EKY’OKUSHONGOZA ekaraamu eki Jordan yaabaire akwaitse kikaba nikireebeka nk’ekitari ky’omuhendo. Kwonka ni kimwe aha bi yaabaire naakunda munonga. Jordan naagira ati: “Russell, omugurusi munywani w’eka yaitu niwe yaakimpaire obu naabaire nkiri muto.” Russell ku yaafiire, Jordan akamanya ngu Russell akaba ahwereire munonga ishenkuru Jordan n’abazaire be, arikubahuumuriza omu bwire bw’oburemeezi bwingi. Jordan naagira ati: “Hati obu nyeyongyeire kumanya bingi ebirikukwata ahari Russell, akaconco aka aku yaampaire ninkatwara nk’ak’omuhendo munonga okukira ira.”

Nk’oku eky’okureeberaho kya Jordan kirikworeka, abantu abamwe nibabaasa kutareeba ekiconco nk’eky’omuhendo. Kwonka kyaheebwa omuntu orikusiima, nikiba kiri eky’omuhendo munonga ahariwe. Baibuli neegamba aha kiconco eky’omuhendo munonga eti: “Oku nikwo Ruhanga yaakunzire atyo ensi, akahayo Omwana we omwe nyamunegyere, ngu omuntu weena orikumwikiriza arekye kuhwerekyerera, kureka atungye amagara agatahwaho.”—Yohaana 3:16.

Ekiconco ekirikubaasisa omuntu kutunga amagara agatahwaho! Mbwenu shi hariho ekiconco ekirikukira ekyo? N’obu bamwe baraabe nibabaasa kuba batarikwetegyereza omugasho gw’ekiconco ekyo, Abakristaayo ab’amazima nibakitwara ‘nk’eky’obuguzi bwingi.’ (Zaaburi 49:8; 1 Petero 1:18, 19) Kwonka shi ahabw’enki Ruhanga yaahaireyo Omwana we nk’ekiconco ahabw’ensi?

Entumwa Paulo naayoreka ahabw’enki yaakikozire arikugira ati: “Nk’oku ekibi kyaizire omu nsi ahabw’okushiisha kw’omuntu omwe, kandi kikarugamu okufa, nikwo n’okufa kwabugire omu bantu boona.” (Abarooma 5:12) Omuntu w’okubanza Adamu, akakora ekibi ahabw’okugomera Ruhanga akigyendereire reero kyamurugiramu okufa. Kuruga ahari Adamu, okufa kukahika aha baijukuru be boona omu nsi.

“Ebihembo by’ekibi n’okufa, kwonka ekiconco kya  Ruhanga n’amagara agatahwaho omuri Kristo Yesu Mukama waitu.” (Abarooma 6:23) Kubaasa kucungura abantu kuruga omu kufa, Ruhanga akoohereza Omwana we, Yesu Kristo, omu nsi kuhayo amagara ge nk’ekitambo ahabw’ensi. Ahabw’ekitambo ekyo, boona abarikwikiririza omuri Yesu nibaija kutunga amagara agatahwaho.—Abarooma 3:24.

Paulo arikugamba aha migisha yoona ei Ruhanga arikuha abarikumuramya kurabira omuri Yesu Kristo, akagira ati: “Ruhanga asiimwe ahabw’ekiconco kye ekitarikubaasa kushoboororwa.” (2 Abakorinso 9:15) Buzima ekitambo n’eky’omuhendo munonga. Mbwenu shi ahabw’enki ekitambo kiri ekiconco ky’omuhendo munonga aha biconco ebindi ebi Ruhanga yaatuhaire? Nikitaana kita aha biconco ebindi ebi Ruhanga atuhaire? * Mbwenu shi tushemereire kukitwara tuta? Nitukuhiga kwetegyereza oku Baibuli erikugarukamu ebibuuzo ebi omu bicweka bibiri ebirikukurataho.