Ku turikweyongyera kumanya emitwarize y’omuntu, nitweyongyera kumwetegyereza kandi twongyera kumunywana. Nikyo kimwe, twayongyera kumanya emitwarize ya Yehova nitwongyera kumwetegyereza gye, reero tuhamya omukago gwaitu nawe. Emitwarize ena emikuru eya Ruhanga n’amaani, obwengye, oburingaaniza, na rukundo.

“Ai Mukama Ruhanga, niiwe waahangiise eiguru n’ensi obushoboorozi bwawe n’omukono gwawe ogugoroire.”​—YEREMIA 32:17.

Ebihangirwe nibyoreka amaani ga Ruhanga. Nk’eky’okureeberaho, ku orikwemerera aheeru omu mushana, niki eki orikuhurira aha mubiri gwawe? Noohurira obutagatsi bw’omushana. Eki orikuhuurira aha mubiri gwawe, n’amaani g’eizooba eri Yehova yaahangire. Eizooba riine amaani garikwingana ki? Nikiteeberezibwa ngu eizooba nirishohoza amaani g’obutagatsi oburikwingaana 27,000,000 Fahrenheit nari 15,000,000°C. Buri katikitiki, amaani agarikuruga aha izooba nigaingana na bomu z’amaani maingi.

Kwonka eizooba ni rikye waarigyeragyeranisa n’obukaikuru bw’enyonyoozi ezindi eziri ahaiguru. Abanyasaayansi nibagira ngu enyonyoozi emwe mpango erikwetwa UY Scuti, yaaza omu mwanya gw’eizooba neerisaangira, esaangira n’ensi etaaha n’omu kizinga kya Jupiter. Buzima eki nikituhwera kwetegyereza eki nabi Yeremia yaagambiire ngu Yehova Ruhanga akahanga eiguru n’ensi, n’obushoboorozi bwe n’amaani ge maingi.

 Amaani ga Ruhanga nigatugasira gata? Abantu nibabaisibwaho ebi Ruhanga yaahangire, nk’eizooba n’ebindi bingi ebiri omu nsi. Kandi Ruhanga naakoresa amaani ge kugasira buri omwe ahariitwe. Mu muringo ki? Omu kyasha ky’okubanza, Ruhanga akaha Yesu amaani g’okukora eby’okutangaaza. Baibuli neegira eti: “Empumi zihumwirwe, ebirema nibigyenda, ababembe bashemeziibwe, ebifa-matu nibihurira, abafiire bazoirwe.” (Matayo 11:5) Kandi shi obunaku obu? Baibuli neeyoreka ngu “abarikugwa enshazi [abaruhire] abaha amaani,” kandi n’abaine amatsiko omuri Yehova nibaija ‘kugarukwamu amaani.’ (Isaaya 40:29, 31) Ruhanga naabaasa kutuha “amaani agarikukirira kimwe” kutubaasisa kwemera okugyezibwa nari oburemeezi. (2 Abakorinso 4:7) Buzima twena nitwenda kuba banywani ba Ruhanga orikutukunda munonga, kandi orikukoresa amaani ge maingi kutuhwera omu buremeezi bwaitu.

“Ai Mukama, emirimo yaawe ka n’ey’emiringo mingi! Ebyo byona okabikoresa obwengye.”​—ZAABURI 104:24.

Twayeyongyera kwega aha bintu ebi Ruhanga yaahangire, obwengye bwe nibweyongyera kututangaaza. Abanyasaayansi nangwa baine eishomo eririkwetwa biomimetics, nari biomimicry ery’okwega aha bihangirwe bya Yehova kwetegyereza entwaza yaabyo kubahwera kuboneza ebi barikushohoza omu makorero. Ebi nibitwariramu ebintu ebyorobi kukora nka ziipu y’emyenda, okuhika ebigumire kukora nk’enyonyi.

Kimwe aha bintu eby’okutangaaza ekirikworeka obwengye bwa Ruhanga n’omubiri gw’omuntu. Nk’eky’okureeberaho teekateeka aha ku omwana arikutandika kubaho omunda. Ekyo nikitandika eihuri ryaheza kutwekwa rikazamu byona ebirikukwata aha buhangwa bw’omwana. Eihuri eryo niritandika kwebaganisamu obutafaari bwingi oburikushushana. Kwonka omu bwire buhikire eihuri eryo niryebaganisamu obutafaari obundi bwingi nk’obw’eshagama, obw’emitsi n’obw’amagufa. Omu bwire bukye omwana naatandika kugira ebicweka ebirikukorera omunda ye nk’omutima, ebihaha n’ebindi. Omu meezi mwenda gonka, eihuri rimwe nirirugamu omwerere oine obutafaari bwingi munonga obutarikubaasa kubarwa. Obwengye nk’obu nibureetera baingi kwikirizana n’eki omuhandiiki wa Baibuli omwe yaagambire ati: “Ninkuhimbisa ahabw’okumpanga omu muringo gw’eihano kandi ogurikutangaaza.”​—Zaaburi 139:14.

Nitugasirwa tuta omu bwengye bwa Ruhanga? Omuhangi waitu naamanya ebirikubaasa kutureetera okushemererwa. Ahakuba n’omunyabwengye kandi naamanya buri kimwe, naatuha obuhabuzi burungi oburi omu Kigambo kye, Baibuli. Nk’eky’okureeberaho, Baibuli neetuhiga eti: ‘Mugumisiririzane, kandi musaasirane.’ (Abakolosai 3:13) Mbwenu obwengye obu nibubaasa kutuhwera? Eego. Abacondooza bashangire ngu okusaasira abandi nikihwera omuntu kubyama gye, kandi nikituubya na puresha y’eshagama. Nikibaasa n’okutuhwera kutagira amaganya n’obundi buremeezi bwingi. Ruhanga nitubaasa kumushushanisa na munywani waitu oine obwengye, orikutufaho kandi otarikurekyera aho kutuha obuhabuzi burungi oburikutugasira. (2 Timoseo 3: 16, 17) Ti waankwenzire kugira omunywani nk’ogwo?

“Mukama akunda eby’oburyo.”​—ZAABURI 37:28.

Obutoosha Ruhanga naakora ebihikire. Baibuli neegira eti: “Nikikabure Ruhanga okukora ebitahikire, ow’Obushoboorozi bwona okukora kubi!” (Yobu 34:10) Naacwa emanja ezihikire, nk’oku omuhandiiki wa Zaaburi yaagambire ahari Yehova ati: “Ahabw’okuba ocwera abantu emanja omu bwinganisa.” (Zaaburi 67:4) Ahakuba Yehova ‘naareeba omutima,’ kandi tihaine orikubaasa kumubeiha arikukoresa oburyarya, ahakuba naamanya ekihikire, kandi acwamu gye. (1 Samueli 16:7) Kandi Ruhanga naareeba obutari buringaaniza n’obushomankuzi oburiho omu nsi, niyo nshonga ahabw’enki naaraganisa ngu juba ‘ababi nibaija kumarwaho omu nsi.’​—Enfumu 2:22.

Kwonka tari mucwi w’emanja omwinazi orikufubira abantu. Naayoreka embabazi ahu kirikwetengyesa. Baibuli neegira ngu Yehova “n’omunyambabazi kandi omusaasizi,” nangwa naasaasira n’abasiisi abarikweteisiza kimwe. Obwo t’oburingaaniza obwabuzima?​—Zaaburi 103:8; 2 Petero 3:9.

Oburingaaniza bwa Ruhanga nibutugasira buta? Entumwa Paulo akagira ati: ‘Ruhanga tashoroora mu bantu, kureka omu mahanga goona orikumutiina, akakora eby’okuhikiirira, ogwo niwe arikusiimwa.’ (Ebyakozirwe 10:34, 35) Oburingaaniza bwe nibutugasira ahakuba Ruhanga tarikushoroora. Twena nitubaasa kumuramya kandi atusiime, atarikwihirira aha ihanga, oruganda, obwegyese, obugaiga, nari obworo bwaitu.

Ahabw’okugira ngu Ruhanga naayenda ngu tumumanye kandi tugasirwe omu buringaaniza bwe, atuhaire omuntu w’omunda. Ebyahandiikirwe nibishoboorora ngu omuntu w’omunda n’ekiragiro ‘ekihandiikirwe omu mitima yaitu,’ ekirikutuhwera ‘kuhamya’ yaaba eki twakora kihikire nari kigwire. (Abarooma 2:15) Eki nikitugasira mu muringo ki? Omuntu waitu w’omunda yaaba atendekirwe gye, naatuhwera kwetantara ebikorwa ebitari by’oburingaaniza. Kandi twakora enshobe, nitubaasa kweteisa tukore n’empindahinduka ezirikwetengyesa. Buzima, okwetegyereza gye ebirikukwata aha buringaaniza  bwa Ruhanga nikituhwera, kandi nikitwiriza haihi nawe!

“Ruhanga aba rukundo.”​—1 YOHAANA 4:8.

Ruhanga naayoreka obwengye, oburingaaniza, n’amaani, kwonka Baibuli terikugira ngu Ruhanga n’amaani, obwengye, nari oburingaaniza. Beitu neegira ngu Ruhanga ni rukundo. Ahabw’enki? Ahakuba nikibaasa kugambwa ngu amaani ga Ruhanga nigamubaasisa kugira eki yaakora, kandi ebi arikukora naabikoresa obwengye n’oburingaaniza. Kwonka Rukundo ya Ruhanga neemuhiga kugira eki yaakora. Ebi arikukora byona naabikora ahabwa rukundo.

N’obu Yehova araabe yaabaire ataine ki akyenire, rukundo ekamuhiga kuhanga ebihangirwe eby’omu iguru n’eby’omu nsi ebiine obwengye, kubaasa kugasirwa omuri rukundo ye n’okufayo kwe. Rukundo ekamuhiga kutebeekanisa ensi omu muringo murungi kugira ngu abantu bagituuremu. Naagumizamu kworeka boona rukundo arikujwisiza omushana ‘ababi n’abarungi, kandi akagwisiza enjura abahikiriire n’abatahikiriire.’​—Matayo 5:45.

Kandi Yehova “aine embabazi nyingi n’okusaasira.” (Yakobo 5:11) Naafayo munonga ahari abo abarikuteeraho kumumanya n’okumwirira haihi. Ruhanga naareeba buri omwe okwe. Kandi ‘naakutaho omutima.’​—1 Petero 5:7.

Rukundo ei Ruhanga atwiniire neetugasira eta? Nikitushemeza kureeba eizooba ririkurenga nari kureeba omwereere naasheka. Kandi nikitushemeza kureeba omwe aha b’omu ka yaitu nari omunyabuzaare naatugirira rukundo. Ebi byona tibiri bikuru munonga kwonka nibitureetera okushemererwa.

Kandi nitugasirwa omuri rukundo ya Ruhanga kurabira omu kushaba. Baibuli neetuhiga eti: “Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime.” Nk’omuzaire oine rukundo, naayenda ngu tumushabe obuhwezi twaba twine ebirikutwerarikiriza. Ahakuba Yehova naatukunda, bwanyima y’okushaba naaturaganisa kutuha, ‘obusingye bwe oburengire okwetegyereza kw’omuntu weena.’​—Abafilipi 4:6, 7.

Twaheza kushwijuma emitwarize ya Ruhanga emikuru nk’obwengye, amaani, oburingaaniza, na rukundo. Eki kiine oku kyakuhwera kwongyera kwetegyereza gye oku Ruhanga arikutwaza? Okwongyera kumanya ebirikukwata ahari Ruhanga, nitukuhiga kwongyera kwega ebi yaakozire n’ebi arikwija kukora kukugasira.