1. Ahabw’enki turikubaasa kugira ngu buri kimwe n’ekya Yehova? (Reeba ekishushani aha kutandika.)

BURI kimwe n’ekya Yehova! “Eiguru, n’eiguru eriri ahaiguru y’agandi, n’ensi n’ebirimu byona” n’ebye. (Eky’Ebiragiro 10:14; Okushuuruurwa 4:11) Ahabw’okugira ngu Yehova niwe yaahangire abantu, twena turi abe. (Zaaburi 100:3) Kwonka omu bantu boona abaarabaireho, Ruhanga atoorainemu bamwe kuba abe omu muringo gw’omutaano.

2. Kurugiirira ahari Baibuli, ni baahi abu Yehova yaatooraine kuba abe omu muringo gw’omutaano?

² Nk’eky’okureeberaho, omu Zaaburi 135 Abaisraeli abaayesigire Yehova nibagambwaho “okuba abe wenka” nari okuba ab’omuhendo ahariwe. (Zaaburi 135:4) Kandi nabi Hosea akaranga ngu bamwe abatari Baisraeli bakaba nibaija kuba abaheereza be. (Hosea 2:23) Obunabi obu bukahikiirira obu Yehova yaatandika kutoorana abantu abatari Baisraeli  kutegyeka na Kristo omu iguru. (Ebyakozirwe 10:45; Abarooma 9:23-26) Abo abashukirweho omwoyo gurikwera ‘n’eihanga eririkwera.’ Nari abantu abu Yehova “yaayetooraniire.” (1 Petero 2:9, 10) Kandi shi Abakristaayo ab’obunaku obu abeesigwa abaine amatsiko g’okutuura omu nsi ebiro byona? Nabo Yehova naabeeta “abantu bangye” kandi “abatoorainwe bangye.”​—Isaaya 65:22.

3. (a) Ni baahi abaine omukago gw’omutaano na Yehova obunaku obu? (b) Omu kicweka eki nituza kushwijuma ki?

³ Obunaku obu, “obusyo obukye,” n’abaine amatsiko g’okutuura omu iguru ebiro byona, kandi ‘ab’entaama ezindi’ n’abaine amatsiko g’okutuura omu nsi ebiro byona, bombi nibaramya Yehova “nk’obusyo bumwe.” (Luka 12:32; Yohaana 10:16) Nitwenda kworeka Yehova ngu nitusiima omukago gw’omutaano ogu twine nawe. Omu kicweka eki, nituza kureeba oku turikubaasa kworeka ngu nitusiima omugisha ogu ogw’omutaano.

4. Nitubaasa kwebaza tuta Yehova ahabw’okutwikiriza kugira omukago murungi nawe, kandi Yesu akakyoreka ata?

⁴ Nitworeka okusiima kwaitu turikwehayo kuheereza Yehova kandi tukabatizibwa. Eki nikyoreka boona butunu ngu turi aba Yehova, kandi tweteekateekire kumworobera. (Abaheburaayo 12:9) Eki nikyo Yesu yaakozire obu yaabatizibwa. N’obu araabe yaazaariirwe omu ihanga eritoorainwe, kwonka nabwo akeehayo ahari Yehova. Akaba naashusha nk’orikugira Ruhanga ati: “Ninshemerererwa okukora ebi okunda.”​—Zaaburi 40:7, 8.

5, 6. (a) Obu Yesu yaabatizibwa, Yehova akagamba ki? (b) Ha eky’okureeberaho kutuhwera kwetegyereza oku Yehova arikwehurira ku turikwehayo ahariwe?

⁵ Yehova akeehurira ata obu Yesu yaabatizibwa? Baibuli neegira eti: ‘Yesu ku yaaherize kubatizibwa, yaaruga ati omu maizi, reeba, eiguru ryakinguuka, yaareeba Omwoyo gurikwera nigumushuumaho nk’enkombe, yaahurira eiraka niriruga omu iguru, nirigira riti: Ogu n’Omwana wangye ou nkunda, kandi ou nshemerererwa munonga.’ (Matayo 3:16, 17) Yesu akaba ari owa Yehova. Kwonka Yehova akashemererwa ahabw’okureeba Yesu arikucwamu kumuheereza ayekundiire. Buzima naitwe twayehayo ahari Yehova nikimushemeza, kandi naija kutuha emigisha.​—Zaaburi 149:4.

⁶ Yehova aine buri kimwe! Mbwenu shi niki eki turikubaasa kumuha? Teekateeka aha mushaija oine omusiri gw’ebimuri birungi. Eizooba rimwe omwishiki we omuto acwa ekimuri omu musiri ogwo reero akimuha nk’ekiconco. Ishe w’omwana ogu naashemererwa n’obu araabe yaaheebwa kimwe aha bimuri bye. Eki nikyoreka ngu omuhara naamukunda. Kandi ekimuri eki yaaheebwa omuhara nikiija kuba eky’omuhendo ahariwe okukira ebimuri ebindi byona eby’omu musiri. Omu muringo nigwo gumwe, Yehova naashemererwa ku turikwehayo ahariwe kumuheereza twekundiire.​—Okuruga 34:14.

7. Nabi Malaki naashoboorora ata oku Yehova arikutwara abo abarikumuheereza beekundiire?

⁷ Shoma Malaki 3:16. Ahabw’enki kiri  kikuru okwehayo ahari Yehova okabatizibwa? N’amazima kuruga obu waazaarwa otwire ori owa Yehova Omuhangi waawe. Kwonka teekateeka oku Yehova arikushemererwa waamutoorana kuba Omutegyeki waawe, kandi okeehayo ahariwe. (Enfumu 23:15) Yehova naamanya abo abarikumuheereza beekundiire, kandi amaziina gaabo naagahandiika omu ‘kitabo ky’okwijutsya.’

8, 9. Abu Yehova arikuhandiika omu ‘kitabo ky’okweijutsya’ baine kukora ki?

⁸ Waaba nooyenda eiziina ryawe kuguma omu ‘kitabo ky’okweijutsya’ haine eki oine kukora. Nabi Malaki naayoreka ngu twine kutiina Yehova, kandi tukateekateeka n’aha iziina rye. Twaramya omuntu nari ekintu ekindi kyona, Yehova naija kutwiha omu kitabo kye!​—Okuruga 32:33; Zaaburi 69:28.

⁹ N’ahabw’ekyo okuraganisa Yehova ngu nitwija kumuheereza, kandi tukabatizibwa tikirikumara. Ebyo n’ebintu ebi turikukora rimwe tukaheza, kwonka okuramya Yehova n’ekintu eki turikukora ebiro byona. Buri izooba, ebikorwa byaitu biine kworeka ngu nitworobera Yehova.​—1 Petero 4:1, 2.

10. Ni ntaaniso ki eri ahagati y’abarikuheereza Yehova n’abatarikumuheereza ei turikureeba butunu?

¹⁰ Omu kicweka ekihwaire, twegire ngu Kaini, Sulemaani n’Abaisraeli abandi bakaba nibateekateeka ngu nibaramya Yehova kwonka bakaba batamuhamiireho. Eby’okureeberaho ebi nibitwegyesa ngu tikirikumara okugamba bugamba ngu nituramya Yehova. Twine kwanga ekibi tukakunda ekirungi. (Abarooma 12:9) Yehova naagira ngu nihaija kubaho entaaniso ahagati ‘y’abahikiriire n’ababi, abarikukorera Ruhanga n’abatarikukorera Ruhanga.’​—Malaki 3:18.

11. Ahabw’enki kiri kikuru kworeka ngu nituramya Yehova wenka?

¹¹ Nikitushemeza munonga kureeba ngu Yehova akatutoorana kuba abaheereza be! Abantu baine kukireeba butunu ngu turi aha rubaju rwa Yehova. (Matayo 5:16; 1 Timoseo 4:15) Yebuuze oti: ‘Abandi nibakireeba ngu buzima ndi omwesigwa ahari Yehova? Nintiina kumanyisa abandi ngu ndi Omujurizi wa Yehova?’ Teekateeka aha ku Yehova arikwehurira waatiina kugambira abandi ngu ori omuheereza we.​—Zaaburi 119:46; shoma Mako 8:38.

12, 13. Ahabw’enki ab’eishe-emwe abamwe kigumire kubamanya nk’Abajurizi ba Yehova?

¹² Eky’obusaasi, Abajurizi ba Yehova abamwe nibatooreza ‘omwoyo gw’ensi.’ Ekirugiremu, tibaine ntaaniso n’abo abatarikuheereza Yehova. (1 Abakorinso 2:12) ‘Omwoyo gw’ensi’ nigureetera abantu kuta omutima aha byetengo byabo byonka. (Abaefeso 2:3) Nk’eky’okureeberaho, n’obu turikuheebwa obuhabuzi  oburikukwata aha kujwara gye, abamwe nibagumizamu kujwara kubi. Omu nteerane z’ekibiina nibajwara emyenda erikubakwata munonga nari erikureeberwamu. Nari nibacwamu kurengyesereza aha ku barikukora aha ishokye ryabo. (1 Timoseo 2:9, 10) N’ekirikurugamu, nikigumira abandi kumanya yaaba nabo n’Abajurizi ba Yehova nari ngaaha.​—Yakobo 4:4.

¹³ Hariho emitwarize endiijo, ei bamwe aha Bajurizi ba Yehova baine, erikworeka ngu nibatooreza ensi. Nk’eky’okureeberaho, baaba bari aha bugyenyi, abamwe nibazina kandi batwaza omu muringo gutari gw’Ekikristaayo. Kandi abandi nibata ebishushani byabo aha mikura, reero babihandiikaho ebirikworeka emiteekateekyere y’ensi. Nibabaasa kuba batakahanirwe omu kibiina Ekikristaayo ahabw’okukora ekibi ky’amaani, kwonka nibabaasa kuba ab’akabi aha b’eishe-emwe abandi abarikuteeraho kwetantara emitwarize y’ensi.​—Shoma 1 Petero 2:11, 12.

14. Twine kukora ki kubaasa kurinda gye omukago gwaitu na Yehova?

¹⁴ Buri kimwe ekiri omu nsi kikozirwe kutureetera kuta omutima aha “bi omubiri gwetenga, n’ebi amaisho geetenga, n’okwehimbisa” ahabw’ebi twine. (1 Yohaana 2:16) Kwonka itwe turi ab’omutaano ahakuba turi aba Yehova. Nitwetantara “okutatiina Ruhanga n’okwetenga eby’ensi,” kandi ‘nitugumaho omu busingye obu obwa hati, nitwerinda turi abahikiriire, abarikutiina Ruhanga.’ (Tito 2:12) Oku turikutwaza, oku turikurya, oku turikunywa, oku turikujwara, n’emirimo ei turikukora, bishemereire kworeka abandi butunu ngu turi aba Yehova.​—Shoma 1 Abakorinso 10:31, 32.

15. Ahabw’enki twine kutwariza ab’eishe-emwe omu muringo gw’embabazi na rukundo?

¹⁵ Nitworeka ngu omukago ogu twine na Yehova ni mukuru twatwariza gye ab’eishe-emwe bagyenzi baitu. Nabo Yehova naabakunda nk’oku arikutukunda. Twaijuka ekyo, nitwija kuguma nitubatwariza omu muringo gw’embabazi na rukundo. (1 Abatesalonika 5:15) Ahabw’enki eki kiri kikuru? Yesu akagambira abakuratsi be ati: “Ku muriguma nimukundana, nibwo abantu boona baribamanya ku muri abeegi bangye.”​—Yohaana 13:35.

16. Ebiragiro bya Musa nibyoreka bita ngu Yehova naakunda abaheereza be?

¹⁶ Eky’okureeberaho ekiri omu Biragiro bya Musa nikibaasa kutuhwera kumanya oku twine kutwariza abandi omu kibiina. Omu hekalu ya Yehova, hakaba harimu ebintu ebyabaire nibikoresibwa omu kuramya honka. Ebiragiro bikaba byoreka butunu oku Abaleevi baabaire baine kubireeberera, kandi owaabaire agomera obuhabuzi obu akaba aitwa. (Okubara 1:50, 51) Mbwenu shi, Yehova ku araabe yaabaire naafayo aha muringo ogu baabaire baine kureebereramu ebintu eby’okukoresa omu kuramya, noogira ngu tarikufayo aha ku abantu barikutwariza abaheereza be abeesigwa? Yehova naatumanyisa oku turi ab’omuhendo ahariwe arikugira ati: ‘Obakoraho aba akozire aha mboni y’eriisho ryangye.’​—Zekaria 2:8.

17. Ni bintu ki ebi Yehova arikutaho omutima?

¹⁷ Nabi Malaki akooreka ngu Yehova naata omutima aha ku turikutwarizana, ahakuba naatutega amatu ge kandi atuhurira. (Malaki 3:16) Yehova “naamanya abe.”  (2 Timoseo 2:19) Naamanya ebi turikukora n’ebi turikugamba. (Abaheburaayo 4:13) Twatwariza ow’eishe-emwe omu muringo ogutari gw’embabazi, Yehova naaba naakireeba. Kandi nitubaasa kuhamya ngu Yehova naareeba ebirungi ebi turikukora nk’okusaasira abandi, okubooreka obufura n’embabazi.​—Abaheburaayo 13:16; 1 Petero 4:8, 9.

18. Nitubaasa kworeka tuta ngu nitusiima Yehova ahabw’okututoorana kuba abantu be?

¹⁸ Nitwenda kworeka ngu nitusiima Yehova ahabw’okututoorana kuba abantu be. Nitumanya ngu obu twayehayo ahari Yehova, tukakora ekirikukirayo oburungi. N’obu turabe nitutuura “ahagati y’ab’obusingye obukiikami oburikwehabagiza,” nitubaasa kuguma tutaine “ky’okuhanwa nari oburyarya” kandi nitwaka “nk’etabaaza omu nsi.” (Abafilipi 2:15) N’ahabw’ekyo nitumariirira kwetantara kukora ekintu kyona eki Yehova arikwanga. (Yakobo 4:7) Nitukunda ab’eishe-emwe kandi tubaha ekitiinisa ahakuba nabo n’aba Yehova.​—Abarooma 12:10.

19. Yehova naasiima ata abo abarikumukunda?

¹⁹ Baibuli neeraganisa eti: Yehova tarikwija kutsigaho “abantu be.” (Zaaburi 94:14) Kandi tikirimu kubangaanisa kwona. N’obu haakubaho ki, Yehova naija kutuhwera. N’obu twakufa, tarikwija kutwebwa. (Abarooma 8:38, 39) “Ku tubaho, tubaho ahabwa” Yehova “kandi ku tufa, tufa ahabwa” Yehova. “N’ahabw’ekyo, yaaba twabaho, yaaba twafa, turi aba” Yehova. (Abarooma 14:8) Tutegyereize obwire obu Yehova araije kuzoora abaheereza be boona abeesigwa abaafiire. (Matayo 22:32) Kandi na hati emigisha mingi ey’omuhendo ei Tataitwe Yehova atuhaire neetureetera okushemererwa. Nk’oku Baibuli erikugira, eihanga eri Yehova ari Ruhanga waaryo, riine omugisha, nibo bantu abu yaatooraine kuba obuhunguzi bwe.​—Zaaburi 33:12.