1. Ni buremeezi ki obumwe obu twine kugumisiriza, kwonka ahabw’enki Yehova naasiima abaheereza be abeesigwa? (Reeba ekishushani aha kutandika.)

EMBEERA obunaku obu zigumire munonga. Nk’eky’okureeberaho, baingi aha b’eishe-emwe na banyaanyazi-itwe barwaire endwara z’amaani. Abamwe abakuzire nibareeberera abanyabuzaare baabo abakaikwire. Kandi abandi nikibagumira kubaisaho amaka gaabo. Kandi nitumanya ngu baingi omuriimwe nimubaasa kuba nimuteganisibwa bumwe aha buremeezi obu nari bwona. Eki nikitwara obwire bwingi, amaani maingi, n’esente nyingi. Kwonka mugire obuhame ngu Yehova naija kubahwera. Nimumanya ngu embeera niziija kuba nungi ahabw’okuba ekyo nikyo Yehova arikuraganisa. Okwikiriza kwanyu buzima kwine kuba nikushemeza Yehova!

2. Ebiri omuri Isaaya 40:29 nibituhiga bita, kwonka abamwe nibakora nshobe ki?

² Kwonka shi obumwe nooreeba ngu oburemeezi obu oine bugumire munonga kubwemera? Ku oraabe nooyehurira otyo, tori wenka. Bamwe aha baheereza ba Ruhanga aba ira nabo  bakeehurira batyo. (1 Abagabe 19:4; Yobu 7:7) Niki ekyabahwereire kugumisiriza? Bakeesiga Yehova kubaha amaani. Baibuli neegira ngu Ruhanga naaha “amaani” abaruhire. (Isaaya 40:29) Kwonka eky’obusaasi, bamwe aha baheereza ba Ruhanga nibateekateeka ngu omuringo murungi gw’okwemera oburemeezi obu baine n’okubanza baarekyera aho kuheereza Yehova. Nibateekateeka ngu okuheereza Yehova n’omugugu omu mwanya gw’okuba omugisha. N’ahabw’ekyo nibarekyera aho kushoma Baibuli, kuza omu nteerane, n’okubuurira. Eki nikyo kyenyine eki Sitaane arikuba naayenda ngu bakore.

3. (a) Nitubaasa kuremesa tuta Sitaane kutumaramu amaani? (b) Nituza kushwijuma ki omu kicweka eki?

³ Omuregi tarikwenda ngu tugire amaani g’okugumisiriza. Kandi naamanya ngu nitugira amaani twaba nitwejumbira kimwe omu kuheereza Yehova. N’ahabw’ekyo, waaba noohurira ngu oruhire omu mubiri n’omu nyehurira, otaza hare na Yehova. Yeyongyere kwirira haihi nawe. Baibuli neegira ngu naija ‘kukugumya, akuhe amaani.’ (1 Petero 5:10; Yakobo 4:8) Omu kicweka eki, nituza kwega aha biri omuri Isaaya 40:26-31, aharikworeka ngu Yehova aine obushoboorozi bw’okutuha amaani. Bwanyima nitwija kugamba aha mbeera ibiri ezirikubaasa kutureetera kukora bikye omu kuheereza Yehova, n’oku okugyendera aha misingye ya Baibuli kirikutuhwera kugumisiriza.

4. Nitubaasa kwega ki omuri Isaaya 40:26?

⁴ Shoma Isaaya 40:26. Tihaine n’omwe orabaasize kubara enyonyoozi zoona eziri ahaiguru. Abanyasaayansi nibaikiriza ngu ekizinga kimwe nikibaasa kuba kirimu enyonyoozi ezirikuhika obuhumbi 400. Kwonka buri nyonyoozi Yehova akagiha eiziina. Eki nikitwegyesa ki ahari Yehova? Ku araabe naafayo aha nyonyoozi ezitaine magara, iwe ashemereire kuba naakufaho munonga! Noomuheereza, ti ahabw’okugira ngu noogyemwa kukikora, beitu ahabw’okugira ngu noomukunda. (Zaaburi 19:1, 3, 14) Yehova Tataitwe naamanya buri kimwe ekirikukukwataho. Baibuli neegira ngu “nangwa n’eishokye ery’aha” mutwe gwawe naamanya omubaro gwaryo. (Matayo 10:30) Yehova naamanya ebi abaheereza be barikurabamu. (Zaaburi 37:18) N’ahabw’ekyo, Yehova naareeba oburemeezi bwawe bwona, kandi naabaasa kukuha amaani g’okugumisiriza buri buremeezi okwabo.

5. Ahabw’enki nituhamya ngu Yehova naabaasa kutuha amaani?

⁵ Shoma Isaaya 40:28. Yehova niwe Bukomooko bw’amaani goona. Teekateeka aha ky’okureeberaho ky’amaani agu arikuha eizooba. Orikuhandiika aha bya saayansi orikwetwa David Bodanis akagira ngu buri katikitiki eizooba nirishohoza amaani maingi agarikwingana n’ag’obuhumbi bwingi bwa bomu. Omucondooza ondiijo akabara yaareeba ngu amaani agu eizooba ririkushohoza omu katikitiki kamwe nigabaasa kubaisaho abantu omu nsi yoona kumara emyaka 200,000! Buzima, Yehova orikuha eizooba amaani, naabaasa kutuha amaani agu turikwetenga kugumisiriza oburemeezi bwaitu.

6. Omugamba gwa Yesu tiguremeire mu muringo ki, kandi eki nikitukwataho kita?

 ⁶ Shoma Isaaya 40:29. Okuheereza Yehova nikutureetera okushemererwa kwingi. Yesu akagambira abeegi be ati: “Mwekorere omugamba gwangye.” Kandi akoongyeraho ngu nimwija kutunga “okuhuumura omu mitima yaanyu, ahakuba omugamba gwangye tigurikuremeera.” (Matayo 11:28-30) Eki buzima kihikire! Obumwe, nituhurira turuhire twaba nituruga omuka kuza omu nteerane nari kuza kubuurira. Kwonka nitwehurira tuta twaba nitugaruka omuka? Nituhurira turuhuukire kandi turi gye tweteekateekire kwemera oburemeezi bwaitu. Buzima, omugamba gwa Yesu, tiguremeire.

7. Ha eby’okureeberaho kworeka ngu ebiri omuri Matayo 11:28-30 bihikire.

⁷ Teekateeka aha mbeera y’omwe ahari banyaanyazi-itwe. Arwaire endwara y’oburuhe oburengyesereize, amaganya, n’okuteerwa omutwe gw’amaani. Obume nikimugumira kuza omu nteerane. Kwonka, eizooba rimwe bwanyima y’okuteeraho n’amaani akaza omu ruteerane, akahandiika ati: “Orubazo rwaba nirugamba aha kuhwamu amaani. Rwaheebwa omu muringo gw’embabazi n’okufayo ekyo kyandeetera kurira. Eki kyanyijutsya ngu omu nteerane niho nshemereire kuba ndi.” Akashemererwa munonga ahabw’okugira ngu akateeraho munonga kuza omu ruteerane!

8, 9. Entumwa Paulo akaba naamanyisa ki obu yaagira ngu “ku mba omweremwa, nibwo ngira amaani”?

⁸ Shoma Isaaya 40:30. Nitubaasa kuba twine emyoga mingi, kwonka oshangye ngu amaani gaitu makye nigaturemesa kugira eki twakora. Eri n’eishomo eri twine kwega. Entumwa Paulo akabaasa kukora ebintu bingi, kwonka akaba atarikubaasa kukora buri kimwe eki yaabaire naayenda. Ku yaagambiire Yehova oku yaabaire naayehurira, Yehova akamugira ati: “Amaani gangye gahikiirizibwa omu bweremwa.” Paulo akeetegyereza eki Yehova yaamugambiire. Niyo nshonga ahabw’enki Paulo yaagizire ati: “Ku mba omweremwa, nibwo ngira amaani.” (2 Abakorinso 12:7-10) Akaba naamanyisa ki?

⁹ Paulo akeetegyereza ngu aine obugarukiro omu bi arikubaasa kukora ahabwe. Akaba naayetenga obuhwezi kuruga aha ari ogwo orikumukiza amaani. Omwoyo gwa Ruhanga gukaba nigubaasa kuha Paulo amaani yaaba omweremwa. Kandi gukaba nigubaasa kukora ekirikukira ahari ekyo. Gukaba nigubaasa kuha Paulo amaani g’okukora ebintu ebi yaabaire atarikubaasa kukora ahabw’amaani ge. Naitwe eki nikibaasa kutubaho. Yehova yaatuha omwoyo gwe gurikwera, buzima nitugira amaani!

10. Yehova akahwera ata Daudi kugumisiriza oburemeezi bwe?

¹⁰ Omuhandiiki wa Zaaburi Daudi obwire obwingi omwoyo gwa Ruhanga gukaba gumuha amaani. Akeeshongora ati: “Ahabwawe nimbaasa kurwanisa omutwe gw’engabo, ahabw’okuhwerwa Ruhanga wangye nimbaasa kuguruka orugo.” (Zaaburi 18:29) Obumwe oburemeezi bwaitu nibuba buri buhango tutarikubaasa kubushoboorora ahabwaitu, nk’ekisiika kiraingwa eki tutarikubaasa kutemba ahabwaitu. Nituba nitwetenga obuhwezi bwa Yehova.

11. Omwoyo gurikwera nigutuhwera guta kugumisiriza oburemeezi?

¹¹ Shoma Isaaya 40:31. Empungu tizirikuguma omu mwanya ahabw’amaani gaazo. Amaani g’omwoya ogurikutagata nigaimutsya empungu etumbeera omu bicu. Eki nikibaasisa empungu kuguruka ekagyenda  omwanya muraingwa etarikukoresa amaani maingi. N’ahabw’ekyo waaba oine oburemeezi bw’amaani, teekateeka aha mpungu. Yeshengyereze Yehova kukwongyera amaani arikukoresa “omuhwezi, omwoyo” gurikwera. (Yohaana 14:26) Nitubaasa kushaba Yehova kutuha omwoyo gurikwera obwire bwona, eshaaha 24 omu izooba. Nitubaasa kwetenga kushaba Yehova kutuhwera twaba twine obutaikirizana n’ow’eishe-emwe nari munyaanyazi-itwe omu kibiina. Kwonka shi ahabw’enki obutaikirizana nk’obwo nibubaho?

12, 13. (a) Ahabw’enki obumwe Abakristaayo nibagira obutaikirizana? (b) Ebyahikire ahari Yosefu nibitwegyesa ki ahari Yehova?

¹² Obutaikirizana nibubaho ahabw’okugira ngu turi abatahikiriire. Obumwe, ebi abandi barikugamba nari barikukora nibibaasa kutugwisa kubi, kandi naitwe nitubaasa kubagwisa kubi. Eki nikibaasa kuba ekigyezo kigumire. Kwonka eki nikituha omugisha gw’okuhamira ahari Yehova. Mu muringo ki? Turikwega kukorera hamwe tukwataniise n’ab’eishe-emwe na banyaanyazi-itwe. Yehova naabakunda n’obu baraabe batahikiriire, mbwenu naitwe twine kubakunda.

¹³ Yehova tarikuzibira ebigyezo kuhika aha baheereza be. Eki nitukyegyera aha byahikire ahari Yosefu. Obu Yosefu yaabaire ari omutsigazi, beene-ishe bakamugirira eihari. Bakamuguza nk’omuhuuku, reero yaatwarwa Misri. (Okutandika 37:28) Yehova akareeba byona ebyabaireho kandi buzima kikamushaasha kureeba munywani we, kandi omuheereza we omwesigwa Yosefu naatwarizibwa kubi. Kwonka nabwo, Yehova tarazibiire ebintu ebyo byona kumuhikaho. Bwanyima, Yosefu ku bamubeehereire ngu akateeraho kuhamba muka Potifaari reero bakamuta omu kihome, Yehova nabwo taramucungwire. Kwonka shi Ruhanga akatsigaho Yosefu? Ngaaha. Baibuli neegira ngu Yehova ‘akaba ari hamwe nawe, kandi ebi yaabaire akora byona, akaba abiha omugisha.’​—Okutandika 39:21-23.

14. Nitugasirwa tuta twayetantara ekiniga?

¹⁴ Eky’okureeberaho ekindi ni Daudi. Abantu baingi tibakatwarizibwaga kubi nka Daudi. Kwonka nabwo, Daudi taraikiriize kugira ekiniga kingi. Akahandiika ati: ‘Reka kuguubwa kubi, ruga omu kiniga; oteemereza omutima; ahakuba ekirugamu n’okukora ekibi.’  (Zaaburi 37:8) Enshonga nkuru erikutureetera kureka kuguubwa kubi nari kugira ekiniga, n’ahabw’okugira ngu nituba nitwenda kutooreza Yehova. We “tatugira nk’ebibi byaitu oku biri” kureka naatusaasira. (Zaaburi 103:10) Hariho n’emigasho endiijo ahabw’enki twine kwetantara ekiniga. Nk’eky’okureeberaho, ekiniga nikibaasa kureetera omutima kwehuuba n’okwitsya kubi. Ekiniga nikibaasa kushiisha ekine n’ekikuruma, n’eby’okurya kutakorwaho gye omunda. Kandi twaba twine ekiniga, titurikubaasa kuteekateeka gye. Nitubaasa kugamba nari kukora ebintu ebirikusaasa abandi, kandi eki nikibaasa kutureetera amaganya kumara obwire buraingwa. Nikiba kiri kirungi kuguma twikaikaine. Baibuli neegira eti: “Omutima ogutuurize gureetera omubiri amagara.” (Enfumu 14:30) Mbwenu shi, nitubaasa kukora ki abandi baatukora kubi, kandi nitubaasa kugaruraho tuta obusingye n’abandi? Nitubaasa kugyendera aha buhabuzi bwa Baibuli obw’obwengye.

15, 16. Nitubaasa kukora ki omuntu yaatukora kubi?

¹⁵ Shoma Abaefeso 4:26. Tikirikututangaaza abantu abatarikuheereza Yehova baatutwariza kubi. Kwonka Omukristaayo nari ow’omu ka yaitu yaakora ekintu kikatugwisa kubi, nitugira obusaasi bwingi. Kandi shi ku twakuba tutarikubaasa kwebwa ekyabaireho? Nitwija kwikiriza tugume n’ekiniga obundi kumara emyaka mingi? Nari nitwija kukuratira obuhabuzi bwa Baibuli obw’obwengye tutereeze enshonga ahonaaho? Twatwara obwire bwingi tutakagambire n’ogwo ou twine nawe obutaikirizana, nikyongyera kutugumira kugaruraho obusingye.

¹⁶ Mbwenu shi ku waakuba nooreeba ngu ow’eishe-emwe akushobeize, kandi torikubaasa kwezibira kukiteekateekaho? Noobaasa kukora ki kugaruraho obusingye? Eky’okubanza, shaba Yehova. Mweshengyereze kukuhwera kugaaniira gye n’ow’eishe-emwe ogwo. Ijuka ngu ow’eishe-emwe ogwo nawe ni munywani wa Yehova. (Zaaburi 25:14) Yehova naamukunda. Yehova naatwariza banywani be omu muringo gw’embabazi, kandi naayenda ngu naitwe tukore tutyo. (Enfumu 15:23; Matayo 7:12; Abakolosai 4:6) Ekya kabiri, teekateeka n’obwegyendesereza aha bi orikuza kugambira ow’eishe-emwe ogwo. Otakaateekateeka ngu akaba naayenda kukugwisa kubi. Obundi ekaba eri enshobe nari okeetegyereza kubi ekyabaireho. Ba oyeteekateekire kwikiriza ngu naiwe haine eki waakozire kureetaho oburemeezi obwo. Noobaasa kutandika kugaaniira n’ow’eishe-emwe ogwo orikugira oti: “Obundi ndahukire kuguubwa kubi, kwonka nyomwabazyo obu ogambire naanye, mpuriire . . .” Okugaaniira okwo kwaba kutakuhwereire kugaruraho obusingye n’ow’eishe-emwe mugyenzi waawe, guma nooteeraho. Shabira ow’eishe-emwe ogwo. Shaba Yehova kumuha omugisha n’okukuhwera kuta omutima aha mitwarize ye mirungi. Obwo noobaasa kuhamya ngu Yehova naija kusiima okuteeraho kwawe okurikuruga aha mutima kugaruraho obusingye n’ow’eishe-emwe mugyenzi waawe, kandi omwe ahari banywani ba Ruhanga.

17. Yehova naatuhwera ata kugaruraho omukago gwaitu nawe twaba tukozire ekibi, kandi ahabw’enki twine kwikiriza obuhwezi obwo?

¹⁷ Abamwe nibeehurira ngu tibashemereire kuheereza Yehova ahabw’ebibi by’amaani ebi baakozire. Okweshinja nikubaasa kumaraho obusingye, okushemererwa, nikumaramu  n’amaani. Omugabe Daudi akaba naateganisibwa okweshinja reero yaagira ati: “Ku naayangire kwatura ekibi kyangye, naahwa aha magufa ahabw’okurenzya eizooba nintsinda. Ahabw’okuba omukono gwawe gukaba gumpingamira nyomushana na nyekiro.” Ekirungi, Daudi akagira obumanzi bw’okukora eki Yehova arikwenda ngu abaheereza be bakore. Akahandiika ati: “Nkakugambira ekibi kyangye,” kandi, “naiwe nikwo kunsaasira orubanja rw’ekibi kyangye.” (Zaaburi 32:3-5) Ku oraabe okozire ekibi ky’amaani, Yehova ayeteekateekire kukusaasira. Naayenda kukuhwera kugaruraho omukago gwawe nawe. Kwonka oine kwikiriza obuhwezi kuruga aha bareeberezi. (Enfumu 24:16; Yakobo 5:13-15) Mbwenu oteeziringa, ahakuba okutunga amagara agatahwaho nikwegamira aha kukora eki. Kwonka shi ku waakuba nookyeshinja ahabw’ekibi eki waasaasiirwe kare. Nooba oine kukora ki?

18. Eky’okureeberaho kya Paulo nikibaasa kuhwera kita abarikuhurira ngu tibarikusiimwa Yehova?

¹⁸ Hariho obu entumwa Paulo yaabaire ahwairemu amaani ahabw’ebibi ebi yaabaire akozire enyima. Akagira ati: “Ndi muto aha ntumwa ezindi, otashemereire kwetwa ntumwa, ahabw’okuba” nkahiiganisa ekibiina kya Ruhanga. Kwonka nabwo Paulo akongyeraho ati: ‘Kwonka ahabw’embabazi za Ruhanga ndi nk’oku ndi.’ (1 Abakorinso 15:9, 10) Yehova akaba naamanya ngu Paulo tahikiriire. Kwonka akaikiriza Paulo nk’oku yaabaire ari, kandi akaba naayenda ngu Paulo ekyo akimanye. Waaba noohurira kubi ahabw’ekibi eki waakozire kandi okagambira Yehova enshonga egyo, n’abareeberezi kyaba nikyetengyesa, Yehova buzima naija kukusaasira. Gira okwikiriza ngu Yehova akusaasiire, kandi ikiriza okusaasirwa kwe!​—Isaaya 55:6, 7.

19. Ekyahandiikirwe ky’omwaka 2018 nikiiha, kandi ahabw’enki nikyetengwa?

¹⁹ Twaguma nitweyongyera kuhika haihi n’emperu y’obusingye obu, twine amatsiko ngu oburemeezi nibwija kweyongyera. Kwonka tushemereire kwijuka ngu Yehova naaha omuntu oruhire “amaani kandi n’otarikwebaasa, amwongyeraho amaani.” N’ahabw’ekyo naabaasa kukuha buri kimwe eki orikwetenga kubaasa kugumizamu noomuheereza omu bwesigwa. (Isaaya 40:29; Zaaburi 55:22; 68:19) Omu mwaka 2018, nitwija kuguma nitwijukibwa amazima aga buri murundi ogu turaaze omu ruteerane aha Kyombeko ky’Obukama tukareeba ebigambo by’ekyahandiikirwe kyaitu ky’omwaka ebi: ‘Abaine amatsiko omuri Yehova nibaija kugarukwamu amaani.’​—Isaaya 40:31.