeba, obuhunguzi bwa Reubeeni nk’omujigaijo bukaheebwa Yosefu.

Mbwenu shi, entumwa Paulo akaba naashoboorora nshonga ki nkuru omu Abaheburaayo 12:16? Nihagira hati: “Hatabaho omushambani weena, nari otarikweta aha bya Ruhanga nka Esau owaagurize obuhunguzi bwe bw’omujigaijo akaihuro k’eby’okurya.”

Paulo akaba atarikugamba ahari baishenkuru Mesia. Beitu akaba naarabura Abakristaayo. Akabagira ati: “Mucwere ebigyere byanyu emihanda eshororokire” kugira ngu “hatagira omuntu owaagwa akaruga omu mbabazi za Ruhanga.” Eky’obusaasi, eki kiba nikibaasa kubaho omuntu yaikiriza kugwa omu bushambani. (Abaheburaayo 12:12-16) Omu muringo ogu, babaka nibaija kushushana nka Esau, owaabaire ‘atarikweta aha bya Ruhanga,’ beitu owaayenzire kwigutsya ekyetengo kye.

Obumwe Esau aine kuba yaabaire naahayo ebitambo ahari Yehova nk’oku omucwe gw’obwire obwo gwabaire guri. (Okutandika 8:20, 21; 12:7, 8; Yobu 1:4, 5) Kwonka Esau akaba ataire omutima aha byetengo bye kandi kikamurugiramu okuguza obuhunguzi bwe ahabw’akaihuro k’eby’okurya. Obundi Esau akaba naayenda kwetantara okubonabona oku Yehova yaagizire ngu abaijukuru ba Abrahamu nibaija kuhikwaho. (Okutandika 15:13) Kandi akooreka ngu tarikweta aha bya Ruhanga obu yaashwera abakazi babiri b’abanyamahanga, ekintu ekyareeteire abazaire be obusaasi bwingi. (Okutandika 26:34, 35) Kwonka Yakobo taratwarize atyo, akahamya ngu yaataha omu bushwere n’omuheereza wa Yehova!​—Okutandika 28:6, 7; 29:10-12, 18.

Ebyahandiikirwe ebi twashwijuma nibitwegyesa ki ahari baishenkuru Mesia? Bamwe aharibo bakaba bari emijigaijo, kandi abandi bakaba batari mijigaijo. Eki Abayudaaya bakaba nibakimanya kandi barikukiikiriza. Eki nitukimanya tuta? Ahakuba bakagira ngu Kristo akaba naija kuba mwijukuru wa Daudi, mutabani wa Yese bucura.​—Matayo 22:42.